1 ¹ पौलुसेरे तरफां ज़ै परमेशरेरो दास ते यीशु मसीहेरो प्रेरते, परमेशरेरे च़ूनोरे लोकां केरे विशवास, ते तैस सच़्च़ेरे पिशानानेरे मुताबिक ज़ै भेगतारे मुताबिके| ² तैस हमेंशरी ज़िन्दगरे उमीदी पुड़, ज़ैसेरो वेइदो परमेशरे ज़ै झूठ न ज़ोए पेहिलो देंतेरो कीयोरोए| ³ पण ठीक वक्ते पुड़ अपनो वचन तैस प्रचारे सैहीं बांदो केरो, ज़ै इशे मुक्ति देंने बाले परमेशरेरे हुकमेरे मुताबिक मीं सोंफोरोए|

⁴ तीतुसेरे नोंवे ज़ैन विशवासे सैहीं मेरू सच़ू मठ्ठूए: बाजी परमेशर ते इशे मुक्ति देंने बाले प्रभु यीशु मसीहेरे तरफाँ अनुग्रह ते शान्ति भोती राए| ⁵ मीं तू ऐलहेरे लेई करेते मां शारोरो थू, कि तू बाकी रेवरी गल्लन सुधारस, ते मेरे हुकमेरे मुताबिक नगरे नगरे मां बुज़ुरग च़ुनस| ⁶ ज़ैना बेइलज़ाम ते एकी एकी कौन्शरे मुन्श भोंन, ज़ैन केराँ मठ्ठाँ विश्वास केरतां भोंन, ज़ैन पुड़ एशपर्सती ते हुकम न मन्नेरो दोष न भोए| ⁷ किजोकी रखवालो परमेशरेरो भण्ढारी भोने सैहीं बे इलज़ाम लोड़े; न हठी, न सेरकलो, न पीने बालो, न मार पीट केरने बालो, ते न घटिया कुमैइयरो लालच़ी| ⁸ पण महैमानां केरी आदर केरने बालो, भलाई चहने बालो, बरदाश केरने बालो, अदालत केरने बालो, पवित्र ते झ़ैल्लने बालो भोए| ⁹ ते वफादार, वचनेरे मुताबिक बनोरो रह, कि रोड़ी तालीमी सैहीं शिखैली बटे; ते बेंस केरने बालाँ केरू आशी भी बंद केरी बटे|

¹⁰ किजोकी बड़े लोक बे फैइदी बेंस केरने ते धोखो देंने बालेन; ख़ास केरतां तैना ज़ैन केरो खतनो भोवरोए| ¹¹ ऐन केरू आशी बंद केर्रू लोड़े: इना लोक नीच़ कुमैइयरे लेई बे पैइदी गल्लाँ शिखैलतां घरां केरां घरां बिगाड़तन| ¹² तैने मैरां एके मैंन्हें ज़ै तैन केरो नबीए, ज़ोवरूए, कि क्रेती लोक सदा झूठे, दुष्ट जनवर ते आलसी पेटू भोतन| ¹³ ई गुवाही सच़ीए, ऐलहेरे लेई तैन खबरदार केर, कि तैना विशवासे मां पक्के भोन| ¹⁴ ते तैना युहूदी केरी कथा कहैन्न ते तैन मैंन्हू केरे हुकम्मन पुड़ मन न लान, ज़ैना सच़्च़े कैरां भटकतन| ¹⁵ शुद्ध लोकाँ केरे लेई सब चीज़ाँ शुद्धन, पण गंदे, ते विशवास न केरने बालाँ केरे लेई किछ भी शुद्ध नैइं: बल्कि तैन केरी अक्ल ते ज़मीर दुइये गंदेन| ¹⁶ तैना ज़ोतन, कि अस परमेशरे ज़ानतम: पण अपने कम्मन सैहीं तैसेरो इनकार केरतन, किजोकी तैना भिटे, ते हुकम न मन्ने बालेन: ते कोंची रोड़े कमेरे लायिक नैइं|