2 इशे बाजे परमेशर ते प्रभु यीशु मसीह कैरां तुस्न अनुग्रह ते शान्ति मल्लती राहे| 3 इशे प्रभु यीशु मसीहेरे परमेशर, ते बाजी केरू शुक्र भोए, कि तैनी असन मसीह मां स्वर्गएरे ठैरी सैभी किसमेरी बरकत दिती| 4 ज़ैंच़रे तैने अस संसार बनानेरे पेहिली तैस मां च़ुने, कि अस तैस कां प्रेमे मां पवित्र ते बेइलज़ाम भोम| 5 ते एपनी मेरज़ी सैहीं अपने लेई पेहिले ठैराए, कि यीशु मसीहेरे ज़िरीये अस तैसेरां लेपालक मठ्ठां भोम| 6 कि तैसेरे अनुग्रहेरे महिमारी स्तूति भोए, ज़ै तैने असन तैस ट्लारे मां मुफ्त दितो| 7 असन तैसेरे खूने सैहीं छुटकारो, मतलब पापां केरी माफी, तैस अनुग्रहेरे धनेरे मुताबिक मल्लोरीए| 8 ज़ैन तैनी सारे ज्ञान ते समझ़ सैहीं साथी असन पुड़ अढंगू किव| 9 कि तैने अपनी मेरज़रो भैद तैस दौलतरे मुताबिक असन ज़ोंव; ज़ै तैने अपने आपे थापोरो थू| 10 कि वक़त पूरो भोनेरो इनतज़ाम भोए, कि ज़ैन किछ स्वर्गए मां भोए, ते ज़ैन किछ ज़मीनी पुड़ भोए, सब किछ मसीह मां अकोठू केरे|
11 तैसे मां ज़ैस मां अस भी तैसेरे मेरज़ी सैहीं ज़ै एपनी मर्ज़ी सैहीं अपने मतेरे मुताबिक सब किछ केरते थी, पेहिले ठैरेइतां मीरास बने| 12 कि अस ज़ैनेइं पेहिले मसीह पुड़ उमीद रखोरी थी, तैसेरी महिमारे स्तुतारी वजाह भोम| 13 ते तैसे मां तुसन पुड़ भी ज़ैखन तुसेइं सच़्च़ेरो वचन शुनो, ज़ै तुशे मुक्ततरे सुसमाचारे, ते ज़ैस पुड़ तुसेइं विशवास केरो, वेइदो केरे पवित्र आत्मारी छाप लगी| 14 तै तैसेरे घिनोरां केरे छुटकारेरे लेई इशे जैदादारो बयानोए, कि तैसेरे महिमारी स्तुति भोए| 15 ऐलहेरे लेई, आंव भी तैस विशवासेरी रोड़ी खबर शुनेइतां ज़ै तुस्न लोकन मां प्रभु यीशु पुड़ ए, ते सब पवित्र लोकन पुड़ बांदोए| 16 तुशे लेई शुक्र केरनू न शैरी, ते एपनी प्रथना मां तुस्न याद केरताइं| 17 कि इषो प्रभु यीशु मसीहेरो परमेशर ज़ै महिमारो बाजीए, तुस्न एपनी पिशानी मां, ज्ञान ते प्रकाशेरी आत्मा दे| 18 ते तुशे मनेरी एछछ़ी खुलन कि तुस बुझ़थ कि तैसेरे कुजाने सैहीं केरी उमीद भोतीए, ते पवित्र लोकन मां तैसेरे मीरासरे महीमारू केरू धने| 19 ते तैसेरी सामर्थ इशे पासे ज़ैना विशवास केरतम, केतरी महाने, तैसे शेकतरो असर तैसेरे कम्मां केरे मुताबिक| 20 ज़ैना तैने मसीहेरे बारे मां कइयाँ कि तैस फटरन मैरां ज़ींते केरतां स्वर्गए मां अपने देहिने पासे| 21 हर किसमेरी हकौमत, ते आधिकार, ते सामर्थ, ते प्रभुतारी, ते हर नोंवें पुड़, ज़ैन न सिर्फ इस जहानी मां, पण एजने बाले जहानी मां भी नेव गहलू, बिशालो| 22 ते सब किछ तैसेरे पवन हैठ केरू: तैनी सैभी चीज़न पुड़ आधिकार बनेइतां कलीसिया दितो| 23 ई तैसेरो जिसमे, ते तैसेरी भरपूरी, ज़ै सैभन मां सब किछ पूरू केरतीए|