¹ Ama ruvoh adhar kami na Yesoh emah ruvah avereh arana anre iku coyhi un Galili a ruvah amarasa muh Yahudiya un suku rapkwu umana ku urdun. ² Rifi'ih reh yhar rin dhorkhorho yhi anre iku war'ahzeh yhon ate'eh mi. ³ Anre a fasisiyawa ku ruvah nang yhi asa an gweke yhi, ankura woh uyhi, "kurip uwoh piyhar izhop piyhowo uyhi awarka rong a nang?" ⁴ Yesoh imane awoh, "inku raotao teze inyara, awoh arizoni piyami en napsa yaon, imah napsa yaon pirumi nang piyhowo" ⁵ Anre iku gura awoh, "awar ka ni pirumi enka jao putu nang muna uyhi a kwapkwuruwoh nang piyhawoni ayaon uvah an wano ikusu irao. ⁶ An ka zaku phi taka reh ayhar avah, phiyhar urao. Awarken kikusu na Kasiri ka mane nasang piyhar isu wattane kin. ⁷ Anre a farisiyawa kuwoh uyhi, "yemmi eh rene Musa iwoh uwuri titaku rho avah u zaovu, a zaovao yhi?" ⁸ Anre Yesoh iku woh uyaon, "awarku rhok una suwuh na yhin kuma rene Musa irume inhi asa inku ku viskize ayhowo ahyin, arizoni amazaku reh ken. ⁹ Ma woh uyhin, phiyami eh zaovao phiyhowo uyhi, an zaku reh iku naomao nang phirong urumi, aka yhira phiron uyhowo, moh wana iku naomoa nang phirong uyhowo. Phirumi umih eh yhira uzaovaoru ku piyhowo moh waana iku naomao nang piyhowo umi uzakure uyhi." ¹⁰ Agwekseni anwoh u Yesoh, "in nang ken nang muri uphi rumi nang piyhowo uyhi, ku zaku rivah u rise irunga," ¹¹ Anre Yesoh iku woh uyaon, "azang ayhar nasang aka sere umisenu uruh, ayha nang ama rume yaon u sere ani. ¹² Arih ayha aku pokoro yaon rituwa un rehyenu yaon arih aya aku pokoro yaon rituwa amih na are ayhar avandare yaon ken. Arih ayha aku pokoro yaon rituwa amih are ayaon avandare atih ayaon ken awar kati womo tih zoh. Phiya enka suska usere u misenu uruh, isere uni. ¹³ Amah yende Yesoh a nonoh na nyhiza asa i tasaza na cara unang, agwekseneni anra gwaorkaoze yaon. ¹⁴ Anre Yesoh iku woh, "sai nonoh na nyhiza nang ruva nan mini, sunu unuku nang, tiwomo titzoh tih reh ti nang." ¹⁵ Anre iku tasaza na cara na yhi uyaon anre iku coyhi atek kami. ¹⁶ Anre piyhar urhao iku ruvah nan Yesoh awoh "Pimiseni, yemmi na mang rene asa unka zuwa uvao ku zah nang rarah?" ¹⁷ Yesoh iwoh uyhi, Awar ki yhen napisin ana nang ikusu kirip? Piyhar urhao irip, in piti suni uvao, phi daorkaorao udoka." ¹⁸ Piyhar umih iwoh, "uriki udoka?" Yesoh iwoh, "su wuna, su naomao iphiyhowo upirong, su tuksu, su rhao ushaida icotti. ¹⁹ Rhao tiwih nang naw atih cirvuh, asao janu uzaontaokao ne ritih ripu." ²⁰ Mazhaorao mami mang woh uyhi, "umma daorkaorao an kusu mun nasan amatini, Yemmi eh takam?" ²¹ Yesoh iwoh uyhi, "in na phi suni phi wan phiya kori jaravu, aka zizi ankusu mumi na phi rimun, aruske ayhu wam, penka zuwa tikarma izoh, anu ruvaa a daorkaoraom." ²² Kadhaor kami na mazhaorhao mami mah pokoro ikusu kimi na Yesoh eh vereh, man jaramang kasuwuh kansi paovao man, awar kuwoh mareh pikarma ugwaki ²³ Yesoh iwoh ana gwekseneni ayhi, rivin nang insin misini, "kuwaon ken nan phiya ireh pikarma enka nighe atiwomo ti zoh. ²⁴ Insin gura misini, onka zaku waonuwao u rakumi u nighe arivaorao rilulura, nang kuwoh phiya ireh pikarma inighe ati womoh teh Siri ²⁵ Agwekseneni amara sesezi ana mina, adi nang a pokoro ken, anre an kuwoh, "In na muriken wami enka zuwa uwaska?" ²⁶ "Nang ayhar munka wanamun ken, nang Kasiri ko kiriki kusu kenka wana ken." Ken nang Yesoh imah tirkiri yaon avereh ²⁷ Anre Bituru iku woh u Yesoh, "rehye, yemmi nang tenka zuwa? Timah jhao ankusum nasang adhaorkhaorhaovu. ²⁸ Yesoh iwoh uhyaon, "insin misini rivin, urong kusana konoh kapiyhar kang ka zomo a riraku daukaka ayhini ayha en dhoarkhaorham enka zomo anarira arikiri ati vah ara temene ti vervene rikiri ativah ti Isra'ila. ²⁹ Phiya en jhao kuyhi, nang putu a muna nang akommina ayhi arumi nang ayhaoni, nang nonoh nayhi awarkari zayhi ri nang enka sere akiri rikiri agura zuwa gau uvao karen. ³⁰ Ayha zoni anka wana ayha awuri, ayha awuri anka wana ayha zoni