¹ Bulus, ngaru Ndeyi ke a deino kusa Yeso Kiristi, ki be'i ona jirek biyai tamangko ma Ndeyi ke be'i manta jire ki yardak mure manta Ndeyi. ² Mayei a tong zoha tili ka zau so an wuye bu so Ndeyi, so an rerei hawoto bu, so iko eninto tingki kabui sommodaku nditu. ³ A jajuni deidei, angko enini ki dingdos ono ne ani. Ne ina woi ki be'i eni Ndeyi a wanga muni. ⁴ Ki Titus, lai an jire tong ona jiremmu. Tili modi, jig-yayi ki deinok lahiyak gem Ndeyi ki Kiristi Yeso a wangumu. ⁵ Ne wusno ko Karita kika woiye e ko dimte arei ei ngamno bu ke ko bobode koknaku tong lei gyabinis siya kit yon angko. ⁶ Ngafko kokna deyi wara 'yak huli, mizi mandu modi, ki milla ana hankali ma anan 'yak huli so tili bolo domana ana gesyos disa bu. ⁷ Ngafko a deita ban donshu, a deinonni so a deita ban Ndeyi, a deyi wara 'yak huli. A deyi a shei ki eni ki mure habri bu, do a seshi, do a jugta be'i, do a zima. ⁸ Aka ka ai, a deyi a biska ngerhahi, zafti bungak ei zina. Ngafko deyi a hangkali, ngoi zina, ngamnok eni Ndeyi, ke ngafkok kanni. ⁹ A deyi a ngaha shutantui 'yangkok gedo, a on gedok ma'atok shutantui zina a ramte ana dasak sik ei suba. ¹⁰ Kika an ana jokoro shei, kit 'yak ana bato. Eninsu yo sarei. A youtu ke bo'itantantik algi. ¹¹ Ngafkom ngesu ti. A shutanta ei suba shutante bu kika ribak kawa ke a rugzantik bano shafto. ¹² Modik hawosu, a wayoi hawosu, ta, "Kiraku manakshi ana rerei, biyai ka shekensu bo'ino ke jo lui riya ana washi, zinasu be'i tina wo'oto zima." ¹³ Eni woi jire, isu ramtuk gedo nzuni eri zina tong ona jire. ¹⁴ Ko mate kelungko ka susuna Yahudaku domana uhe algi yo sabyangkok jire. ¹⁵ Ki mayei bu'unoi, lei miya bu'uno. Me mayei ana mure bu'ushi ki ana mure ona jire, lei miya bu'uno bu. Kika tilinsu ki asumsu shaf daftito. ¹⁶ Nzuni anshe ta manangkotik Ndeyi, nzuni me a shanta sik be'i rutansu. Deyansu 'yak bunzi ki ana mure sunta ka. Biya gita ona gedo kasu ka rutai zina bu.