¹ Yahuza, ngaru Yeso Kiristi yagena Yakubu, godi gem mayei wundangko nzuni, ana zomu mu tong Ndeyi, ngahangkok kasuk ka Yeso Kiristi: ² Eri jig-yayi ki deinok lahiya ki ndaltu sauwe bottom. ³ Ana zomu mu, don atko udonnon tureku ka wangu, ne damtinnon turekun elleku kumo ngu ngar tilingku ka ona jire so onangkok biyai onangkok jire. ⁴ Gyamaro an biyai ma'ato rinsu hototku. Mamayei zansu gyenga tingki tono. Biyai maye a wanglantantik ruta Ndeyi yo zina inni disa, biyai a ku'ushe Bomu Abano, Yeso Kiristi. ⁵ Kauson ndalon dibkudi-shafki ka'a dei ngu manangkoti-ta Abano walta biyak elik Masar, ki bei wom me ndino dudgitik mayei onangko jire bui'e. ⁶ Malekakui erangko ka rutansu bu, me wundangko be'i deinos onansui-Ndeyi ngarinsuk yakla tong tutudu, kaba hoti sheryas isno. ⁸ Shafki ka'a tong shida bille wom, ana suna mayei a yabtanta zugonsu bu. A damtak ana mene bu, a akna ei disa kasu. ⁹ Me lei Maleka Mikailu, do zugonto shanak singkau ka gubu Misa, akneni eniy nakshi ka sherya. Kika woi angko ta, "Ndeyi hod barkatko!" ¹⁰ Biyai maye me a huhuli ka ei manangko bu. Ei manangkoti me a ishe 'ya kit ei riya wara dibna-ei mayei dudgya nzuniy si. ¹¹ Titikutku, kika ngu dafshe sheke Kayinu, ngu ngahangko Ba'alam Billei disa kika riba. Shafsu maftansu tong Kuraha be'i rikshi. ¹³ Digmaku ham ana takur, a ho'oshe kumfak hawosu. Nzuni jenjaku ana gesyo, zansutik tutudu so an ernoto bu. ¹⁵ Si isno gonni sheryak leilo. Si isno ina sherya ka ana rutanta disa, ki shida disa gorok eniy biya aknangko kanni." ¹⁶ Mamayei ana ngurari, ana ngeldi, ana daha bille singkau. Nzuniy ana akna eniy disa, ma, gyaza ribak kasu a bashe dilok algi. ¹⁷ Nguni me, ana zomu mu, diba eniy anangkok majiraku Bomu abano Yeso Kiristi. ¹⁸ Anangku ta, "A tata ka dunya an ana zuzugra algi ana daha ei tilinsu ndalo." ¹⁹ Mamayei ana titika ka algi. biyai dunya, anan Kelui bu'uno bu. ²⁰ Nguni me, ana zomu mu, ngara gedotku tong ona jires bu'uno, 'ya donshu tong Kelui bu'uno. ²¹ Deya tong ndaltu Ndeyi, gesa jig-yayik Bomu abano Yeso Kiristi yo mokingku zau so an bonto bu. ²² Kola jig-yayik ana mure gedo. ²³ Walta ma'ato ki be'i gora nzunik tong yesi. Kola jig-yayik ma'atoi ki zuba. Kukdatik lei subai yabteni. ²⁴ Kausoi ki woi yo ngeku ngete, yo zofko nguning eri domni, wara 'yak eni ki kuyu shei, ²⁵ Ki Ndeyimmu modabi a wangumu ki Yeso Kiristi Bomu abano darja, ki nama ka, ki mene, ki gedo, tingki onzi, kauso, godi dom. Amina.