8 ¹ Kem ndɔ gǝ n noo tǝ ɓaa kosǝ dee gǝ i ngãy rɔ dǝ tǝ ɓay, bǝ ǝsan yãã lee. Taa Jeju ɓar nge ndoo gǝ bǝ ǝdǝ dǝ nɛ: ² Kum õõm kǝ dee gǝ n ndoo ngãy tam njǝyan sesi dǝ ndɔ dǝ i mǝtǝ ɓoolaa bǝ ǝsan yãã lee an ndoo ɓaa ɓoo asǝ dǝ nakǝ. ³ N ndoo ɗe m-ǝyã dǝ m-adǝ aan kari ɓaalaa ɓoo a tɔl dǝ ɗobo. Tam nge kǝ nɛy gǝ ĩĩn i sãy ngãy n ɗeen nǝ. ⁴ Nge ndoo gǝ tur ǝdan nɛ: J-a j-ǝngǝ mapa i ɗa dǝlǝlo tǝ laa kadǝ asǝ kosǝ dee gǝ kǝ ngãy gǝ n asǝn naa bee too ǝsan asǝ dǝ nǝ. ⁵ Ne deje dǝ nɛ: Mapa yaji i kondong? Nɛn ǝdǝnǝn nɛ mapa i siri. ⁶ Ne ǝdǝ kos dee gǝ kadǝ ndin nang tǝ. Ne taa mapa kǝ siri nǝ, ndɔy dɔ tǝ, bǝ gang naa tǝ, adǝ nge ndoo gǝ kadǝ adǝn kosǝ dee gǝ.̄ ⁷ Ne taa ngan kanjǝ kǝ jidǝ, ndɔy dɔ tǝ, bǝ adǝ nge ndoo gǝ kadǝ nobon kosǝ dee gǝ . ⁸ Nɛn ǝsan ndanǝn. Nɛn kanǝn g ǝ gããn ɗosǝ kee siri. ⁹ Dee gǝ n ǝsan yãã malang nǝ nɛn i dubu sɔ. Bǝ Jeju ǝyã dǝ adǝ aan lo yadǝ. ¹⁰ Tamǝn tam too lee ɓaa nee al kem too kǝ nge ndoo yan gee, aan dǝ nang kǝ Dalmanuta tǝ. ¹¹ Sẽy bee ngoy ɓaalaa, Parij gǝ teen kǝ ɗobo bǝ ǝlan gir nejǝn tam. Nɛn dejenǝn yãã kǝ kɔr kum kogii kĩ̄ĩ dǝrã tǝ ya tɔsǝn gatǝn. ¹² Jeju tɛtǝ koo pĩĩ kem ndilǝn tǝ bǝ ǝdǝ nɛ: Gir kaa n ndoo saa yãã kǝ kɔr kum kogii i tam ɗi ɛɛ? Adǝ m-ǝdǝ si najǝ kǝ rokǝm: Yãã kǝ kɔr kum kogii kǝ yǝ ɗa kadǝ gir kaa n ndoo goto i ɗɛrǝ. ¹³ Go tǝ ɓaalaa ǝyã dǝ, bǝ ĩĩ ɔtǝ alǝ kem too, tee kǝ gidǝ kǝ nuu tǝ. ¹⁴ Dǝ nge ndoo gǝ oy nalǝ kɔy mapa gǝ ji dǝ tǝ. Adǝ i mapa kogi ngoy jidǝ tǝ kem too. ¹⁵ Ne taa dǝ ɔjǝ dǝ yãã ndoo kǝ mbay gǝ, ǝdǝ nɛ: I-ngɔmi rɔ ho, adi kum si gol si lee ho, ɔjǝn dǝ kaa kasǝ yǝ Parij gǝ ho, yǝ Herod ho. ¹⁶ Nge ndoo gǝ yurǝn dǝdan tǝ nɛ: Najǝ n ndoo i tam dɔji n oynal kɔy mapa nǝ n hã a tam tam too. ¹⁷ Jeju ger gir yadǝ bǝ ǝdǝ dǝ nɛ: I-yuri ǝdai nɛ i tam dɔsi n oynal kɔy mapa nǝ n m-ɔrǝn najǝ n ndoo i tam ɗi tɛɛ? I-geri kum yãã gǝ lee ɓay a? I-geri lee a? Adǝ n ndoo kem si ngãã i mbee ɓay a? ¹⁸ Kum si tootǝ ho, bǝ ããi loo lee a? Mbi si tootǝ ho, bǝ ooi tam lee a? Igǝ ur si dǝ yãã kogii tǝ lee a? ¹⁹ Lon mapa i mii, ba gang naa tǝ m-adǝ dee gǝ dubu mii nǝ, i-kan gajǝ gããn i kee kondong? Nɛn ǝdan nɛ: I kee kutǝ gidi joo. ²⁰ Bǝ lo n m-gang mapa siri m-adǝ dee gǝ dubu sɔɔ nǝ ɔyi gajǝ gããn i kee kondong? Nɛn ǝdan nɛ; I kee siri. ²¹ Adǝ n ndoo ɓaa i-geri kum lee ɓay a? ²² Nɛn ɗee ɔtǝn Betsaida tǝ ɓaa, dee kǝ kem ɓee gǝ ɗeen dǝngam kǝ mbiki kogii rɔn tǝ, bǝ ɗaan ɓɔɔ kadǝ ǝndǝ jin dɔ̀n tǝ. ²³ Jeju ǝwǝ taji mbiki nǝ, ndɔrǝn tee senɛɛ gid ɓee tǝ kǝ ndaa. Ne tibǝ hor kumn tǝ ho, ǝndǝ jin dɔn tǝ ho, bǝ dejen nɛ: ãã loo a? ²⁴ Ne ǝnǝ kumǝn kǝ dɔɔ bǝ ǝdǝ nɛ: M-ãã dee gǝ ton titǝ kag gǝ n a njǝyan nǝ. ²⁵ Jeju tel ǝndǝ jin kumǝn tǝ, bǝ un ɓaa dee nǝ tẽẽ kumǝn ɓaa ãã loo unjǝ, adǝ nee ãã yãã malang unjǝ ɗay ɗay. ²⁶ Jeju ǝyan adǝ tel aa ɓee bǝ ǝdan nɛ: Udǝ kem ɓee lee. ²⁷ Jeju tee kǝ nge ndoo yan gee aan kem ɓee gǝ kǝ Sejare kǝ go nang ya Pilip tǝ. Lo n nɛn ɓaa Jeju deje dǝ nɛ: Dee gǝ ǝdan nɛ ma i naa ɛɛ? ²⁸ Nɛn ǝdanǝn nǝ: I i Jã Batisǝ. Kogii gǝ ǝdan nǝ: I i Eli. Nge kǝrang gǝ ǝdan nɛ; I i nge kɔjǝ ndu Nǝbǝ. ²⁹ Bǝ i sei ko kǝ dɔsi nǝ, ǝdai nǝ ma i naa ɛɛ? Pǝyer tur ǝdan nǝ: I i Kris. ³⁰ Jeju taa dǝ kadǝ ǝdan dee najǝ yan lee. ³¹ Bǝ neko ǝlǝ gir ndoo dǝ kadǝ Ngon Dee a kõny kem yãã gǝ tǝ, adǝ kum kɔɔ gǝ ho, ngar ya nge gugǝ dɔ gǝ ho, nge sǝyã maktub gǝ ho, a mbatǝn ho, a tɔlǝnǝn ho, bǝ ɗe ndɔ mǝta ɓaalaa a ĩĩ day. ³² E ǝdǝ najǝ nǝ adǝ unjǝ ɗɛr. Ɓa Pǝyer ndɔr jin ɔtǝ senɛɛ kǝ kogǝ dǝ, bǝ ǝlǝ gir gakǝn. ³³ Jeju tur rɔn ãã nge ndoo yãã yan gǝ. Bǝ ǝlǝ gir gakǝ Pǝyer ǝdǝ nɛ:Tel gom tǝ kɔkǝ Satã. Õõi tɔdɔ yãã yǝ Nǝbǝ lee, bǝ i yǝ dee gǝ taa. ³⁴ Bǝ ne ɔsǝ dǝ nge ndoo yan gǝ ho, kosǝ dee gǝ ho naa t, bǝ ǝdǝ dǝ nǝ: Ɗe dee kogii gee kun ɓaalaa, adǝ kǝwǝ nǝ mbatǝ rɔn nee ko ho, un kag desǝ yan ho taa un gɔm. ǝǝǝǝǝ ³⁵ Tam dee n gee kajǝ rɔn ɓaa tan a tĩ̄ĩ, bǝ dee n tĩĩ tǝ rɔn tam yam tǝ ho, tam Najǝ kǝ Majǝ tǝ ho, ɓaalaa a ajǝ, ³⁶ Lo n dee ǝngǝ yãã malang kǝ dunia tǝ, bǝ ɗe ndil kajǝ yan ta tĩĩ kɔkǝ nǝ, yãã kǝ soo dee tǝ i ɗi. ³⁷ Yãã kǝ dee a ad kadǝ mbelǝn gir rɔn i ɗi ɛɛ? ³⁸ De rɔ dee sɔlǝn tam yam tǝ ho, tam najǝ yam tǝ ho dan gir ka ray tǝ ho, kǝ ɗaa majal n ndoo tǝ ho, ɓaalaa rɔ Ngon Dee a sɔlǝn, dan n a ɗee dan kɔrta ya Bɔbǝn tǝ dan kosǝ anjǝ yan kǝ tal gǝ tǝ nǝ.