13 ¹ Dan n Jeju tee gir kuju (temple) kǝ ndaa ɓaalaa nge ndoo yãã yan kogii ndɔtǝ kǝ rɔn tǝ idan nɛ: Kǝwǝ ɓe ãã mbal kǝ majǝ ngãy gǝ n ndoo ho, kujǝ gǝ n ndoo ho a? Bǝ Jeju tel idan nɛ: ² Ãã kujǝ kǝ bo ngãy gǝ n ndoo a? Mbal kogi kǝ a nditǝ dǝ madǝn tǝ laa a gotoo, a mbere tǝnan dǝ kɔɔkǝ malang. ³ Lo n Jeju tee a nditǝ dǝ mbal wãrang gǝ tǝ ɓaa Pǝyer ho, Jak ho, Jãã ho, Ãndre ho, ɗeen rɔn tǝ jǝkɛɛ, bǝ dejenǝn nɛ: ⁴ Ǝdǝ ji yãã gǝ n ndoo a ɗeen i ɗingãy tǝ ho, yãã n a ɗaa yãã ɓaa a ɔjǝ kadǝ yãã gǝ nǝ a ɗeen ngɔr ho nǝ i ɗi gǝ ɛɛ? ⁵ Jeju ǝlǝ gir kǝdǝ dǝ: I-ndii dǝ rɔsi tǝ, bǝ kadǝ dee gol si lee. ⁶ Dee gǝ ngãy a ɗeen kǝ rim, bǝ ǝdan nɛ: Ma i Kris. Adǝ a tĩĩn tǝ dee gǝ ngãy. ǝǝǝǝǝǝ ⁷ Ɗe a ooi najǝ ɗɔ gǝ ho, kãã ɗɔ gǝ ho ɓaalaa i-soli lee. Tam yãã gǝ n ndoo a ɗaan yãã gar, bǝ i tǝ tɔl ta lee ɓay. ⁸ Gir ɓe kogi a mbatǝ madǝn ho, kõɓe kogi a mbatǝ madǝn ho, dǝ nang a ndebe kǝ loo gǝ tǝ ho, ɓoo a ɗaa dee gǝ ho. Bǝ i tǝ kǝlǝ gir kõny yǝ kojǝ. ⁹ I-ndii dǝ rɔsi tǝ, A ǝlan si ji nge kõɓe gǝ tǝ ho, a tǝndan si kem Sinagog gǝ tǝ ho. A aan sesi no nge kõɓe gǝ tǝ ho, nõ mbang gǝ tǝ ho, tam rim tǝ, bǝ nee n ndoo i kǝ kum tǝ yadǝ. ¹⁰ Bǝ mber Najǝ kǝ Majǝ n ndoo a i ǝnan kǝ kem ɓee gǝ tǝ malang kǝ taa paa taa. ¹¹ Ɗe ǝwan si, bǝ aan sesi ǝlan si jidǝ tǝ ɓaa, i-soli dǝ najǝ n a ɔri tǝ naa lee. Tam kum mbang koo n nõõ tǝ bang ɓaa a ingai najǝ kǝ kadǝ a ɔri, tam i Ndil kǝ Talǝn a indǝ najǝ tasi tǝ nǝ. ¹² Ngokõ naa gǝ a unǝn dǝ naa kadǝ tɔlǝn dǝ ho, bɔbǝ ngon a un dǝ ngonn ho. Ngan gǝ a mbatǝn tǝ nge kojǝ dǝ gǝ ho, a sǝlan gir dǝ kadǝ dee gǝ tɔlǝn dǝ ho. ¹³ Dee gǝ malang a mbatǝn si tam rim tǝ. Bǝ dee n ǝwǝ ngãã batǝ tǝ tɔl ta tǝ ɓaalaa a ajǝ. ¹⁴ Dan n sei ããi yãã kǝ yãã kǝ yẽr nditǝ lo n sɔɔ kadǝ nee nditǝ kɛɛ tǝ lee ɓaa, (adǝ dee n tǝdǝ najǝ n ndoo nǝ ger kum), adǝ dee gǝ n ndin Judee tǝ nǝ ããyǝn naa kǝ mbõõ mbal gǝ tǝ, ¹⁵ adǝ dee n nditǝ dǝ kuju nǝ ɗisǝ unǝ yãã lee ho, ¹⁶ dee n i ndɔrɔ nǝ tel ɗee ɓee unǝ kub yan lee ho, ¹⁷ Bǝ dǝyã gǝ n ndanǝn ngan ho, nge gǝ n ngan ilǝn mba dǝ kem ndɔ gǝ n ndoo tǝ nǝ, urkɔl i yadǝ. ¹⁸ I-ndɔyi ngãy taa kadǝ yãã gǝ ndoo i naa kul tǝ lee. ¹⁹ Tam i urkɔl kǝ boo ngãy. Urkɔl kǝ titǝn gotoo, lo koo n Nǝbǝ ubǝ n dunia mbong ɓoolaa ndoo ho, urkɔl kǝ titǝn a gotoo gogǝ ho. ²⁰ Ɗe Nǝbǝ gang tǝ ndɔ nǝ adǝ gindǝ dɛpǝ lee ɓaa, dee kǝ a ajǝ a gotoo, bǝ tam yǝ nge gǝ gǝran dǝ tǝ nǝ, Nǝbǝ gang tǝ ndɔ gǝ nǝ. ²¹ I bee nǝ ɗe dee ǝdǝ si nɛ: Ããi Kris n ndoo, lee ɓaa Ããi nee i laa. Ɓaa i taai kemǝn lee. ²² Tam Kris kǝ mbay gǝ ho, nge kɔjǝ ndu kǝ mbay gǝ ho, a teen ngãy ho, a ɗaan yãã kǝ kɔr kǝ kum gǝ ho, mboli gǝ ho, yǝ golǝn dee gǝ, kee i nge kǝ gǝrǝ gǝgee. ²³ I-ndii dǝ rɔsi tǝ. Tam m-ǝdǝ si yãã gǝ n ndoo kete kɔɔkǝ. ²⁴ Go urkɔl kǝ kem ndɔ gǝ n ndoo tǝ nǝ, mbang a ndul ho, naa a ndaa lee ho, ²⁵ kurmẽy gǝ kǝ dǝrã tǝ a toson ho, tɔg gǝ kǝ dǝrã tǝ a yeyǝn ho. ²⁶ Taa laa nɛn a ããn Ngon Dee a ɗee dan kil man tǝ, kǝ tɔg kǝ to ɓol ngãy ho, dan kɔr ta tǝ ho. ²⁷ Taa laa, nee a ilǝ anjǝ (ngekǝlǝ) gǝ yan kadǝ kanǝ nge kǝ gǝrǝ gǝ kǝ nel kǝ dam sɔɔ ǝlǝ gir ta ngoy dǝnang kǝ kogii tǝ, batǝ tǝngoy dǝrãã kǝ kogii tǝ. ²⁸ I-ndooi najǝ yǝ kotǝ. Lo n tǝjin gǝ ǝlǝ gir kitǝ, ɓaalaa i-geri kadǝ ɓar i ngɔr. ²⁹ I tǝ n ndoo ho, lo n ããn yãã gǝ n ndoo ugǝn ɓaalaa i-geri kadǝ nee i ngɔr tǝ ɗobǝ tǝ. ³⁰ M-ǝdǝ si kǝ rokǝm tǝ, girka n ndoo a man lee, batǝ y kadǝ gǝ n ndoo ɗee udǝ giri. ³¹ Dǝrãã ho, dǝnang ho, bǝ najǝ yam a man lee batǝ. ³² Bǝ kǝ tam ndɔ nǝ tǝ ho, kum mbang nǝ tǝ ho nǝ, dee kogii kǝ ger gotoo, kee i anjǝ gǝ kǝ dǝrãã tǝ gee, Ngon Dee koo gǝgee, bǝ i Bɔbǝ ngoy. ³³ I-ndii kǝ mbẽnjɛɛ. I-ndii dǝ rɔ si tǝ, tam i-gerii kum mbang naa lee. ³⁴ Tootǝ i titǝ dee n aa kǝ mbaa tǝ, ɓaa ɓar ngan nge kǝlǝ yan gǝ, bǝ gang kǝlǝ adǝ dǝ kǝ dɔdǝ gee nǝ. Nee ǝdǝ nge ngɔm tǝ loo kadǝ nditǝ jǝjããã. ³⁵ Tǝ n ndoo, ɓaa i-ndii jǝjãã. Tam i-geri i kum mbang kǝ raa tǝ n kǝwǝ kujǝ a ɗeen tǝ naa lee, majǝ laa i ndɔɔ, lee ɓaa i dan loy, lee ɓaa i nõõ kǝnjǝ tǝ, lee ɓaa i kǝ ndɔɔi. ³⁶ Kadǝ ɗe tee bugǝru ɓaa ǝnge si dǝ ɓii tǝ lee. ³⁷ Yãã n m-ǝdǝ si too, m-ǝdǝ i dee gǝ malang. I-ndii jǝjãã.