¹ Nyan nɛ̀ ngă taa kum Jonas le njing adǝ wong in sǝ'n puu. ² E ra ndoo ra Njendisǝnon'tɨ ǝdǝ nɛ:̀ ǝi Njendisǝnon ke è a è tà kɨ ndɔ kɨ m' tam loo kɨ ma m'ee'n kɛ̀m ɓee kɨ lǝm ɓai le wa? E nyan kɨ non a m'ndigǝ le á m'ain lǝ kaw'n kɨ Tarsis. Tǝdǝ m'gǝr titɨ kɨ i Nubǝ kɨ njekankumtondoo sǝ njerakɛ̀m kanm a, ong in sǝi law le a, i njekɛ̀majǝnkɨ ɓò a tɔ. Tabai i ndigǝ rai dè majǝ le't nga. ³ Ɗadinè, Njendisǝnon ɔr kǝb lǝm kɔk tǝdǝ k'wǝi'm è soo'tɨ dum ndi kumgajǝr. ⁴ Njendisǝnon tǝl ǝde ǝdǝ nɛ̀: wong kɨ i ra nga ke è loon'tɨ wa? ⁵ Jonas tee kɛ̀m ɓee-ɓò'tɨ, tabai è ndi mbeng loo kubǝ'tɨ lǝ kad. Loon'tɨ nè ɓaa e ra kǝi kanm ndi tutɨ saar kadǝ an'n nyan kɨ a tee ɓee-ɓò kɨ Ninib'tɨ nè nga. ⁶ Nubǝ Njendisǝnon adǝ rɔng ubǝ, ngal kɨ dɔ dè Jonastɨ lǝ kad ndil'n oso denn'tɨ ɓaa lǝ kadǝ wong lǝnn undǝ'n nang. Jonas ra ranǝl ngain tǝdǝ rɔng nè nga. ⁷ Nè bare tà gir loo'tɨ ɓaa, Nubǝ adǝ kur kare ree usǝ ngirǝ rɔng nga adǝ tutɨ karǝm-karǝm. ⁸ Loo kɨ kad tee ɓà, Nubǝ adǝ nǝl kɨ tungǝ in loo kubǝt'ɨ lǝ kadǝ ulǝ a, kadǝ tugǝ dǝ Jonas'tɨ saar adǝ oso nang gudu ruk. E ndigǝ rann yo ǝdǝ nɛ̀: kwei'm è soo't dum ndii'm kum gajǝr. ⁹ Nuɓe ǝdǝ Jonas ǝdǝ nɛ̀: wong kɨ i ra tǝdǝ rɔng nee nga kɨ è lonn'tɨ kuwǝ wa? E tǝl tam ǝdǝ nɛ̀: wong kɨ m'ra nè nga è loon'tɨ kuwǝ saar ndɔ yoom'tɨ. ¹⁰ Tabai Njendisǝnon tam ǝdǝ nɛ̀: i an kumtondoo lǝ rɔng kɨ i rakulǝ'n ɔr yal-yal lea é i a i ra'n adǝ tɔg le a tɔ. ¹¹ A ɓaa ke ma gea mas k'an kumtondoo lǝ ɓee-ɓò kɨ Ninib kɨ doogɨ kɨ ndii tutɨ k'ɔr dǝ al dǝ doogɨ aru dɔg loo aru sǝ kɔrjoo. Ke gǝri dǝ ji kon dǝ le eke gǝri dǝ ji gǝl dǝ le a sǝ nyan kulgɨ kɨ k'ɔr dǝ dum tutɨ a tɔ.