¹ Ta lǝ Njèndisǝnon oso mbi Jonas, ngonn lǝ Amitaï tɨ ǝdǝ nɛ̀: ² In dɔ́ aw ɓee bo kɨ Ninibɨ , ɓee kɨ boi ngain in-in sǝ'n tǝdǝ kɛ̀myɛr lǝ'n aw sár tee ram tɨ. ³ Ɓa Jonas ɔs nang in-in an-in kumǝ'n kɨ Tarsis ǝbǝ ta kum Njèmdisǝnon. E aw tee Japo ɓa ingǝ bato kɨ aw kɨ Tarsis. Ee ugə nar ɓa al kɛmɛ sǝ doo gǝ kɨ rang kɨ awi kɨ Tarsis. Ee ndigɨ k'aw ǝbǝ ta kum Njèndisǝnon tɨ. ⁴ Nɛ̀ Njèndisǝnon adɨ nǝl bo undǝ loo pitring tee ulǝ dǝ ba tɨ sǝ tɔg'n ngain adǝ tɛp lea bato ndui sǝdɨ. ⁵ doo gǝ kɨ ndii kɛ̀m bato tɨ nɛ̀ nga ɓǝl undǝ dɨ natɨ gang dɨ, nan-nan gea non ndang magɨ lǝ'n. dee d'ɔyi nyan kɨ nán-nàn gɨ d'um mannɛ́ lǝ k'adɨ ɔlɛ'n pɛl. Nɛ̀ Jonas ɓa ur lɛbɛtɨ aw gilɨ bato tɨ too nang too ɓi wǝi ɗɛk-ɗɛk. ⁶ Njè kuwǝ gabɨ bato agɨ lɛw kɨ ra Jonas tɨ ǝdǝ'n ǝdǝ nɛ̀: ke bain a i to mbi wa? in dɔ i non i ndang Nubǝ lǝi bain lea à gir dǝjei tɨ ɓa j'a tuji le ⁷ Tabai d'aw ra nan tɨ yó kɨ nɛ̀ d'ǝdɨ nan d'ǝdɨ nɛ̀: i reei adi jè turi jalá dǝ nan tɨ j'ain ke nán adɨ nyan nɛ̀ tee dǝ jei tɨ wa? Dee tur jala ɓa jala ɔsǝ Jonas. ⁸ Ɓa dee d'ǝdǝ'n d'ǝdɨ nɛ̀: ǝdɨ je, ke nan adɨ nyan nɛ̀ undɨ loo pitring tee bè wa? ke ri á è kulǝ rai wa? ke in ra wa? ɓeekon lǝi è ra wa? ke i gir kojɨ kɨ ra tɨ wa? ⁹ Jonas ǝdǝ dɨ ǝdǝ nɛ̀: man nga m'ee hebǝrǝ, man njè ɓǝl Njèndisǝnon Nubǝ kɨ danran kɨ njè kundǝ ba bo kátɨ sǝ dǝ nang. ¹⁰ Doo gǝ nɛ̀ nga ɓǝl undǝ dɨ ndatɨ ngang dɨ ɓa ǝdi Jonas ǝdi nɛ̀: ke i ra nyan nɛ̀ bè tǝdɨ ri wa? Tǝdɨ ei gǝri titɨ kɨ n'ain n'aw ǝbɨ ta kum Njèndisǝnon tɨ tǝdɨ è nɛ kuwǝ a n'ǝdǝ dɨ. ¹¹ Dee d'ǝdǝ Jonas d'ǝdǝ nɛ̀: ke ri á j'a ra sǝi lǝ kadɨ mann tǝl t'oso'n ɗɛng-ɗɛng wa? Tǝdɨ nǝl adɨ mann ba tal sǝ tɔgǝ'n bungsɨ-bungsɨ kumǝ'n kɨ kete-kete. ¹² Jonas ilǝ dɨ dǝtɨ ǝdǝ nɛ̀: unni man ilǝi man baa ɓa bà a tǝl t'oso ɗɛng-ɗɛng, tǝdǝ m'gǝr kadɨ e man á m'adɨ nyan nɛ̀ nga ǝndǝ loo pitring tee dǝsi tɨ. ¹³ Doo gǝ nɛ̀ nga nǝli lǝ k'awi dǝ nang tɨ nɛ̀ asi le tǝdǝ pangǝ'm ba tilǝ kum dǝ kumǝ'n kɨ kete-kete. ¹⁴ Ɓa dee non dee ndang Njèndisǝnon d'ǝdǝ nɛ̀: Ɛi Njèndisǝnon adɨ je tuju tǝdǝ ndi kumgajǝr lǝ doo nɛ̀ nga le, tabai adǝ ta mǝsɨ doo kɨ ra majǝle le bai uwǝ dǝ je le. I Njendisǝnon nga i ra nyan kɨ kɛ̀mi ndigǝ. ¹⁵ Tabai d'unn Jonas d'ilǝ'n mannɛ ɓa dǝ ba tǝl t'oso ɗɛng-ɗɛng. ¹⁶ Doo gǝ nɛ̀ nga ɓǝlii Njendisǝnon ngain ɓa ujǝi nyan k'ujǝ mǝsɨ adi ni, tabai unni ndudǝ adi ni. ¹⁷ Njendisǝnon ulǝ sǝ kanjɨ bo adǝ ur Jonas ɓa Jonas too kɛ̀m kanjɨ tɨ ndɔ́ mutɨ, kada sǝ ndɔ̄.