¹ An, kɛ̀m ndɔgɨ’tɨ nè, dekurloo’tɨ nè nga, njé kɨ Juda kɨ Jerisalem kɨ d’aw səd ɓe ɓər nè nga, ma təl səd ɓaa ² ma m’ɔsɨ nja gir kojɨ doogɨ malangɨ naan’tɨ, ma re sədə loo mba loo’tɨ kɨ Josapatɨ ; loo kɨ nè’tɨ a ma gangɨ ta dədə’tɨ tədə Israel, doogɨ ləm kɨ də sanédə dan gir kojɨ doogɨ’tɨ ā, ɓeekon ləm kɨ de kaina ā tɔ. ³ De tur jala ɓita də kain na doogɨ ləm kɨ d’uwed ɓər. Dun ngonn kɨ du də mbəl’n dinyan kɨ njèrakaya. Ngann kɨ mandgə ɓa digue sədə tan yibɨ d’ai. ⁴ Sei kɨ Tyr kɨ Sidon ā, kos doogɨ lə ngann ɓekongə lə Phillistɨ ke ri ā ndigui ram’tɨ wa ? Ke sei ndigui d’al ban ke ra səm ta wa ? Kalangɨ nè kuwə, ma madə nyan rasigə ā ɔde kumsi. ⁵ Sei ɔi nar nda kɨ lɔr ləm kɨ ɓogɨ. Sei ɔi nyangɨ ləm kɨ majɨ malangɨ awi kɛ̀m kei magɨ’tɨ ləsi ā, ⁶ Sei higui se doogɨ kɨ Juda kɨ Jerusalem adɨ Ionie aw sədə əbɨ sə beekon lədɨ. ⁷ E be ā, ma madə da din loogɨ’tɨ higui də tutə lə təl re sədə ɓe, ma madə nyan rasigɨ a ɔde kumsi. ⁸ Ma m’ilə kosɨ doogɨ ləsi ji nje kɨ Juda’tɨ lə kadɨ higui də ra gir doogɨ’tɨ kɨ in-in əbɨ ngain dənangɨ’tɨ Sabe. ENjendisənon a tam be. ⁹ Ilei mbər nè ədə gir kojɨ doogɨ doogɨ; uwei də njasi lə kaw rɔ, ɔsi nja baw (gon) njerɔgɨ ! Be kuwə, kadɨ njerɔgɨ malangɨ awi ta rɔ’tɨ. ¹⁰ Ɔi ndɔ̰ kosɨ ləsi uwei kuye kaskargɨ ā, ɓarumgɨ (ngorongɨ’gɨ) ləsi uwei ningə ā tɔ. Majɨ kadɨ njetɔgɨ goto gea ədɨ nè : Ma nga, ma gon rɔ. ¹¹ Majɨ kadɨ gir doogɨ malangɨ kɨ loogɨ’tɨ kɨ gay-gay, ɔsi rasi ɓatɨ ā, I rei kəbi nan. Eei Njendisenon, adɨ gonrɔgɨ lei re’n. ¹² Majɨ kadɨ kosɨ doogɨ in-in dɔ̰ ā, awi loo mba loo’tɨ kɨ Josaphatɨ, tədə loo nè nga ma m’ndi tutɨ lə gangɨ ta də gir kojɨ doogɨ’tɨ kɨ in-in kɨ loogɨ malangɨ. ¹³ Ɔi ɓarum tədə ko to kum kujə, I rei mbulei; tədə man ndu rosɨ loom bon-in à rosɨ joogɨ adɨ rubə nangɨ ā tɔ. tədə kɛ̀m yər lədə dum də loo. ¹⁴ An-in bule doogɨ, doo bulə’gɨ mba loo gangɨ tatɨ, ndɔ gangɨ ta lə Njendisənon nain ndei be. Mba lo gangɨ tatɨ ¹⁵ Loo ndul a utɨ kum kadɨ sə nan, ra ndion lə konyongɨ a goto tɔ. ¹⁶ Njendisənon ndangɨ ra’n də mbal’tɨ kɨ Sion, ndu’n ɓar Jerusalem, dəran sə dənangɨ nè a yei ɓukɨ-ɓukɨ. Nè Njendisənon é loo kulə də lə kosɨ doogɨ lə’n, é loo ɓɔyɔra lə Israel’gɨ. ¹⁷ Bè ā sei a gəri ma Njendisənon, Nubə ləsi kɨ ndidə mbal’tɨ kɨ Sion, mbal ləm kɨ to sə nin’n, Jerusalem a ée kei lə Nubə : Doogɨ mbagɨ a ndi tutɨ ndan lé. ¹⁸ Ee a kɛ̀m ndɔ’tɨ nè nga, yibɨ ndu kɨ sɔl a ain də mbalgɨ’tɨ ā, mba a an-in də ngann mbalgɨ’tɨ ā tɔ. Man a ain kɛ̀m kanrangɨ’tɨ malangɨ kɨ Juda, man a ain-in de kei’tɨ lə Njendisənon lə kulə mba loo kɨ kagɨ acaciagɨ toi tutɨ. ¹⁹ Ɓeekon kɨ Ejiptɨ a ndi dan kumtondo’tɨ ā, Edɔm a təl diləlo, tədə nyan ra kɨ sə ɔgɨ lə’n kɨ ra sə doogɨ kɨ Juda sar um məsɨ doogɨ kɨ ta lə nangɨ kɛ̀m ɓeekon’tɨ lədə ²⁰ Ɔjɨ də ɓeekon kɨ Juda ɓaa, a e loo ndi sar se non ā, Jerusalem gea a to titɨ kɨ ɓe sar sə non. ²¹ Madɨ kem ti mbitɨ dədə’tɨ ā, Dee kɨ məsɨ də ain-in nangɨ nal kadɨ kem ti mbitɨ dədə’tɨ. Njendisenon a ndi də mbal’tɨ kɨ Sion.