¹ Eheni ikirẹ mi eanmi ogo, ọdavbi ekẹn okun de. Ọ mọọn ekhuanmi igbe bi uhonmọn ihiọn. Eru ọkhae rẹ rii elekhuanmi ghọi, eii li rii elu uhọnmọn ghọi rẹ wui ekhua rẹji Oisẹlẹbua. ² Ọli eanmi ogo na li miẹn ọrẹ bi era. Oẹ ghọi rẹẹ bọ oẹ atalakpa, unu ghọi rẹ rẹẹ bu unu ikoiko. Ọli Idragon rẹ wui itotomi ghọi nọi, lọ rio kha ragbọn shan. ³ Ọkpa vbi use elu uhọnmọ eanmi ogo na rẹ bi ebọ mọọ ekhokhoo lọ gbai lọ kha si uu jọi. Sokpẹn ọle ekhokhoo ni foi ọrẹ yan agbọn eesẹn vbo tọ agbọn ẹo a yiain ria dian ọle eanmogo. ⁴ Ian rẹ gbo gaa ọli Idragọn ọhiọ khọ ọwin itotomi ghọi ni ọle eanmi ogo. Eri ian gbo gaa ọle eanmi ogo yian ria ta, "Daa ọlọ rẹ bi ọle eanmi ogo? "Daa ọlọ mati kpai khọin?" ⁵ Era wui unu nii ọle eanmi ogo lọria mati ruọ lọria gbo ta eta ekhua. Eri a rehe nọi rẹ wee awe asẹ vbi uki egbọọ eva ikpeghe eva(ikpe eha bi ushọnmọn). ⁶ Ọli eanmi ogo rẹ vuju unuan kha gui iyẹnmi ekhua rẹ ji Oisẹlẹbua. Ọria khuale eii ghọi bi efẹn lọ deha, bi elọ rii okhumueimi. ⁷ Arẹ ri ehe ni ọle eanmi ogo rẹkha kpa agbọn li miehọn khọin, lọ daa khuosho iẹn. Agbo ri asẹẹ nọi vbi uhọmọn ẹwẹ, agbọn, uroo bi evboo eesẹn. ⁸ Agbọn eesẹn li rii ọlu uhọmo tọ na eri ian gai. Uan khu uan lai vin eii ghọi, rẹ da vbi eghẹ larẹ ma ọla agbọn na hiọ ebe ẹdẹ agbọn, lọu khọ wọ oghi ọli iyangbo, lagbe ⁹ Uan khu uan lọ mọọn ehọ, ọmọọn idaehọ. ¹⁰ Akha mi uanha laa mu yi oghumu, erọọ yo oghumu. Akha mi ọlọ rii alakuta gbuuan, alakuta ario gbo gbọ. Eli kpefuẹn, ache vba livba mọọn iziegbe bi ioyatẹẹ bi adiuduyẹn. ¹¹ Erẹ che miẹ khi eanmi ogo ọvbee ọda ẹkẹn otọ deanre, ọ mọọn ekhuanmi eva egbẹ agbọ ọ gui iyẹnmi egbẹ Idragọn. ¹² Ọọ wee asẹẹ eesẹn lọ eanmi ogho ogo ni lọ kpodao nọi wee vbẹ ehe lọ rii, ọrẹ zii otọ agbọn bii elọ riọ kha gaa ọli eanmi ogo lọ kpodao ni-lọ wọ ọlọ mọọ ẹkhokhoo okhena lọ foi. ¹³ Ọbia obia ọyanuan lọ gbai, ọ sie erẹn daa vbo okhumu eimi do otọ agbọn re vbi odao agbọn achee, ¹⁴ re shan ela aẹẹn la zọi kha u, ọrẹ tẹẹ agbọn li riọ uhọmọn otọ agbọn na e, ọria gu mai iẹn lian ẹnhẹn aghoan rẹ wui ekpẹn ni eanmo ogo la rii alakuta wẹn ekhokhoo okhena hiọ vbegbe ọrẹẹ rii iyọ nii ọkpe riọ. ¹⁵ Eri a gbo rehe nọi rẹ re etin la fii hii eba amai vbi aghoan ọle eanmogo, rẹ mati gui iyẹnmi, la daa ga yẹn khi elii de uhọmọ re ni ọli eanmogo ọju uan gbiẹn vbu ubi. ¹⁶ Ọ gbo rii itotomi ziaa eli ide wuemi bi eli kpọshọi, elife bi ele esọngbe, eli mọọn uaan egbe bi ekhẹn oghumu, rẹ rii aẹẹn hii obọ ọdion iẹn da ehai iẹn. ¹⁷ Sọi dọu khu uan mọọ ọla aẹẹn nii davbi inọmba lọ rii eii ọli eanmogo ni man ọkhi mati shẹn emi davbi ọ de emi. ¹⁸ Ẹwuain an hoo vbọ ọlemina. Akha miọn ọlọ mọọ awuẹn ẹo kuere, zọi oo eka ọli inọmba ọghi eanmogo na u. Ọhiọ khi inọmba oghi uanha ọ. Inọmba ghọ ikhi ehan ehan ehan.(egbọọ ehan vbo odi ehan bi egbọọ eha ikpeghe ehan.)