¹ Ipọlu, apọsito oghọ Ijesu Ikiristi rẹji aoo Oisẹlẹbua Ọlọsumuan ma bi Ijesu Ikiristi lọ wọ ọli ma wọn udu hiọ vbi egbe, ² rẹji Itimotiu, ọmọn ata adiuduan ma: Ẹsee ọhẹ, ituẹkẹ, bi ọfure lọda obọ Oisẹlẹbua Era re bi Ijesu Ikiristi Ọlọmọima. ³ Ẹgbẹli da tama vba vbi ẹghẹ li ria da Imasidana re, li vba da deha vbi Ẹfisọs, lada miẹn khi vbai zọ agbọn eboo khaa ma emi ọdan. ⁴ Da lian kha kha daehọ itan ọdọdan bi itan liain mọọ irẹso. Eri ena si Itua unu re etini lọ kha rẹ kha ri ikpabọ re vbi aoo Oisẹlẹbua, lọ wọ rẹ shan adiuduan ⁵ Bọna ebọ wọ ọli aoo ni ikhọ ihọnmẹkẹ lọda vbi udu lọfuẹn re, udu lọ ya ri iboi gbe egbe ghọ, adiuduan lọ wọ ata. ⁶ Agbọn eboo ki dọn odẹ yan ki fi egbe delegbe da elemina ri yọ eta oghọ irurumi. ⁷ Erian hoo lian wọ elian ma agbọn uhi, sokpẹn yain iẹn ebian ta da ebian guọ iyẹnmi ghọ. ⁸ Sokpẹn ma ẹn khọ ọlọ uhi ọhọnmọn sọ uanha we ọi ẹgbẹ lọ uhi tai. ⁹ Ma gbo ẹn ọna khọ uhi ai ẹnhọn ni uanha lọ mọi uẹẹn lọsẹn, sokpẹn agbọn liain mọọ ekpẹn jọ uhi, agbọn lian wọ emi ọbe bi ekhẹn olọkhọọ, gbo khọ eliain mọi eti igami Oisẹlẹbua bi ekhẹn olọkhọọ. Era ẹnhọn ni elian gbe Era bi Iyọn iẹn vbu ubi, ekhẹn ọgbu bi, ¹⁰ nọ agbọn lian gbo oghẹẹ shan shan, nọ imọhe lian mẹhẹn kpẹn egbe iẹn, nọ elian hiẹ li agbọn vbọ oghumu, nọ ekhẹn ọro erai, nọ elian rọ ọsẹi era, bi emi khe emi lọi wọ uhi lọ dia. ¹¹ Elọ uhi na erọ riọ ẹgbẹ lọ ọkhai aniyẹnlọsẹn oghi iyanba Oisẹlẹbua ri, la mọi mẹn vbo obọ. ¹² I khuẹmi Ijesu Ikiristi Lọmọima. Erọ re mẹn akha, ọhiọ ọda ghe mẹn khi mọi adiuduan, ọrẹ gbo mu mẹn hiọ obia ghọ. ¹³ Eria sẹnẹ rọ unu gbo obia ghọ, ọlọ zee agbọn, bi uanha lọ zemi khọọ. Sokpẹn Eri mi ituẹkẹ erumu eri wọ elemina vbẹkẹ khi iẹn ebiau bi I miehọn. ¹⁴ Sokpẹn ẹsee Ọlọmọima ọzemi vọn vbi adiuduan bi ihọnmẹkẹ lọ ri egbe Ijesu Ikiristi. ¹⁵ Ọli eta na wọ eba rọ udu hi bi eba mati gaobọ mu, khọ Ijesu Ikiristi dọ ọla agbọna re da sumu ekhẹn olọkhọọ. Mẹmẹn ọria lẹ vbọ ena. ¹⁶ Sokpẹn ọhiọna ọzẹ la rẹ mọi ituẹkẹ imẹn, lada miẹn vbi egbe mẹn, ọlọ sẹ wọ ọkhọọ lẹ, li Ijesu Ikiristi da rọ oziẹn ghọ eesẹn ma. Erọ wọna ẹgbẹ irẹma jọ elian rọ udu hiọ vbi egbe, ọhiọ agbọn lọi mọi irẹso. ¹⁷ Bọna rẹjọ ọba lọ riọ rẹ da vbọ eimi re, lọya uu, yọin ọkpa ọwọ Oisẹlẹbua, ọkhai kho oghọ rẹ so nẹnẹ nẹ. Isẹẹ. ¹⁸ Eria ta elemina ma, Itimotiu, lo ovbi mẹn. Eria wọ ena rẹji ẹgbẹ la da tai kpotọ vbi ọhiọ wẹ tẹlẹ, luda wọn egbe hiọ egbegbo osho. ¹⁹ Kha wọ ena luda mọi adiuduan lọsẹn bi udu lọ khia rọ ibọi na. Agbọn eboo ki sọn ena hiotọ yan ki gbo ria adiuduan iẹn an. ²⁰ Agbọn ẹgbẹ iyọ yain khi Ihiminọsi bi Alazẹda li ki mu nọ esu lian da mama ẹgbẹ la ya da rọ unu gbe emi.