2 ¹ NDɔ kɨ kutɨ joo gɨde kare lə na̰y kɨ nje ko̰ sɨri, NJe-koy-al ɨndə ta ləne ta Aje tɨ kɨ nje-kəl-ta kɨ tae tɨ ə nə: ² Əl Jerobabəl kɨ ngon lə Salatɨyəl, nje-ko̰-ɓe kɨ dɔnangɨ Jude tɨ əi kɨ Jojuwe kɨ ngon lə Josadakɨ kɨ e kɨ bo lə njé-kɨjə-nḛ məsɨ kadɨ-kare je kɨ ndəgɨ dɨje ə nə: ³ Na dansi tɨ ə e dəw kɨ tḛḛ ta yo tɨ, adɨ oo kəy kam kagɨ-lo maje tɨ kɨ dɔso̰y ə? Nɨngə koo kɨ oi-e ɓasɨne kɨn to ban ə? Kɨ oi-e kɨn təl nḛ kɨ kare ba ta kəmsi tɨ al wa? ⁴ NJe-koy-al əl Jerobabəl ə nə: kɨ ɓasɨne kɨ ɓa, uwə tɔgi ba, əl Jojuwe kɨ ngon lə Josadakɨ kɨ e kɨ bo lə njé-kɨjə-nḛ məsɨ kadɨ-kare je ə nə: uwə tɔgi ba, ə əl kosɨ dɨje kɨ me ɓətɨ pətɨ ə nə: uwəi tɔgɨsi ba. Nɨngə ɓuki rɔsi ta kɨlə tɨ, tadɔ mi NJe-koy-al lə njé-rɔ je mi naa tɨ səsi. ⁵ E kɨ go kun tɨ kɨ m-un mɨndɨ m-adɨ səsi lokɨ ɨsɨ ɨtḛḛi Ejɨpɨtɨ tɨ kɨ taga. NDɨlm e dansi tɨ, ɨɓəli nḛ madɨ al. ⁶ Tadɔ ta kɨ mi NJe-koy-al lə njé-rɔ je m-əl ə to kɨn: Na̰y ngay al par ə m-a yəkɨ dɔra̰ je kɨ dɔnangɨ je, ba je kɨ dɔnangɨ ray je. ⁷ NJe-koy-al lə njé-rɔ je əl ə nə: M-a m-adɨ gɨn ɓe je kɨ dangɨ dangɨ, njade a jalala, nɨngə nḛ majɨ je ləde a lo kadɨ re, ɓa kəy kɨn a ndole ndole kɨ dum kəl tae. ⁸ NJe-koy-al lə njé-rɔ je əl ə nə: la nɨm, ɔr nɨm əi nḛ ləm. ⁹ NJe-koy-al lə njé-rɔ je əl ə nə: kəy kɨ gogɨne kɨn a ndole ɨtə kəy kɨ dɔso̰y. E ə e lokɨ m-a m-adɨ ɨngəi lapɨya tɨ. ¹⁰ NDɔ kɨ kutɨ joo gɨde sɔ lə na̰y kɨ ko̰ jikare lə ɓal kɨ ko̰ joo lə ko̰-ɓe lə Dayrusɨ, NJe-koy-al ɨndə ta ləne ta Aje tɨ kɨ nje-kəl-ta kɨ tae kadɨ əl ə nə: ¹¹ “NJe-koy-al lə njé-rɔ je əl ə nə: m-dəji kadɨ ɨdəjɨ njé-kɨje-nḛ məsɨ kadɨ-kare je ta kɨ dɔ ndu tɨ kɨn: ¹² Kɨn ə re dəw ndəw da kɨ e kɨ kɔr ta dɔ tɨ no̰ ndɨngɨri tɨ lə Luwə ta kɨbɨ tɨ ləne, ɓa gotɨ ta kɨbɨ ka kɨn ɔdɨ mapa, ə se kasɨ kandɨ njuu, ə se yɨbɨ, ə se nḛ kuso madɨ, nɨngə se nḛ je kɨn a təli nḛ kɨ kɨndə ta dangɨ mbata lə Luwə kare wa? Ɓa NJé-kɨjə-nḛ məsɨ kadɨ kare əi nə: Jagɨ a e be al. ¹³ Aje dəjɨ-de ɓəy ə nə: kɨn ə re dəw ɔdɨ nɨn, adɨ təl nḛ kɨ majal ta kəm Luwə tɨ, ɓa dəw ka kɨn ɔdɨ nḛ madɨ kɨ rangɨ, nɨngə se nḛe ka kɨn a təl nḛ kɨ majal ta kəm Luwə tɨ tɔ wa? Ɓa NJé-kɨjə-nḛ məsɨ kadɨ-kare əli əi nə: Oyo a təl nḛ kɨ majal ta kəm Luwə tɨ. ¹⁴ Lo kɨn tɨ Aje un ta əl ə nə: «NJe-koy-al əl ə nə: kɨ rɔm mi tɨ, dɨje kɨn toi be tɔ, gɨn ɓe kɨn to be tɔ. Kɨlə je pətɨ kɨ jide ɔdɨ ka to be tɔ, nḛ je kɨ awi no̰ ndɨngɨri tɨ ləm e nḛ kɨ majɨ mbata ləm al.» ¹⁵ NJe-koy-al təl əl-de ɓəy ə nə: «Kɨ ɓasɨne kɨn, m-dəjɨ səsi kadɨ ɨndəi kəmsi majɨ go nḛ je tɨ kɨ a rai nḛ ɨlə ngɨre ɓone kɨn, kəte ɓəy taa kadɨ ɨləi ngɨrə kɨndə mbal kɨndə kəy ləm dɔ naa tɨ. ¹⁶ Re e be al ə, re awi lo ko tɨ ləsi kɨ ɨɓuki dɔnaa tɨ kare kutɨ joo ə ɨngəi dɔgɨ ba, re awi kadɨ ɔdi kasɨ njuu ləsi kɨ ɨndəi gum kutɨ mi ə, ɨngəi gum kutɨ joo ba. ¹⁷ NJe-koy-al əl ɓəy ə nə : M-ɨndə səi kɨndə kɔjɨ, m-adɨ tɔne tɔl ko je ləsi, m-adɨ yɨbɨ kuu je ndumi-de, taa m-adɨ ndi kɔsɨ budɨ-de nangɨ kaa, ɨtəli rəi rɔm tɨ al. ¹⁸ Kɨ ɓasɨne kɨn, m-dəjɨ səsi kadɨ ɨndəi kəmsi majɨ go nḛ je tɨ kɨ a rai nḛ ɨlə ngɨre ɓone, ndɔ kɨ kutɨ joo gɨde sɔ lə na̰y kɨ ko̰ jikare, kɨ e ndɔ kɨndə gɨn kəy lə NJe-koy-al kɨn, ɨndəi dɔsi tɨ majɨ. ¹⁹ Kɨ ne kɨn, ko nḛ to me dam tɨ no̰o̰ ɓəy a? NJuu je, kɨ mbay kote je, kɨ kagɨ kɨ ɓari-e gɨrənadɨye je, kɨ bɨni je, kandɨde kare ka goto. Nə ḭ dɔ ndɔ tɨ kɨ ɓone kɨn, m-a m-adɨ majɨ a ur səsi. ²⁰ NDɔ kɨ kutɨ joo gɨde sɔ lə na̰y ɓa, NJe-koy-al əl Aje ta kɨ nje ko̰ joo ə nə: ²¹ «Əl Jerobabəl, nje-ko̰-ɓe kɨ dɔnangɨ tɨ Jude tɨ ə nə: M-a m-yəkɨ dɔra̰ əi kɨ dɔnangɨ; ²² M-a m-tɔsɨ ngar je dɔ ko̰-ɓe tɨ ləde m-tɨlə-de kɔ, taa m-a m-tujɨ tɔgɨ ko̰-ɓe je kɨ dangɨ dangɨ kɨ dɔnangɨ tɨ ne. M-a m-tujɨ pusɨ rɔ je kɨ njé rɔ me tɨ kɔ. M-a m-adɨ sɨndə rɔ je kɨ njé kal-de je təli dɔnaa tɨ tɔli-naa. ²³ NJe-koy-al lə njé-rɔ je əl ta me ndɔe tɨ kɨn ə nə: Mi NJe-koy-al lə njé-rɔ je, m-uni ḭ Jerobabəl kɨ ngon lə Salatɨyəl, kadɨ m-rai tə po̰ kɔsɨ dɔ nḛ tɨ. Tadɔ e ḭ ə m-kɔti.