1 ¹ NDɔ kɨ dɔso̰y lə na̰y kɨ ko̰ mḛhḛ lə ɓal kɨ ko̰ joo lə ko̰-ɓe lə Dayrusɨ, ta lə NJe-koy-al tḛḛ ta Aje tɨ kɨ nje-kəl-ta kɨ ta Luwə tɨ kadɨ əl Jerobabəl kɨ ngon lə Salatɨyəl, nje-ko̰-ɓe kɨ dɔnangɨ tɨ Jude tɨ əi kɨ Jojuwe kɨ ngon lə Josadakɨ kɨ e kɨ bo lə njé-kɨjə-nḛ məsɨ kadɨ-kare je ə nə: ² «Ta kɨ tḛḛ ta NJe-koy-al tɨ lə njé-rɔ je ə to kɨn: “Dɨje kam əli əi nə: kagɨ-lo ra kəy lə NJe-koy-al asɨ al ɓəy, dɔ kagɨ-loe re al ɓəy. ³ E mbata kɨ ə, NJe-koy-al əl-n-de ta kɨ ta Aje kɨ nje-kəl-ta kɨ tae tɨ ə nə: ⁴ Adɨ kɨ e dɔ kagɨ-lo kɨ kadɨ ɨsii me kəy je tɨ ləsi kɨ majɨ majɨ, lokɨ yam tətɨ nangɨ wa? ⁵ Ta kɨ NJe-koy-al lə njé-rɔ je əl ə to kɨn: Kɨ ɓasɨne kɨn, ɨgo̰i go rəbɨ nḛ rasi je kɨn majɨ oi. ⁶ Ɨdɨbi nḛ nga̰y ka ɨtəti ndə̰y ba, usoi nḛ ka ɨndani al, a̰yḭḭ man ka tɔl kɨndə al, ɨləi kɨbɨ ka taa kul dɔsi tɨ al, dəw kɨ un la kɨlə ləne ka, ɨlə me ɓɔl tɨ kɨ gɨne mbutɨ yo. ⁷ Ta kɨ NJe-koy-al lə njé-rɔ je əl ɓasɨne ə to kɨn: Ɨgo̰i go rəbɨ nḛ rasi je kɨn majɨ oi. ⁸ NJe-koy-al əl nə : awi dɔ mbal je tɨ taa, ɨrəi kɨ kagɨ je ɨraii kəy ləm. Lo kɨn tɨ, rɔm a nəlɨm nɨm, m-a m-ɨngə tɔɓa tɨ nɨm. ⁹ Ɔji mesi tɨ kadɨ a ɨngəi nḛ ngay, nə yə ɨngəi ndə̰y ba par. Ɨrəəi ɓe ka, m-to kunjɨ tam dɔ m-adɨ o̰-e kɔ. NJe-koy-al lə njé-rɔ je dəjɨ ə nə se nḛ kɨn ra nḛ be mbata ri wa? Əl ə nə : E mbata kəy ləm kɨ tujɨ, nɨngə səi, ɓi ɔdɨ kəmsi al dɔ ra kəy je tɨ ləsi. ¹⁰ E be ə, dɔra̰ ɔgɨ-n səsi man, ə dɔnangɨ ɔgɨ səsi kandɨne tɔ. ¹¹ M-adɨ ɓo osɨ dɔ ɓe tɨ, kɨ dɔ mbal je tɨ, m-adɨ ko je tuti, kasɨ kandɨ njuu a̰y al, yɨbɨ kandɨ kagɨ je a̰yḭḭ al, dɔnangɨ tḛḛ kɨ kandɨ madɨ kare al. Ɓo osɨ dɔ dɨje tɨ kɨ dɔ da je tɨ ba pətɨ. Kɨlə je pətɨ kɨ dɨje rai, nḛ kare kɨ ɨngəi tɨ goto.”» ¹² Jerobabəl kɨ ngon lə Salatɨyəl nɨm, Jojuwe kɨ ngon lə Josadakɨ kɨ e kɨ bo lə njé-kɨjə-nḛ məsɨ kadɨ-kare je nɨm, kɨ ndəgɨ dɨje me ɓe ba pətɨ, oi dɔ ndu NJe-koy-al kɨ e Luwə ləde kɨ əl kɨ ta Aje kɨ e nje-kəl-ta kɨ tae tɨ, kɨ go kɨlə tɨ kɨ NJe-koy-al, Luwə ləde ade. Lo kɨn tɨ, dɨje me ɓe ba pətɨ, ɓəl tɔl-de adɨ dadi par par no̰ NJe-koya-al tɨ. ¹³ Aje kɨ nje-kaw-kɨlə lə NJe-koy-al əl dɨje me ɓe kɨ go ndu tɨ kɨ NJe-koy-al ade ə nə: «NJe-koy-al ə nə: Mi naa tɨ səsi.» ¹⁴ NJe-koy-al adɨ kəm Jerobabəl kɨ ngon lə Salatɨyəl, nje-ko̰-ɓe kɨ dɔnangɨ Jude tɨ əi kɨ Jojuwe kɨ ngon lə Josadakɨ kɨ e kɨ bo lə njé-kɨjə-nḛ məsɨ kadɨ-kare je kɨ ndəgɨ dɨje me ɓe pətɨ rɨrə dɔ kɨlə tɨ kɨ kadɨ rai. Be ə, ḭḭ taai, awi ɓuki-naa ta kɨlə kəy tɨ lə NJe-koy-al lə njé-rɔ je kɨ e Luwə ləde. ¹⁵ Nḛ kɨn ra nḛ kɨ ndɔ kɨ kutɨ joo gɨde sɔ lə na̰y kɨ ko̰ mḛhḛ lə ɓal kɨ ko̰ joo lə ko̰-ɓe lə Dayrusɨ.