^{1 2} 1 ಯೇಸು ಕ್ರಿಸ್ತನ ದಾಸು ಯಾಕೊಬನ ತೆಂಬಿಐಕ್ರ ಯೂದನ ತಂದೆ ಅನಾ ದವ್ರುಕೋರು ಪ್ರಿಯರೈಕ್ರಗ್ಯ ಯೇಸು ಕ್ರಿಸ್ತನ್ಕಯಿ ಅಗ್ಸಗ್ಯ ಐಕ್ರಲ್ಕಿ ವರಿರಾದು ಎ೦ದ ಇಂಡೆಕೆ, 2 ದವ್ರಿಂಡು ಅಗ್ಸಗ್ಯ ನಿಂಗ್ಲುಕು ಕರುಣೆ ಶಾಂತಿ ಪ್ರೀತಿ ಹೆಚ್ಚಗೋಟು. ^{3 4} 3 ಪ್ರಿಯರೇ ನಂಗ್ಲುಕು ಹುದುವಗಿಕ್ರ ರಕ್ಷಣೆಯ ವಿಷಯತ್ಗೊರು ನಿಂಗ್ಲುಕು ವರಿರ್ಕು ಪೂರ್ಣಶಕ್ತಿಯಿಂಡು ಪ್ರಯತ್ನ ಸೈತಯಿಂದಪೋದು ದವ್ರು ಮಕ್ಕಿಲ್ಕಿ ಶಾಶ್ವತವಯಿಕ್ರುತರ ಒಂಡೇರಕ ಒಪ್ಪಿಸಲ್ಪಾಟ್ನಾ ನಂಬಿಕೆಯತ್ತೆಯ ಕಾಪಡಿಗ್ರುಕು ನಿಂಗ ಹೊರಡ್ರುದುಯಿಂಡು ವರಿರಾದು ಅವಶ್ಯಕಯಿಂಡು ತೋಚುಸು . 4 ಯಂತ್ಗುಇಂಡೆಕ್ಯ ಭಕ್ತಿ ಹೀನರೂ ನಂಗ್ಲ ದವ್ರ ಕೃಪೆಯತ್ತೆಯ ನೆವಸೆದ್ಗೊಂಡು ನಾಚಿಕೆಗೆಟ್ಟ ಕೃತ್ಯಲತ್ತೆಯ ಸೈರಾಗ್ಯ ನಂಗ್ಲ ಒಂಡೇ ಒಡೆಯ ಕರ್ತನು ಐಕ್ರ ಯೇಸು ಕ್ರಿಸ್ತನತ್ತೆಯ ತಿಳುಜುಗ್ದೆ ಇಕ್ರ ಸ್ವಲ್ಪ ಮಂದಿಗ್ಯ ಸಭೆಕೊರು ಕಳ್ತನತಿಂಡು ಹೊಕ್ಕಿನ್ನು ;ಅಲ್ಕಿ ಈ ದಂಡನೆ ಅಗ್ರುದುಯಿಂಡು ಮುನ್ನೆ ಐಲ್ಯ ವಿಷಯತ್ ಬಗೆ ವರ್ಜಿಜು , ^{5 6} 5 ನಿಂಗ ಸಮಸ್ತ ಅದ್ದಿ ಮುನ್ನೆ ತಿಳ್ಜಿನ್ದೆಕು ನಾನು ಮುನತ್ತ ಸ್ವಲ್ಪ ಸಂಗತಿಲತ್ತೆಯ ನಿಂಗ್ಲ ನೆನಪ್ಗು ಹತೆರ್ದು ಯಿಂಡು ಅಪೇಕ್ಷಿಸರೆ, ಅದು ಎ೦ದ ಇಂಡೆಕೆ –ಕರ್ತನು ತಟ ಮಂದಿಲ್ಲತ್ತೆಯ ಐಗುಪ್ತ ದೇಶತಿಂಡು ಉಡಿಪ್ಚ ನಪೋದು ಐಲ್ಲುಲಿ ನಮ್ದೆ ಇಕ್ರಲ್ಲತ್ತೆಯ ನಾಶಸೆನ್ಚು, 6 ತಂಗ್ಲ ದೊರೆತನತ್ತೆಯ ಕಾಪಾಡುಗ್ದೆ ತಂಗ್ಲುಕು ಬೇಕನಾ ಜಾಗತ್ತೆಯ ಉಟ್ಟ ದೇವದುತ್ರುಕು ದವ್ರು ನಿತ್ಯ ಅನಾ ಬೇಡಿಲ್ಲತ್ತೆಯ ಹೋಟು ಮಹಾ ನಲ್ತ್ಗೊರು ಆಗ್ರಾ ದಂಡನೆಯ ತೀರ್ಪುಗಾಯಿ ಐಲ್ಯತ್ತೆಯ ಕತ್ಲುಲಿ ಹಚ್ಚಿದೂ. ^{7 8} 7 ಸೊದೋಮ ಗೊಮೋರ ಪಟ್ಟಣತಗ್ಯ ಆ ದೂತ್ರು ತರ ನಡ್ದುಗೊಂಡು ತಂಗ್ಲತ್ತೆಯ ಜಾರತ್ವಕು ಒಪ್ಪಿಸಿಕುಡ್ತು ಸ್ವಬಾವ ವಿರೋದ ಅನಾ ಬೋಗತ್ತೆಯ ಅನುಸರ್ಸತಿಂಡು ಐಗ್ಯ ಹೆಪೋದು ನೆರ್ಪುಗೋರು ದಂಡನೆಯತ್ತೆಯ ಅನ್ ಬವುಸ್ತ (ದುರ್ಮಾರ್ಗಿಲ್ಕಿ ಆಗ್ರಾ ದುರ್ಗತಿಕು) ಉದಾಹರಣೆ ಆಯಿ ಇದ್ನೂ. 8 ಇ೦ನ್ಗಿದೇಕು ಈ ಮಂದಿಗ್ಯ ಸ್ವಪ್ನವಸ್ಥೆ ಕೊರುಯಿಕ್ರುತರ ಅದೇ ತರ ಹೊಡ್ಮ ತ್ತೆಯ ಮಲಿನ ಸೇಂದ್ಗಾಕ್ನು. ಪ್ರಭುತ್ವತ್ತೆಯ ಅಸಡ್ಡೆ ಸೈಯಕ್ನು, ಮಹಾ ಪದವಿಲತ್ತೆಯ ದೂಷಿಸಿದ್ನು, ^{9 10 11} 9 ಅನೇಕೆ ಪ್ರದಾನ ದೇವದೂತ ಅನಾ ಮಿಕಾಯೇಲನು ಮೋಶೆಯ ಪಿನ್ಗಿ ವಿಷಯತ್ಗೊರು ಸೈತಾನನೆಂಟಿ ಲಡಾಯಿ ಸೆಂದು ವಾಗ್ದಾನಸೇನ್ದಪೋದು ಅದು ಸೈತಾನನ್ ಮೇನಿ ದೂಷಣಾಬಿಪ್ರಾಯತ ಸೊಂಡ್ರುಕು ಧೈರ್ಯ ಸೈಯ್ದೆ –ಕರ್ತನು ನಿನ್ನತ್ತೆಯ ಖಂಡಿಸೋಟು ಇಂಡ್ಸು , 10 ಅನೇಕೆ ಈ ಮಂದಿಗ್ಯ ತಂಗ್ಲುಕು ಗೋತಿಲ್ದೆ ಅದ್ದಿಆತ್ತೆಯ ದುಷಿಸಾಕ್ನು ಮತ್ತೆ ತಂಗ ವಿವೇಕಶೂನ್ಯ ಪಶುಲ್ತರ ಸ್ವಾಭಾವಿಕವಾಯಿ ಎತೆಂತ ತಿಳ್ಜುಗಾಕ್ನೋ ಅತ್ಗೋರು ತಂಗ್ಲತ್ತೆಯ ಕಡ್ತ್ಗಕ್ನು, 11 ಐಲ್ತ ಗತಿಯತ್ತೆಯ ಎಂದಯಿಂಡು ಸೋನೋಟ್ಟು; ಇಗ್ಯ ಕಾಯಿನನ ಹೇಗೆತ್ತೆಯ ಪುಡ್ಸಗ್ಯ ದುಡ್ಲುಸಂಪದ್ನೆಕಾಯಿ ಬಿಳಾಮನ ಭ್ರಾಂತಿಕೊರು ಪೂರ್ಣವಾಯಿ ಮುಳುಗ್ನಾಗ್ಯ ಕೋರಹನ್ ತರ ಪದ್ಪದ್ರಿಗಿ ವಸೇತ್ತಿ ನಾಶಆಯಿ ಹೊಗ್ರಾಗ್ಯ ಐನು, ^{12 13} 12 ಈಗ್ಯ ಸಮುದ್ರುಕೋರಿಕ್ರ ಗುಪ್ತಅನಾ ಬಂಡತ್ ಕನಿಯಿಂದು ನಿಂಗ್ಲ ಪ್ರೇಮಭೋಜನುತ್ಗೊರು ಕುಡ್ಗ್ಯೊಂಡು ತಿಂಡ್ರು ಕುಡ್ಕ್ಯಕ್ನು ,ನಿರ್ಭಯವಾಯಿ ಸ್ವಂತ ತಂಗ್ಲುತ ವರ್ಗತ್ತೆಯ ಪಾತುಗ್ರ ಕುರುಬ್ರೈನು, ಈಗ್ಯ ಗಾಲಿಂಡು ಗದ್ಗೊಂಡು ಹೋಗ್ರ ತನ್ನಿಲ್ದ ಮೇಘಗಳು, ಎಲ್ಗದ್ದಿ ಉದ್ರಿ ಪಂಗುಉಡ್ದೇ, ನೋಡ್ದೊಯಿ ಬೇರು ಸಮೇತ ಪಿಚ್ಗೊಂಡು ಬೂದೋನಮಾರಂಗ 13 ಸ್ವಂತ ಅವಮಾನಯಿಂಗ್ರ ನೊರೆಯತ್ತೆಯ ಕಾರ್ರ ಸಮುದ್ರತ ಹುಚ್ಚು ತೆರೆಗ್ಯ ಆಗಿದ್ನು, ಅಲೀರ ನಕ್ಷತ್ರಅನಾ ಇಲ್ತು ಪಾಲ್ಕು ನೋಬ್ಬು ಹೆಪೋದು ಅಚ್ಚಿಕ್ಯಾಕು, ^{14 15 16} 14 ಇಂತಲ್ತ ವಿಷಯಕೋರು ಆದಾಮುನ್ಕು ಹೋಗ್ನೆ ತಲ್ಕತದಾನ ಹನೋಕನು –ಇದೋ ಕರ್ತನು ಲಕ್ಷಾಂತರ ಪರಿಶುದ್ದ ದೂತರತ್ತೆಯ ಕೊಡ್ಗೊಂಡು. 15 ಅದ್ಯಾರ್ಕು ನ್ಯಾಯತಿರ್ಸುರ್ಕು ಭಕ್ತಿ ಹೀನರದ್ದಿ ಸೇಂದ ಭಕ್ತಿಯಿಲ್ದೆ ಇಕ್ರ ಅದ್ದಿ ಕೃತ್ಯಗಳ ವಿಷಯವಾಯಿ ಮತ್ತೆ ಭಕ್ತಿಯಿಲ್ದ ಅದ್ದಿ ಕ್ರುತ್ಯಲ್ತ ವಿಷಯವಾಯಿ ಮತ್ತೆ ಭಕ್ತಿಯಿಲಾದೇ ಇಕ್ರ ಪಾಪಿಷ್ಟರ್ ತಂಗ್ಲುಮೇನಿ ಸೋನ್ನ ಅದ್ದಿ ಕಠಿಣ ಅನಾ ಓಕ್ತ ವಿಷಯಕೋರು ಐಲ್ಯತ್ತೆಯ ಖಂಡಿಸ್ರುಕು ವಂಚು, ಇಂಡು ಪ್ರಾವದಿಸುಸು, 16 ಈಗ್ಯ ಗುಣಗುಟ್ರಗ್ಯ ತಂಗ್ಲ ಗತಿಯತ್ತೆಯ ನಿಂದಿಸ್ರಗ್ಯ ತಂಗ್ಲ ದುರಾಶೆಯತ್ತೆಯ ಅನುಸರ್ಸಿ ನಡುಕ್ರಗ್ಯ ಐನೂ, ಇಲ್ತ ವಾಯಿಂಡು ಬೆರು ಬೆರು ಹೋಕು ವಾರಕು, ಈಗ್ಯ ಸ್ವಪ್ರಯೋಜನಕ್ಕಾಯಿ ಮಗ್ತು ಸ್ತುತಿ ಸೈಯಾಕ್ನು, ^{17 18 19} 17 ಪ್ರೀಯರೇ ನಿಂಗನ್ನೇಕು ನಂಗ್ಲ ಕರ್ತಾ ಅನಾ ಯೇಸು ಕ್ರಿಸ್ತನ ಅಪೋಸ್ತಲರು ಮುನ್ನಿ ಸೋನ್ನ ಓಕತ್ತೆಯ ಜ್ಞಾಪಕ ಸೇನ್ದೊಂಗೋ, 18 ಭಕ್ತಿಕು ವಿರುದ್ದ ಅನಾ ಆಶೆಆತ್ತೆಯ ಅನ್ಸರ್ಸಿ ನಡ್ಕ್ರ ಕುಚೋದ್ಯಗಾರರು ಅಂತ್ಯಕಾಲುತ್ಗೊರು ಇಕ್ಯಾಕ್ನುಯಿಂಡು ಐಗ್ಯ ನಿಂಗ್ಲುಕು ಸೋನ್ನಿದ್ನಾಲ್ಯ, 19 ಈಗ್ಯ ಭೇದಲ್ಲತ್ತೆಯ ಸೈರಾಗ್ಯ ಪ್ರಾಕೃತಮನುಷ್ಯ ದವ್ರುಆತ್ಮ ಇಲ್ದೆಯಿಕ್ರಗ್ಯ ಐನು, ^{20 21} 20 ಪ್ರೀಯರೇ ನಿಂಗ್ಲನ ಆನೇಕು ನಿಂಗ್ಲುಕಿಕ್ರ ಅತಿಪರಿಶುದ್ದ ಅನಾ ಕ್ರಿಸ್ತನಂಬಿಕೆಯತ್ತೆಯ ಆದಾರಸೇದ್ಗೊಂಡು ಭಕ್ತಿಕೋರು ಅಭಿವೃದ್ದಿ ಹೊಂದಿ ಪವಿತ್ರಾತ್ಮ ಪ್ರೇರಿತರಾಯಿ ಪ್ರಾಥನೆ ಸೈತ, 21 ನಿತ್ಯಜೀವಕಾಯಿ ನಂಗ್ಲ ಕರ್ತಅನಾ ಯೇಸುಕ್ರಿಸ್ತನ ಕರುಣೆಯತ್ತೆಯ ನಿಂಗ್ಲತ್ತೆಯ ದವ್ರು ಪ್ರೀತಿಕೊರು ಕಾಪಾಡ್ಗೊಂಗೋ, ^{22 23} 22 ಸಂದೇಹಪಡ್ರ ಅಳ್ಳುದ್ನಾಳು ಕರುಣೆಯತ್ತೆಯ ಕಟ೦ಗೋ; 23 ಐಲ್ಯತ್ತೆಯ ನೆರ್ಪುವಾಯಿಂಡು ಹಿಗ್ತುಗೊಂಡು ರಕ್ಷಿಸಂಗೋ, ಅಳ್ಳುದ್ನಾಲ್ನ ಭಯಯುಕ್ತರಾಯಿ ಕರುಣಿಸಂಗೋ; ಹೊಲ್ಸನಾ ನಡತ್ತೆಯಿಂಡು ಮೈಲಿಗೆ ಅನಾ ಐಲ್ತ ಅಂಗಿಯತ್ತೆಯ ಅಸಯಸೈಯಂಗೋ, ^{24 25} 24 ಎಡವಿಬೂಗರ್ಕನಿ ನಿಂಗ್ಲತ್ತೆಯ ಕಾಪಾಡ್ರುಕು ತನ್ನ ಪ್ರಭಾವ್ತ ಸಮಕ್ಷಮತ್ಗೋರು ನಿಂಗ್ಲತ್ತೆಯ ನಿರ್ದೋಷಿಗಳನಾಯಿ ಸಿರ್ಪೋಟಿಗೂ ನಿಪ್ಕಿರ್ಕು ಶಕ್ತಅಯಿಕ್ರ,, 25 ನಂಗ್ಲ ರಕ್ಷಕಅನಾ ಒಂಡೇ ದವ್ರುಕು ನಂಗ್ಲ ಕರ್ತಅನಾ ಯೇಸುಕ್ರಿಸ್ತನ ಮೂಲಕ ಪ್ರಭಾವ ಮಹತ್ವ ಅಧಿಪತ್ಯ ಅಧಿಕಾರ ಅದ್ದಿ ಕಾಲುತ್ಗಿಂತ ಮುನ್ನಿ {ಇಂದ ತರ} ಇಪೋದು ಎಪೋದು ಇಕ್ಯೋಟು, ಆಮೆನ್.