^{1 2} 1 ಯೇಸು ನಡದುಗೊಂಡು ಹೋಗುತಿಂದಪ್ಪೋರು ಹುಟ್ಟುಕುರುಡನಾಯಿಕ್ಕಿರ ಒಂಡು ಮಣುಸುನತ್ತೆಯಿ ಪಾತುಸು, 2 ಅತನತ ಶಿಷ್ಯರು –ಭೋದಕನೆ ಇದು ಕುರುಡನಯಿ ಪರ್ದಿಕ್ಕಿರತ್ಗು ಎತ್ರ ಪಾಪ ಕಾರಣ ? ಈ ಮಣುಸುನೋ ಅಥವಾ ಇದ್ಗ ತಾಯಿ –ದೊಪುನ ಇಂಡು ಅತನತ್ತೆಯಿ ಕೊಟುಸುನು. ^{3 4 5} 3 ಯೇಸು ಅಯಿಲಿಕಿ –ಈ ಮಣುಸು ಅಗೋಟು ಇದ್ಗ ತಾಯಿ –ದೊಪು ಅಗೋಟು ಪಾಪಾತ ಸೇಯ್ಯಿಲ್ಲನು ಅನೇಕೆ ದವ್ರತ ಕ್ರಿಯೆಗ ಇತ್ತಮೂಲಕ ಪ್ರಕಟವಾಗುರುಕು ಇದಾಸು , 4 ನನ್ನತ್ತೆಯಿ ಅಂಪಿಕ್ಕಿರತನ ಪನಿಲಾತ್ತೆಯಿ ನಾನು ಪಗಮಾರಿಕಿ ಸೇಯ್ಯಿರಿದು;ನಮಾರಿಯಾಕ್ಕುದು , ಅಪ್ಪೋರು ಏ ಮಣುಸುನು ಪನಿ ಸೇಯ್ಯಿದಿಲ್ಲನು, 5 ನಾನು ಈ ಲೋಕತಕೋರು ಇಂದಪ್ಪೋರು ಈ ಲೋಕತ್ಗು ಬೆಳಕಯಿರೆ ಇಂಡಸ್, ^{6 7} 6 ಆತನು ಈ ತರ ವಸ್ಸೆತ್ತಿ ತರ್ರಿ ಮೆನಿ ಉಮುಜು ಆ ನೆಚ್ಚಿಟ್ಟು ಬುರಿದಿ ಸೆಂದು ಆ ಬುರಿದಿಯತ್ತೆಯು ಅತ್ಗೊಂಡು ಕನ್ನುಲುಕು ಆಂಟಿಚ್ಚುಸು; 7 ಅಪ್ಪೋರು ಅತ್ಗು ---ಸಿಲೋವ ಕೊಳತ್ಗು ಹೊಯ್ಯಿ ಕೊವ್ವಿಗೋ (ಸಿಲೋವ ಇಂಡೆಕೆ ಅಂಪಲಪಟ್ಟಿಕ್ಕಿರದು ಇಂಡು ಅರ್ಥ )ಇಂಡಸ್,ಅದು ಹೊಯ್ಯಿ ಕೊವ್ವಿಗೊಂಡು ಕನ್ನಿಕ್ಕಿರದಾಯಿ ವಂಚು. ^{8 9} 8 ಅದು ಮೊದಲು ಕುರುಡನಾಯಿಕ್ಕಿರತ್ತ ಪತಿಕ್ಕಿರ ಅಕ್ಕಪಕ್ಕತಯ್ಯ –ಉಕ್ಕೊಂಡು ಬಿಕ್ಷೆ ಬೇಡಿತಿಂದ ಆ ಮಣುಸು ಅಲ್ಯ ಇಂಡಸ್ನು 9 ಕೆಲವುರು –ಅಂಬೋ ಅದು ಇದೇನೆ ಇಂಡಸ್ನು, ಬೇರೆಯ್ಯ –ಇದು ಅತ್ತ ತರ ಇದು ಇಂಡಸ್ನು,ಅನೇಕೆ ಅ ಮಣುಸ್ ನಾನೆ ಅದು ಇಂಡಸ್. ^{10 11 12} 10 ಅಪ್ಪೋರು ಅಯಿಗ್ಯ –ನಿನ್ಕು ಕನ್ನುಗ ಏನಾಗು ವಂಚುನು,ಇಂಡು ಕೊಕುನು, 11 ಅಮಣುಸು ಅಯಿಲಿಕಿ –ಯೇಸು ಇಂಗಿರಂತ ಒಂಡು ಮಣುಸು ನೆಚ್ಚಿಟ್ಟು ಬುರಿಡಿ ಸೆಂದು ನಟ ಕನ್ನುಲುಕು ಆಂಟಿಪ್ಪಿಚ್ಚು ನನ್ಕು –ಸಿಲೋವ ಕೊಳತ್ಗು ಹೊಯ್ಯಿ ಕೊಯಿಗೋ ಇಂಡು ಸೋನ್ನತ್ಗು , ನಾನು ಹೊಯ್ಯಿ ಕೊಯ್ಯಿಗೊಂಡೆ ಅಪ್ಪೋರು ನನ್ಕು ಕನ್ನುಗ ವಂಚುನು ಇಂಡಸ್ 12 ಅಪ್ಪೋರು ಅಯಿಗ್ಯ ಅ ಮಣುಸುನುಕು –ಆದು ಎಟಿದು ?ಇಂಡು ಕೊಕುನು ಅ ಮಣುಸು ನನ್ಕು ಗೊತ್ತಿಲ್ಲ ಇಂಡಸ್. ^{13 14 15} 13 ಅಪ್ಪೋರು ಮೊದಲು ಕುರುಡನಾಯಿಂದ ಆ ಮಣುಸುನತ್ತೆಯಿ ಪರಿಸಾಯರಂಚುಗು ಅಸ್ಸೆಂಚುನು 14 ಯೇಸು ಕನ್ನುಲ ಕುಡ್ತಾ ಆ ದಿನ ಸಬ್ಬತ್ ದಿನಾಯಿಂಚು, 15 ಅಪ್ಪೋರು ಪರಿಸಾಯರು ಸಹ ಈ ಮಣುಸುನುಕು ಕನ್ನುಗ ಏನಾಗು ವಂಚು ಇಂಡು ಅತ್ತ ಕೊಕುನು , ಅದು –ಯೇಸು ಬುರಿದಿಯತ್ತೆಯಿ ಕನ್ನುಲುಕು ಆಂಟಿಚ್ಚು ಕೊವ್ವಿಗಿರುಕು ಸೋನ್ನುಸು ನಾನು ಕೊವ್ವಿಗೊಂಡಪ್ಪೋರು ನಾಕು ದೃಷ್ಟಿ ವಂಚು ಇಂಡಸ್. ^{16 17 18} 16 ಪರುಗುಂಡು ಪರಿಸಾಯರುಕೋರು ಕೆಲವುರು – ಈ ಮಣುಸು ದವುರುಕು ಸಂಬದಪಟ್ಟದಲ್ಲ ;ಯಂತ್ಗು ಇಂಡೆಕೆ ಇದು ಸಬ್ಬತ್ ದಿನತ್ ಪ್ರಕಾರ ನಡುಕುದಿಲ್ಲ ಇಂಡಸ್ನು,ಇನ್ನು ಕೆಲವುರು –ಪಾಪಿಯಾಯಿಕ್ಕಿರ ಒಂಡು ಮಣುಸು ಇಂತ ಪನಿಲಾತ್ತೆಯಿ ಏನಾಗು ಸೇಯ್ಯದು ? ಇಂಡಸ್ನು,ಹಿನಗೆ ಅಯಿಲಿಕೊರು ಬೇದ ಶುರುವಾಸು , 17 ಅಯಿಗ್ಯ ತಿರಿಗಿ ಆ( ಕುರುಡು )ಮಣುಸುನುಕು ನಿನಕು ಕನ್ನುಲಾ ತಂದಿಕ್ಕಿರ ಆ ಮಣುಸುನು ಬಗ್ಗೆ ನೀನು ಯಂತ ಸೋನ್ನರ ಇಂಡಪ್ಪೋರು ಅದು ಆತನು ಒಂಡು ಪ್ರವಾದಿ ಇಂಡಸ್, 18 ಅನೇಕೆ ಕನ್ನುಲ ಹೊಂದಿಕ್ಕಿರ ಆ ಮಣುಸುನ ವಿಷಯವಾಯಿ ಯೆಹೊದ್ಯರು ನಂಬಿಕೆ ಇಲ್ಲದೆ. ^{19 20 21} 19 ಅದ್ಗ ತಾಯಿ –ದೊಪುನತ್ತೆಯಿ ಅಗುಸು, ಕುರುಡನಯಿ ಪರ್ದಿಕ್ಕಿರಂತ ನಿಮ್ಮ್ ಮವ್ವು ಇದೇನಾ?ಇತ್ತ್ಗು ಕನ್ನುಗ ಏನಾಗು ವಂಚು ಇಂಡು ಕೊಕುನು? 20 ಅಪ್ಪೋರು ಅಯಿಗ್ಯ ನಮ್ಮ್ ಮವ್ವು ಮೊದಲು ಕುರುಡನಾಯಿಂದಾದು ಕರಾ 21 ಅನೇಕೆ ಇಪ್ಪೋರು ಇತ್ಗು ಕನ್ನುಗ ಏತರ ವಂದಿದು ಇಂಡು ನಂಗುಲುಕು ಗೊತ್ತಿಲ್ಲ ಇಂಡಸ್ನು,ಮತ್ತೆ ಇತ್ಗು ಕನ್ನುಗ ವರ್ರಕನಿ ಸೆಂದಾದು ಎದೋ ನಂಗುಲುಕು ಗೊತ್ತಿಲ್ಲ,ಅದು ಪರೆತಾದೆ ಅತ್ತೆ ಕೊರಾಂಗೋ, ಅಪೋರು ಅದೇ ಅದ್ದಿನು ಸೋನ್ನದು ಇಂಡಸ್ನು. ^{22 23} 22 ಆ ತಾಯಿ –ದೊಪು ಯೆಹೊದ್ಯರು ಬಿತ್ಗೊಂಡು ಅ ತರ ಸೋನ್ನುಸುನು:ಯಂತ್ಗು ಇಂಡೆಕೆ ಏದಾನ ಅತನತ್ತೆಯಿ ಕ್ರಿಸ್ತನು ಇಂಡು ಒಪ್ಪಿಗೊಂಡೆಕೆ ಆಯಿಲ್ಯ ಸಭಾಮಂದಿರತಿಂಡು ಬಹಿಷ್ಕರಿಸುರುದು ಇಂಡು ಮೊದಲೇ ತಿರ್ಮಾನಿಸಿಂಚುನು, 23 ಅತ್ಗು ಆ ತಾಯಿ –ದೊಪು –ಅದು ಪಾರೆತಾದೆ ಅತ್ತೆ ಕೊರಾಂಗೋ ಇಂಡಸ್ನು. ^{24 25} 24 ಅಪ್ಪೋರು ಯೆಹೊದ್ಯರು ಕುರುಡನಾಯಿಂದ ಅ ಮಣುಸುನ ಅಗುಸು –ದವುರುಕು ಸ್ತೋತ್ರ ಸಲ್ಲುಸು; ಈ ಮಣುಸು ಪಾಪಿಯಿಂಡು ನಂಗುಲುಕು ಗೊತ್ತಿದು ಇಂಡಸ್ನು, 25 ಅದು ಪ್ರತ್ಯುತ್ತರವಾಯಿ –ಆತನು ಪಾಪಿನೋ ಅಲ್ಯೋ ನನಕು ಗೊತ್ತಿಲ್ಲ:ಒಂಡು ಮಾತ್ರ ನಾಕು ಗೊತ್ತು ಅದು ಯಾಂದಾದಿಂಡೆಕೆ; ಮೊದಲು ನಾನು ಕರುಡನಾಯಿಂದೆ ; ಅನೇಕೆ ಇಪ್ಪೋರು ನನಕು ಕನ್ನುಗ ಕಾಂಗುತಿದು ಇಂಡಸ್ ^{26 27 28 29} 26 ಅಪ್ಪೋರು ಅಯಿಗ್ಯ ಅತ್ಗು ತಿರಿಗಿ –ನಿನಕು ಅದು ಯಂತ ಸೆಂಚು;ಕನ್ನುಗ ಏನಾಗು ವಂಚುನಿಂಡು ಕೊಕುನು, 27 ಅದು ಪ್ರತ್ಯುತ್ತರವಾಯಿ –ನಿಂಗುಲುಕು ಅಪ್ಪೋರೆ ಸೊನ್ನೇನೆ;ಅನೇಕೆ ನಿಂಗ ಕೊಕುಲ್ಲ;ಮತ್ತೆ ಮತ್ತೆ ಯಂತ್ಗು ಕೊಕರಂಗ?ಆತನ ಶಿಷ್ಯರಾಗುರುಕು ನಿಂಗುಲುಕು ಮನಸಿದೋ?ಇಂಡಸ್, 28 ಅಪ್ಪೋರು ಅಯಿಗ್ಯ ಅತ್ತ ದೂಷಿಸಿ ನೀನು ಆತನ ಶಿಷ್ಯ:ಅನೇಕೆ ನಂಗ ಮೋಶೆತ ಶಿಷ್ಯರು, 29 ಮೋಶೆನಂಟಿ ದವುರು ವಸ್ಸೇತಿದು ಇಂಡು ನಂಗುಲುಕು ಗೊತ್ತಿದು ; ಅನೇಕೆ ಇದು ಎಟ್ಯಾದೋ ನಂಗುಲುಕು ಗೊತ್ತಿಲ್ಲ ಇಂಡಸ್ನು, ^{30 31} 30 ಅಪ್ಪೋರು ಅ ಮಣುಸು ಅಯಿಲಿಕಿ ಪ್ರತ್ಯುತ್ತರವಾಯಿ ---ಆತನು ನಟ ಕನ್ನುಲ ತೆರೆದೆನ್ಕು ಆತನು ಎಟಿಯಾದು ಇಂಡು ನಿಂಗುಲುಕು ಗೊತ್ತಿಲ್ಲರದು ಆಶ್ಚರ್ಯವಾಯಿಕ್ಕಿರ ವಿಷಯ ಅಲ್ಯ? 31 ದವ್ರು ಪಾಪಿಲಾತ ಪ್ರಾರ್ಥನೆ ಕೊಕುದಿಲ್ಲ:ಅನೇಕೆ ಎದಾನ ದವ್ರತ್ತ ಚಿತ್ತದಂತೆ ನಡ್ದ್ನೇಕೆ ಅತ್ರ ಪ್ರಾರ್ಥನೆಯತ್ತೆಯಿ ದವ್ರು ಕೊಕಾದು ಇಂಗಾರದು ನಂಬುರುಕು ಗೊತ್ತಿದು. ^{32 33 34} 32 ಹುಟ್ಟುಕುರುಡನಾಯಿಕ್ಕಿರ ಮಣುಸುನತ ಕನ್ನುಲ ಸರಿ ಸೇಂದಿಕ್ಕಿರತ್ತ ಲೋಕಾದಿಯಿಂಡು ಎಮಾನು ಕೋಟಿಕ್ಕಿಲ್ಲ, 33 ಈ ಮಣುಸು ದವರಜಾಯಿಂಡು ವರಾದಿಂದೆಕೆ ಯಂತು ಸೇಯ್ಯದೆ ಇಕ್ಕ್ಯಂಚು ಇಂಡಸ್, 34 ಅತ್ಗು ಅಯಿಗ್ಯ ---ನೀನು ಕೆವಲ ಪಾಪತ್ಕೊರು ಪರ್ದಿಕ್ಕಿರವ ; ನೀನು ನಂಗುಲುಕು ಕೆಪ್ಪಿಕ್ಯರ್ಯ ಇಂಡು ಅತ್ತ ಗದರಿಸಿ ಬೆಲಿಕಿ ಹೊಟುಸುನು. ^{35 36 37 38} 35 ಅಯಿಗ್ಯ ಅ ಮಣುಸುನು ಬೆಲಿಕಿ ಹೋಟಿಕ್ಕಿರತ್ತ ಯೇಸು ಕೋಟು;ಅತ್ತ ಪಾತು ಅತ್ಗು---ನೀನು ದವ್ವುರ ಮವ್ವುನ ನಂಬರ್ಯ ? ಇಂಡಸ್ 36 ಅತ್ಗು ಅದು ಪ್ರತ್ಯುತ್ತರವಾಯಿ –ಕರ್ತನೇ ನಾನು ಅತನತ್ತೆಯಿ ನಂಬುರೆ ಆತನು ಏದು ಸ್ವಾಮಿ ಇಂಡಸ್, 37 ಯೇಸು ಅ ಮಣುಸುನುಕು ---ನೀನು ಅತನತ್ತೆಯಿ ಪಾತಿರಾ ;ನಿನ್ನಂಟಿ ವಸೆತ್ತಿಕ್ಕಿರ ನಾನೇ ಆತನು ಇಂಡಸ್, 38 ಅಪ್ಪೋರು ಅದು ---ಕರ್ತನೇ,ನಾನು ನಂಬರೇ ಇಂಡು ಸೋನ್ನಿ ಅತನತ್ತೆಯಿ ಅರಾದಿಸುಸು. ^{39 40 41} 39 ಯೇಸು –ನೋಡದವರು ನೋಡುವಂತೆಯೂ ನೋಡುವವರು ಕುರುಡರಾಗುವಂತೆಯೂ ನ್ಯಾಯ ತಿರ್ಪಿಗೋಸ್ಕರ ನಾನು ಈ ಲೋಕತ್ಗು ವಂದಿರೆ ಇಂಡಸ್, 40 ಅತನಂಟಿ ಇಂದ ಕೆಲವುರು ಈ ವೋಕುಲಾತ್ತೆಯಿ ಕೋಟು ---ನಂಗುಲು ಸಹ ಕುರುಡುರ್ರಾ ಇಂಡು ಅತನತ್ತೆಯಿ ಕೋಟುಸುನು, 41 ಅತ್ಗು ಯೇಸು ಅಯಿಲಿಕಿ ---ನಿಂಗ ಕುರುಡರಾಯಿಂದೆಕೆ ನಿಂಗಲಾಂಚಿಲಿ ಪಾಪ ಇಕ್ಕ್ಯಕ್ಕಿಲ್ಲ,ಅನೇಕೆ –ನಂಗ ಪಾಕರೋ ಇಂಡು ನಿಂಗ ಸೋನ್ನರತಿಂಡು ನಿಂಗಲತ ಪಾಪಗ ಇದು ಇಂಡಸ್.