^{1 2} 1 ದೌರ್ ನಾಮತ್ಗು ಆತನ ಬೋದನೆಕು ದೋಷಣೆ ಉಂಟಾಗರ್ಕಾನಿ ನೋಗತ ಆಧೀನತ್ಕುರು ಇಕ್ರ ಸೇವಕರಾದೇರು ತಂಗ್ಟ ಸ್ವಂತ ಯಜಮಾನರನ್ನ ಆದಿ ಮಾನತ್ಗು ಯೋಗ್ಯರು . 2 ವಿಶ್ವಾಷಿ ಯಜಮಾನರಿಯರು, ಆ ಯಜಮಾನರನ್ನ ಸಹೋದರರಿಂಡು ತಾತ್ಸಾರ ಸೈದೆ ಆದಾಯತ್ಕುರು ಪಾಲು ಹೊಂದ್ರಗ್ಯ ನಂಬ್ರಗ್ಯ ಪ್ರಿಯರು ಆಯಿನು ಇಂಡು ತಿಳ್ಜು ಸೇವೆ ಸೈಯಿರ್ದು . ಇತತ್ತೆಯ ಬೋಧಿಸಿ ಎಚ್ಚರಿಸಂಗೋ . ^{3 4 5} 3 ಎದನ ಬೇರೆ ವಿಷಯತ್ಕುರು ಉಪದೇಶಸೇದು ಅಂದೇಕೆ ನಗ್ಟ ಕರ್ತಾನ ಯೇಸು ಕ್ರಿಸ್ತನ ಸ್ವಸ್ಥವಾನ ಓಕುಕು ಭಕ್ತ್ಯನುಸಾರವಾಯಿ ಬೋದನೆಕಿ ಸಮ್ಮತಿಸ್ ದೇ ಹೊನೇಕೆ 4 ಅಂಥಗ್ಯ ವಡ್ನ ತಿಳ್ಗುದೆ ವಾಗ್ವಾದ ಸೇದು ಸೈರ ಭ್ರಾಂತಿಕುರು ಅಹಂಕಾರಿಯಯಿನು .ಇತಿಂಡು ಹೊಟ್ಟೆ ಕಿಚ್ಚು ಜಗಳ ದೋಷಣೆಯಿಂಡು ದುಸ್ಸಂಶಯ ಇಗ್ಯ ಉಂಟಾಕ್ದು . 5 ಇದಲ್ಲದೆ ಬುದ್ದಿಗೆಟ್ಟು ಸತ್ಯಹೀನರಾಯಿ ದೌರ್ ಭಕ್ತಿನ್ನ ಲಾಭಸಾದನವೆಂದೆಂನಿಸ್ದೆ ಈ ಮನುಷ್ಯಕುರು ವ್ಯರ್ಥವಾನ ವಿವಾದ ಉಂಟಾಕ್ದು .ಇಂಥಲ್ಯಕಿ ತುರ್ರಯಿರೊಂಗೋ. ^{6 7 8} 6 ಸಂತುಷ್ಟಿ ಸಹಿತವಾನ್ನ ಭಕ್ತಿ ಬೇರ್ದು ಲಾಭಾನೇ ಸರಿ . 7 ನಂಗ ಲೋಕತ್ಕುರು ಎಂದು ಅತ್ಕೊಡು ವರುಲ್ಲ ;ನಿಶ್ಚಯಾವಾಯಿ ಆತ್ಕುರು ಎತುನ್ನು ಅತ್ಗೊಂಡು ಹೊಗ್ಮಾಟೂ 8 ಆತಿಂಡು ಕಲಿಬಟ್ಟುಗ ಇಕ್ರವಾರಯಿ ಇತ್ಕುರು ತೃಪ್ತರಗೋಮು. ^{9 10} 9 ಆನೆಕೆ ಐಷ್ವರ್ಯರಗುರ್ದು ಇಗ್ರಗ್ಯ ಶೋದನೆಕುರು ಉರ್ಲ್ಕುರು ಸಿಕ್ಕಿಕೊಂಡು ಬುದ್ದಿಹೀನತೇ ,ಹಾನಿಕಾರವಾನ ದುರಾಶೆಕುರು ಬುಗಕ್ನು .ಇಂಥ ಆಸೆಕುರು ಮನುಷ್ಯರ್ನ್ನ ಸಂಹಾರ ನಾಶತ್ಕುರು ಮುಳುಗಿಸಗ್ನು . 10 ಹಣತ ಪ್ರೀತಿಯು ಸಕಲ ವಿಧವಾನ ಕೊಟ್ಟತ್ಗು ಮೂಲವಾಯಿದು .ಸ್ವಲ್ಪ ಮಂದಿ ಆತ್ಕಾಯಿ ಆತುರ ಪಟ್ಟು ನಂಬಿಕೆಯಿಂಡು ತಪ್ಪಿಹೋಯಿ ಶ್ಯನ್ನ ದುಃಖತ್ಕುರು ತಗುಲ್ನ ತಂಗೆ ತಿವಿಶಿಗ್ಯಾಗ್ನು. ^{11 12} 11 ಓ ದೌರ್ ಮನುಷ್ಯರೇ ,ನಿಗನೆಕೋ ಇತಿಂಡ್ ತುರ್ ಓಡಿ ಹೊಂಗೋ ;ನೀತಿ ಭಕ್ತಿ ನಂಬಿಕೆ ಪ್ರೀತಿ ತಾಳ್ಮೆ ಸಾತ್ವಿಕತ್ವ ಯಾತಾತೆಯ ಅನುಸರ್ಸೊಂಗೋ . 12 ನಂಬಿಕೆತ ಶ್ರೇಷ್ಟ ಹೋರಾಟ ಸೈಯಂಗೋ ,ನಿತ್ಯ ಜೀವವನ್ನ ಪುಡ್ಸಗೊಂಗೋ ; ಆತ್ಕಾಯಿ ನಿನ್ನು ಹಗ್ಸಿಕ್ರವಾನಯಿರ .ನೀನು ಶ್ಯಾನ ಸಾಕ್ಷಿ ಮುನ್ನಕು ನಾಲ್ಲ ಅರಿಕೆನ್ನ ಸೇನ್ದಿರಂಗ್ಲೆ. ^{13 14} 13 ಆದೆರ್ನು ಬದುಕಿಸ್ರ ದೌರ್ ಮೂನ್ಕು ಪೊಂತ್ಯ ಪಿಲಾತನ ಮುಂಕು ಶ್ರೇಷ್ಠ ಅರಿಕೆನ್ನ ಸಾಕ್ಷಿಕರಿಸ್ರ ಕ್ರಿಸ್ತ ಯೇಸು ಮುನ್ಕು ನಾನು ನಿಂಗುಲ್ಕು ಸೊಂಡ್ರದ್ದಿಂಡೆಕೆ . 14 ನಗ್ಟ ಕರ್ತನಾನ ಯೇಸು ಕ್ರಿಸ್ತನು ಪ್ರತ್ಯಕ್ಷ ನಾಗುರ್ತಂಕ ಈ ಆಜ್ಞೆನ ನಿಷ್ಕಳಂಕವಾಯಿ ನಿಂದಾರಯಿತವಾಯಿ ನೀನು ಕಪಾಡುರ್ದು. ^{15 16} 15 ಸುತ್ತಿ ಹೊಂದತಕ್ಕ ವಂಡೆ ಸರ್ವಾಶಕ್ತನು .ತಟ್ಟು ಸಮಯತ್ಕುರು ಆತನಾನ ಪ್ರತ್ಯಕ್ಷ ಪಡ್ಸಾಕು ;ಆ ಸರ್ವಶಕ್ತನು ರಾಜಾದಿರಾಜನು ಕರ್ತರ ಕರ್ತನು ಆಯಿದು ; 16 ಆದೊಂಡೆ ಅಮರತ್ವವುಳ್ಳ ಎದು ಅನ್ಚುಗು ಹೋಗರ್ಕು ಹಾಗ್ದೆಯಿಕ್ರ ವಲ್ಸುರ್ಕುರು ವಾಸಿಸ್ರದಾಯಿದು ;ಏ ಮನುಷ್ಯನು ಆತತೆಯ ಪಕುಲ್ಲ ; ಎದು ಪಕುರ್ಕು ಹಗ್ದಿಲ್ಲ ;ಅತ್ಗು ಮಾನನು ನಿತ್ಯಾದಿಕಾರನು ಇಕೊಟ್ಟು .ಆಮೇನ್ ^{17 18 19} 17 ಈ ಲೋಕತ್ಕುರು ಐಶ್ವರ್ಯ ಇಕ್ರಗ್ಯ ಅಹಂಕಾರಿಯಾಯಿನು ,ಅಸ್ಥಿರವಾನ ಐಶ್ವರ್ಯತ್ ಮೇನಿ ಭಾರವಾಸ ಅಕ್ದೆ ತಗ್ಟ ಅನುಬೋಗತ್ಕೊಸ್ಕಾರ ನಂಕು ಆದಿನು ಶ್ಯನ ತರ್ರ ಜೀವವುಳ್ಳ ದೌರ್ ಮೇನಿ ಭರವಸ ಆಕಿರ್ದುಯಿಂಡು 18 ಆಗ್ಯ ನಾಲ್ಲತ ಸೈರಗ್ಯ ಸತ್ಕಾರ್ಯತ್ಕುರು ಐಶ್ವರ್ಯವಂತರು ಪಾಲು ಕೊಡ್ಕರತ್ಕುರು ಸಿದ್ದವಾಯಿಕಾಕ್ನು ಪರೋಪಾಕರ ಸೈರಗ್ಯರಯಿನು . 19 ಮುಂಕಾಲತ್ಕುರು ನಾಲ್ಲ ಅಸ್ತಿರವಾಗ್ರಥ ತಂಗುಲ್ಕು ಕೊಡಿಸ್ಗುರ್ದುಯಿಂಡು ನಿತ್ಯ ಜೀವನ ಪುಡ್ಸುಗುರ್ದುಯಿಂಡು ಆಲ್ಕಿ ಆಜ್ಞಾಪಿಸಂಗೋ ^{20 21} 20 ಓ ತಿಮೊತಿಯಾನೆ ,ಅಪಭ್ರಷ್ಟವನ ವ್ಯಾರ್ಥ ಓಕುಕು ಸುಳ್ಳು ಪೇರಿಕ್ರ ಜ್ಞಾನತ ತರ್ಕತ್ಗು ತಪ್ಪಿಸ್ಗೊಂಡು ನಿಟ್ಟು ವಶತ್ಕು ತಂದಿಕ್ರಲ್ನ ಕಾಪಾಡು . 21 ಸ್ವಲ್ಪ ಮಂದಿ ಆ ಸುಳ್ಳು ಜ್ಞಾನ ಸೊಂಗೊಂಡು ನಂಬಿಕೆಯಿಂಡು ತಪ್ಪಿ ಹೊಸ್ನು .ಕೃಪೆ ನಿಗ್ಲೆಂಟ್ಟಿ ಇಕೊಟ್ಟು .ಆಮೆನ್ .