^{1 2} 1 ನಂಗ ನಿಂಗ್ಲುಕು ಪ್ರಸಿದ್ಧ ಪಡಿಸ್ರ ಜೀವವಾಕ್ಯ ಆದಿಯಿಂಡು ಮುನ್ನಿಂಡು ಇಂದದು, ನಂಗ ಅತ್ತ ಸೋವ್ಯರೆ ಕೋಟು ಕನ್ನಿಂಡು ಪಾತು ಮನಸ್ಸಿಂಡು ಪಾತು ಕೈಯಿಂಡು ಮುಟ್ಟಿರೋ. 2 ಆ ಜೀವ ಪ್ರತೆಕ್ಷ ಅಸು. ಅವ್ ವಂಚ್ಲಿ ಇಂದು ನಂಗ್ಲುಕು ಪ್ರತೆಕ್ಷ ಅನಾ ಆ ನಿತ್ಯ ಜಿವತ್ತೆಯ ನಂಗ ಪಾತು ಅತತ್ತೆಯ ಕುರ್ತು ಸಾಕ್ಷಿ ಸೋನ್ನಿ ಅತ್ತ ನಿಂಗ್ಲುಕು ಪ್ರಸಿದ್ದಿ ಪಡುಸ್ತ ಪಡ್ ಸರೋ, ^{3 4} 3 ನಂಗ ಪಾತು ಕೊಟಾದು ನಿಂಗ್ಲುಕು ಗೋತಾಯಿ ನಂಗ್ಲುಕು ಇಕ್ರ ಅನ್ಯೋನ್ಯತೆಕೊರು ನಿಂಗ ಸೇರುರ್ದು ಇಂಡು ಅತ್ತ ನಿಂಗ್ಲುಕು ಪ್ರಸಿದ್ಧ ಪಡುಸ್ತ ಇರೋ. ನಂಗ್ಲುಕು ಇಕ್ರ ಅನ್ಯೋನ್ಯತೆಯು ಅವ್ ಜೊತೆ ಅತ್ರ ಮವ್ ಅನಾ ಯೇಸು ಕ್ರಿಸ್ತನ ಜೋತೆಕೊರು ಇಕ್ರಂತಾದು. 4 ನಮ್ಮು ಭಯತರ ಸಂತೋಷವು ಪರಿಪೂರ್ಣ ಅಗ್ರುದು ಇಂಡು ನಂಗ ಈ ಒಕತ್ತೆಯ ವರಿತಯಿರೋ. ^{5 6 7} 5 ನಂಗ ಅತಿಂಡು ಕೋಟು ನಿಂಗ್ಲುಕು ತಿಳುಸ್ರ ವಾರ್ತೆ ಎಂದ ಇಂಡೆಕ್ಯ ದವ್ರು ವಲ್ಕಯಿದೂ ಮತ್ತೆ ಆತಂಚ್ಲಿ ಕತ್ಲು ಇಂಗ್ರದು ಇಲ್ಲ. 6 ನಂಗ ದವ್ರ ಜೊತೆ ಅನ್ಯೋನ್ಯತೆಕೋರು ಇರೋ ಇಂಡೋಟು ಕತ್ಲುಕೊರು ಪಾಪುತ್ಗೊರು ನಡ್ದೇಕೆ ಸುಳ್ಳು ಸೊಂಡ್ರಗ್ಯ ಆಯಿರೋ. ಸತ್ಯತ್ತೆಯ ಅನುಸರ್ ಸ್ರಗ್ಯ ಅಲ್ಲ. 7 ಅನೆಕ್ಯ ಅದು ವಲ್ಕುಕೊರು ಇಕ್ರುತರನೆ ನಂಗ ವಲ್ಕುಕೊರು ನಡ್ದೇಕೆ ನಂಗ ಒ೦ಡಲ್ ಜೊತೆ ಒಂಡಳು ಅನ್ಯೋನ್ಯತ್ತೆಕೊರು ಇರೋ ಮತ್ತೆ ಅತ್ರ ಮಾವ್ವನ ಯೇಸುತ ರಕ್ತ ಅದ್ದಿ ಪಾಪಲತ್ತೆಯ ನಿವಾರಣೆ ಸೆಂದು ನಂಗತ್ತೆಯ ಶುದ್ದಿ ಸೈಯಾಕು. ^{8 9 10} 8 ನಂಗ್ಲುಕೊರು ಪಾಪ ಇಲ್ಲಇಂಡು ನಂಗ ಸೋನ್ನೆಕ್ಯ ನಂಗ್ಲತ್ತೆಯ ನಂಗೆ ಮೋಸ ಸೇನ್ದ್ಗರೋ ಮತ್ತೆ ಸತ್ಯ ಇಂಗ್ರದು ನಂಗ್ಲಚ್ಲಿ ಇಲ್ಲ. 9 ನಂಗ್ಲ ಪಾಪಲತ್ತೆಯ ಒಪ್ಗೊಂಡು ಅರಿಕೆ ಸೇನ್ದೇಕೆ ಅದು ನಂಬಿಗಸ್ತನು ನೀತಿವಂತನು ಐಕ್ರತಿಂಡು ನಂಗ್ಲ ಪಾಪಲತ್ತೆಯ ಕ್ಷಮಿಸ್ಯೋಟು ಅದ್ದಿ ಅನೀತಿಯತ್ತೆಯ ಪರಿಹರಿಸಿ ನಂಗ್ಲತ್ತೆಯ ಶುದ್ದಿ ಸೈಯಾಕು. 10 ನಂಗ ಪಾಪ ಸೈಲ ಇಂಡು ಸೋನ್ನೆಕ್ಯ ಅತ್ತತ್ತೆಯ ಸುಳ್ಳುಗಾರನಯಿ ಸೈಯರೋ ಮತ್ತೆ ಅತ್ರ ವಾಕ್ಯ ನಂಗ್ಲ೦ಚ್ಲಿ ಇಲ್ಲ.