17 ¹ ಯೋಡು ಪಾತ್ರೆಲು ಪುಟ್ಕನು೦ಡ ಯೋಡು ಮ೦ದಿ ದೇವದೂತುಲಾ ಒ೦ಕುಡು ವಚ್ಚಿ ನಾ ತೋಡು ಮಾಟ್ಲಾಡಿ - ರಾ ಜಾಸ್ತಿ ನೂಳ್ ಮೀ೦ದ ವಾಸಿಚುಂಡ ಮಹಾ ಜಾರಸ್ರ್ತೀಕಿ ವಚ್ಚೆ ದ೦ಡನೆನ್ನಿ ನೀಕಿ ಸುಬಿಸ್ತಾನು . ² ದಾನ್ ಜೋತ್ಲಾ ಭೂರಾಜಲು ಜಾರತ್ವಮೂ ಸೇಸ್ಲೀ , ಮಲ್ಲಿ ಭೂನಿವಾಸಿಲು ದಾನ್ ಜಾರತ್ವಮೂ ಅನೇ ದ್ರಾಕ್ಷರಸಮ್ನೀ ತಾಗೀ ಮತ್ತಲೈಲೀ ಅನೀ ಸೋಪ್ಪೆ . ³ ಅಪ್ಡು ವಾಡ್ ದೇವರಾತ್ಮಾವಶಮೈ ನಾ ನನ್ನೀ ಎತ್ಕೋನಿ ಅಡವಿಕಿ ಪಾಯಾ . ಗಾನಾ ನಾನು ರಕ್ತವರ್ಣ ಮೃಗಮೂ ಮೀ೦ದ ಕುಚ್ಚನುಂಡ ಒಕ್ಕ ಸ್ರ್ತಿನೀ ಸೂಸ್ತಿ ; ಆ ಮೃಗ ಪೈ ಮೀ೦ದ ದೇವದೂಷಣೆ ಪೇರ್ಲು ನೀಡ್ಡು೦ಡೆ . ⁴ ದಾನ್ಕಿ ಯೋಡ್ ತಲಕೈಲೂ ಪದೀ ಕೊ೦ಬ್ಲೂ ವು೦ಡೆ . ಆ ಸ್ತ್ರಿ ಧೂಮ್ರವರ್ಣ ವಸ್ರ್ತಲ್ನೀ ರಕ್ತಾ೦ಬರನ್ನಿ ಧರಿಚ್ಕೊನಿ ಚಿನ್ನ , ರತ್ನ ಮುತ್ತು ಇವುಟ್ಲುನಿಚ್ಚ ಅಲ೦ಕರೀಚ್ಕ ನು೦ಡೆ ; ದಾನ್ ಸೇತ್ಲಾ ಒ೦ಕ್ಟಿ ಚಿನ್ನಮೂ ಬಟ್ಟಲೂ ಉ೦ಡೆ ; ಅದೀ ಅಸಹ್ಯಮೈನಾದಾನಿಚ್ಚ ಅಂಟ್ಟೆ ಜಾರತ್ವ ಸ೦ಬ೦ಧಮೈನಾ ಅಶುದ್ಧ ವಸ್ತುಲೀ೦ಚ್ಚ ನೀಡ್ಡುಂಡೆ . ⁵ ದಾನ್ ಹಣೆ ಮೀ೦ದ - ಬಾಬೆಲ್ ಅನೇ ಮಹಾನಗರಿ , ಭೂಮಿಲಾವು೦ಡ ಜಾರಸ್ರ್ತೀಕು ಅಸಹ್ಯಮೈನಾ ಕಾರ್ಯಲಾ ತಲ್ಲಿ ಅನೇ ಗೂಡಾರ್ಥವುಂಡ ಪೆರು ರಾಸು೦ಡೇ . ⁶ ಆ ಸ್ರ್ತಿ ದೇವಜನಲಾ ರಕ್ತಮ್ನೀ ಯೇಸುಕ್ಕೊಸ್ಕರಮೂ ಸಾಕ್ಷಿ ಇಚ್ಚಿ ಹತಮೈನಾಟ್ಟ ರಕ್ತಮ್ನೀ ತಾಗೀ ಮತ್ತಳಮೈ ವು೦ಡೆದಾನ್ನಿ ಸೂಸ್ತಿ . ⁷ ದಾನೀ ಸೂಸೀ ಅತ್ಯಾಶ್ಚರ್ಯಮೂನೀ ಪಟ್ತೀ . ಅಪ್ಡು ಆ ದೇವದೂತುಡು ನಾಕೀ ಸೋಪಿಂದಿ - ನೂವ ಎ೦ದ್ಗೂ ಆಶ್ಚರ್ಯಮೂ ಪಡ್ತವೀ ? ಆ ಸ್ರ್ತಿನೀ೦ಚನೂ ದಾನ್ ವಾಹನಮೂ ಅಯ್ಯುಂಡ ಯೋಡು ತಲಕೈಲೂ ಪದೀ ಕೋ೦ಬುಲು ಉಳ್ಳ ಮೃಗಮೀ೦ಚನೂ ಸೂಚಿತಮೈನಾ ಗೂಡರ್ಥತನ್ನಿ ನಾನೂ ನೀಕ್ಕಿ ವಿವರಿಸ್ತನು . ⁸ ನೂವಸುಸ್ನಾಟ್ಟ ಈ ಮೃಗಮೂ ಮೂದಲೂ ವು೦ಡೆ , ಇಪ್ಡು ಲೇದು , ಮಲ್ಲಿ ಅಧೋಲೋಕಮ್ನಿಚ್ಚ ಏರಿ ವಚ್ಚಿ ನಾಶ೦ಕ್ಕಿ ಪಾತಾದೀ . ಭೂನಿವಾಸಿಲೋಗ ಯೋಳೊಳ್ ಪೇರು ಲೋಕಾದಿಯೀ೦ಚ ಜೀವಬಾಧ್ಯರಾ ಪಟ್ಟಿಲಾ ರಾಸು೦ಡಲೇದು ವಾಳು ಈ ಮೃಗನೀ ಸೂಸೀ ಇದೀ ಮೊದಲು ವು೦ಡೆ , ಇಪ್ಡು ಲೇದು ಇಕ್ಕ ಮೀ೦ದ ವಚ್ಚೆದೀ ಅನೀ ತಿಳಿಚ್ಕೊನಿ ಆಶ್ಚರ್ಯಮ್ ಪಡ್ತಾರು . ⁹ ಇದೀ ಬುದ್ದಿವಂತುಡ್ಕಿ ಮಾತ್ರ ಗೊತ್ತೈತದೀ . ಆ ಯೋಡು ತಲಕೈಲೂ ಆ ಸ್ರ್ತಿ ಕುಚ್ಕನುಂಡ ಯೋಡು ಬೇಟ್ಟಲೂ ; ಇದಿಕಾಕುಂಡ ಅವೀ ಯೋಡು ಮ೦ದಿ ಅರಸುಲ್ನಿ ಸೂಚಿಸ್ತಾವೀ . ¹⁰ ವಾಲ್ಲ ಐದು ಮ೦ದಿಲು ಪಡಿಪೈನಾರು , ಒ೦ಕಡು ವು೦ಡಾಡು , ಮತೊಕ್ಡು ಇ೦ಕ್ಕ ರಾಲೇದು . ವಾಚ್ ಅಮೆಕಿ೦ದ್ದ ವಾಡು ಸ್ವಲ್ಪ ಕಾಲಮೂ ವು೦ಡಾಲ . ¹¹ ಮೊದಲ್ ವುಂಡಿ ಇಪ್ಡು ಲೇನಟ್ಟ ಆ ಮೃಗಮೂ ತಾನೇ ಎಯ್ಮದೀ ಅರಸು ; ವಾಡು ಆ ಯೋಡು ಮ೦ದಿ ಅರಸುಲ್ಕಿ ಸೇರುಂಡೋಡು ; ನಾಶ೦ಕ್ಕಿ ಪಾತಡು . ¹² ನೂವ ಸೂಸ್ನಟ್ಟ ಆ ಪೋದೀ ಕೊ೦ಬುಲು ಅಂಟ್ಟೆ ರಾಜ್ಯಮೂ ಇಕ್ಕ ಹೋ೦ದನೇ ವುಂಡ ಪದೀ ಮ೦ದಿ ಅರಸುಲು . ವಾಳು ಒಕ್ಕ ಗಳಿಗೆ ತನಕ ರಾಜುಲ್ ರೀತಿ ಆಳೆ ಅಧಿಕಾರಮ್ನೀ ಮೃಗಜೋತ್ಲಾ ಹೋ೦ದ್ತಾರು . ¹³ ವಾಳು ಒ೦ಕ್ಕೆ ಅಭಿಪ್ರಾಯಮೂ ವುಡ್ನೋಳ್ ಅಯ್ಯಿ ತಮ್ಮ ಶಕ್ತಿನೀ ಅಧಿಕಾರಮ್ನೀ ಮೃಗಂಕಿ ಇಸ್ತಾರು . ¹⁴ ವಾಳು ಯಜ್ಞದಕುರಿಯಾದಾತುಡ ಮಿಂದ ಯುದ್ದಮ್ ಸೇಸ್ತಾರು ಅಯ್ತೆ ಆತಡು ಕರ್ತುಡ ಕರ್ತುಡು ರಾಜಾಧಿರಾಜುಡು ಐಯ್ಯು೦ಡೆದಾನೀ೦ಚ್ಚ ವಾಳ್ನೀ ಜಯೀಸ್ತಾಡು ; ಮಲ್ಲಿ ದೇವುಡು ಪೀಲಿಚ್ನೋಳು ದೇವುಡು ಆರಿಬಿಚ್ಕೋಳೂ ನ೦ಬಿಗಸ್ತಲು ಐನಾಟ್ಟ ಆತುಡು ತೊಟೋಳು ಆ ಜಯಮ್ಲಾ ಪಾಲುಗಾರುಲ್ ಐತಾರು . ¹⁵ ಇಕ್ಕ ಆ ದೇವದೂತುಡು ನಾಕಿ ಸೋಪ್ಪಿಂದೀ - ಆ ಜಾರಸ್ತ್ರೀ ವಾಸಿಂಚ್ಚೆ ನೂಳುಳ್ನಿ ಸೂಸ್ತ್ವಿಕದಾ ? ಅವೀ ಪ್ರಜೆ ಸಮೂಹಮೂ ಜನಲು ಭಾಷೆಲ್ನಿ ಸೂಚಿಸ್ತಾವೀ . ¹⁶ ಇದೀ ಕಾಕು೦ಡ ಪದೀ ಕೊ೦ಬುಲ್ನೀ ಮೃಗನ್ನಿ ಸೂಸ್ತ್ವಿಕದಾ ? ಇವುಟ್ಲೀ೦ಚ ಸೂಚಿತಮೈನೋಳು ಆ ಜಾರಸ್ತ್ರಿನ್ನಿ ದ್ವೆಷಿಚ್ಚಿ ದಾನ್ನೀ ಗತಿಗೆಟ್ಟ೦ದೀವಳೈಯ್ಯಿ , ಬಟ್ಲುಲೆನ್ದ ರೀತಿ ಅಯ್ಯಿ , ಸೇಸೀ ದಾನ್ ಮಾ೦ಸನೀ ತಿನ್ನಿ ದಾನ್ನೀ ಆಗ್ಗಿಯಿ೦ಚ್ಚ ಕಲ್ಚೆಸ್ತಾರು . ¹⁷ ಯದ್ಗು ಅಂಟ್ಟೆ ವಾಳು ದೇವುಡ ಅಭಿಪ್ರಾಯನ್ನಿ ನೆರವೇರಿಚ್ಚೆದಾನ್ಕು ಒಕ್ಟೆ ಅಭಿಪ್ರಯಮೂ ವುಳ್ಳೋಳ್ ಅಯ್ಯಿ ತಮ್ಮ ರಾಜ್ಯನ್ನಿ ಮೃಗಂಕಿ ಇಚ್ಚೆಕೂ ದೇವುಡು ತನ್ನ ವಚನಮೂ ನೆರವೇರೇ ತನಕ ವಾಳ್ ಹೃದಯನ್ನಿ ಪ್ರೆರಿಚ್ನಾಡು . ¹⁸ ನೂವ ಸುಸ್ನಾಟ್ಟ ಆ ಸ್ರ್ತಿ ಭೂರಾಜುಲ್ ಮೀ೦ದ ಅಧಿಕಾರಮ್ನೀ ಹೋದು೦ಡ ಮಹಾನಗರಿ .