15 ¹ ಪರಲೋಕಮ್ಲಾ ಆಶ್ಚರ್ಯಕರಮೈನಾ ಇಕ್ಕೋಕ ಮಹಾಲಕ್ಷಣಮು ನಾಕಿ ಕಮಡಿಚ್ಚೆ . ಯೋಡು ಮಂದಿ ದೇವದೂತ್ಲಾ ಸೇತ್ಲಾ ಯೋಡು ಉಪದ್ರವಲೂ ವುಂಡೆ ; ಇವಿ ಕಡೆ ಉಪದ್ರವಲೂ ; ಇವುಟ್ಲಾ ದೇವುಡ ರೌದ್ರಮು ಮುಗಿಸ್ಸುಂಡೆದೀ . ² ಅಗ್ಗಿ ಬೇರ್ಸ್ನಾಟ್ಟ ಗಾಜು ಸಮುದ್ರಮೋ ಅನೆ ಹೇಮೋ ಒಕ್ಟಿ ನಾಕಿ ಕಮಡಿಚ್ಚೆ . ಅಪ್ಡು ಮೃಗ ವಿಗ್ರಹಂಕಿ ನಮಸ್ಕರಿಸ್ದನೆ ದಾನ್ ಪೇರ್ ಅಂಕಿನೀ ಮುದ್ರೆನ್ನಿ ಹೇಬಿಚ್ಕೋದನೆ ದಾನ್ ಮಿಂದ ಜಯಮ್ ಹೊದ್ನೋಳು ದೇವುಡ ಸೇವಾರ್ಥಮೈನಾ ವೀಣೇಲ್ನಿ ಸೇತ್ಲಾ ಪುಟ್ಕೊನ್ನಿ , ³ ಗಾಜು ಸಮುದ್ರ ಹತಿರ್ಲಾ ನಿಲ್ಕೋನೀ ದೇವುಡ ದಾಸಮ್ ಐನ್ನಾಟ್ಟ ಮೋಶೆ ಹಾಡ್ನಿ ಯಜ್ಞಕುರಿಯಾದಾತುಡ ಹಾಡ್ನಿ ಹಾಡ್ತಾ ದೇವುಡ್ ಐನಾ ಕರ್ತುಡಾ ಸರ್ವಶಕ್ತುಡ , ನೀ ಕೃತ್ಯಲು ಮಹತೈನಾವೀ ಆಶ್ಚರ್ಯಕರಮೈನಾವೀ , ಐನಾವೀ . ಸರ್ವ ಜನಾ೦ಗಲಾ ಅರಸುಡಾ ನೀ ಮಾರ್ಗಲು ನ್ಯಾಯಮು ಸತ್ಯಮೂ ಐನಾವೀ . ⁴ ಕರ್ತುಡ ನೀ ನಾಮಕ್ಕಿ ಭಯಮ್ಪಡ್ದನೇ ವುಂಡೋಳು ದಾನ್ನಿ ಘನಮೈಯಿಂದ್ದಿ ಅನಿ ಒಪ್ಕಂದನೆ ವುಂಡೋಳು ಯೋಳೈತ್ನೂ ವುಂಟ್ಟೆ ? ನೂವೊಕ್ಕಡೆ ಪರಿಶುದ್ದುಡು ನೀ ನೀತಿಯುಂಡ ಕೃತ್ಯಲು ಪ್ರಾಕಾಶನ್ಕಿ ವಚ್ಚಿನ್ದಾಂಕಿ ಎಲ್ಲಾ ಜನಾ೦ಗಲು ವಚ್ಚಿ ನೀ ಸನ್ನಿಧಾನಮ್ಲಾ ನಮಸ್ಕಾರಮ್ ಸೇಸ್ತಾರು ಅನಿ ಸೋಪ್ಲಿ . ⁵ ಇದ್ ಅಮೆಕಿ೦ದ್ದ ನಾನು ಸೂಸ್ನಾಪ್ದು ಪರಲೋಕಮ್ಲಾ ವುಂಡ ದೇವದರ್ಷನದೀ ಗುಡಾರ ಪವಿತ್ರ ಸ್ಥಾನಮು ತೇರ್ಸೆ . ⁶ ದಾನ್ಲೋಗನಿಚ್ಚ ಯೋಡು ಉಪದ್ರವಲ್ನಿ ಸೇತ್ಲಾ ಪುಟ್ಕನುಂಡ ಆ ಯೋಡು ಮಂದಿ ದೇವದೂತುಲು ವಚ್ಲಿ . ವಾಳ್ ಪ್ರಕಾಶಮು ನಿರ್ಮಲಮೂ ಐನಾ ನಾರುಮಡಿನೀ ಧರಿಚ್ಕೊನುಡ್ಲಿ ; ವಾಳ್ ಎದೇಲ್ಕಿ ಚಿನ್ನಮ್ದಿ ಪಟ್ಟಿನೀ ಕಟ್ಕನುಡ್ಲಿ . ⁷ ನಾಲ್ಗು ಜೀವಿಲ್ಲಾ ಒಕ್ಟಿ ಆ ಯೋಡು ಮಂದಿ ದೇವದೂತುಲ್ಕಿ ಯುಗಯುಗಾ೦ತರಮ್ಲಾನು ಜೀವಿಚ್ಚೆ ಆತುಡ್ ಐನಾ ದೇವುಡ ರೌದ್ರಮ್ನಿಚ್ಚ ನಿಂಡು೦ಡ ಯೋಡು ಚಿನ್ನ ಪಾತ್ರೆಲ್ನಿ ಇಚ್ಛೆ . ⁸ ದೇವುಡ ತೇಜಸ್ಸಾನ್ನಿಧ್ಯನಿಚ್ಚನೂ ಆತುಡ ಶಕ್ತಿಯಿ೦ಚನೂ ಉಂಟೈನಾ ಪಗನಿಚ್ಚ ಪವಿತ್ರ ಸ್ಥಾನಮು ನಿಂಡ ಕಾರಣಮೂ ಆ ಯೋಡು ಮಂದಿ ದೇವದೂತುಲಾ ಸೇತ್ಲಾ ವುಡ್ನಾಟ್ಟ ಯೋಡು ಉಪದ್ರವಲೂ ತಿರೇ ತನ್ಕ ಆ ಪವಿತ್ರ ಸ್ಥಾನಮ್ಲೋಗ ಪ್ರವೇಶಿಚ್ಚೆಕಿ ಯೋಳ್ ಇ೦ಚನೂ ಕಾಲೇದು .