2 ¹ ಕೊಂಚ್ಮು ದಿನ್ಮಾಯ್ಮಿಂದ ವಾಡು ಕೆಪೆರ್ನೌಮಿಕಿ ತಿರ್ಗಿ ವಚ್ಚೆ . ಇಂಟ್ಲಾವುoಡಾಡನೆ ವರ್ತ್ಮಾನ್ಮು ಹಬ್ನಪ್ಪ್ದು ಎಕ್ವಜನುಮ್ಲು ಸೇರ್ಕೊನಿ ವಚ್ಚಿನ್ದಾನಿಂಚ ವಾಕ್ಲ ಹತ್ರುಮ್ಲಾವ್ನಿ ಜಾಗ್ಮುಂಡ್ಲೆ . ² ವಾಡು ವಾಳ್ಕಿ ದೇವುಡು ವಾಕ್ಯಾನಿ ಸೊಪ್ತಾವುಂಡೆ . ³ ಅಂತ್ಪದ್ಗಿ ಕೆಲುವ್ಲು ಒಕ್ಡು ಪಾರ್ಶ್ವವಾಯ್ಮು ರೋಗ್ಮೊಡ್ನಿ ನಾಲ್ಗು ಮಂದಿಲಿಂಚ ಮೋಸ್ಕೊನಿ ಯೇಸು ದೆಗ್ರುಕಿ ಎತ್ಕೊಚ್ರಿ . ⁴ ಜನಲು ಗುಂಪಾಯುಂಡೆ ದಾನಿಂಚ ವಾಳು ಯೇಸು ದೆಗ್ರುಕಿ ಸೇರ್ಕುನ್ನ ವಾಡುಂಡಿನ ಇಂಟ್ ಪೈನ್ಚಾವ್ಣಿನಿ ಇಪ್ಪಿ ದ್ವಾರ್ಮು ಸೇಸಿ ಪಾರ್ಶ್ವವಾಯ್ಮು ರೋಗ್ಮೊಡು ಪೊಂಗೊನುಂಡಿನ ಹಾಸ್ಗ್ನಿ ದಿಂಪ್ರಿ . ⁵ ಯೇಸು ವಾಳ್ ನಂಬುಕ್ಮುನಿ ಸೂಸಿ ಅ ಪಾರ್ಶ್ವವಾಯ್ಮು ರೋಗಿಕಿ - ಕೊಡ್ಕಾ, ನೀ ಪಾಪಲು ಕ್ಷಮಿಚ್ನಾವಿ ಅನಿ ಸೊಪ್ಪೇ. ⁶ ಶಾಶ್ತ್ರಿಲ್ಲ ಕೆಲುವ್ಲು ಆನ ಕುಚ್ಕೊನುಂಡಿ - ⁷ ಎಂದ್ಗೂ ಇಟ್ಟ ಮಾಟ್ಲಾಡ್ತಾಡು ? ಇದಿ ದೇವುಡು ದೂಷಣ್ಮು . ದೇವುಡೋಕ್ಡೆ ಹೊರ್ತು ಇಂಕ್ಯೋಳು ಪಾಪಲ್ನಿ ಕ್ಷಮಿಚ್ಚೋಳು? ಅನಿ ವಾಳ್ವಾಳ್ ಮನ್ಸ್ಲ ಅನ್ಕೊನ್ರಿ . ⁸ ಇಟ್ಟ ಅನ್ಕೋನೆದಾನ್ನಿ ಅಪ್ಡೇ ಯೇಸು ತನ್ ಆತ್ಮುಲ ತಿಳ್ಚ್ಕೊನಿ ವಾಳ್ಕಿ- ಮೀರು ಮೀ ಮನ್ಸ್ಲ ಎಂದ್ಗೂ ಇಟ್ಟ ಅನ್ಕೊಂಟಾರು ? ಯಾವ್ಡಿ ಸುಲ್ಬ್ಮು ? ⁹ ನೀ ಪಾಪಾಲು ಕ್ಷಮಿಚ್ನಾವಿ ಅನೇದೋ? ಲೇಸಿ ನಿ ಹಾಸ್ಗ್ಮುನಿ ಸೀಸ್ಕೊನಿ ಪದ ಅನೇದೋ? ¹⁰ ಆಯ್ತೆ ಪಾಪಲ್ನಿ ಕ್ಷಮಿಚ್ಚಿಇಡ್ಸೇಕಿ ಮನುಷ್ಯುಕುಮಾರುಡುಕಿ ಭೂಲೋಕ್ಮುಲ ಅಧಿಕಾರ್ಮು ವುoಡಾದನೇದಿ ಮೀಕಿ ತಿಲಿಯಾಲ ಅನಿ ಸೊಪ್ಪಿ ಪಾರ್ಶ್ವವಾಯು ರೋಗ್ಮೊಡ್ನಿ ಸೂಸಿ - ¹¹ ಲೇಸಿ ನೀ ಹಾಸ್ಗ್ಮುನಿ ಎತ್ಕೋನಿ ಇಂಟ್ಕಿ ಪೋ ಅನಿ ಮೀಕಿ ಸೊಪ್ತಾನು ಅನೆ. ¹² ವಾಡು ಲೇಸಿ ಅಪ್ಪ್ದೆ ವಾಡ್ ಹಾಸ್ಗ್ಮುನಿ ಸೀಸ್ಕೋನಿ ಅಂದ್ರು ಮುಂದ್ರ ಪಾಯೇ . ದಾನ್ಕಿ ಅಂದ್ರು ಬೆರ್ಗಾಯಿ ಇಂದಾಕ ಮಾಮು ಇಟ್ಟೆದ್ನಿ ಎಪ್ಡೂ ಸೂಡ್ನೆಲೇದು ಅನಿ ಸೊಪ್ಪ್ತಾ ದೇವುಡ್ನಿ ಕೊಂಡಾಡ್ರಿ. ¹³ ಯೇಸು ಲೇಸಿ ತಿರ್ಗಿ ಸಮುದ್ರುಮು ದೆಗ್ರುಕಿ ಪಾಯೇ. ಜನಲು ಗುಂಪಂತ ದೆಗ್ರುಕಿ ವಚ್ನಪ್ಡು ವಾಡು ವಾಳ್ಕಿ ಉಪದೇಶ್ಮು ಸೇಸೆ . ¹⁴ ವಾಡು (ಆನಿಂಚ ) ಪಾಯೇನಪ್ಪ್ದು ಸುಂಕ್ಮುಕಿ ಕುಚ್ಚೋನುಂಡಿನ ಆಲ್ಫಾನುಡು ಕೊಡ್ಕಾಯಿನ ಲೇವಿಯುಡ್ನಿ ಸೂಸಿ - ನನ್ನೀ ಹಿಂಬಾಲಿಯ್ಯಿ ಅನಿ ವಾಡ್ನಿ ಪಿಲ್ಚೆಕಿ ವಾಡು ಲೇಸಿ ಯೇಸು ಎನ್ಕ ಪಾಯೇ. ¹⁵ ಆಮಿಂದ ಯೇಸು ವಾಡ್ ಇoಟ್ನೋನ ಊಟುಮ್ಕಿ ಕುಚ್ಚೋನುನ್ಡ್ನಪ್ಪ್ದು , ಬಹು ಮಂದಿಲು ಸುಂಕ್ಮೊಳು ಪಾಪಿಲು ಯೇಸು ಮಲಿ ವಾಳ್ ಶಿಷ್ಯುಲ ಪಂಕ್ತಿಲಾನೆ ಕುಚ್ಚೊನ್ರಿ . ¹⁶ ಅಟ್ಟೋಳು ಬಹು ಮಂದಿಲು ವುಂಡ್ರಿ . ಪರಿಸಾಯುಲಾಯ್ನ ಶಾಸ್ತ್ರಿಲು ಯೇಸು ಎನ್ಕ ಪಾಯಿ ವಾಡು ಪಾಪಿಲು ಮಲಿ ಸುಂಕ್ಮೋಳ್ ಜೊತ್ಲ ಊಟ್ಮು ಸೇಸೇದ್ನಿ ಕನಿ ಶಿಷ್ಯುಲ್ಕಿ - ವೂಡು ಸುಂಕ್ಮೋಳ್ ಜೊತ್ಲ ಮಲಿ ಪಾಪಿಲು ಜೊತ್ಲ ಊಟ್ಮು ಸೇಸ್ತಾಡು ಸೂಡoಡ್ರಿ ಅನಿ ಸೊಪ್ಪೇ . ¹⁷ ಯೇಸು ದಾನ್ನಿ ಇನಿ - ಕ್ಷೇಮುಲವುಂಡೋಳ್ಕಿ ವೈದ್ಯುಡು ಬೇಕಾವ್ಲೇ , ಕ್ಷೇಮುಮು ಲೇನೋಳ್ಕಿ ಕಾವಾಲ . ನಾನು ನೀತಿವಂತುಲ್ನಿ ಪಿಲ್ಚೆದಾನ್ಕು ವಚ್ನೋಡ್ಕಾದು , ಪಾಪಿಲ್ನಿ ಪಿಲ್ಚೇಕಿ ವಚ್ನೋಡು ಅನೆ. ¹⁸ ಇದ್ಕಾಕುನ್ನ ಯೋಹಾನುಡು ಶಿಷ್ಯುಲು ಪರಿಸಾಯುಲು ಉಪ್ವಾಸ್ಮು ವುಂಡ್ರಿ . ವಾಳು ಯೇಸು ದೆಗ್ರುಕಿ ವಚ್ಚಿ - ಯೋಹಾನುಡು ಶಿಷ್ಯುಲು ಪರಿಸಾಯುಲು ಶಿಷ್ಯುಲು ಉಪ್ವಾಸ್ಮು ಸೇಸ್ತಾರೆ ? ನೀ ಶಿಷ್ಯುಲು ಎಂದ್ಗೂ ಉಪ್ವಾಸ್ಮು ಸೇಸೇಟ್ಲೆ ? ¹⁹ ಅನಿ ಅಡ್ಗೆಕಿ ಯೇಸು ವಾಳ್ಕಿ - ಜನಲು ವಾಳ್ ಜೊತ್ಲ ಮದಲಿಂಗುಡು ವುನ್ಡ್ನಪ್ಡು ಉಪ್ವಾಸ್ಮು ವುಂಡೆದಿ ಉಂಟಾ? ಮದಲಿಂಗುಡು ವಾಳ್ ಜೊತ್ಲ ವುಂಡೆಗಂಟ ವಾಳು ಉಪ್ವಾಸ್ಮು ಸೇಸೆಕಾಯೇಟ್ಲೆ . ²⁰ ಆಯ್ತೆ ಮದಲಿಂಗುಡ್ನಿ ವಾಡ್ ದೆಗ್ರಿಂಚ ಸೀಸ್ಕೋನಿ ಪಾಯೇ ಕಾಲ್ಮು ವಸ್ತಾದಿ , ಆ ಕಾಲುಮ್ಲಾನೆ ಉಪ್ವಾಸ್ಮು ಸೇಸ್ತಾರು. ²¹ ಯೋಳು ಕೊತ್ ಬಟ್ಳು ತುಂಡ್ನಿ ಪಾತ್ ಬಟ್ಳುಕಿ ತ್ಯಾಪ ಏಸೇಟ್ಲೆ , ಏಸ್ತೆ ಆ ಕೊತ್ ತ್ಯಾಪ ಬಟ್ಳುನಿ ಹಿಂಜೆದಾನ್ನಿಂಚ ಸಿಂಪಾತದಿ ²² ಮಲಿ ಪಾತ್ ಬುದ್ದಲಿಲ ಕೊತ್ ದ್ರಾಕ್ಷಾರಸುಮ್ನಿ ಯೋಳು ಏಸ್ಪೆಟ್ಟೆಟ್ಲೆ , ಪೆಡ್ತೆ ಆ ದ್ರಾಕ್ಷಾರಸ್ಮು ಬುದ್ದಲಿನಿ ಪೊಗ್ಲಿ ದ್ರಾಕ್ಷರಸ್ಮು ಬುದ್ದಲಿಲು ರೊಂಡು ಶೆಡ್ಪಾತಾವಿ . ಆಯ್ತೆ ಕೊತ್ ದ್ರಾಕ್ಷರಸ್ಮುನಿ ಕೊತ್ ಬುದ್ದ್ಲಿಲ (ಏಸ್ಪೆಟ್ಟೆದಿ) ಅನಿ ಸೊಪ್ಪ್ರಿ. ²³ 23 ಯೇಸು ಸಬ್ಬತ್ ದಿನುಮ್ಲ ಪೈರ್ಲು ಸೇನ್ಲು ಮಿಂದ ಪಾಯೇನಪ್ಪ್ದು, ಯೇಸು ಶಿಷ್ಯುಲು ನಡ್ಸ್ತಾ ತೆನೆಲ್ನಿ ಇರ್ಸ್ಕೊನ್ರಿ . ²⁴ 24 ಪರಿಸಾಯುಲು ವಾಡ್ನಿ - ಸೂಡಿ ವೂಳು ಸಬ್ಬತ್ ದಿನ್ಮ್ಲ ಸೈಬಾರ್ದ್ ಕೆಲ್ಸುಮ್ನಿ ಎಂದ್ಗೂ ಸೇಸ್ತಾರು ಅನಿ ಅಡ್ಗ್ರಿ . ²⁵ ವಾಡು ವಾಳ್ಕಿ - ದಾವಿದುಡು ತಾನು ವಾಳ್ ಜೊತ್ಲ ವುಂಡೋಳು ಕೊರ್ತ್ಮುವುನ್ಡೋಳಾಯಿ ಆಕ್ಲಾಯಿ ಏಮಿ ಸೇಸ್ತಡನೆದ್ನಿ ಮೀರು ಎಪ್ಡಾರ ಓದ್ಲೆದ? ²⁶ ವಾಡು ಮಹಾಯಾಜಕುಡೈನ ಅಬಿಯಾತರುಡಿನ ಕಾಲುಮ್ಲ ಮಂದಿರ್ಮುನೊಂಕಿ ಪಾಯಿ ಯಾಜಕುಲು ಹೊರ್ತು ಇಂಕ್ಯೋಳು ತಿನ್ಗುಡ್ದು ನೈವೆದ್ಯುಮು ರೊಟ್ಟ್ಲುನಿ ತಾನು ತಿನಿ ವಾಳ್ ಜೊತ್ಲ ವುಂಡೋಳ್ಕು ಇಚ್ನಾಡೆ ? ಅನಿ ಸೊಪ್ಪೇ . ²⁷ ಮಲಿ ವಾಡು - ಸಬ್ಬತ್ ದಿನ್ಮು ಮನುಷ್ಯುಲು ಗೋಸ್ಕರ್ಮು ಉಂಟಾಯ್ನೆ ಹೊರ್ತು ಮನುಷ್ಯುಲು ಸಬ್ಬತ್ ದಿನ್ಮುಕೋಸ್ಕರ್ಮು ಉಂಟಾವ್ಲೆದು , ²⁸ ಇಟ್ಟುಂಡೆದಾಯಿ ಮನುಷ್ಯ ಕುಮಾರುಡು ಸಬ್ಬತ್ ದಿನುಮ್ಕಿ ರಾಜುಡೈನಾಡು ಅನೆ.