¹ ಆ ದಿನುಮ್ಲ ಸ್ನಾನಿಕುಡೈನ ಯೋಹಾನುಡು - ಪರಲೋಕರಾಜ್ಯ್ಮು ಹತ್ರುಮಾಯೇ, ² ದೇವುಡು ತೊಟ್ಗಿ ತಿರಿಕೊಂಡ್ರಿ ಅನಿ ಯೂದಾಯ್ಮಿನ ಅಡವಿಲೋ ಸಾರ್ಕೊನಿ ಸೋಪ್ಪ್ತಾವಚ್ಚೆ. ³ ಕರ್ತುಡು ದಾವ್ನಿ ಸಿದ್ಮು ಸೇಯನ್ದ್ರಿ, ವಾಡ್ ದಾವ್ನಿ ನೆಟ್ಗ ಸೇಯನ್ದ್ರಿ ಅನಿ ಅಡ್ವಿಲೋ ಕೂಸೋಡಿನ ಶಭ್ದ್ಮು ವುಂಡಾದಿ ಅನಿ ಪ್ರವಾದುಡಾಯಿನ ಯೇಶಾಯುಡಿಂಚ ಸೂಚಿತ್ಮಾಯ್ನೋಡು ವೂಡೆ. ⁴ ಈ ಯೋಹಾನುಡ್ಕಿ ಒಂಟಿನ ಎಂಟುಕ್ಲಿನಿ ಹೊದುಕ್ಮಿನಿ ನಡುಮ್ಲ ತೊಗ್ಲಿನ ನಡ್ಮ್ಕಟ್ಟು ವುಂಡೆ. ವಾಡ್ಕಿ ಮಿಡ್ತೆಲು ಮಲ್ಲಿ ಕಾಡ್ಜೆನ್ಲು ಆಹಾರ್ಮಾಯಿಂಡೆ. ⁵ ಅಪ್ಡು ಯೆರೂಸಲೇಮುಮು ಅಂತ ಯೂದಾಯ್ಮು ಯೋರ್ದೊನ್ ಏರಿನ ಸುತ್ಲು ವುಂಡೆ ಅನ್ನಿ ಸೀಮ್ಲು ವಾಡ್ ಜೊತ್ಕಿ ಪಾಯಿ. ⁶ ವಾಳು ವಾಳ್ ವಾಳ್ ಪಾಪಲ್ನಿ ಸೊಪ್ಕೊನಿ ಯೋರ್ದೊನ್ ಏರ್ಲ ವಾಡಿಂಚ ದೀಕ್ಷಾಸ್ನಾನುಮ್ನಿ ಸೇಬಿಚ್ಕೊಂಟವುoಡ್ರಿ. ⁷ ಆಯ್ತೆ ವಾಡು ಪರಿಸಾಯುರ್ಲಾ ಸದ್ದುಕಾಯುರ್ಲಾ ಅನೇಕ್ಲು ವಾಡಿಂಚ ಸ್ನಾನ್ಮು ಸೇಬಿಚ್ಕೊನೆಕಿ ವಚ್ಚೆದ್ನಿ ಕನಿ ವಾಳ್ಕಿ ಎಲೈ ಸರ್ಪ್ಮು ಜಾತೋಳ, ಮುಂದ್ರ ಕನೋಚ್ಚೆ ದೇವುಡು ಕೋಪ್ಮಿಂಚ ತಪ್ಪಿಚ್ಕೊನೆಕಿ ಮೀಕಿ ಉಪದೇಶ್ಮು ಸೇಸ್ನೋಲ್ಯೋಳು? ⁸ ಅಟ್ಟಾಯತೆ ಮೀ ಮನ್ಸು ದೇವುಡು ತೊಟ್ಗಿ ತಿರಿಕೋನೆ ಅನೆದ್ನಿ ತಕ್ಕ್ಮು ಪಲ್ಮಿಂಚ ಸೂಬಿಯಂಡ್ರಿ. ⁹ ಅಬ್ರಾಮುಡು ಮಾಕಿ ಮೂಲಪುರುಷುಡುಕದ ಅನೆ ಆಲೋಚುಮ್ನಿ ಇಡಿಯಂಡ್ರಿ. ದೇವುಡು ಅಬ್ರಾಮುಡ್ಕಿ ಈ ರಾಳ್ಳಿoಚಾನು ಬಿಡ್ಲುನಿ ಪುಟ್ಟಿಚೆಕಿಬಲ್ಲುಡನಿ ಮೀಕು ಸೊಪ್ತಾನು. ¹⁰ ಇಪ್ಡೆ ಮಾನ್ಲು ಬೇರ್ಲುಕಿ ಕೊಡ್ಳಿ ಎಸಿಂದಿ, ಮಂಚ್ಚಿ ಪಲ್ಮನಿ ಈಕುನ್ನ ಪ್ರತಿಯೋಕ್ಟಿ ಮಾನ್ನಿ ನರ್ಕಿ ಆಗ್ಲೋ ಏಸ್ತಾರು. ¹¹ ನಾನ್ಮಾತ್ರುಮು ಮೀ ಮನ್ಸು ತಿರಿಕೊವಾಲನಿ ಮೀಕಿ ನೂಳ್ಲೋ ಸ್ನಾನ್ಮು ಸೇಬಿಸ್ತಾನು. ಆಯ್ತೆ ನಾ ಎನ್ಕ ವಚ್ಚೋಡು ನಾಕಿಂತ ಶಕ್ತುಡು, ವಾಡ್ ಶೋಪ್ಪುಲ್ನಿ ಮೊಸೇಕು ನಾನು ಯೋಗ್ಯುಡು ಕಾದು , ವಾಡು ಪವಿತ್ರಾತ್ಮುಡಿನ್ಚಾನು ಅಗ್ಲಾನು ಮೀಕಿ ಸ್ನಾನ್ಮು ಸೇಬಿಸ್ತಾನು. ¹² ವಾಡು ಮೊರಮ್ನಿ ಸೇತ್ಲಾನೆ ಪಟ್ಕೊನ್ನಾಡು, ಕಣoಲ ರಾಶಿನಿ ತೂರಿ ಹಸನ್ಮು ಸೇಸಿ ವಾಳ್ ಗೋದುಲ್ನಿ ಕಣ್ಜುಮ್ಲ ನಿಮ್ಪ್ಕೋನಿ ಹೊಟ್ನಿ ಆರ್ಕುನ್ನಾ ಅಗ್ಲೇಕಿ ಕಾಲ್ಚಿಡ್ಸ್ತಾಡು ಅನಿ ಸೊಪ್ಪೇ. ¹³ 13 :-ಅ ಕಲ್ಮಲ ಯೇಸು ಯೋಹನನಿಕ ಸ್ನನಸೆಬಿಚ್ಕೊನಳನಿ ಗಲಿಯಮ್ಲ ಯೋರ್ದನ ನಿದಿಕಿ ಹೊಚ್ಚೆ . ¹⁴ 14 :-ಅಪ್ದ್ದು ಯೋಹನುದು ನೇನು ನಿನ್ಕ ಸನಮ್ಸೆಸ್ಕೊನಳನಿ ನುವ ನಾ ದೇಗ್ರ ಹೊಚೀದೆಮಿ ಅನಿ ಅಡಗಿ ಅತ್ಹ್ದುನಿ ಥದುಪ್ಥ ಉಂಡೆ . ¹⁵ 15 :-ಅಪ್ದ್ದು ಯೇಸು ವಡ್ಕಿ -ಸದ್ಯಕಿ ಒಪ್ಕ ;ಇಪ್ಪ್ದು ಮಾಮು ಅಂತ ದರ್ಮ್ನಿ ನೆರ್ವೆರಳನಿ ಸೋಪ್ಕನಿ ವಡೂ ಒಪಿಂಚಿ ಹಿಚ್ಚೆ . ¹⁶ ಯೇಸು ಸ್ನಾನ್ಮು ಸೇಬಿಚ್ಕೊನಪ್ದೆ ನೂಳಿಂಚ ಪೈನ್ಕಿ ವಚ್ಚಿ ಇಗೋ ವಾಡ್ಕಿ ಆಕಾಶ್ಮು ತೆರ್ಸೆ ಮಲ್ಲಿ ದೇವುಡು ಆತ್ಮುಮು ಪಾರಿವಾಳ್ಳಾಕ ದಿಗಿ ವಾಡ್ಮಿಂದ ವಚ್ಚೆದ್ನಿ ಕನೆ. ¹⁷ ಅಪ್ಡು ವೂಡು ಪ್ರಿಯುಡೈನ ನಾ ಕೊಡ್ಕು, ವೂಡ್ನಿ ನಾನು ಮೆಚ್ಚ್ನ ಅನಿ ಆಕಾಶ್ಮುವಾಣಿ ಆಯೆ.