¹ . ಮಾಮು ಇಪ್ಡು ಸೋಪ್ಪೆ ಸಂಗತಿಲ್ಲಾ ಮುಖ್ಯುಮಾಯಿನ ಮಾಟ ಏಮಂಟೆ ಪರಲೋಕ್ಮು ನೋನ ಮಹತ್ವುಮು ವುಂಡೆ ದೇವುಡು ಸಿಂಹಾಸನ್ಮು ಕುಡುಮ್ ತೊಟ್ಟುಲ ಅಸನ್ಮುರೂಡುಡಾಯಿನಟ್ಟ ಪೆದ್ ಯಾಜಕುಡು ಮಾಕುಂಡಾಡು . ² . ವೂಡು ಪವಿತ್ರುಮು ಸ್ಥಾನ್ಮುಲ ಅಂಟೆ ಮನುಷ್ಯುಡು ಏಯ್ಕುನ್ನ ಕರ್ತುಡು ಏಸಿನ ನಿಜ್ಮಾಯಿನ ದೇವುಡು ದರ್ಶನ್ಮು ಗುಡಾರ್ಮುಲ ಯಾಜಕೊದ್ಯೋಗ್ಮು ನಡ್ಬಿಚ್ಚೋಡಾಯಿನಾಡು . ³ . ಪ್ರತಿಯೋಕ್ಡು ಪೆದ್ ಯಾಜಕುಡು ಕಾಣಿಕೆಲ್ನಿ ಯಜ್ಞಲ್ನಿ ಸಮರ್ಪಿಚ್ಚೆ ದಾನ್ನಿ ಈ ಪೆದ್ ಯಾಜಕುಡ್ಕು ಏಮಾರ ವುಂಡಾಲ . ⁴ . ವೂಡು ಇಂಕ ಭೂಮಿಮಿಂದ ವುಂದಿಂಡೆ ಆಯ್ತೆ ಯಾಜಕುಡು ಆಯ್ತವುಂಡ್ಲೆದು ಎಂದ್ಕಂಟೆ ಧರ್ಮುಮು ನಿಯಮ ಪ್ರಕಾರ್ಮು ಕಾಣಿಕೆಲ್ನಿ ಸಮರ್ಪಿಚ್ಚೋಳು ವುಂಡೆ ವುಂಡಾರು . ⁵ .ವಾಳು ಪರಲೋಕ್ಮುವುಂಡೆ ದೇವುಡು ಆಯಿಯ್ಮುನ ಪ್ರತಿರೂಪ್ಮು ಛಾಯೆ ಅಯುಂಡೆ ಆಲಯುಮ್ಲ ಯಾಜಕತ್ವುಮುನಿ ನಡ್ಬಿಚ್ಚೋಳು ಮೋಶೆಡು ದೇವುಡು ದರ್ಶನ್ಮು ಗುಡಾರ್ಮುನಿ ಸೇಸೆದಾನ್ನಿ ವುಂಡ್ನಪ್ಡು ಬೆಟ್ಟುಮ್ಲ ನಾನು ಮೀಕಿ ಸೂಪಿನ ಮಾದರ್ಮು ಪ್ರಕಾರುಮೆ ಅಂತಾನು ಸೇಬಿಯಾಲ ಅನೆ ದೈವೋಕ್ತಿ ವಾಡ್ಕಿ ಉಂಟಾಯಿನೆಕದಾ . ⁶ . ಆಯ್ತೆ ಯೇಸು ದಾನ್ನಿಂತ ಶ್ರೇಷ್ಠ ಮೈನ ಯಾಜಕೊದ್ಯುಮುನಿ ಹೊಂದ್ಕೊಡ್ ಆಯಿನಾಡು ಉತ್ತಮುಮು ವಾಗ್ದಾನ್ಮುಮು ಮಿಂದ ಸ್ಥಾಪಿತ್ಮು ಆಯಿನ ಉತ್ತಮುಮು ಆಯಿನ ಒಡಂಬಡಿಕೆಕಿ ಮದ್ಯಸ್ಥುಡು ಆಯಿನಾಡು . ⁷ . ಆ ಮಾದ್ಲುನೆ ಒಡಂಬಡಿಕೆ ದೊಷ್ಮು ಲೇಂದಿ ಆಯುoಟೆ ರೊಂಡ್ನೆ ಒಡಂಬಡಿಕೆಕಿ ಅವಕಾಶ್ಮು ವುಂಟ ವುಂಡ್ಲೆದು . ⁸ . ಆಯ್ತೆ ದೇವುಡು ಆ ಒಡಂಬಡಿಕೆಕಿ ಸೇರ್ನೋಳು ಮಿಂದ ತಪ್ಪು ಮೊಪಿ ಇಟ್ಟನೆ ಇಗೋ ನಾನು ಇಸ್ರಾಯೇಲ್ ವಂಶ್ಮೋಳ್ ಜೋತ್ಲ ಕೋತ್ತುದಾಯುಂಡಿನ ಒಕ್ ಒಡಂಬಡಿಕೆನಿ ಸೇಸ್ಕೊನೆ ದಿನಾಲು ವಸ್ತಾದಿ ಅನಿ ಕರ್ತುಡು ಸೋಪ್ತಡು . ⁹ .ಈ ಒಡಂಬಡಿಕೆ ನಾನು ವೂಳ್ ಪಿತೃಲ್ನಿ ಸೈಪೆಟ್ಟಿ ಐಗುಪ್ತ ದೇಶು ಮುನೋನಿಂಚ ತೋಡ್ಕೊನಿ ವಚ್ಚಿನ ಕಾಲುಮ್ಲ ವಾಳ್ ಜೋತ್ಲ ಸೇಸ್ಕೊನಿನ ಒಡಂಬಡಿಕೆ ಅಂಟೆದಿ ಕಾದು ವಾಳು ನಾ ಒಡಂಬಡಿಕೆಲು ಸ್ಥಿರ್ಮಾಯಿ ನಿಲ್ಪಡ್ಲೆನೀಂದಾನ್ನಿಂಚ ನಾನು ವಾಳ್ ಚಿಂತುಮ್ನಿ ಇಡ್ಸ್ತಿ ಅನಿ ಕರ್ತುಡು ಸೋಪ್ತಾಡು . ¹⁰ . ಆ ದಿನಾಲು ವಚ್ಚಿನ್ಮಿಂದ ನಾನು ಇಸ್ರಾಯೇಲ್ ವಂಶ್ಮೋಳ್ ಜೋತ್ಲ ಸೇಸ್ಕೊನೆ ಒಡಂಬಡಿಕೆ ಇಟ್ಟುಂಟಾದಿ -ನಾ ಆಜ್ಞೆಲ್ನಿ ವಾಳ್ ಮನಸ್ಲ ಪೆಡ್ತಾನು ವಾಳ್ ಹೃದಯುಮು ಮಿಂದ ಅವುಟ್ಲುನಿ ರಾಸ್ತಾನು ನಾನು ವಾಳ್ಕಿ ದೇವುಡಾಯುಂಟಾನು ವಾಳು ನಾಕಿ ಪ್ರಜುಲು ಆಯುಂಟಾರು . ¹¹ ಒಕ್ಕೆ ಊರ್ನೋಳು ಆನ್ ದೊಂಬುಳ್ಳು ಒಕ್ಕುಕೊಕ್ಳು ಕರ್ತುಡು ಜ್ಞಾನುಮ್ನಿ ಪಡಿಯಂಡ್ರಿ ಅನಿ ಬೋದಿಚ್ಚೆದಿ ಬೇಕಾಯುಂಡೆಟ್ಲೆದು ಸನ್ನೋಳು ಮೊದ್ಲುಗೋನಿ ಪೆದ್ದೋಳು ಗಂಟ ಅಂದ್ರು ನಾ ಜ್ಞಾನುಮ್ನಿ ಪಡ್ಸುಂಟಾರು . ¹² . ನಾನು ವಾಳ್ ದುಷ್ಕ್ರುತ್ಯುಲು ವಿಷಯ್ಮಾಯಿ ಕ್ಷಮೆವುಂಡೋಡಾಯುಂಟಾಲನು ವಾಳ್ ಪಾಪಲ್ಕಿ ನಾ ನೆನುಪ್ಕಿ ಎಪ್ಡುಕೂ ಎತ್ಕೋಚ್ಚೆಟ್ಲೆದು ಅನಿ ಕರ್ತುಡು ಸೋಪ್ತಾಡು . ¹³ . ಈನ ಕೊತ್ ಒಡಂಬಡಿಕೆ ಅನಿ ಸೋಪ್ಪಿಂದಾoಟ್ಲ ಮೊದ್ಲುಂಡಿoದಾನ್ನಿ ಪಾತಿದಾಯಿ ಸೇಸ್ನಾಡು ಆಯ್ತೆ ಪಾತುದಾಯ್ತ ಮುದಿದಾಯೇ ಅಂಟೆದಾನ್ನಿ ಅಂತ್ಯುಮು ಸಮೀಪ್ಮು ಆಯಿಂದಿ .