¹ . ದಾನ್ನಿಂಚ ಇಂತಮುಂದಿಲು ಸಾಕ್ಷಿಯೋಳು ಮೆಘಮೋ ಪಾದಿಲ ಮಾ ಸುತ್ತುಮು ವುಂಡೆ ದಾನ್ನಿಂಚ ಮಾಕಿ ಅಭ್ಯುಂತ್ರುಮು ಸೇಸೆ ಅನ್ನಿ ಭಾರಮುನಿ ಎಕ್ಕೊನೆ ² . ಪಾಪ್ಮುನಿ ಮಾಮು ಸಹ್ಮು ಸಿಸ್ ಪೆಟ್ಟಿ ನಂಬುಕ್ಮುನಿ ಪುಟ್ಟಿಚ್ಚೋಡು ಪೂರೈಸೂಡು ಆಯಿನ ಯೇಸುಮಿಂದ ದೃಷ್ಟಿ ಪೆಟ್ಟಿ ಮಾಕಿ ನೇಮಕ್ಮು ಆಯಿನ ಓಟಲ ಸ್ಥಿರ ಚಿತ್ಮುನಿಂಚ ಪರ್ಪದಾಮು ವಾಡು ತನ್ ಮುಂದ್ರ ಪೆಟ್ಟಿಂಡಿನ ಸಂತೋಷ್ಮುಕೊಸ್ಕರ್ಮು ಅವಮಾನುಮ್ಮಿ ಅಲಕ್ಷ್ಯುಮು ಸೇಸಿ ಶಿಲುಬೆ ಮರಣ್ಮುಮ್ನಿ ಸಹಿಸಿಕೊನಿ ದೇವುಡು ಸಿಂಹಾಸನ್ಮು ಕುಡ್ಮುತೊಟ್ಟುಲ ಅಸನ್ಮು ರೂಡಡಾಯಿನಾಡು ³ . ಮೀರು ಮನಗುಂದಿ ನೋಳಾಯಿ ಬೇಸರ್ಮು ಸೆಸ್ಕೋನಟಗ ವಾಡ್ನಿ ಅಲೋಚಿಯಂಡ್ರಿ ⁴ . ಯೇಸು ಪಾಪಿಲಿಂಚ ಎಂತೋ ವಿದನಿ ರೋದ್ಮುನಿ ಸಹಿಸ್ಕೋಸೆ ಪ್ರಾಣಪಾನ್ಮುನ ಗಂಟ ಇಂಕ ದಾನ್ನಿ ಎದ್ರಿಯ ಲೆದೋ ⁵ . ಸಿನೋಳ್ಕಿ ಸೋಪ್ಪಟ್ಗ ಮೀಕಿ ಸೊಪ್ಪಿನ ಎಚ್ರುಕು ಮಾಟ್ನಿ ಇಡ್ಸ್ನಾರೋ . ಎಮಂಟೆ ಕೊಡ್ಕಾ ಕರ್ತುಡು ಶಿಕ್ಷೆನಿ ತಾತ್ಸಾರ್ಮು ಸೆಯದ್ದು ವಾಡು ನಿನ್ನಿ ಗದರಿಚ್ಚೆ ನಪ್ಡು ಬೇಸರ್ಮು ಸೇಸ್ಕೊವದ್ದು ⁶ . ಕರ್ತುಡು ತಾನು ಪ್ರೀತಿಸ್ನೊಳ್ನೆ ಶಿಕ್ಷಸ್ತಾಡು ತಾನು ಸೇರ್ಬಿಚ್ಕೊನೆ ಪ್ರತಿಯೋಕ್ದು ಕೊಡ್ಕುನಿ ಕೊಡ್ತಾಡು ಅನೇದಿ ⁷ . ಮೀರು ಶಿಕ್ಷಿತುಲಾಯೆದಾನ್ನೇ ಮೀಕಿ ಶಿಕ್ಷೆಯಾಯ್ತಾದಿ ಅನಿ ತಿಳಿ ದಾನ್ನಿ ಸಹಿಸ್ಕೊಂಡಿ ದೇವುಡು ಮೀಮ್ಮುಲ್ನಿ ಬಿಡ್ಳು ಅನಿ ನಡ್ಬಿಸ್ತಾಡು ⁸ . ತಂಡ್ರಿಯಿಂಚ ಶಿಕ್ಷೆನಿ ಹೊಂದ್ಲೇಲಿನಿ ಕೊಡ್ಕ ಯಾನ . ಬಿಡ್ಳoದ್ರು ಹೊಂದ ಶಿಕ್ಷೆನಿ ಮೀಕುಂಟಾವ್ನುನ್ನವುಂಟೆ ಮೀರು ಹಾದ್ರುಮು ನಿಂಚ ಪುಟ್ನೋಳೆ ಹೊರ್ತು ಪುತ್ರುಲುಕಾದು ⁹ . ಇವಿ ಮಾತ್ರುಮು ಕಾಕುನ್ನ ಮಮ್ಮುಲ್ನಿ ಶಿಕ್ಷಿಚ್ಚಿನ ಶರೀರ್ಮು ಸಂಬಂದ್ಮು ಆಯಿನ ತಂಡ್ರಿಲ್ನಿ ಸನ್ಮಾನಿಚ್ಚಾಡಂತೆ ಮಾ ಆತ್ಮುಲಿಕು ತಂಡ್ರಿಯಾಯಿನವಾಡಿಕಿ ಮಾಮು ಇಂಕ ಹೆಕ್ಟಾಯಿ ನೋನ್ ಪಡಿ ಜೀವಿಚ್ಚಾಲಕದ ¹⁰ . ತಂಡ್ರಿಲು ಕೆಲುವು ದಿನ್ಮುಮು ಪ್ರಯೋಜ್ನುಮುನಿ ಲಕ್ಷಂಕಿ ಸೇಸ್ಕೊನಿ ತಮ್ ಮನ್ಸಕಿ ಸೋಪ್ನಟ್ಟ ಮಮ್ಮುಲ್ನಿ ಶಿಕ್ಷಿಚಿ ವಾಡಾಯ್ತೆನೋ ಮಾಮು ತನ್ ಪರಿಶುದ್ಮುಲ ಪಾಲುಗಾರುಲು ಆವಾಲನಿ ಮಾ ಹಿತ್ಮುಕ್ಕಾಯೇ ಶಿಕ್ಷಿಸ್ತಾಡು ¹¹ . ಯಾವ್ ಶಿಕ್ಷ ಆಯ್ತೆನು ತತ್ಕಾಲುಮ್ನಿ ಸಂತೋಷ್ಮುಕರ್ಮು ಆಯಿ ತೋಚ್ಕುನ್ನ ದುಃಖ್ಮು ಕರ್ಮುಆಯಿ ತೋಚುತ್ತದೆ ಆಯ್ತೆನು ಅಮಿಂದ ಆದಿ ಶಿಕ್ಷ ಹೊಂದಿನೋಳ್ಕಿ ನೀತಿ ಅನೆ ಫಲ್ಮುನಿ ಇಚ್ಛೆ ಮನ್ಸಿಕಿ ಸಮಾದಾನ್ಮುನಿ ಉಂಟು ಸೇಸ್ತಾದಿ ¹² . ದಾನ್ನಿಂಚ ಜೋಲು ಪಡಿನ ಪೈಲ್ನಿ ನಡ್ಗೆ ಮೊಣಕಾಲ್ನಿ ಸುದಾರೋಚ್ಕೊಂಡ್ರಿ ¹³ ಮೀ ಕಾಲ್ಲು ಇಂಚ ನೆಟ್ಗ ಮುಂದ್ರ ನಡೆಯಂದ್ರ ಇಟ್ಟ ಸೇಸ್ತ ಕುಂಟ ಕಾಲು ಉಳ್ಕಿ ಪೊಕುನ್ನ ಆಯ್ತಾದಿ ¹⁴ . ಅಂದ್ರು ಜೋತ್ಲ ಸಮದಾನ್ಮಿಂಚ ವುಂಡೆ ದಾನ್ಕು ಪರಿಶುದ್ದತೆನಿ ಹೊಂದೆದಾನ್ಕು ಪ್ರಯತ್ಮು ಸೇಯಂಡ್ರಿ ಪರಿಶುದ್ದ್ಮು ಲೆಕುನ್ನ ಯೋಡು ಕರ್ತುಡ್ನಿ ಕನೆಟ್ಲೆದು ¹⁵ . ಮೀಲ ಯೋಡಾರ ದೇವುಡು ಕೃಪೆಕಿ ತಪ್ಪಿ ಹಿಂಜರಿಕಕುನ್ನಟ್ಗ ಯಾವ್ ವಿಷವುಂಡೆ ಬೇರು ¹⁶ . ಮೀಲ ಚಿಗ್ರಿ ಅಸಮದಾನ್ಮುನಿ ಪುಟ್ಟಿಚ್ಚಿ ಸಭೆಯೋಳ್ಕಿ ಶೆಡ್ ಪನಟ್ಗ ಯಾವ್ ಜಾರುಡಾವ್ನಿ ಎಸಾವುಡಟ್ಗ ಪ್ರಾಪಂಚಕುಡಾವ್ನಿ ಮೀಲ ಲೇನಟ್ಗ ಜಾಗ್ರತೆಯಿಂಚ ಸೂಸ್ಕೊಂಡ್ರಿ ಆ ಎಸಾವುಡು ಒಕ್ಕೆ ಒಕ್ ಊಟ್ಮು ಕೋಸ್ಕರ್ಮು ತನ್ ಚೋಚ್ಚಲ್ ತಸ್ಮುನ ಹಕ್ಕ ಇಚ್ಚಿ ಇಡ್ಸೆ ¹⁷ . ಅನಂತುಮ್ಲ ತನ್ ತಂಡ್ರಿ ಆಶ್ರಿವಾದುಮುನಿ ಬಾದ್ಯುಮಾಮಿ ಹೊಂದಲನಿ ಕನ್ನೋಳು ಎಸ್ತಾ ಚಿಡ್ಕೋoಡ್ರಿ ನಡ್ಸಿಂದಾನ್ನಿ ಲೇನಿನಟ್ಗ ಸೇಸೆಕಿ ಮಾರ್ಗಮು ಲೆಕುನ್ನ ನಿರಾಕರಿಚ್ಚಲ್ಪಡೆ ಅನಿ ಲೇಳಿಯಂಡ್ರಿ ¹⁸ . ಮೀರು ಮುಟ್ಟೆದಾನ್ಕಿ ಸಾಧ್ಯುಮಾಯಿನ ಮಲಿ ಹಗ್ಗಿಎಕ್ಕಿನ ಬೆಟ್ಟಮ್ನಿ ಮಾಡ್ಮು ಬೋಬ್ಬುಕು ಸಿಕ್ಟಿಕು ಬಿರುಗಾಳಿಕು ತುತ್ತೂರಿ ಧ್ವನಿಕು ಮಾಟ್ಲು ಶಬ್ದಂಕು ವಚೋಳ್ ಕಾದು ¹⁹ . ಆ ಶಬ್ದುಮುನಿ ಇನಿನೋಳು ತಮ್ನಿ ಇಂಕ ಒಕ್ ಮಾಟ್ನಮ್ನಿ ಸೋಪ್ಪ್ಗಡದನಿ ಬೆಡ್ಕೊನ್ರಿ ²⁰ . ಎಂದoಟೆ ಒಕ್ ಮೃಗುಮಾವ್ನಿ ಬೆಟ್ಟoಕ ಮುಟ್ತೆ ದಾನ್ನಿ ರಾಯ್ ಪಾರೋಟ್ಟಿ ಸೊಂಪಾಲನಿ ವಿಧಿನಿ ತಾಳಲಾರ್ಕುನ್ನ ವುಂಡ್ರಿ ²¹ . ಇದ್ಕಾಕುನ್ನ ಆನ ಸೂಪಿಂದಿ ಅಂತ ಭಯಂಕರ್ಮು ಆಯುಂಡೆ ದಾನ್ನಿಂಚ ಮೋಶೆ ನಾಕಿ ಹೆಕ್ವ ಭಯ್ಮು ಆಯ್ತಾದಿ ನಡ್ಗುತ್ತಾನು ಅನಿ ಸೊಪ್ಪೆ ²² . ಆಯ್ತೆ ಮೀರು ಚಿಯೋನ್ ಪರ್ವತಂಕಿ ಜೂಡ್ ಸ್ವಾರುಪ್ಮಾಯಿನ ದೇವುಡು ಪಟ್ಟನ್ಮಾಯಿನ ಪರ್ಲೋಕ್ಮು ಯೇರುಸಲೇಮಿಕು ಉತ್ಸವ್ಮು ಸಂಘುಮ್ ²³ . ಕೂಡುಂಡೆ ಕೋಟ್ಯಾನುಕೋಟಿ ದೇವುಡು ದೂತುಲು ದೇಗ್ರುಕು ಪರ್ಲೋಕ್ಮುಲ ಪೇರು ರಾಬಿಚ್ಕೊನಿನ ಚೋಚ್ಚಲ್ಮು ಬಿಡ್ಳು ಸಭೆಕು ಅಂದ್ರುಕು ನ್ಯಾಯ್ಮು ಅಧಿಪತಿಯಾಯಿನ ²⁴ ದೇವುಡು ದೇಗ್ರುಕು ಸದ್ದಿಕು ವಚ್ಚುಂಡಿನ ನೀತಿವಂತುಲ ಆತ್ಮುಲು ದೇಗ್ರುಕು ಕೊತ್ ಒಡಂಬಡಿಕೆಕಿ ಮದ್ಯಸ್ಥುಡಾಯಿನ ಯೇಸು ದೇಗ್ರುಕಿ ಹೇಬೇಲುಡು ರಕ್ತುಮುಕ್ಕಿಂತ ಹಿತಕರ್ಮಾಯಿ ಮಾಟ್ಲಾಡೆ ಪ್ರೋಕ್ಷಣ್ಮು ರಕ್ತುಮು ದೇಗ್ರುಕು ವಚ್ಚಾರು ²⁵ . ಮೀರು ಮಾಟ್ಲಾಡ್ತ ವುಂಡೆವಾಡ್ ಮಾಟ್ನಿ ಇನಿಟ್ಲೆದು ಅನಿ ಸೋಪ್ಗುಡ್ದು ಭೂಮಿಮಿಂದ ದೈವೋಕ್ತಿಲ್ನಿ ಅಡಿನೋಡ್ನಿ ಶಪ್ಪಿಚ್ಚೆ ಮನ್ಸಲೆಕುನ್ನ ವುಂಡಿನ ಇಸ್ರಾಯೇಲುಲು ದಂಡನೇಕಿ ತವ್ವಚ್ಕೊಕುನ್ನವುಂಟೆ ಪರ್ಲೋಕ್ಮು ಇಂಚ ಮಾಟ್ಲಾಡೋಡ್ಕಿ ಮಾಮು ಶವ್ವಿಚ್ಚೆ ಮನ್ಸ್ ಲೆಕುನ್ನ ತೊಲಗ್ತೆ ಎಟ್ಟ ಎಟ್ಟ ತಪ್ಪಿಚ್ಕೊಂಟಮಿ ²⁶ . ವಾಡ್ ದ್ವನಿ ಆ ಕಾಲುಮ್ಲ ಭೂಮಿನಿ ಕದಲಿಚ್ಚೆ ಇಪ್ಡಾಯ್ತೇನೋ ವಾಡು ಇಂಕೊಕ್ಕೆ ಸಾರಿ ನಾನು ಭೂಮಿನಿ ಮಾತ್ರುಮು ಕಾಕುನ್ನ ಪರ್ಲೋಕ್ಮುನಿ ನಡ್ಗಿ ಸ್ತಾಡು ಅನಿ ವಾಗ್ದಾನ್ಮು ಸೇಸ್ನಾಡು ²⁷ . ಇಂಕೊಕ್ಕೆ ಸಾರಿ ಅನೆ ಈ ಮಾಟ್ನಿ ಯೋಚಿಸ್ತೆ ಕದಲಿಚ್ಚುಂಡೆ ವಸ್ತುಲು ನಿರ್ಮಿತುಮು ಆಯಿನೋವಿ ಆಯೇಂಡೆ ದಾನ್ನಿಂಚ ಸೇಸೆಯಾಲನಿ ಸ್ವಷುಟಮ ಆಯ್ತುದಿ ಅಪ್ಡು ಕದಲಿಯ್ನನ್ನ ವುಂಡೆ ವಸ್ತುಲು ಸ್ಥಿರಮಾಯಿ ನಿಲ್ಪಡ್ತಾವಿ ²⁸ ದಾನಿಂಚ ಯೋಳು ಕದಲಿಚ್ಚೆ ಕಾಕುನ್ನ ರಾಜ್ಯುಮುನಿ ಹೊಂದ್ನೋಳಾಯಿನ ಮಾಮು ಕೃತಜ್ಞತೇಯುಳ್ಳೋಳು ಅಯುಂಡಿ ವಾಡ್ಕಿ ಸಮರ್ಪಕ್ಮುಆಯಿನ ಆರಾಧನೆನಿ ಭಕ್ತಿಯಿಂಚೆನೂ ಭಯ್ಮುಂಚಾನು ಸೇತಾಮು ²⁹ . ಎಂದ್ಕಂಟೆ ಮಾ ದೇವುಡು ದಹಿಚ್ಚೆ ಅಗ್ನಿಯಾಯ್ನಾಡು