¹ Paulo, la otwarahini niho Kristo cebu hilasi Timateo niho Filimone, morite hojie ora cebu ahaleteni hojie nihigiama ² cebu niho Apia hinisi hojie ho niho Achipa haleteni hojie niho nahisegere ho niho nakelesia na iramahita nihang hoji tihitik. ³ Ikie namehino obwon nihote cebu nayomo na olotu niho Monye hojie cebu niho Hobu Yesu Kristo. ⁴ Esiarshita ne nawa tihitik niho Najyok ho ne. Ahiramahita ne ite nimojita ho ne. ⁵ Etiyir ne nakwama ho nahiruk hote na ihwanahisite niho Hobu Yesu cebu niho laheruhok fad. ⁶ Amojo ne ojo nahiriamahino ho hiruk hote ikie itiringa nijianari nareji huja ongidari fad huja obwoni nihiji hojie niho Kristo. ⁷ Abwon ne ho nakwama cebu nahirabiji ho taji to nakwama, to natajio ho laheruhok hote, hilasira. ⁸ Inaha, dobu abwon ne ho nahingereji niho Kristo nihiramahinere ite nanyuo te itum mata ihuanati, ⁹ nyuo hati to nakwama, alelia ne nihote- Ne, Paulo, laragangani, cebu ta hanya ahatwarani niho Yesu Kristo. ¹⁰ Ahifiasu ne ite te ha ne Onesimo, la etoboloru ne niho natuara. ¹¹ Obu fa ngete ongida niho hoji, nyuo hati tahanya angida nihoji cebu niho ne. ¹² Asulahi ne ngete la ora ataji ho ne-nihoji. ¹³ Egigilo ne ojo ongida ne etotongohi ngete iji ho ne, onida ohilwaha ne nimaji hoji, ne atwara to nahiram ho Efanjelio. ¹⁴ Nyuo hati abu ne awak ihwana ibwo nasinge iji ibe ijien. Ehon ne anya ojo ongida ibuo nahigiama na ongida obu igemi ojo ahirosohi ne iji, nyuo hati to nawahan hoji. ¹⁵ Kuya nafutiri na igialajierete ngete niho hoji kai, ojo ongida iji ibwa nata hongete jik. ¹⁶ Ojo ongida ngete obu ora apiti, ati ora la ilany la piti, hilasi la ikwama iji-bebe niho ne, cebu bebe nihoji, nikwan ho niho Hobu. ¹⁷ Cebu nihwanahiji ne ahaleteni hoji, ifwotu ngete to hefwotu iji ne. ¹⁸ Nyuo hati nepalaya fatia ngete nihoji bebe, kuya obwon hebwo namongijo, tongotohi niho ne. ¹⁹ Ne, Paulo,legier anya to nehene ho ne: Adumahi ba ne nihoji. Abu ne eramahi nihoji ojo ibuon iji ho namongijo ho ne ngete nahisu hoji. ²⁰ Ee, hilasi, ikie ne abwon hebwo nakwama niho Lohobu to ji: Etelengejuk nataji ho ne niho Kristo. ²¹ Nagolon to nabayangi hote, egierehiso ne nihote, ajien ojo, ongida ite igiamata ilany anya atianya ne. ²² Cebu ihuhumahisi nahaji niho ne, egigilo ne ojo to namojo hote hatum ba ne ahiwaju ite. ²³ Epafras, haleteni ho ne nitwara niho Yesu Kristo, ohihata iji. ²⁴ Cebu Marko, Aristarchus, Demas, Luka, haletok ho ne lahegiamak. ²⁵ Ikie namehino ho Lohobu hojie Yesu Kristo obwon niho nolohailongi hote.Amen.