1 Lo fa hiluri nalohoi ho lati Yesu itiyirari netenyita ho Najyok, obotia fa ngete niger ho hari ho Gennesaret. 2 Ngete ho na telniso natigoli harik nahari oworito. Angirini lahamwanak nihosing ho nahilalasu nemwanita hosing. 3 Yesu ho nahiruhiso niho abito hehwe tigoli, no ora noho Simone, ce bu ho na hiramahiso ngete ihwanahi niger ho hari olama kai. Ngete ho nahitwongo nifok ho nahitejiana lati niger hotigol 4 Lo fa natuhohi ngete natianya, ngete ho najiman niho Simone, ''Iyare natigol nihari na owudo ipirehi nangerie huja nihotwa ho hari ongida inefito.'' 5 Simone ho na hitaranga ojo, ''Lolohitwahaji, ongiama jie naharie fad, obu jie ohinefu ibwo singe, nyuo hati to natianya hoji, epirehi ba ne nangerie.'' 6 Lo fa nepirehini sing nangerie, sing ho na hitolohiniso nahaiyem huja olwaji,many ifude nangerieji hosing. 7 Sing ho nangeleso haletok hosing ojo ongida ofwoni lwahan sing. Sing ho nafwoniso itufutahiso natigoli many owahi igireriso. 8 Nyuo hati, lo fa natel Simone Petur anya, ngete ho nahuyari nihejiaha ho Yesu, ho najiman, '' Ilo tinyi ho ne, ara ne ahepalani, Lohobu.'' 9 Obayang fa ngete, he hule hula fa obwoni hongete nilomwanari, to nahaiyem huja itolohini sing. 10 Obwoni fa sing hobo Juma ojo Yuwana, lemusak ho Sebedee, haletok ho Simone.Yesu ho najiman niho Simone, ''Hebayang , ichak tobaya toto nihatemeni ilo ji imwana lati." 11 Lo fa neyene sing natigoli hosing niger, sing ho nahidahiso nsreji fad ho nahijifaru ngete. 12 Lo fa hobwon Yesu niho ibwo nahang na obolo, lobo latwani la onya nachalulu obwon da. Lo fa natelu ngete Yesu, ngete ho nahuyari to nohomom nihomo ho nahilelia niho ngete , ojo, ''Lohobu,heruk iji, itinyilaja ne." 13 Yesu ho nahipiheriso nehene hongete ho natiron ngete, ho najiman, "Eruk ne. Tonyilaja. "Nachalulu ho nahidahiso ngete. 14 Ngete ho nahiramahiso ojo ongida obu iramahi lobo latwani, ho najiman, ''Ilo tene hoi hoji, itelehi nakwan hoji niho lapadiri cebu isiarahi neyalita noho itinyilajariti iji, toho hiramahinere Muse, nahiteleyehiso nihosing.'' 15 Nyuo hati natianya ho nahisarahiso to ngete bebe nalohoi ho lati fwiniso harabito nhiitiyirari nahitejiana ho ngete cebu ongida itingidari sing tediahita hosing. 16 Nyuo hati lojierita ngete nimasik huja obengi lati olo mojo. 17 Niho ibwo noholong ngete itejiana, obwoni fa hilihe laharisak ce be lahetejianak hechihita itwenge da hula ofwoni to hangite hama hama huja holwaji to fok ho Galileya cebu nifok ho Yudea, cebu nihang nobolo noho Yerusalem. Nahifirang ho Lohobu obwon fa niho ngete nihitingidarari. 18 Hilihe lati ho na fwoniso, otingito lobo latwani la ongura to nabiris, otahite fa sing nehoi nihiyajiere ngete nihiji ojo ongida itegetehini ngete nihatimeni ho Yesu. 19 Obu sing hohorihini nehoi nihiyajiere ngete nihihaji to na lwajan ho lati, sing ho na fwoten nihide hohaji ho nahipiriniso ele twani nifok to nabiris hongete nihiji ho lati, nihatemeni hatemeni ho Yesu. 20 Natialan nahiruk hosing, Yesu ho najiman, ''ale twani,alahahine nepalita hoji.'' 21 Lahegierok ho laharisak ho nahichak hifiasu ojo, ''Ngai dwo ale lotianya nerohojita lomwange? ngai lotum ibalahi nepalita, nyuo hati Najyok hama?'' 22 Nyuo hati Yesu, ho najianan nanyuo fa sing igigile, ho najiman nihosing, ''Nanyuo te ifiasete anya nitajio hote? 23 Ani lonyiha to natianya, 'Nepalita hote ahahine ' kuya najiman 'Todete idaha?' 24 Nyuo hati ongida ite ijianata ojo obwonitere Iha Najyok ho nagolon nifok nilahahinere nepalita, ajo ne nihoji, 'Todete, iduhu nabiris hoji ,ilo nihaji hoji.''' 25 Ngete ho nadeto to hatemeni hosing ho nahiduhuniso nabiris hongete; ho nayitereso nihaji ho ngete, itokwata Najyok. 26 Lati fad okwame ho nahitokwata Najyok. Ifuti fa sing fad ho nabayangi, ojimi, ''Ahitel jie nareji huja itabayange bayaa.'' 27 Lo fa nedwongi hunya reji , Yesu ho naloten to da ho nateliniso lahedufuhani ho mochoro nafure hongete Levi itwongo nimaji na iduduhariti namochoro. Ngete ho najiman, ''Ijifine ne.'' 28 Levi ho na hidahiso nareji fad, honadeto, honahijifaru ngete. 29 Levi ho nahihuhumahiso nanyasu niho Yesu nihaji ho ngete, cebu obwoni fa laheduduhak ho mochoro hula olwaji da, ho lati hilihe itwonge nilonyesere onyese hosing. 30 Nyuo hati laharisak ho lahegierok ho nahingungwa niho lolohejehi hongete, ojo, ''Nanyuo te inyesete ce bu imatati ho lati hula iduduhe nafochoro ce bu lahepalak ho lati?'' 31 Yesu ho na hitaranga sing, ''Lati hula ongidari nakwanite hosing obu otahite lebwoni, mayak lahadiahak. 32 Abu ne alotu ingeleso lahangidarak nihiwahari, nyuo hati alotu ne ingeleso lahepalak ongida iwahe.'' 33 Sing ho najiman niho ngete, ''Itwongite fa lolohejehi ho Yuwana obu onyese cebu omojite, cebu lolohejehi ho laharisak ihwane tehene. Nyuo hati lolohejehi hoji onyase ce bu omata.'' 34 Yesu ho na jiman niho sing, 'Hatum lobo latwani isiarahi lati hula obwoni niloyamari obu onyese, lahayamani ho bwoni hosing? 35 Obwoni ba noholongi lomo nalo lahayamani tiye hosing, nihehwe holongi itwenge hadi sing obe onyese.'' 36 Yesu ho natianya niho sing to nodoho. ''Obe lobo twani ochiru nabongo to bongo nangejuk orifari nibongo nolongore. Nehon ngete, ochir ba ngete nangejuk hobongo, obu ba nechirit ho bongo otumuhino nilongore ho bongo. 37 Cebu obe lobo twani ihwanahi nangejuk ho balu nihisase nolongore. Nehon ngete , ifudo ba nangejuk ho hisase nabalu ho nahijuhoro, cebu nahisase ebalaru. 38 Nyuo hati ikie ihwanahini nangejuk ho balu nihisase na ora angejuk. 39 Obe lobo latwani, lomo namat nolongore ho balu, owak nangejuk ho balu, to nanyuo, ojo ba ngete," Ongida nolongore.'''