¹ Yesu, la ifut ho Nolohailong na onyila, honayitiniso to hari ho Jordano, ² cebu nolohailong ho nahiyaru ngete niwaha noholong nehejek ongon na otem laharohojani ngete. Niho ehwe holongi, obu ngete onya ibwo nasinge, cebu nilo hichungi aniama fa ngete bebe ho nahure. ³ Nolohailong nebot ho najiman niho ngete, ''Nereji a hito ho Najyok, ibielo anya morwo angirang.'' ⁴ Yesu ho nahitaranga ngete, ''Igierehini ojo, 'Obu latwani omanya to nangirang ija.''' ⁵ Nolohailong nebot ho nahiyaru ngete nihang na ohadu, ho nahitelehiso ngete nereji ho nifok fad. ⁶ Nolohailong nebot ho na tianya niho ngete ojo, "Esiarahi ba ne iji nagolon ongida itiala hunya hangite fad, ho nareji hosing fad. Hatum ne egem anya toho isiarahini niho ne enefito , cebu atum ne esiarahi niho lobo latwani la awak ne hisiarahiso. ⁷ Naha, irugung hadi ji nihatemeni ho ne cebu imojo ne, hunya fad orahi ba anoho ji.'' ⁸ Nyuo hati Yesu ho nahitarang ojo, ''Igierehini, 'Ongida iji imojo Lohobu Najyok hoji, cebu ongida iji igiama niho ngete ija.''' ⁹ Nolohailong nebot ho na hiyaru ngete to ho Yerusalem ho nahihwanahiso ngete nilolele ho haji ho najiman niho ngete, " Nareji eha Najyok, ipireye nakwan hoji nifok tinyi. ¹⁰ Igierehini, 'Iramahi hadi Anjiloji hongete ongida ohituni iji otun iji, cebu ohitiese iji,' ¹¹ cebu, 'otingi ba sing iji nitodo to nehes hosing , ongida iji obu itwamahi neheju hoji nimorwo.''' ¹² Yesu ho nahitarang ngete ojo, ''Hetiama Lohobu Najyok hoji." ¹³ Lo fa natuhohi nolohailong nebot natiama Yesu, ngete hona loten niger cebu idahi ngete many niho ibwo noholong. ¹⁴ Yesu ho nayiteriso to ho Galileya to na golon holohailong, nahiram ho ngete ho na hisarahisoo nihangite fad. ¹⁵ Itejien ngete nekelesiaji, lati fad itokwate fa ngete. ¹⁶ Niho ibwo noholong ngete ho loten to ho Nazaret, nihang nobolojere fa ngete. Toho ora amanya hosing , ngete ho nahiruhiso nekelesia niholong hetaleji, ho na bwotia nihikianari nabuk. ¹⁷ Natianya ho lahiramahitani ho hiramita Isaya, isiarahini fa niho ngete, ngete ho nangan nabuk ho na horihiso namaji na igierehini, ¹⁸ ''Nolohailong ho Lohobu obwon niho ne, to nanyuo anyumu ngete ne nihiramahinere na tianya na ongida ho niho laparitak. Ohisulu ngete ne nihiramahinere nalahino niho lahatwarak, cebu nihisiarahinere natiala niho lahangodok, nilahahinere hula itumumune, ¹⁹ nihiramahinere nenga noho Lohobu.'' ²⁰ Ngete ho na hikianahiso nabuk, ho nahisiarahiso niho lahegiamani he kelesia, ho nahitwongo nifok. Otiale fa lati fad hula obwoni nikelesia to ho niho ngete. ²¹ Ngete ho nahichak itianya niho sing, ''Tahanya anya buk etufuti niho nehatemeni hote.'' ²² Lati fad hula obwoni da ateli nasinge na oteny ngete, obayangi sing fad niho netenyita huja ofwoni to hutuk hongete. Ojimi fa sing,"Ngete ale iha Yosefo, obe ora ?'' ²³ Yesu ho natianya niho sing, itianya beji hanya hiram niho ne, 'nebwoni, ojo nakwan hoji. ibwo nasinge na otiyiri je ojo higemiji Capernaum, igiama inyini hang hoji obolo ce bu.''' ²⁴ Ojo cebu, ''Tarihe atianya ne niho ji, obe lo laheramahitani ho hiramita la owahi nihang ho ngete. ²⁵ Nyuo hati atianya nee tarihe obwoni fa nagoro Isarayil huja oyeyi habehin niholong ho Elija, no fa nabu nahuju obeho niyafaji hutik ce bu nihiji ho ngaji, no fa nabwon nahure nobolo nifork fad. ²⁶ Nyuo hati Eobu fa osuluni Elija niho hosing, ati niho nangorite na aye habi na itwongo tito Sarefat na onyiha nihang ho Sidonia. ²⁷ Obwoni fa lati ho chalulu ho Isarayile niholongi ho lahetamahitani ho hiramita Elisha, nyuo hati obe fa lobo nihosing ihuhumuno mayak Naamana lo ho Siria.'' ²⁸ Lati fad hula obwoni nikelesia ho nahilongojita lofa netiyiri sing hunya reji. ²⁹ Sing ho nadeto ho narohoriso ngete to hang , cebu iyare ngete nihide ho denge namaji na ifahahinerete sing nahang nahitwahaji, ojo ongida ipirini ngete nifok. ³⁰ Nyuo hati ngete ho na daha to hatemeni hosing, ho naloten nihoi hongete. ³¹ Ngete ho naloten to ho kapernaume, nahang na obolo niho Galileya. Niho ibwo noholong hetaleji, itejiana fa ngete lati nekelesia. ³² Obayangi fa sing nahitejiana ho ngete, to nanyuo otianya ngete na obu to nagolon. ³³ Obwon fa lobo latwani nihotwa ho kelesia la obwon ho nolohailong na ibot noho mininga, ho nayoo to na murut na okwat, ³⁴ "Nanyuo jie hahitum ogiam niho ji, Yesu ho Nazaret? Ilotuji ipalariso ijie? Ajien ne iji angai! Ireji Ahanyilajani ho Najyok!'' ³⁵ Yesu ho nahireng nameninga , ojo, ''Ininge ce bu kwo niger !'' Lo fa nepirehi namininga ele twani nihiji hosing, ngete ho nalotiniso toda hosing obe iriafu sing. ³⁶ Lati fad ho nabayangi bebe, ho na hitiranga tianya nakwanite hosing. Sing ho na jiman. ''Ahuni hiramita hunya? Iramahi ngete nolohailongi huja iboti to nagolon ce bu nahifirang sing ho na fwoniso niger?'' ³⁷ Natianya ho ngete ho nahichak hisarahiso niho nimasik ho hang fad. ³⁸ Yesu ho na hidahiso nekelesia ho nahiruyoriso nihaji ho Simone. Odiaha fa homoni ho Simone nolofudi, sing ho nahilelia niho ngete to ene ngorite. ³⁹ Ngete ho na botia niho ngete ho nahireng nolofudi, ho na hidahiso ngete. Ene ngorite ho nadeto ho nahichak higiama niho sing. ⁴⁰ Lo fa nadoyoriso noholong, lati ho na hiyene hilihe lati hula odiahe ho na dehita. Ngete ho narwehiso nehes niho lati hula odiahe fad ho nahitingidar sing. ⁴¹ Naminga ho nafwoniso niho lalohoi ho lati, oye, otianya ojo, ''Iji iha Najyok!'' Yesu ho nahireng namininga ce bu obu isiarahi sing otianye, ojieni sing ojo ngete Kristo. ⁴² Lo fa nara akil ofarani, ngete ho naloten nimaji na opoloro. Otahite fa nalohoi ho lati Yesu ho nafwoniso nimaji na obwonitere ngete. Otemi sing itik ngete ongida obe olo niger tiye hosing. ⁴³ Nyuo hati ngete ho natianya niho sing, ''Awak cebu ne itotoso natianya nangejuk ho nahang ho Najyok nihangite huja olwaji, ngete anya natianya osulunerete ne inyi.'' ⁴⁴ Ngete ho nahitiringa itotoso nekelesia nihang ho Yudea.