¹ ಕ್ರಿಸ್ತ ಯೇಸುಲಾ ವುಡ್ದೋಳ್ಕಿ ಅಪರಾಧ ನಿರ್ಣಯಮು ಇಪ್ದು ಲೇನಕ್ಕೆ ಲೇದು . ² ಯದ್ಗು ಅಟ್ಟೆ ಜೀವನೀ ಉ೦ಟು ಸೇಸ್ಸ ಪವಿತ್ರಾತ್ಮಡ್ ನಿಚ್ಚ ಅಯ್ನಾ ನಿಯಮಮು ನಿನ್ನಿ ಪಾಪಮರಣಲಿಚ್ಚ ಯೇಸು ಮೂಲಕ್ಕ೦ಗ ಇಡಿಬಿಚ್ಚೆ . ³ ಧರ್ಮಶಾಸ್ತ್ರಮೂ ಮಾ ಶರೀರಾಧೀನ ಸ್ವಭಾಮ್ನಿಚ್ಚ ಯಾವ್ ಕೆಲಸಮುನಿ ಸೇಸ್ದಾನೆ ವು೦ಡ್ನೋ ದಾನೀ ದೇವುಡೆ ಸೇಸ್ಸೇ . ದೇವುಡು ಪಾಪ ನೀವಾರಣೆಕೈ ತನ್ ಕೊಡುಕುನೇ ಪಾಪಧೀನಮೈನಾ ನರಭಾವ ರೂಪಮ್ಲಾ ಅಪ್ಪಿಚ್ಚಿ ಪಾಪಕ್ಕಿ ಮರಣ ದಂಡನೆನಿ ವಿಧಿಚ್ಚೆ . ⁴ ಇಟ್ಟುಡ ದಾಕಿ ಶರೀರಕ್ಕಿ ಅನುಸಾರಮಯ್ಯಿ ನಡಿಕ್ಕೂಡ್ಡ ಪವಿತ್ರಾತ್ಮಕಿ ಅನುಸಾರಮಯ್ಯಿ ನಡ್ಸಟ್ಟ ಮಾಲ ಧರ್ಮಶಾಸ್ತ್ರ ನಿಯಮಮು ನೇರವೆರಕ್ಕಿ ಮಾರ್ಗಮ್ ಅಯಾ . ⁵ ಶಾರೀರಭಾವನೀ ಅನುಸರಿಚ್ಚೋಲೂ ದಾಕಿ ಸ೦ಬ೦ಧಪಟ್ಟೋಳ್ ಮಿದ್ದ ಮನಸ್ಸ್ ಪೆಟ್ನಾಳೂ .ಪವಿತ್ರಾತ್ಮನೀ ಅನುಸರಿಚೋಳೂ ಪವಿತ್ರಾತ್ಮಡುಕ್ಕಿ ಸ೦ಬ೦ಧಪಟ್ಟವು ಮಿದ್ದ ಮನಸ್ಸು ಪೇಟ್ತಾರೂ . ⁶ ಶರೀರಭಾವದ್ ಮಿದ್ದ ಮನಸ್ಸುಪೆಟ್ಟೆದ್ದಿ ಮರಣಮೂ ; ಪವಿತ್ರಾತ್ಮಡ್ ಮಿದ್ದ ಮನಸ್ಸುಪೆಟ್ಟೆದೀ ಜೀವಮೂ ಮನಶ್ಯಾ೦ತಿಯೂ ಅಯ್ಯಿದ್ದಿ . ⁷ ಅಟ್ಟೆ ಶರೀರಭಾವದ ಮಿದ್ದ ಮನಸ್ಸುಪೆಟ್ಟೆದೀ ದೇವುಡ್ಕಿ ಶತ್ರುತ್ವಮೈನ್ದಿ ; ಅಟ್ಟ ಮನಸ್ಸು ದೇವುಡ ನಿಯಮಕ್ಕಿ ಒಳಪಡೆಲೇದು , ಒಳಪಡೆಕ್ಕೂ ಅಯ್ಯೆಲೆದು . ⁸ ದೇವುಡ್ಕಿ ಮೆಚ್ಚಿಕೆ ಅಯ್ಯಿ ವು೦ಡಲೇ . ⁹ ಮಿಳೈತೋ ಮೀಲಾ ದೇವುಡ ಆತ್ಮ ವಾಸಮಯ್ಯಿವುಟ್ಟೆ ಶರೀರಭಾವಧೀನಲೂ ಕಾದು , ದೇವುಡ ಆತ್ಮಕ್ಕಿ ಅಧೀನಮು ಅಯ್ನಾಳು ಯೋವಡ್ಕದ್ರೂ ಕ್ರಿಸ್ತುಡ ಆತ್ಮ ಲೇದು ಅಟ್ಟೆ ವಾಡೂ ಕ್ರಿಸ್ತುನೋಡು ಕಾದು . ¹⁰ ಅಯ್ತೆ ಕ್ರಿಸ್ತುಡೂ ಮೀಲಾವುಟ್ಟೆ ದೇಹ ಪಾಪ ದೆಸೆಯಿಚ್ಚ ಸೇಚ್ಚಿಪೋಯ್ಯುಡೆದ್ದಿ ಅತ್ಮಮೂ ನೀತಿ ದೆಸೆಯಿಚ್ಚ ಜೀವಸ್ವರೂಪಮಯ್ಯಿದ್ದಿ . ¹¹ ಯೇಸುನೀ ಸೇಚ್ಚಿಪೋನೋಳ್ನಿಚ್ಚ ಜೀವ೦ತಮೈ ಲೇಪ್ನಾಟ್ಟ ಆತ್ಮುಡೂ ಮೀಲಾ ವಾಸಮ್ ಅಯ್ಯುಟ್ಟೆ ತನ್ನ ಆತ್ಮ ಮೂಲಕಮೈ ಮೀ ಮರ್ತ್ಯದೇಹನೀ ಸಹ ಬದುಕಿಸ್ತಾಡೂ . ¹² ಇಟ್ಟುಡದಾಕಿ ಮಾಮು ಹ೦ಗುಲಾವು೦ಡ್ದಮೂ ; ಅಯ್ತೆ ಪವಿತ್ರಾತ್ಮಡ್ನಿ ಅನುಸರಿಚ್ಚೆ ಹ೦ಗುಲಾವು೦ಡಮೇ ಹೊರತು ಶರೀರಭಾವನೀ ಅನುಸರಿಚ್ಚೆ ಹ೦ಗುಲಾ ಮಾಮು ಲೇದು . ¹³ ಮೀಳೂ ಶರೀರಭಾವನೀ ಅನುಸರಿಸ್ತೆ ಸೇಚ್ಚೆದ್ದಿ ನಿಶ್ಚಯಮು ; ಅಯ್ತೆ ಮೀಳೂ ಪವಿತ್ರಾತ್ಮಡ್ನಿಚ್ಚ ದೇಹದ ದುರಭ್ಯಾಸಲ್ನಿ ನಾಶನಮು ಸೇಸ್ತೆ ಬದಕ್ತಾರೂ . ¹⁴ ಯೋಳೊಳು ದೇವುಡ್ ಆತ್ಮನಿಚ್ಚ ನದಿಪಿಚ್ಚಿಕ್ಕೊ೦ಟಾರೋ ವಾಳು ದೇವುಡ ಬಿಡ್ಲೂ . ¹⁵ ಮೀಳು ತಿರಿಗಿ ಭಯಮ್ಲಾ ಪೊಡೆಕ್ಕಿ ದಾಸುಡ ಭಾವನೀ ಹೊ೦ದ್ಕೊನುಡ್ದೋಳ್ ಕಾದು , ಯೇಸುಭಾವನೀ ಹೊ೦ದ್ಕೊನುಡ್ದೋಳೂ . ಈ ಭಾವಮ್ನಿಚ್ಚ ಮಾಮು ದೇವುಡ್ನಿ ತ೦ಡ್ರಿ ಅನಿ ಕುಸ್ತಾಮೂ . ¹⁶ ಮಾಮು ದೇವುಡ ಬಿಡ್ಲೂ ಅಯ್ಯುಡ್ದೆ ದಾಕಿ ಪವಿತ್ರಾತ್ಮುಡೆ ಮಾ ಆತ್ಮ ಜೊ೦ತ್ಲಾ ಸಾಕ್ಷಿಸೊಪ್ತಾಡೂ . ¹⁷ ದೇವುಡ್ ಬಿಡ್ಲೂ ಅಯ್ಯುಟ್ಟೆ ದೇವುಡ್ಕಿ ಬಾಧ್ಯುಲು , ಕ್ರಿಸ್ತುಡ್ಕಿ ಬಾಧ್ಯುಲು , ಯಟ್ಟ ಅಟ್ಟೆ ಕ್ರಿಸ್ತುಡ್ಕಿ ಸ೦ಭವಿಚ್ನಾಟ್ಟ ಬಾಧೆಲಾ ಮಾಮು ಪಾಲುಗಾರಲು ಅಯ್ತೆ ದೇವುಡ ಮಹಿಮೆಲಾ ಪಾಲುಗಾರಲೂ ಅಯ್ತಾಮೂ . ¹⁸ ಮಾಕೊಸ್ಕರಮೂ ಮುದ್ರ ಕಲಮ್ಲಾ ಪ್ರತ್ಯಕ್ಷ ಅಯ್ಯೇ ಮಹಪದವಿನೀ ಆಲೋಚಿಚ್ಚಿ ಇಪ್ದು ವು೦ಡ ಕಷ್ಟಲೀ ಅಲ್ಪಮು ಅನಿ ಎಣಿಸ್ತಾನು . ¹⁹ ದೇವುಡ ಪುತ್ರುಲಾ ಮಹಿಮೆ ಯಪ್ದು ಪ್ರತ್ಯಕ್ಷಮೈತಾದೀ ಅನಿ ಲೋಕಮು ಜ್ಯಾಸ್ತಿ ಲವಲವಿಕೆಯಿಚ್ಚ ಎದುರುಸುಸ್ತಾ ವು೦ಡಾದ್ದಿ . ²⁰ ಲೋಕಮು ವ್ಯರ್ಥತ್ವಕ್ಕಿ ಒಳಗೈಯ್ಯಿದ್ದಿ . ಇಟ್ಟ ಒಳಗೈಯ್ಯು೦ಡಾದ್ದಿ ಸ್ವೆಚ್ಚೆಯಿಚ್ಚ ಕಾದೂ , ದಾನಿ ಒಳಪದಿಚ್ನೋಡ್ ಸ೦ಕಲ್ಪಮಿಚ್ಚನೇ . ²¹ ಐತ್ನೂ ದಾಕಿಒಕ್ಟಿ ನೀರಿಕ್ಷೆ ಯುನ್ನಾದೀ ; ಯೇಮಟ್ಟೆ ಆ ಲೋಕಮು ಕೂಡ ನಾಶನ ವಶಮ್ನಿಚ್ಚ ಬಿಡುಗಡೆ ಅಯ್ಯಿ ದೇವುಡ್ ಬಿಡ್ಡುಲ ಮಹಿಮೆಯ ವಿಮೋಚನೆಲಾ ಪಾಲುಹೋದ್ಕೊನದೇ . ²² ಜಗತ್ತು ಇನ್ನಿ ತನಕ ನರಳ್ತಾ ಪ್ರಸವ ವೇದನೆ ಪಡ್ತಾವು೦ಡಾದ್ದಿ ಅನಿ ಮಾಮು ತಿಲಿಚ್ಕೊನಾಮು . ²³ ಇದು ಕಾಕುಡ್ಡ ಪ್ರಥಮ ಫಲಾ ಅಯ್ನಾಟ್ಟ ಪವಿತ್ರಾತ್ಮ ವರನೀ ಹೊ೦ದ್ದಿನ ಟ್ಟ ಮಾಮು ದೇಹಕ್ಕಿ ರಾಬೇಕೈಯುಡ್ದ ವಿಮೋಚನೆನಿ ಎದುರುಸುಸ್ತಾ ಮಾಲನೆ ನರಳ್ತಾವು೦ಡಾಮು . ²⁴ ಮಾಮು ರಕ್ಷಣೆ ನೀ ಹೊ೦ದ್ದುಟ್ನೂ ಇಕ್ಕ ಎದುರುಸುಸ್ತಾ ವು೦ಡಾಮು . ಎದುರುಸುಸೇ ಪದವಿ ಪ್ರತ್ಯಕ್ಷಮೈಯ್ಯುಟ್ಟೆ ಎದುರುಸೂಸೆದ್ದಿಯದ್ಗು ? ಪ್ರತ್ಯಕ್ಷಮೈಯ್ಯುಡ್ದದಾನಿ ಎದುರುಸುಸೇದ್ದಿವು೦ಟ್ಟೆ ? ²⁵ ಅಯ್ತೆ ಸೂಸ್ದಾನೇ ವು೦ಡದಾನೀ ಎದುರುಸುಸೇದ್ದಿ ಅಯ್ಯುಟ್ಟೆ ತಾಳ್ಮೆಯಿಚ್ಚ ಕಸ್ಕಾವು೦ಡಾಮು . ²⁶ ಅಟ್ಟೆ ಪವಿತ್ರಾತ್ಮಡು ಮಾ ಆಸಕ್ತಿಸೂಸಿ ಸಹಾಯಮ್ ಸೇಸ್ತಾಡೂ . ಯಟ್ಟ ಅಟ್ಟೆ ಮಾಕಿ ಹೇಮ ಅಡಿಕ್ಕೊವಲಾ ಅನೆದ್ದಿ ಗೊತ್ಲೆನ್ದನೆ ವು೦ಡದಾಕಿ ಪವಿತ್ರಾತ್ಮುಡೆ ಮಾಟಾ ಲೆನಟ್ಟ ನರಲಾಟಮ್ನಿಚ್ಚ ಮಕ್ಕೊಸ್ಕರಮು ಅಡಿಕೊಟ್ಟಡೂ . ²⁷ ಅಯ್ತೆ ಹೃದಯನೀ ಶೋಧಿಚ್ಚಿ ಸುಸೋಡ್ಕಿ ಪವಿತ್ರಾತ್ಮುಡ ಮನೋಭಾವಮು ಹೇಮನೀ ಗೊತ್ತುಡದೀ ; ಆ ಆತ್ಮುಡು ದೇವುಡ ಚಿತ್ತಾನುಸಾರಮೈ ದೇವುಡ ಜನಲ್ ಕೊಸ್ಕಕರಮು ಅಡಿಕೊಟ್ಟಡೂ ಅನಿ ದೇವುಡ್ಕಿ ಗೊತ್ತು . ²⁸ ಇದೂ ಕಾಕುಡ್ಡ ದೇವುಡ ಸ೦ಕಲ್ಪಮಿದ್ದ ಪಿಲಚ್ಚಿ ಆತುಡ್ನೀ ಪ್ರಿತಿಚ್ಚೋಳ್ ಹಿತಕ್ಕಿ ಎಲ್ಲಾ ಕಾರ್ಯಲೂ ಅನುಕೂಲಮು ಅಯ್ತಾದೀ ಅನಿ ಮಾಕಿ ಗೊತ್ತು . ²⁹ ಅಟ್ಟೆ ದೇವುಡು ತನ್ ಕೊಡಕುಕ್ಕಿ ಅನೇಕ ಸಹೋದರೂಲು ವು೦ಡ್ಡಿ ವಾಳ್ಲಾ ಆತುಡೆ ಹಿರಿಯುಡ್ ಕವಾಲನಿ ಉದ್ದೆಶಿಚ್ಚಿ ಯೋಳ್ನಿ ತನೋಳ್ ಅನಿ ಮೊದಲು ತಿಲಿಚ್ಕೋನೋ ವಾಳ್ನೀ ತನ್ನ ಕೊಡುಕು ಸಾರೂಪ್ಯವುಳೋಳ್ ಅಯ್ಯೇಕಿ ಮೊದ್ಲೇ ನೇಮಿಚ್ಚೂಡೆ . ³⁰ ಮಲ್ಲಿ ಯೋಳ್ನಿ ಮೊದ್ಲೂ ನೇಮಿಚ್ನೋ ವಾಳ್ನೇ ಪಿಲ್ಚೆ . ಯೋಳ್ನಿ ಪಿಲಚ್ನೋ ವಾಳ್ನಿ ನೀತಿವ೦ತುಲ್ ಅನಿ ನಿರ್ಣಯಿಚ್ಚೆ .ಯೋಳ್ನಿ ನೀತಿವ೦ತುಲ್ ಅನಿ ನಿರ್ಣಯಿಚ್ನೋ ವಾಳ್ನಿ ಮಹಿಮೆಯ ಪದವಿಕಿ ಸೇರಿಚ್ಚೆ . ³¹ ಈ ವಿಷಯಮ್ಲಾ ಮಾಮು ಹೇಮಿ ಸೋಪ್ದಾಮು ? ದೇವುಡು ಮಾ ಪಕ್ಷವು೦ಟ್ಟೆ ಮಾಮಲ್ನಿ ಎದುರಿಚೋಳೂ ಯೋಳೂ ? ³² ಸ್ವ೦ತ ಕೊಡುಕುನೇ ವುಳ್ಬಿಚ್ಕೊನ್ದಾನೆ ಮಾಕೊಸ್ಕರಮೂ ಒಪ್ಪಿಚ್ಚಿಚೆಕದಾ ; ಕೊದುಕುನೀ ಇಚ್ ಅಮೆಕಿದ್ದ ಸಮಸ್ತನೀ ಮಾಕಿ ಇಸ್ದಾನೇ ವು೦ಟಾಡ ? ³³ ದೇವುಡು ಅರಿಬಿಚ್ಕನೋಟ್ಟೋಳೂ ಮಿದ್ದ ಯೋರು ತಪ್ಪುನೀ ಹೊರಿಸ್ತಾರೂ ? ದೇವುಡೆ ಮಾಮಲ್ನಿ ನೀತಿವ೦ತುಲು ಅನಿ ನೀರ್ಣಯಿಚ್ಚೋಡೂ ಅಯ್ನಾಡೂ . ³⁴ ಅಪರಾಧಿಲೂ ಅನಿ ನೀರ್ಣಯಿಚ್ಚೋಳೂ ಯೋವರೂ ? ಕ್ರಿಸ್ತ ಯೇಸು ಮರಣನೀ ಹೊ೦ದಿದ್ದಿ ಕಾಕುಡ್ಡ ಜೀವ೦ತಮೈ ಲೇಸಿ ದೇವುಡ ಕುಡುಮ್ ತೋಟೂ ವು೦ಡ್ಡಿ ಮಾಕೊಸ್ಕರಮೂ ಬೇಡಿಕೋ೦ಟ್ಟವು೦ಡ್ಡಡೂ . ³⁵ ಕ್ರಿಸ್ತುಡ ಪ್ರೀತಿಯಿಚ್ಚ ಮಾಮಲ್ನಿ ಅಗಲಿಚ್ಚೋಳೂ ಯೋರೂ ? ಕಷ್ಟಮೋ , ಸ೦ಕಟಮೋ , ಹಿ೦ಸೆಯೋ , ಅನ್ನಮೂಲೇನ್ದನೆ ವು೦ಡಾದೋ , ಗಂಡಾತರಮೋ , ಖಡ್ಗಮೋ ? ³⁶ ದೇವುಡ ಮಾಮು ನೀ ನಿಮಿತ್ತಮಿಚ್ಚ ದಿನಮೆಲ್ಲಾ ಕೊಲೆಕಿ ಗುರಿ ಅಯ್ನಾಮೂ ; ಜನಲೂ ಮಮಲ್ನಿ ಕೊಯ್ಗುರಿಲಕ ಎಣಿಚ್ಲಿ . ಅನಿ ರಸ್ನಾಟ್ಗ ಅಯ್ತಾದೀ ಕದಾ . ³⁷ ಮಮಲ್ನಿ ಪ್ರಿತಿಚ್ಚಿನ ಆತುಡ ಮೂಲಕಮೈ ಮಾಮು ಈ ಎಲ್ಲಾ ವಿಷಯಮ್ಲಾ ಪೂರ್ಣ ಜಯಶಾಲಿಲೂ ಐನಾಮೂ . ³⁸ ಯಟ್ಟ ಅಟ್ಟೆ ಮರಣಮ್ ಕಾನಿ , ಜೀವಮ್ ಕಾನಿ , ದೇವದೂತುಲ್ ಕಾನಿ , ದುರಾತ್ಮಕಾನಿ , ಇಪ್ದುಡ್ದ ಸ೦ಗತಿಕಾನೀ , ಮೂದ್ರುಡ್ದ ಸ೦ಗತಿಕಾನೀ , ಮಹತ್ವಕಾನೀ , ³⁹ ಮೇಲಣ ಲೋಕಮ್ ಕಾನಿ , ಕೆಳಗಣ ಲೋಕಮ್ ಕಾನಿ , ಸೃಷ್ಟಿಕಾನಿ ಮಮಲ್ನೀ ಮಾ ಕರ್ತುಡ್ ಅಯ್ನಾ ಯೇಸು ಕ್ರಿಸ್ತುಡ್ಲಾ ತೋರಿ ವಚ್ನಟ್ಟ ಪ್ರಿತಿಯಿಚ್ಚ ಅಗಲಿಚ್ಚೆಕ್ಕಿ ಅಯ್ಯೇಲೇದ್ ಅನಿ ಮಾಕಿ ನಿಶ್ಚಯಮು ವು೦ಡಾದ್ದಿ .