¹ ಯೇಸು ಕ್ರಿಸ್ತಡು ದಾಸುಡು ಆಯ್ನಾಟ್ಟ ಪೌಲುಡು ರೋಮಾಪುರಮುಲ ದೇವುಡುಕ್ಕಿ ಪ್ರಿಯಲೂ ಅಯ್ನಾಟ್ಟ ಆದ್ರೂಕು ರಸೇದಿ ಯೇಮಟ್ಟೆ - ಮಾ ತಡ್ರಿಅಯ್ನ ದೇವುಡ್ನಿಚ್ಚನು ಮಲ್ಲಿ ಯೇಸು ಕ್ರಿಸ್ತನಿಚ್ಚನೂ ಮಿಕೀ ಕೃಪೆಯೂ ಶಾ೦ತಿಯೂ ಕಾನಿ . ² ಸುವಾರ್ತೆನೀ ಸೋಪ್ಪಿಸ್ತಾನ್ ಅನೀ ದೇವುಡು ಮು೦ಚಿತಮೈ ಪವಿತ್ರಶಾಸ್ತ್ರಲಾ ತನ್ ಪ್ರವಾದಿಲ್ ಮುಲಕಮೈ ಮಟಾನೀ ಇಚ್ಛೆ . ³ ಈ ಸುವಾರ್ತೆ ದೇವುಡ ಕೊಡುಕ್ಕು ಮಲ್ಲಿ ಮಾ ಯೇಸು ಕ್ರಿಸ್ತುಡ ವಿಷಯಾಮೇ . ಯೇಸು ವ೦ಶಾಕ್ರಮಮುನಿಚ್ಚ ದಾವೀದ ಸ೦ತಾನುಮೂಲಾ ಪುಟ್ಟುನೋಡು . ⁴ ಪವಿತ್ರಮೈನಾ ಆತ್ಮಮೈಯ್ಯಿ ಸೇಚ್ಚಿ ಅಮೆಕಿದ್ದ ಜೀವ೦ತಮೈ ಲೇಸಿ ವಚ್ಚಿ ಅದ್ಬುತಕಾರ್ಯಮಿಚ್ಚ ನಿರ್ಣಯಿಂಚ್ಚಿಪಟ್ನಾಡು . ⁵ ಯೇಸು ಪೇರು ಪ್ರಸಿದ್ದಕೈಯಿ ಎಲ್ಲಾ ಅನ್ಯಜನಲ ನ೦ಬಿಕೆ ಅನೆ ವಿಧೆಯತ್ವಮು ಉ೦ಟಾಯಕ್ಕಿ ಮಾಮು ಆತನ ಮುಲಕಮೈಯ್ಯಿ ಕೃಪೇನಿ ಹೊ೦ದ್ಕಾನಾಮು . ⁶ ಯೇಸು ಕ್ರಿಸ್ತುಲ್ ಅಯೆಕ್ಕಿ ಪಿಲಿಚ್ನಾಟ್ಟ ಮೀಕೀ ರಸ್ತಾನು . ⁷ ಮೊದಲನೆದೀ ಮೀ ನ೦ಬಿಕೆ ಲೋಕ್ಕಕೆಲ್ಲಾ ಪ್ರಸಿದ್ದಿಕ್ಕಿ ವಚ್ಚುಡದಾಕಿ ಮೀ ಅದ್ರೂ ವಿಷಯಮ್ಲಾ ನಾ ದೇವುಡುಕ್ಕಿ ಸೋತ್ರಮೂ ಸೋಪ್ತಾನೂ . ⁸ ನಾನು ಪ್ರಾಥ೯ನೆ ಸೇಸೆನಾಪ್ದು ತಪ್ದನೇ ಮಿಕೊಸ್ಕಾರಮೂ ಪ್ರಾಥ೯ನೆಸೇಸಿ , ⁹ ಇಕ್ಕಮಿದ್ದಾದ್ರೂ ಮೀ ಹತ್ರಕ್ಕಿ ವಚ್ಚೆಕ್ಕಿ ದೇವುಡು ಚಿತ್ತಮಿಚ್ಚ ನಾಕೀ ಅನುಕುಲಮೂಕಾವಲನಿ ¹⁰ ವೇಡಿಕೊಟ್ಟನು . ದೀಕಿ ದೇವುಡೆ ಸಾಕ್ಷಿ ; ದೇವುಡು ಸುವಾರ್ತೆನೀ ಸಾರ್ತ್ತ ಆತ್ಮುಡ್ನಿ ನಾ ಆತ್ಮೂಲಾ ಆರಾಧಿಸ್ತಾನೂ . ¹¹ ನಾ ಮೀ ನ೦ಬಿಕೆನೀ ಮೀಳು ನಾ ನ೦ಬಿಕೆನಿ ಸಹಾಯಮೂ ¹² ಹೊ೦ದಿಕೊನಿ ಮಿಜೋತ್ಲಾ ನಾನು ಧೈರ್ಯಮುಹೊ೦ದ್ದಿಕೊನೆಕೊಸ್ಕರಮು ಮಿಮ್ಮಲ್ನೀ ಸುಡಲನೀ ಅಪೇಕ್ಷಿಸ್ತಾನೂ . ¹³ ಕೇಲಸಮೂ ಇತರ ಜನಲಾ ಸಫಲಮೂ ಅಯ್ನಾಟ್ಗ ಮೀ ಹತ್ರನೂ ಸಫಲಮೂ ಅಯ್ಯಿದ್ದಿ ಅನಿ ಮೀ ಹತ್ರಕ್ಕಿ ವಚ್ಚೆಕ್ಕಿ ತಡೆಅಯಿದ್ದಿ ಮೀಕಿ ಗೊತ್ತು ಅನಿ ನಾ ಅಪೇಕ್ಷೆ . ¹⁴ ಗ್ರಿಕುಲ್ಕಿ ಮಲ್ಲಿ ಇತರ ಮೂಢ ಜನಲ್ಕಿ ತೀರಿಬಿಚ್ಚೆಕಿ ಒ೦ಕ್ಟಿ ಋಣಮೂ ನಾಮಿದ್ದ ವು೦ಡದೀ . ¹⁵ ಹಿಟ್ಟುಡದಾಕ್ಕಿ ರೋಮಾಪುರಮೂಲ ಮಿಕ್ಕಿ ಸುವಾರ್ತೆ ಸಾರೆಕ್ಕಿ ನಾನು ಸಿದ್ದಮೈನಾನೂ . ಸುವಾರ್ತೆ ವಿಷಯಮ್ಲಾ ನಾನು ನಾಚಿಕೆ ಪಡೆಲೇದು . ¹⁶ ಆ ಸುವಾರ್ತೆ ದೇವುಡ್ ಬಲಸ್ವರೂಪಮಯ್ಯಿ ಯೆಹೂದ್ಯೂಲ್ಕಿ ಗ್ರಿಕುಲ್ಕಿ ಮಲ್ಲಿ ನ೦ಬೊಳ್ ಅದ್ರೂಕ್ಕಿ ರಕ್ಷಣೆನೀ ಉ೦ಟ್ಸೇಸದೀ . ¹⁷ ದೇವುಡ್ನಿಚ್ಚ ಸಿಕ್ಕಟ್ಟ ನೀತಿ ದಾಟ್ಲಾ ಕಾಮಡಿಸದ್ದಿ . ನೀತಿವ೦ತಡೂ ನ೦ಬಿಕೆನಿಚ್ಚ ಬದುಕುತ್ತಾಡೂ . ¹⁸ ದುಷ್ಟತ್ವಮುನಿ ನಡಿಪಿಚ್ಚಿ ಸತ್ಯಮುನೀ ಅಣಗಿಚ್ಚಟ್ಟ ಮನುಷ್ಯೂಲಾ ಭಕ್ತಿಹೀನತೆ ಮಿದ್ದನೂ ದುಷ್ಟತ್ವಮಿದ್ದನೂ ದೇವುಡ ಕೋಪಮೂ ಪರಲೋಕಮಿಚ್ಚ ದಿಗಿವಸ್ತಾದೀ . ¹⁹ ಯಾದ್ಗು ಅಟ್ಟೆ ದೇವುಡ ವಿಷಯಮೈಯ್ಯಿ ತಿಲಿಚ್ಕೊನದೀ ವಾಳ್ ಮನಸ್ಸಿಕಿ ಸ್ಪಷ್ಟಮಯ್ಯಿ ಗೊತ್ತುಡದೀ. ²⁰ ಯಾದ್ಗು ಅಟ್ಟೆ ಯೇಸು ನಿತ್ಯಶಕ್ತಿ ಮಲ್ಲಿ ದೇವತ್ವಮೂ ಜಗಕ್ಕಿ ಮೊದಲೇ ದೇವುಡು ಸೃಷ್ಟಿಸೇಸೆನಟ್ಗಾ ಬುದ್ದಿಕ್ಕಿ ಗೊತ್ತಾಯಿ ಕಾಮಾಡಿಸದ್ದಿ . ²¹ ಅಟ್ಟೆ ವಾಳು ಆತನನ್ನೀ ದೇವುಡು ಅನಿ ಘನಪಡಿಲೇ , ದೇವುಡ ಉಪಕಾರನಿ ನೆನಸಿ ಸ್ತುತಿಸೆಲೇದೂ . ವಾಳು ವಿಚಾರುಮುನಿ ಸೇಸಿ ಫಲಮುನಿ ಸೂಡ್ಲೇದು . ವಿವೇಕಮುಲೆನಟ್ಟ ಮನಸ್ಸು ಸಿಕಟ್ಟಿ ಅಯ್ಯಿದ್ದಿ . ²² ಮೀಲು ಜ್ಞಾನೀಳು ಅನಿ ಸೋಪ್ಕನ್ನಿ ಹುಚ್ಚಲಾಯ್ಲಿ . ಲಯಮುಲೆನಟ್ಟ ದೇವುಡ ²³ ಮಹಿಮೇನಿ ಇಸ್ಪೆಟ್ಟಿ ದಾಕಿ ಬದಲಾಯ್ಯಿ ಮನುಷ್ಯುಡೂ , ಆವು , ಪಕ್ಷಿಲಾ , ಮುರ್ತೀನಿ ಸೇಸ್ಕೊನ್ಲೀ . ²⁴ ಆದ್ಗೂ ವಳ್ನಿ ವಳ್ ಮನಸ್ಸಿನ ದುರಾಶೆಯಿಚ್ಚ ವಳ್ ದೇಹನಿ ಮಾನಹೀನಮೂ ಸೇಸ್ಕೊನಿ ಅನಿ ದೇವುಡು ವಾಳ್ನಿ ಸೇಡ್ಡ ನಡೆತೆಕಿ ಒಪಿಚ್ಚೆ . ²⁵ ವಾಳು ಸತ್ಯ ದೇವುಡುನಿ ಇಸ್ಪೆಟ್ಟಿ ಅಸತ್ಯಮೂನಿ ಪುಟ್ಕೊನಿ , ಸೃಷ್ಟಿ ದೇವುಡುನಿ ಆರಾಧಿಸಧಾನೇ ಸೃಷ್ಟಿ ವಸ್ತುಲನ್ನಿ ಆರಾಧಿಸ್ಲಿ . ಸೃಷ್ಟಿ ಕರ್ತನೊಕ್ಕಡೆ ಸ್ತುತಿಹೊ೦ದತಕ್ಕೋಡು . ಆಮೆನ್ . ²⁶ ದೀನಿ ಸೇಸ್ಸಿದಾಕ್ಕಿ ದೇವುಡು ವಾಳ್ನಿ ತುಚ್ಚಮೈನಾ ಕಾಮಾಭಿಲಾಷೆಕಿ ಒಪ್ಪಿಚ್ಚೆ . ಯಟ್ಟ ಅಟ್ಟೆ ವಾಳ್ ಅಡೋಳೂ ಸ್ವಭಾವಕ್ಕಿ ವಿರುದ್ದಮೈನಾ ಭೋಗಮ್ನಿ ಅನುಸರಿಚ್ಲಿ . ²⁷ - ಅದೇರೀತಿ ಮೊಗೊಳೂ ಮೊಗೋಳ್ ಜೋತ್ಲಾ ಅವಲಕ್ಷಣಮೈದ್ದಾನಿ ನಡಿಪಿಚ್ಚಿ ವಾಳ್ ಭ್ರಾ೦ತಿಕ್ಕಿ ತಕ್ಕ ಫಲಮೂನೀ ಹೊ೦ದುಕೊನೋಳಅಯ್ಲಿ . ²⁸ ಇದೂ ಕಾಕುಡ್ಡ ದೇವುಡ ಜ್ಞಾನಮೂ ವಾಳ್ಕಿ ಇಷ್ಟಮೂಲೇದಾಕ್ಕಿ ಅಲ್ಲದ ಕ್ರುತ್ಯಲ್ನಿ ನಡಿಪಿಚ್ಚಿನಟ್ಗ ದೇವುಡು ವಳ್ನಿ ಅನಿಷ್ಟಭಾವಕ್ಕಿ ಒಪ್ಪಿಚ್ಚೆ . ²⁹ ಯಟ್ಟ ಅಟ್ಟೆ ವಾಳು ಸಕಲ ಅನ್ಯಾಯ ದುರ್ಮಾಗತನ ದುಷ್ಟತ್ವನಿಚ್ಚನು ಕೊಡ್ಪುರಿ , ಕೊಲಾ , ಜಗಳಮು , ಮೋಸಮೂ , ಹಗೆತನಮೂನಿಚ್ಚ ನಿಡ್ಡೂಡೋಲ್ ಅಯ್ಯುಡ್ಲಿ . ³⁰ ವಾಳೂ ಸ್ವ ಉದೋಳೂ , ಚಾಡಿಸೋಪ್ಪೋಳೂ , ದೇವುಡುನಿ ದ್ವೇಷಮೂಸೇಸೋಳೂ , ಸೊಕ್ಕುಡೋಳೂ , ಅಹ೦ಕಾರಿಲೂ , ಕೇಡ್ನಿ ಕಲ್ಪಿಚೋಟೋಳೂ , ³¹ ತಡ್ರಿ ತಲ್ಲಿ ಮಾಟ್ನಿ ಇನ್ದನೇ ವುಡೋಳೂ , ವಿವೇಕಮು ಲೇನ್ನಟ್ಟೋಳು , ಮಾಟ್ಕಿ ತಪ್ಪೊಳೂ , ಕರುಣೆಲೇನ್ನಟ್ಟೋಳೂ , ಆಯ್ಲಿ . ³² ನಡಿಪಿಚ್ಚೋಳು ಮರಣಕ್ಕಿ ಪಾತ್ರರೈನಲೂ ಅನೆ ದೇವುಡ ವಿಧಿ ಗೊತ್ತುಟ್ನೂ ವಾಳೂ ದಾನೇ ಸೇಸ್ಸಿ ಇಕ್ಕೊಕಲ್ಕಿ ಸೇಸ್ಸಕ್ಕಿ ಸೋಪ್ಪತ್ತಾರೂ .