¹ ವಾಳು ಯೆರೂಸಲೆಮಿಕಿ ಸಮೀಪಿಚ್ಚಿ ಅಂದ್ಮುಮಾನ್ಲು ಗುಡ್ಮು ದೆಗ್ರುಂಡೆ ಬೆತ್ಪಕೆಕು ಬೇಥಾನ್ಯಕು ವಚ್ನಪ್ಪ್ದು ಯೇಸು ತನ್ ಶಿಷ್ಯುಲ್ಲ ಇದ್ರುನಿ ಪಿಲ್ಚಿ ಮೀಎದ್ರುಲ ವುಂಡೆ ಹಳ್ಳಿಕಿ ಪೊಂಡ್ರಿ , ² ದಾನೋನ್ಕಿ ಪಾಯ್ನಪ್ಪ್ದೆ ಆನ ಕಟ್ಟುಂಡೆ ಓಕ್ ಗಾಡ್ದಿ ಪಿಲ್ಲ್ನಿ ಕಂಟಾರು , ಇಂತ್ಗಂಟ ದಾನ್ ಮಿಂದ ಯೋಳು ಎಕ್ಲೇದು , ದಾನ್ನಿ ಇಪ್ಪಿ ಪಟ್ಕೋನಿ ರಾಂಡ್ರಿ . ³ ಯೋವ್ಡಾರ ಮಿಮ್ಮುಲ್ನಿ - ಏಮಿ ಇಟ್ಟ ಸೇಸೇದಿ ಅನಿ ಅಡ್ಗ್ತೆ - ಇದಿ ಸ್ವಾಮಿಕಿ ಬೇಕಾಯಿಂದಿ , ವಾಳು ತಡ್ಮ್ ಸೇಯ್ಕುನ್ನ ತಿರ್ಗಿ ಈನ್ಕೆ ಅಂಪಿಸ್ತಾರು ಅನ್ನಂಡ್ರಿ ಅನಿ ಸೊಪ್ಪಿ ಅಂಪಿಚ್ನಾರು . ⁴ ಆ ಶಿಷ್ಯುಲು ಪಾಯಿ ಬೀದ್ಲ ಆಕ್ಟರ ವಾಕ್ಲಿ ಅತ್ರುಮು ವಚ್ಚಿ ಗಾಡ್ಡಿ ಪಿಲ್ಲ್ನಿ ಕಟ್ಟುಂಡೆದ್ನಿ ಕನಿ ದಾನ್ನಿ ಇಪ್ರಿ . ⁵ ಆನ ನಿಲ್ಪಡುಂಡೋಳ್ಳ ಕೆಲುವ್ಲು ಈ ಪಿಲ್ನಿ ಇಪ್ಪಿಡ್ಸಿ ಏಮಿ ಸೇಸ್ತಾರು ? ⁶ ಅನಿ ವಾಳ್ನಿ ಅಡ್ಗಿನ್ದಾಂಕು ಯೇಸು ಸೋಪ್ಪ್ನಟ್ಗೆ ವಾಳು ಸೊಪ್ಪ್ನಪ್ಡು ಆ ಜನಲು ಸೀಸ್ಕೊಂಪಾಯೇಕಿಇಡ್ಸಿ ⁷ ಶಿಷ್ಯುಲು ಆ ಪಿಲ್ನಿ ಯೇಸು ದೆಗ್ರುಕಿ ಎತ್ಕೊಚ್ಚಿ ವಾಳ್ ಬಟ್ಳುನಿ ದಾನ್ಮಿಂದ ಎಸೀ ಯೇಸು ದಾನ್ಮಿಂದ ಎಕ್ಕಿ ಕುಚ್ಚೋನ್ರಿ . ⁸ ಅಪ್ಡು ಅನೇಕ್ಲು ವಾಳ್ ಬಟ್ಳುನಿ ದಾವ್ಲ ಪರ್ಸ್ರಿ . ಬೇರೆ ಕೆಲ್ವುವ್ಲು ತೊಟ್ಮಿಂಚ ಚಿಗುರ್ಲುನಿ ಕೋಸಿ ಚೆಚ್ಚಿ ಪರ್ಸ್ರಿ . ⁹ ಯೇಸು ಎನ್ಕಾನು ಮುಂದ್ರಾನು ಪಾತವುನ್ದ್ನೋಳು - ಜಯಮು , ಕರ್ತುಡು ಪೇರ್ಲ ವಚ್ಚೋಡ್ಕಿ ಆಶಿರ್ವಾದ್ಮು , ¹⁰ ಮಾ ಪಿತ್ರುಮೈನ ದಾವಿದುಡು ರಾಜ್ಯುಮು ವಸ್ತಾದಿ , ದಾನ್ಕೆ ಆಶೀರ್ವಾದ್ಮು , ಪೈನ ಲೋಕುಮ್ಲ ಜಯ್ಮು ಅನಿ ಆರ್ಭಟಿಚ್ರಿ . ¹¹ ಆಮಿಂದ ಯೇಸು ಯೆರೂಸಲೆಮ್ನಿ ಸೇರ್ಕೊನಿ ದೇವುಡುಆಲಯ್ಮ್ಕಿ ಪಾಯಿ ಸುತ್ಲು ಅಂತ ಸೂಸ್ಕೋನಿ ಅಂತ್ಪದ್ಗಿ ಮಾಟಾಲಾಯುಂಡೆದಾನಿಂಚ ಪನ್ನೆಂಡು ಮಂದಿಲು ಶಿಷ್ಯುಲ್ನಿ ತೊಡ್ಕೋನಿ ಬೇಥಾನ್ಯಂಕು ಪಾಯ್ರಿ . ¹² ಮರುದಿನ್ಮು ವಾಳು ಬೇಥಾನ್ಯನಿ ಇಡ್ಸಿ ವಚ್ಚೆನಪ್ಪ್ದು ಯೇಸುಕಿ ಆಕ್ಲಾಯೆ . ¹³ ಮಲಿ ಹಾಕ್ಲಿಡ್ಸುಂಡಿನ ಓಕ್ ಅಂಜೂರ್ಮು ಮಾನ್ನಿ ದೂರುಮ್ಲ ಕನಿ ದಾಂಟ್ಲ ತನ್ಕೇಮಾರ ಪಂಡು ಸಿಕ್ತಾದನಿ ಆನ್ಕಿ ಪಾಯ್ರಿ . ದಾನ್ ದೆಗ್ರಿಕಿ ವಚ್ನಪ್ಪ್ದು ದಾಂಟ್ಲ ಬರೀ ಹಾಕ್ಲುನೆ ಹೊರ್ತು ಮಲೇಮಿ ಕನ್ಲೇದು , ಆದಿ ಅಂಜೂರ್ಮು ಪಂಡ್ಳು ಕಾಲ್ಮು ಕಾದು . ¹⁴ ಅಪ್ಡು ಯೇಸು ಆ ಮಾನ್ಕಿ - ಇoಕ್ಮಿಂದ ಒಕ್ಳೂ ನೀಲ ಪಂಡ್ನಿ ಎಪ್ದುಕೂ ತಿನ್ನ್ಲೇನಟ್ಗ ಆವ್ನಿ ಅನಿ ಸೊಪ್ಪೇ. ಯೇಸು ಶಿಷ್ಯುಲು ದಾನ್ನಿ ಇನ್ರಿ . ¹⁵ ವಾಳು ಯೆರೂಸಲೇಮ್ಕಿ ವಚ್ನಪ್ಪ್ದು ಯೇಸು ದೇವುಡು ಆಲಯುಮ್ಕಿ ಪಾಯಿ ದಾಂಟ್ಲ ಮಾರೋಳ್ನಿ ಸೀಸ್ಕೊನೋಳ್ನಿ ಅಂಪಿಚ್ಚೆಕಿ ಪ್ರಾರಂಬ್ಮು ಸೇಸಿ ಚಿನಿವಾರ್ಲುಲ ಮೇಜುಲ್ನಿ ಪಾರಿವಾಳ್ಮು ಮಾರೋಳುಲ ಕಾಲ್ಮಣೆಲ್ನಿ ಪಡೇಸೆ , ¹⁶ ಒಕ್ಡಾರ ಸಾಮಾನ್ಲುನಿ ಮೋಸ್ಕೊನಿ ದೇವುಡು ಆಲಯುಮ್ಕಿ ಪಾಯೇಕಿಡಿಲೆ . ¹⁷ ಮಲಿ ಯೇಸು ಉಪದೆಶ್ಮು ಸೇಸಿ ನಾ ಆಲಯ್ಮು ಅನ್ನಿ ಜನಾಂಗ್ಮುಲಿಕು ಪ್ರಾರ್ಥನಾಲಯ್ಮು ಅನ್ಬಿಚ್ಕೊಂಟಾದಿ ಅನಿ ರಾಸಿಂದೆ ? ಆಯ್ತೆ ಮೀರು ದಾನ್ನಿ ದೊಂಗ್ಲು ಗವಿ ಸೇಸ್ನಾರು ಅನಿ ಸೊಪ್ಪೇ . ¹⁸ ದಾನ್ನಿ ಮಹಾಯಾಜಕುಲು ಶಾಸ್ತ್ರಿಲು ಇನಿ ವಾಡ್ನಿ ಯಾವ್ ಉಪಾಯ್ಮಿಂಚ ಸೊಂಪ್ದಾಮು ಅನಿ ಸಂದರ್ಭ್ಮುನಿ ಸೂಸ್ತಾವುಂಡ್ರಿ , ಎಂದ್ಕಂಟೆ ಜನಲಂದ್ರು ಯೇಸು ಉಪದೇಶ್ಮುನಿ ಇನಿ ಅತ್ಹ್ಯಾಶ್ಚರ್ಯುಮು ಪಟ್ಟಿoದಾನ್ನಿಂಚ ವಾಳು ವಾಡ್ಕಿ ಹೆದ್ರುಕೊoಟವುಂಡ್ರಿ . ¹⁹ ಪ್ರತಿ ಮಾಟಾಲ ಯೇಸು ವಾಳ್ ಶಿಷ್ಯುಲು ಪಟ್ಣುಮ್ನಿ ಇಡ್ಸಿ ಆಕ್ಟರ್ಕಿ ಪಾತವುಂಡ್ರಿ . ²⁰ ಪದ್ನ ವಾಳು ವಚ್ಚೆನಪ್ಪ್ದು ಆ ಅಂಜೂರ್ಮು ಮಾನು ಬುಡ್ಮಿಂಚಾನು ಎಂಡ್ಪಾಯುಂಡೆದ್ನಿ ಕನ್ರಿ . ²¹ ಅಪ್ಪ್ದು ಪೇತ್ರುಡು ಎನ್ಕ ನಾಡ್ ಸಂಗತಿಲ್ನಿ ನೆನ್ಸ್ಕೋನಿ - ಗುರುಲ , ಇಗೋ ನುವ್ವ ಶಾಪ್ಮು ಇಚ್ಚಿನ ಅಂಜೂರ್ಮು ಮಾನು ಎಂಡ್ಪಾಯಿಂದಿ ಅನಿ ಸೊಪ್ಪಿಂದಾಂಕಿ ಯೇಸು ಸೊಪ್ಪಿನ್ದೆಮಂಟೆ - ²² ಮೀಕಿ ದೇವುಡ್ಲ ನಂಬುಕ್ಮುಣ್ಣಿ . ²³ ಮೀಕಿ ಸತ್ಯುಮಾಯಿ ಸೊಪ್ತಾನು , ಯೌಡಾರ ಈ ಬೆಟ್ಮುಕಿ - ನುವ್ವ ಪೆರಿಕೋನಿ ಪಾಯಿ ಸಮುದ್ರುಮುಲ ಪಡು ಅನಿ ಸೊಪ್ಪಿ ವಾಳ್ ಮನ್ಸ್ಲ ಸಂಶಯ್ಮು ಪಡ್ಕುನ್ನ ತಾನು ಸೊಪ್ಪಿಂದಿ ಅಯ್ತಾದಿ ಅನಿ ನಂಬ್ತೆ ವಾಡು ಸೊಪ್ಪ್ನಟ್ಗೆ ಆಯ್ತಾದಿ . ²⁴ ದಾನ್ ಕಾರ್ಣುಮಿಂಚ ಮೀರು ಪ್ರಾರ್ತ್ನುಮು ಸೇಸಿ ಏಮೇಮಿ ಬೇಡ್ಕೊಂಟಾರೋ ದಾನ್ನಂತ ಹೊಂದ್ಕೊನ್ನಾಮು ಅನಿ ನಂಬಂಡ್ರಿ , ಆದಿ ಮೀಕಿ ಸಿಕ್ತಾದಿ ಅನಿ ಮೀಕಿ ಸೊಪ್ತಾನು . ^{25 26} ಇದ್ಕಾಕುನ್ನ ಮೀರು ನಿಲ್ಪಡ್ಕೋನಿ ಪ್ರಾರ್ತ್ನುಮು ಸೇಸೇನಪ್ಪ್ದಂತ ಯೋಳ್ಮಿಂದಾ ಏಮಾರ ವಿರೋದ್ಮುಂಟೆ ದಾನ್ನಿ ವಾಡ್ಕಿ ಕ್ಷಮಿಚ್ಚಂಡ್ರಿ , ಕ್ಷಮಿಸ್ತೆ ಪರ್ಲೋಕ್ಮುಲ ವುಂಡೆ ಮೀ ತಂಡ್ರಿ ಮೀಕಿ ಕ್ಶಮಿಸ್ತಾಡು ಅನೆ. ²⁷ ವಾಳು ತಿರಿಕೋನಿ ಯೆರೂಸಲೆಮಿಕಿ ವಚ್ಚ್ನಪ್ಪ್ದು ವಾಡು ದೇವುಡುಆಲಯುಮ್ಲ ತಿರ್ಗಾಡೆನಪ್ಪ್ದು ಮಹಾಯಾಜಕುಲು ಶಾಸ್ತ್ರೀಲು ಪೆದ್ದೋಳು ಯೇಸು ದೆಗ್ರಿಕಿ ವಚ್ಚಿ - ²⁸ ನುವ್ವ ಯಾವ್ ಅಧಿಕಾರ್ಮಿಂಚ ದೀನ್ನ್ನಂತ ಸೇಸ್ತಾವು ? ದೀನ್ನಿ ಸೇಸೆದಾನ್ಕಿ ಈ ಅಧಿಕಾರ್ಮುನಿ ನೀಕಿ ಯೋಳು ಇಚ್ಚ್ರಿ ಅನಿ ವಾಡ್ನಿ ಅಡುಗ್ರಿ . ²⁹ ಯೇಸು ವಾಳ್ಕಿ - ನಾನು ಮೀಕಿ ಓಕ್ ಮಾಟ ಅಡ್ಗ್ತಾನು , ನಾಕಿ ಉತ್ರುಮು ಸೊಪ್ತೆ ನಾನೂವೆ ಯಾವ್ ಅಧಿಕಾರ್ಮಿಂಚ ದೀನ್ನಿ ಸೇಸ್ತಾನನಿ ಮೀಕಿ ಸೊಪ್ತಾನು . ³⁰ ದೀಕ್ಷಾಸ್ನಾನುಮು ಸೇಬಿಚ್ಚೆ ಅಧಿಕಾರ್ಮು ಯೋಹಾನುಡ್ಕಿ ಪರ್ಲೋಕ್ಮಿಂಚ ವಚ್ಚ್ನೋ ? ಮನುಷ್ಯುಲಿಂಚ ವಚ್ಚ್ನೋ ? ಉತ್ರುಮಿಯ್ಯಂಡ್ರಿ ಅನೆ . ³¹ ಅಪ್ಪ್ದು ವಾಳು - ಪರ್ಲೋಕ್ಮಿಂಚ ವಚ್ಚೆ ಅನಿ ಮಾಮು ಸೊಪ್ತೆ ಅಟ್ಟಾಯ್ತೆ ಮೀರು ವಾಡ್ನಿ ಎಂದ್ಗೂ ನಂಬ್ಲೆದು ಅನೆ , ³² ಮನುಷ್ಯುಲಿಂಚ ವಚ್ಚೆ ಅನಿ ಸೊಪ್ತೆ ಎಮಾಯ್ತಾದೋ ಅನಿ ವಾಳ್ ವಾಳ್ನೋನ ಮಾಟ್ಲಾಡ್ಕೊoಟವುಂಡ್ರಿ . ಯೋಹಾನುಡು ಪ್ರಾವಾದುಡು ಅನಿ ಜನಲಂದ್ರು ಅನ್ಮಾನ್ಮುಲೇಕುನ್ನ ತಿಲ್ಸ್ಕೊನೆದಾನ್ನಿಂಚ ವೂಳ್ಕಿ ಜನಲು ಭಯ್ಮುಂಡೆ . ³³ ಇಟ್ಟುoಡೆದಾಯಿ ವಾಳು - ಮಾಮು ತಿಲಿಲೇದು ಅನಿ ಯೇಸುಕಿ ಉತ್ರುಮಿಚ್ಚ್ರಿ . ಅಪ್ಪ್ದು ಯೇಸು ವಾಳ್ಕಿ - ಯಾವ್ ಅಧಿಕಾರ್ಮಿಂಚ ದೀನ್ನಿ ಸೇಸ್ತಾನೋ ದಾನ್ನಿ ನಾನು ಮೀಕಿ ಸೊಪ್ಪೆಟ್ಲೆದು ಅನೆ .