¹ ಸಬ್ಬತ್ ದಿನ್ಮು ಆಯಿನ್ಮಿಂದ ವಾರ್ಮು ಮೊದ್ಲುನೆ ನಾಡು ತೆಲ್ಲಾರೆನಪ್ಡು ಮಗ್ದಲಿದಿ ಮರಿಯಳು ಆ ಬೇರೆ ಮರಿಯಳು ಸಮಾದಿನಿ ಸೂಸೇಕಿ ವಚ್ರಿ . ² ಅಪ್ಡು ಪೆದ್ ಭೂಕಂಪ್ಮು ಆಯೆ . ಕರ್ತುಡಿನ ದೂತುಡು ಆಕಾಶ್ಮಿಂಚ ದಿಗಿ ವಚ್ಚಿ ಆ ರಾಯ್ನಿ ವಾಕ್ಲಿಂಚ ಪಡೇಸಿ ದಾನ್ಮಿಂದ ಕುಚ್ಚೋನ್ರಿ . ³ ವಾಡ್ ಮಕ್ಮು ಭಾವ್ಮು ಮಿಂಚ್ಲಾಕ ವುಂಡೆ , ವಾಡ್ ಬಟ್ಳು ಹಿಮಲಾಕ ತೆಲ್ಲುಗೆ ವುಂಡೆ , ⁴ ಕಾವಲುಗಾರ್ಲು ವಾಡ್ಕಿ ಹೆದ್ರುಕೊನಿ ನಡ್ಗಿ ಸಚ್ನೋಳ್ ಅಟ್ಗ ಆಯ್ರಿ . ⁵ 5 ಅಪ್ಡು ದೂತುಡು ಆ ಆಡೋಳ್ಕಿ - ಮೀರು ಹೆದ್ರೋದಂಡ್ರಿ ಶಿಲುಭೇಕಿ ಏಸಿನ ಯೇಸುನಿ ಹುಡ್ಕ್ತಾವುoಡಾರನಿ ತಿಲ್ಸಿಂದಿ , ವಾಡು ಈನ ಲೇದು , ^{6 7} ತಾನು ಸೊಪ್ನಟ್ಗ ಲೇಸ್ನಾಡು , ರಾಂಡ್ರಿ, ವಾಡು ಪೊಂಗೊನುಂಡಿನ ಜಾಗುಮ್ನಿ ಸೂಡoಡ್ರಿ , ಮಲಿ ಜಲ್ದಿ ಪಾಯಿ ವಾಡ್ ಶಿಷ್ಯುಲ್ಕಿ - ಸಚ್ನೋಡು ಬದ್ಕ್ನಾಡು , ವಾಡು ಮೀ ಮುಂದ್ರ ಗಲಿಲಾಯುಮ್ಕಿ ಪಾತಾಡು , ಆನ ವಾಡ್ನಿ ಕಂಟಾರು ಅನಿ ತಿಲ್ಬಿಯಂಡ್ರಿ , ನಾನು ಮೀಕು ಸೊಪ್ನಾನು, ಸೂಡoಡ್ರಿ ಅನಿ ಸೊಪ್ಪೇ. ⁸ ವಾಳು ಭಯ್ಮಿಂಚಾನು ಎಕ್ವ ಸಂತೋಷ್ಮಿಂಚಾನು ಜಲ್ದಿ ಸಮಾದಿನಿಂಚ ಪಾಯಿ ವಾಡ್ ಶಿಷ್ಯುಲ್ಕಿ ತಿಲ್ಬಿಚ್ಚೇಕಿ ಪರ್ಪಾಯ್ರಿ . ⁹ ಅಪ್ಡು ಯೇಸು ವಾಳ್ ಹೆದ್ರುಕಿ ವಚ್ಚಿ - ಮೀಕಿ ಶುಭ್ಮಾವ್ನಿ ಅನೆ. ವಾಳು ಹತ್ರುಮ್ಕಿ ವಚ್ಚಿ ಯೇಸು ಪಾದಲ್ನಿ ಪಟ್ಟಿ ಯೇಸುಕಿ ನಮಸ್ಕಾರ್ಮು ಸೇಸ್ರಿ. ¹⁰ ಯೇಸು ವಾಳ್ಕಿ ಹೆದ್ರೋದಂಡ್ರಿ , ನಾ ಸಹೋದುರ್ಲು ದೆಗ್ರುಕಿ ಪಾಯಿ ವಾಳು ಗಲಿಲಾಯುಮ್ಕಿ ಪೋವಾಲನಿ ಸೊಪ್ಪಂಡ್ರಿ , ಆನ ನನ್ನೀ ಸೂಸ್ತಾರು ಅನಿ ಸೊಪ್ಪೇ. ¹¹ ವಾಳು ಪಾಯೇನಪ್ಡು ಕಾವ್ಲುಗಾರ್ಲಾ ಕೆಲುವ್ಲು ಪಟ್ನುಮುನೋನ್ಕಿ ವಚ್ಚಿ ನಡ್ಸಿನ ಸಂಗತಿಲ್ನಿ ಅನ್ನಿ ಮಹಾಯಾಜಕುಲ್ಕಿ ತಿಲ್ಬಿಚ್ಚ್ರಿ . ¹² ವೂಳು ಪೆದ್ದೋಳ್ ಜೊತ್ಲ ಕೂಡ್ಕೊನಿ ಆಲೋಚ್ನುಮು ಸೇಸಿ ಆ ಸಿಪಾಯಿಲ್ಕಿ ಬಹಳ್ಮು ದುಡ್ಲಿಚ್ಚಿ - ¹³ ವಾಡ್ ಶಿಷ್ಯುಲು ರಾತ್ರಿಲ ವಚ್ಚಿ ಮಾಮು ನಿದ್ರಾ ಸೇಸ್ತಾವುನ್ನಪ್ಡು ವಾಡ್ನಿ ದೊಂಗ್ಲಿಚ್ಕೊನಿ ಪಾಯ್ರಿ ಅನಿ ಸೊಪ್ಪಂಡ್ರಿ, ¹⁴ ಇ ಸುದ್ದಿ ದೆಶಾಧಿಪತಿಲು ಶೊವ್ಕಿ ಪಡ್ತೆ ಮಾಮು ವಾಳ್ನಿ ಸಮಾದಾನ್ಮು ಪಡ್ಬಿಚ್ಚಿ ಮೀಕಿ ಭಯ್ಮು ಲೇನಟ್ಗ ಸೇಸ್ತಾಮು ಅನ್ರಿ . ¹⁵ ವೂಡು ಆ ದುಡ್ದ್ಲುನಿ ಸೀಸ್ಕೋನಿ ವಾಳ್ಕಿ ಸೋಪ್ಪಿಚ್ನಟ್ಗ ಸೇಸ್ರಿ . ಈ ಮಾಟ ಇಪ್ಡುಗoಟ ಯೆಹೂದ್ಯುಲ್ಲ ಹಬ್ಬೆ ವುಂಡಾದಿ. ¹⁶ ಅಮೀಕೆ ಪನ್ನೆಂಡು ಮಂದಿಲು ಶಿಷ್ಯುಲು ಗಲಿಲಾಯುಮ್ಕಿ ಪಾಯಿ ಯೇಸು ಮೀಕಿ ಗೊತ್ತು ಸೇಸಿನ ಬೆಟ್ಮುಕಿ ಸೇರ್ರೀ. ¹⁷ ಆನ ಯೇಸುನಿ ಕನಿ ಯೇಸುಕಿ ಅಡ್ಮು ಪಡ್ರಿ , ಆಯ್ತೆ ಕೆಲುವ್ಲು ಸಂದೇಹ್ಮು ಪಟ್ಟ್ರಿ. ¹⁸ ಅಪ್ಡು ಯೇಸು ಹತ್ರುಮ್ಕಿ ವಚ್ಚಿ - ಪರ್ಲೋಕ್ಮುಲಾನು ಭೂಲೋಕ್ಮುಲಾನು ಅನ್ನಿ ಅಧಿಕಾರ್ಮು ನಾಕಿ ಇಚ್ಚಿಂದಿ . ¹⁹ ದಾನ್ನಿಂಚ ಮೀರು ಪಾಯಿ ಅನ್ನೀ ದೇಶ್ಮು ಜನಲ್ನಿ ಶಿಷ್ಯುಲಾಯಿ ಸೇಯಂಡ್ರಿ , ವಾಳ್ಕಿ ತಂಡ್ರಿ , ಕೊಡ್ಕು , ²⁰ ಪವಿತ್ರಾತ್ಮುಮು ಪೇರ್ಲ ದೀಕ್ಷಾಸ್ನಾನ್ಮು ಸೇಬಿಚ್ಚಿ ನಾನು ಮೀಕಿ ಆಜ್ನಾಪಿನ್ಚಿಂದಂತ ಕಾಪಾಡ್ಕೋನೆಕಿ ವಾಳ್ಕಿ ಉಪದೇಶ್ಮು ಸೇಯಂಡ್ರಿ . ಸೂಡoಡ್ರಿ , ನಾನು ಯುಗ್ಮು ಸಮಾಪ್ತಿಗoಟ ಅನ್ನಿ ದಿನ್ಮು ಮೀ ಸಂಗಡ್ಮು ಉಂಟಾನು ಅನಿ ಸೊಪ್ಪೇ.