¹ ಆಮಿಂದ ಯೇಸು ದೇವಾಲಯ್ಮಿಂಚ ಹೊರ್ಟಿ ಪಾತವುಂಡೇಕಿ ಯೇಸು ಶಿಷ್ಯುಲು ಯೇಸುಕಿ ದೇವಾಲಯ್ಮು ಕಟ್ಟಣ್ಮುಲ್ನಿ ಸೂಪೆದಾನ್ಕಿ ದೆಗ್ರುಕಿ ವಚ್ರಿ . ² ಅಪ್ಡು ಯೇಸು ಇವುಟ್ಲುನಿಅಂತ ಸೂಸ್ತವುಂಡಾರು ಕದಾ , ಈನ ರಾಯ್ಮಿಂದ ರಾಯಿ ಉಳ್ಸೆಟ್ಲೆದು , ಅಂತಾ ಪಡ್ಪಾತಾದಿ ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು ಅನೆ . ³ ಬಳಿಕ್ಮು ಯೇಸು ಆಂದ್ಮು ಮಾನ್ಲು ಗುಡ್ಡುಮಿಂದ ಕುಚ್ಚೋನುನ್ಡ್ನಪ್ಡು ಶಿಷ್ಯುಲು ವಾಡ್ ದೇಗ್ರಿಕಿ ಪ್ರತ್ಯೇಕ್ಮಾಯಿ ವಚ್ಚಿ - ಆದಿ ಎಪ್ಡು ಆಯ್ತಾದಿ ? ನುವ್ವ ಪ್ರತ್ಯಕ್ಷುಮಾಯೇದಾಂಕಿ ಯುಗ್ಮು ಸಮಾಪ್ತಿಕು ಸೂಚನ್ಮು ಏಮಿ ? ⁴ ನಾಕಿ ಸೊಪ್ಪು ಅನೇಕಿ ಯೇಸು ವಾಳ್ಕಿ ಉತ್ರುಮಾಯಿ ಸೊಪ್ಪಿನ್ದೆಮಂಟೆ - ಯೋಳಾರ ಮಿಮ್ಮುಲ್ನಿ ಮೊಸ್ಮು ಗೊಳಿಚ್ಚೋಳು ಸೂಸ್ಕೊಂಡ್ರಿ . ⁵ ಎಂದ್ಕಂಟೆ ಅನೇಕುಲು ವಚ್ಚಿ ನಾ ಪೇರ್ನಿ ಎತ್ಕೋನಿ - ನಾನು ಕ್ರಿಸ್ತುಡು , ನಾನು ಕ್ರಿಸ್ತುಡು ಅನಿ ಸೊಪ್ಪಿ ಎಂತೋ ಜನಲ್ನಿ ಮೊಸ್ಮು ಗೊಳಿಸ್ತಾರು. ⁶ ಇದ್ಕಾಕುನ್ನ ಯುದ್ಧಾಲು ಆಯೆದಾನ್ನಿ ಯುದ್ಧ್ಮು ಆಯೇ ಅಟ್ಗ ವುಂಡಾದಿ ಅನೆ ಸುದ್ದಿಲ್ನಿ ಮೀರು ಇನ್ಬೇಕಾಯಿಂದಿ . ಕಳ್ವಳ್ಮು ಪಡ್ಕುಣ್ಣ ಸೂಸ್ಕೊಂಡ್ರಿ , ಎಂದ್ಕಂಟೆ ಅಟ್ಟಾಯೇದಿ ಅಗತ್ಯುಮು . ⁷ ಆಯ್ತೆನು ಇದಿ ಇಂಕ ಅoತ್ಯುಮು ಕಾಲ್ಮು ಕಾದು . ಜನಲ್ಕಿ ವಿರೋಧ್ಮಾಯಿ ಜನಲು ರಾಜ್ಯುಮ್ಕಿ ವಿರೋಧ್ಮಾಯಿ ರಾಜ್ಯುಮು ಲೇಸ್ತಾವಿ , ಮಲಿ ಆನಾನ ಬರಾಲು ವಸ್ತಾವಿ , ಭೂಕಂಪ್ಮುಲು ಆಯ್ತಾವಿ , ಇವಂತ ನೂತನ್ಮು ಕಾಲ್ಮು ಪುಟ್ಟೇ ಪ್ರಸವವೇದನ್ಮು ಪ್ರಾರಂಭ್ಮು . ⁸ ಅಪ್ಡು ಮಿಮ್ಮುಲ್ನಿ ಉಪದ್ರವಂಕಿ ಒಪ್ಪಿಚ್ಚಿ ಸೊಂಪ್ತಾರು , ⁹ ನಾ ಪೇರ್ ನಿಮಿತ್ಮು ಮಿಮ್ಮುಲ್ನಿ ಅನ್ನೀ ಜನಾಂಗ್ಮೊಳು ಪಗ ಸೇಸ್ತಾರು . ¹⁰ ಅನೇಕ್ಲು ಎನ್ಕಿಕಿ ತಿರ್ಗಿ ಒಕ್ಳುಕೊಕ್ಳುನಿ ಪಟ್ಟಿಸ್ತಾರು , ಒಕ್ಳು ಮಿಂದೊಕ್ಳು ದ್ವೇಷ್ಮು ಸೇಸ್ತಾರು . ¹¹ ಹೆಕ್ವಮಂದಿ ಸುಳ್ಳು ಪ್ರವಾದಿಲು ಸಹ್ಮು ಲೇಸಿ ಅನೇಕುಲ್ನಿ ಮೋಸ್ಮುಗೊಳಿಸ್ತಾಳು . ¹² ಇದ್ಕಾಕುನ್ನ ಅಧರ್ಮುಮು ಹೆಕ್ವಾಯೇದಾನ್ನಿಂಚ ಬಹುಜನಲು ಪ್ರೀತಿ ಸಲ್ಗಾಯಿ ಪಾತಾದಿ . ¹³ ಆಯ್ತೆ ಕಡೆಗಂಟ ತಾಳೋಡು ರಕ್ಷಣ್ಮು ಹೊಂದ್ತಾಡು . ¹⁴ ಇದ್ಕಾಕುನ್ನ ಪರ್ಲೋಕ್ಮು ರಾಜ್ಯುಮಿನ ಈ ಸುವಾರ್ತುಮು ಸರ್ವ ಲೋಕ್ಮುಲ ಅನ್ನೀ ಜನಾಂಗ್ಮುಲಿಕಿ ಸಾಕ್ಷಿಕೈಯಿ ಸಾರ್ತಾದಿ , ಅಪ್ಡು ಅಂತ್ಯುಮು ವಸ್ತಾದಿ . ¹⁵ ದಾನ್ನಿಂಚ ಪ್ರವಾದಿಯಾಯಿನ ದಾನಿಯೇಲುಡು ಸೊಪ್ಪಿನ ಪಾಡ್ಸೆಸೆ ಅಸಹ್ಯುಮು ವಸ್ತು ಪವಿತ್ರುಮು ಸ್ತಾನುಮುಲ ¹⁶ ನಿಲ್ಪಡುoಡೇದ್ನಿ ಮೀರು ಕನೆನಪ್ಡು ದೀನ್ನಿ ಓದೋಡು ತಿಲ್ಸ್ಕೊನ್ನೀ ಯೂದಾಯ್ಮುಲ ವುಂಡೋಳು ಬೆಟ್ಟಾಲ್ಕಿ ಪರ್ಪೋದ್ರುಗಾನಿ , ¹⁷ ಮಾಲಿಗುಲು ಮಿಂದ ವುಂಡೋಡು ವಾಡ್ ಇಂಟ್ಲವುಂಡೆದಾನ್ನಿ ಸೀಸ್ಕೊನೆದಾನ್ಕಿ ದಿಗ್ಕುನ್ನಾ , ¹⁸ ಸೇನ್ಲವುಂಡೋಡು ವಾಡ್ ಹೊದಿಕೆನಿ ಸೀಸ್ಕೊನೆದಾನ್ಕಿ ಹೆನ್ಕ ತಿರ್ಗಿ ರಾಕುಣ್ಣಾ ಪರ್ಪೋದ್ರುಗಾನಿ . ¹⁹ ಆಯ್ತೆ ಆ ದಿನುಮ್ಲ ನಿನ್ಮನ್ಸ್ಳುಕಿ ಮೊಲೆಕೂಸುಂಡೆ ಆಡೋಳ್ಕು ಆಯೇ ಕಸ್ಟಲ್ನಿ ಏಮಿ ಸೊಪ್ಪುದ್ನು . ²⁰ ಅಪ್ಡು ಪೆದ್ ಸಂಕಟ್ಮು ಉಂಟಾಯೇದಾನ್ನಿಂಚ ಮೀ ಪಲಾಯನ್ಮು ಚಳಿಗಾಲ್ಮುಲಾ ಆವ್ನಿ ಸಬ್ಬತ್ ದಿನ್ಮುಲ ಆವ್ನಿ ಆಗುಡ್ದನಿ ಪ್ರಾರ್ಥ್ನುಮು ಸೇಯಂಡ್ರಿ . ²¹ ಅಟ್ಟೆ ಸಂಕಟ್ಮು ಲೋಕ್ಮು ಪುಟ್ಟುಂಡಿ ಮೊದ್ಲುಗೋನಿ ಇಪ್ಡುಗಂಟ ಆವ್ಲೇದು . ²² ಇ೦ಕ್ಮಿ೦ದಾನು ಆಯೇಟ್ಲೆದು . ಕರ್ತುಡು ಆ ದಿನಲ್ನಿ ತಕ್ವ ಸೇಯ್ಕುನ್ಪಾತೆ ಓಕ್ ನರಪ್ರಾಣಿ ಆಯ್ತೆನು ಉಳ್ಸೆಟ್ಲೆ , ಆಯ್ತೆ ತಾನು ಅನ್ಕೊನ್ನೋಳ್ಕೋಸ್ಕರ್ಮು ಆ ದಿನಲ್ನಿ ತಕ್ವ ಸೇಸ್ತಾಡು . ²³ ಅಪ್ಡು ಯೋಳಾರ ಮೀಕಿ - ಇಗೋ ಕ್ರಿಸ್ತುಡು ಈನುಂಡಾಡು , ಅಗೋ ಆನುಂಡಾಡು ಅನಿ ಸೊಪ್ತೆ ನಂಬೋದಂಡ್ರಿ . ²⁴ ಸುಳ್ಳು ಕ್ರಿಸ್ತುಲು ಸುಳ್ಳು ಪ್ರವಾದಿಲು ಲೇಸಿ ಸಾದ್ಯುಮಾಯ್ತೆ ದೇವುಡಾರ್ಪಿಕೊನಿನೊಳ್ನಿ ಸಹ್ಮು ಮೋಸ್ಮು ಗೊಳಿಚ್ಚೆಕೊಸ್ಕರ್ಮು ಪೆದ್ ಪೆದ್ ಸೂಚಕ್ಮು ಕಾರ್ಯಲ್ನಿ ಅದ್ಭುತ್ಮು ಕಾರ್ಯಲ್ನಿ ಸೇಸಿ ಸೂಪ್ತಾರು . ²⁵ ಇಗೋ ಮೀಕಿ ಮುಂದಾಯಿ ಸೊಪ್ನಾನು ದಾನ್ನಿಂಚ ಯೋಳಾರ ಮೀಕಿ - ²⁶ ಅಗೋ ಕ್ರಿಸ್ತುಡು ಅಡ್ವಿಲಾ ವುಂಡಾಡು ಅನಿ ಸೊಪ್ತೆ ಪಾಯಿಡದನ್ದ್ರಿ , ಇಗೋ ಕೋನ್ಳವುಂಡಾಡು ಅನಿ ಸೊಪ್ತೆ ನಂಬೋದಂಡ್ರಿ . ²⁷ ಎಟ್ಟ ಮೂಡಣ್ಮುಲ ಪುಟ್ಟಿ ಪಡುವಣ್ಮು ಗಂಟ ಕನ್ಬಿಸ್ತಾದೋ ಅಟ್ಟೆನೆ ಮನುಷ್ಯಕುಮಾರುಡು ಪ್ರತ್ಯಕ್ಷಮು ವುಂಟಾದಿ ²⁸ ಪೀನ್ಗುಲು ಪಡಿನ್ತಾವು ಹದ್ದುಲು ಕೂಡ್ತಾವಿ . ²⁹ ಆ ದಿನ್ಮುಲ ಸಂಕಟ್ಮು ತೀರ್ಸಿನ್ಮಿಂದ ಸೂರ್ಯುಡು ಸೀಕ್ಟಾಯಿ ಪಾತಾಡು , ಚಂದ್ರುಡು ಎಲ್ಗು ಇಯ್ಕುನ್ನ ವುಂಟಾಡು , ನಕ್ಷತ್ರುಮುಲು ಆಕಾಶ್ಮಿಂಚ ಉದ್ರುತ್ತಾವಿ , ಆಕಾಶ್ಮು ಶಕ್ತಿಲು ಕದ್ಲುತ್ತಾವಿ . ³⁰ ಅಪ್ಡು ಮನುಷ್ಯುಕುಮಾರುಡ್ನಿ ಸೂಚಿಚ್ಚೆ ಗುರ್ತು ಆಕಾಶ್ಮುಲ ಕನೋಸ್ತಾದಿ . ಅಪ್ಡು ಭೂಲೋಕ್ಮುಲ ವುಂಡೆ ಅನೀ ಕುಲ್ಮೋಳು ಎದಕೊಟ್ಕೊನ್ಟಾರು ಮಲಿ ಮನುಷ್ಯಕುಮಾರುಡು ಬಲ್ಮಿಂಚಾನು ಬಹು ಮಹಿಮೆಯಿಂಚನು ಆಕಾಶ್ಮು ಮೇಘಾಲು ಮಿಂದ ವಚ್ಚೆದಾನ್ನಿ ಕಂಟಾರು . ³¹ ಮಲಿ ವಾಡು ತೂತೂರಿ ಪೆದ್ ಶಬ್ಧುಮಿಂಚಾನು ತನ್ ದೂತುಲ್ನಿ ಅಂಪಿಸ್ತಾಡು . ವಾಳು ಯೇಸು ಆರ್ಪ್ಕೊನ್ನೋಳ್ನಿ ಅಕಾಶ್ಮು ಓಕ್ ತೊಟ್ಟಿಂಚ ಇಂಕೊಕ್ ತೊಟ್ಗಿ ನಾಲ್ಗು ದಿಕ್ಕುಲಿಂಚ ಒಟ್ಗೂಡಿಸ್ತಾರು . ³² ಅಂಜೂರ್ಮು ಮಾನು ದುಸ್ಟಾoತ್ಮುಯಿಂಚ ಬುದ್ದಿ ನೇರಿಯಂಡ್ರಿ . ದಾನ್ ಕೊಂಬ ಇಂಕ ಮ್ಯಾತಿದಾಯುಂಟೆನು ಆಕ್ ಇಡ್ಸೆ ನಪ್ಡು ಬೇಸ್ಗ ಹತ್ರುಮಾಯೇ ಅನಿ ತಿಲ್ಸ್ಕೊಂಟಾರೆ . ³³ ಅಟ್ಟೆನೆ ಮೀರು ಸಹ್ಮು ದೀನ್ನಂತ ಸೂಸೆನಪ್ಡು ಆ ದಿನ್ಮು ಹತ್ರುಮುಂಡಾದಿ , ವಾಕ್ಲಾನೆ ವುಂಡಾದಿ ಅನಿ ತಿಲ್ಸ್ಕೊಂಡ್ರಿ . ³⁴ ಇದಂತ ಅಯೇಗಂಟ ಈ ಸಂತತಿ ಅಳ್ಸಿಪಾಯೇಕೆಲೇದು ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು . ³⁵ ಭೂಮಿಆಕಾಶ್ಮುಲು ಅಳ್ಸಿಪಾತಾವಿ ಆಯ್ತೆ ಮಾ ಮಾಟ್ಳು ಅಲ್ಸಿಪಾಯೇಕೆಲೇದು . ³⁶ ಇದ್ಕಾಕುನ್ನಾ ಆ ದಿನ್ಮು ವಿಷಯ್ಮು ಗಲ್ಗೆ ವಿಷಯ್ಮು ನಾ ತಂಡ್ರಿ ಯೋಕ್ಡಿಕೇ ತಿಲ್ಸ್ತಾದೆ ಹೊರ್ತು ಇಂಕ್ಯೋಳ್ಕು ತಿಲ್ಸೆಟ್ಲೆ , ಪರ್ಲೋಕ್ಮುಲ ವುಂಡೆ ದೂತುಲ್ಕು ತಿಲ್ಸೆಟ್ಲೆ, ಕೊಡ್ಕುಕು ತಿಲ್ಸೆಟ್ಲೆ . ³⁷ ನೋಹನುಡು ದಿನಾಲು ಎಟ್ಟುoಡ್ನೋ ಅಟ್ಟೆನೆ ಮನ್ಸಿಕುಮಾರುಡು ಪ್ರತ್ಯಕ್ಷಮು ವುಂಟಾದಿ . - ಎಟ್ಟಂಟೆ ಜಲಪ್ರಳಯುಮ್ಕಿ ಮುಂದ್ರ ದಿನಾಲ್ಲಾ ನೋಹಾನುಡು ನಾವೇಲ ³⁸ ಸೇರಿನ ದಿನ್ಮು ಗಂಟ ಜನಲು ತಿಂಟ ತಾಗ್ತಾ ಪೆಂಡ್ಳಿ ಸೇಸ್ಕೊಂಟ ಸೇಸಿಸ್ತ ವುಂಡಿ ಪ್ರಳಯ್ಮು ನೂಳು ವಚ್ಚಿ ಅಂದ್ರುನಿ ಕೊಟ್ಕೊನಿ ಪಾಯೇಗಂಟ ಏಮಿ ತಿಲಿಕುನ್ನ ವುಂಡಾರೆ. ³⁹ ದಾನಂತೆ ಮನ್ಸುಕುಮಾರುಡು ಪ್ರತ್ಯಕ್ಶುಮು ಆಯೇ ಕಾಲುಮ್ಲಾನು ವುಂಟಾದಿ . ⁴⁰ ಅಪ್ಡು ಇದ್ರೂ ಸೇನ್ಲವುoಟಾರುರು , ಒಕ್ಡು ಸೀಸಲ್ಪಡ್ತಾಡು , ಒಕ್ಡು ಇಡ್ಸಲ್ಪಡ್ತಾಡು . ⁴¹ ಇದ್ರೂ ಆಡೋಳು ಬೀಸೆ ರಾಯಿ ಮುಂದ್ರ ಕುಚ್ಚೋನಿ ಬೀಸ್ತಾವುಂಟಾರು , ಒಕ್ತಿ ಸೀಸಲ್ಪಡ್ತಾದಿ , ಒಕ್ತಿ ಇಡ್ಸಲ್ಪಡ್ತಾದಿ . ⁴² ಇಟ್ಟುನ್ಡೆದಾಯಿ ಮೀ ಕರ್ತುಡು ವಚ್ಚೆ ದಿನ್ಮು ಮೀಕಿ ಗೊತ್ಲೆಂದಾಯಿದಾನಿಂಚ ಎಚ್ರುಮಾಯುನ್ಡಡ್ರಿ . ⁴³ ದೊಂಗ ವಚ್ಚೆ ಜಾವ್ಮು ಇಂಟ್ ಯಜ್ಮಾನುಡ್ಕಿ ತಿಲ್ಸುಂಟೆ ವಾಡು ಎಚ್ರಾಯುಂಡಿ ವಾಡ್ ಇಂಟ್ಕಿ ಕನ್ಮುಎಸೇಕಿಇಡ್ಸ್ತಾವುನ್ಡ್ಲೆದುಅನಿ ತಿಲ್ಸ್ಕೊಂಡ್ರಿ . ⁴⁴ ದಾನ್ನಿಂಚ ಮೀರು ಸಹ್ಮು ಸಿದ್ಮಾಯುಂಡoಡ್ರಿ , ಮೀರು ನೆನಿಲೇನಿನ ಗಲುಗ್ಲ ಮನ್ಸುಕುಮಾರುಡು ವಸ್ತಾಡು . ⁴⁵ ಅಟ್ಟಾಯ್ತೆ ಯಜ್ಮಾನುಡು ವಾಡ್ ಇಂಟೋಳ್ಕಿ ಫೊದ್ ಪೊದ್ಗಿ ಅನ್ಮು ಇಚ್ಚೇಕಿ ವಾಳ್ ಮಿಂದ ಪೆಟ್ಟಿನ ನಂಬಿಗಸ್ತುಡು ವಿವೇಕಿನು ಆಯಿನ ಆಳು ಯೋಳು ? ⁴⁶ ಯಜ್ಮಾನುಡು ವಚ್ಚಿ ಯಾವ್ ಆಳು ಇಟ್ಟ ಸೇಸೆದಾನ್ನಿ ಕಂಟಾಡೋ ಆ ಆಳು ಧನ್ಯುಡು . ⁴⁷ ಅಟ್ಟೋಡ್ನಿ ವಾಡು ವಾಡ್ ಅಂತ ಆಸ್ತಿ ಮಿಂದ ನೇಮಿಸ್ತಾಡು ಅನಿ ಮೀಕಿ ನಿಜ್ಮಾಯಿ ಸೊಪ್ತಾನು . ⁴⁸ ಆಯ್ತೆ ಆ ಶೆಡ್ದೆ ಆಳು - ನಾ ಯಜ್ಮಾನುಡು ತಡ್ಮು ಸೇಸ್ತಾಡು ಅನಿ ವಾಡ್ ಮನ್ಸ್ಲ ⁴⁹ ಅನ್ಕೋನಿ ವಾಳ್ ಜೊತ್ಲ ಆಳುಲ್ನಿ ಕೊಟ್ಟೆದಾಂಕಿ ತೊಡ್ಸಿ ತಾಗೋಳ್ ಸಂಗ್ಮು ತಿಂಟ ತಾಗ್ತಾ ವುಂಡೆದಾಯ್ತೆ , ವಾಡು ನೆನಿಲೇನಿನ ದಿನ್ಮ್ಲಾನು ತಿಲಿಲೇನಿನ ಗಲ್ಗುಲಾನು ⁵⁰ ಆ ಆಳಿನ ಯಜ್ಮಾನುಡು ವಚ್ಚಿ ವಾಡ್ನಿ ಕಟಿಣ್ಮಾಯಿ ಕೊಟ್ಬಿಚ್ಚಿ ಕಪಟಿಲ್ಕಿ ಆಯೇಅಟ್ಟ ಗತಿನಿ ವಾಡ್ಕಿ ನೇಮಿಸ್ತಾಡು . ⁵¹ ಆನ ಗೊಳಾಟ್ಮು ಕಟಕಟಾನಾ ಪಂಡ್ಳು ಕೊರ್ಕೆದಿ ವುಂಟಾವಿ .