¹ ಭೋದನೆನಿ ಸೇಸ್ತ ಇಂಕ ಸಾಮ್ಯುಮು ರೂಪ್ಮಾಯಿ ವಾಳ್ಕಿ ಸೊಪ್ಪಿನ್ದೀಮಂಟೆ - ² ಪರ್ಲೋಕ್ಮು ರಾಜ್ಯುಮು ಕೊಡ್ಕಿಕಿ ಪೆಂಡ್ಳಿ ಸೇಸಿನ ಓಕ್ ಅರಸುಡ್ಕಿ ಹೋಲುಕ್ಮಾಯಿಂದಿ . ³ ವಾಡು ಪೆಂಡ್ಳಿಕಿ ಸೊಪ್ಪಿಚ್ನೋಲ್ನಿ ಪಿಲ್ಚೆದಾಂಕಿ ವಾಳ್ ಆಳ್ನಿ ಅಂಪಿಚ್ಚೆಕಿ ವಚ್ಚೆದಾನ್ಕಿ ವಾಳ್ಕಿ ಮನ್ಸ್ವುಂಡ್ಲೆದು . ⁴ ತಿರ್ಗಿ ಬೇರೆ ಆಳುಲ್ನಿ ಪಿಲ್ಚಿ - ಮೀರು ಊಟುಮ್ಕಿ ಸೊಪ್ಪಿಚ್ಕೊನಿನ ವಾಳ್ ದೆಗ್ರುಕಿ ಪಾಯಿ - ಇಗೋ , ಅಡ್ಗೆ ಸಿದ್ಮಾಯಿಂದಿ , ನಾ ಹೋರಿಲ್ನಿ ಕೊಬ್ಬಿನ ಪಶುಲ್ನಿ ಕೋಬಿಚ್ನಾನು , ಅಂತ ಸಿದ್ಮಾಯಿಂದಿ , ಪೆಂಡ್ಳಿ ಊಟುಮ್ಕಿ ರಾಂಡ್ರಿ ಅನಿ ವಾಳ್ಕಿ ಸೊಪ್ಪಂಡ್ರನಿ ಅಪ್ಪಣ್ಮು ಇಚ್ಚಿ ಅಂಪಿಚ್ಚೆ . ⁵ ಆಯ್ತೆ ವಾಳು ಅಲಕ್ಷ್ಯುಮು ಸೇಸಿ ಒಕ್ಡು ವಾಡ್ ಸೇನ್ಕಿ ಒಕ್ಡು ವಾಡ್ ವ್ಯಾಪರುಮ್ಕಿ ಪಾಯಿಡ್ಸ್ರಿ ⁶ , ಉಳ್ಸ್ನೋಳು ವಾಡ್ ಆಳುಲ್ನಿ ಪಟ್ಕೋನಿ ತಿಟ್ಟಿ ಸೊಂಪೇಸ್ರಿ . ⁷ ಅರಸುಡು ಕೊಪ್ಮು ಸೇಸ್ಕೊನಿ ವಾಳ್ ದಂಡುಲ್ನಿ ಅಂಪಿಚ್ಚಿ ಆ ಕೊಲೆಗಾರುಡ್ನಿ ನಾಶ್ಮು ಸೇಸಿ ವಾಳ್ ಪಟ್ಟಣ್ಮುಲ್ನಿ ಕಾಲ್ಚಿ ಇಡ್ಸ್ರಿ . ⁸ ಅಪ್ಡು ವಾಡ್ ಆಳುಲ್ಕಿ - ಪೆಂಡ್ಳಿಕಿ ಸಿದ್ಮಾಯಿಂದಿ ಸರಿ , ಆಯ್ತೆ ಪಿಲ್ಚಿನೋಳು ಯೋಗ್ಯುಮಾಯುಂಡ್ಲೆದು . ⁹ ಮೀರು ಇಪ್ಡು ನಾಲ್ಗು ದಾವ್ಲ ಇಚ್ಚೆ ಸ್ಥಳ್ಮುಕಿ ಪಾಯಿ ಕನೋಲ್ನಿಅಂದ್ರುನಿ ಪೆಂಡ್ಳಿ ಊಟುಮ್ಕಿ ಪಿಲಿಯಂಡ್ರಿ ಅನಿ ಸೊಪ್ಪೆ . ¹⁰ ಆ ಅಳುಲು ದಾವ್ಕಿ ಪಾಯಿ ಶೆಡ್ದೋಳು ಮನ್ಚೋಳು ಅನ್ಕುನ್ನ ಕನೋಲ್ನಿಅಂದ್ರುನಿ ಕೂಡ್ಬಿಚ್ಚಿ ತೋಡ್ಕೋನಿ ವಚ್ರಿ . ಇಟ್ಟ ಇಂಟ್ ನಿಂಡ ಊಟುಮ್ಕಿ ಕುಚ್ಚೋನ್ರಿ . ¹¹ ಆಮಿಂದ ಅರಸುಡು ಕುಚ್ಚೋನುನ್ಡೋಳ್ನಿ ಸೂಸೆದಾನ್ಕಿ ನೋನ್ಕಿ ವಚ್ಚಿ ಪೆಂಡ್ಳಿ ಬಟ್ಳುನಿ ಏಸ್ಕೊಲೇನಿನ ಒಕ್ಕುಡ್ನಿ ಕನಿ ವಾಡ್ನಿ - ¹² ಏಮಬ್ಬಾ , ಪೆಂಡ್ಳಿ ಬಟ್ಳು ಲೇಕುನ್ನ ನುವೀನ ಎಟ್ಟ ನೋನ್ಕಿ ವಸ್ತ್ವಿ ಅನಿ ಅಡ್ಗೆಕಿ ವಾಡು ಊರ್ಕುಂಡೆ . ¹³ ಆಮಿಂದ ಅರಸುಡು ಸೇವಕುಲ್ಕಿ - ವಾಡ್ ಕಾಲ್ ಸೇತ್ಲು ಕಟ್ಟಿ ವಾಡ್ನಿ ಆಕ್ಟರ ಸೀಕ್ಟಿಕಿ ನೂಕಂಡ್ರಿ ಅನಿ ಸೊಪ್ಪೆ .ಆನ ಗೋಳಾಟ್ಮು ಕಟಕಟನ ಪಂಡ್ಳು ಕೊರ್ಕೇದಿ ವುಂಟಾವಿ . ¹⁴ ಇಟ್ಟ ಪಿಲ್ಚ್ನೋಳು ಕೊಂಚ್ಮು ಜನಲು ಅನೆ . ¹⁵ ಆಟ್ಟೆ ಪರಿಸಾಯುಲು ಪಾಯಿ ವಾಡ್ನಿ ಮಾಟ್ಲ ಎಟ್ಟ ಸಿಕ್ಕಿಚ್ಚೇದಿ ಅನಿ ಕೂಡ್ಕೊನಿ ಆಲೋಚ್ಮುಸೇಸ್ಕೊನಿ ಯೇಸು ದೆಗ್ರುಕಿ ವಾಳ್ ಶಿಷ್ಯುಲ್ನಿ ಹೆರೋದಿಲು ಜೊತ್ಲ ಅಂಪಿಚ್ರಿ . ¹⁶ ವೂಳು ವಚ್ಚಿ - ಗುರುಲಾ , ನುವ್ವ ಸತ್ಯುವಂತುಡು , ದೇವುಡು ಮಾರ್ಗುಮ್ನಿ ಸತ್ಯುಮಾಯಿ ಭೋದಿಚ್ಚೋಡು , ಯೋಳ್ಕು ಹೆದ್ರುಲೇನೋಡು , ನುವ್ವ ಜನಲು ಮಕ್ಮು ಇಚ್ಚೆಕಿ ಮಾಟ್ಲಾಡೋಡುಕಾದು ಅನಿ ತಿಳ್ಚ್ನಾಮು . ¹⁷ ಇಟ್ಟುoಡೆದಾಯಿ ಸೈಸೆರೋಡ್ಕಿ ತೆರಿಗೆ ಇಚ್ಚೇದಿ ಸರಿನೋ ? ಸರಿಕಾದೋ ನೀಕಿ ಎಟ್ಟ ಸೂಪ್ತಾದಿ ? ಮಾಕಿ ಸೊಪ್ಪು ಅನ್ರಿ . ¹⁸ ಯೇಸು ವಾಳ ಕೆಡುಕ್ನಿ ಅರ್ಸಿನೋಳಾಯಿ - ಕಪಟಿಲಾ , ನನ್ನೀ ಎಂದ್ಗೂ ಪರೀಕ್ಷೆ ಸೇಸ್ತಾರು ? ¹⁹ ತೆರಿಗೆಕಿ ಇಚ್ಛೆ ನಾಣ್ಯುಮ್ನಿ ನಾಕಿ ಸೂಪಂಡ್ರಿ ಅನೇಕಿ ವಾಳು ವಾಡ್ಕಿ ಓಕ್ ದುಡ್ಲುನಿ ಎತ್ಕೊಚಿಚ್ರಿ . ²⁰ ಯೇಸು - ಈ ತಲಕೈ ಈ ಮುದ್ರೆ ಯೋಲ್ದಿ ಅನಿ ಅಡ್ಗಿನ್ದಾಂಕು ವಾಳು - ಸೈಸೆರೋಲ್ದಿ ಅನ್ರಿ . ²¹ ಅಪ್ಡು ಯೇಸು ವಾಳ್ಕಿ - ಅಟ್ಟಾಯ್ತೆ ಸೈಸೆರೋಲ್ದ್ನಿ ಸೈಸೆರೋಳ್ಕಿ ಇಯಂಡ್ರಿ , ದೇವುಡುದ್ನಿ ದೇವುಡ್ಕಿ ಇಯಂಡ್ರಿ ಅನಿ ಸೊಪ್ಪೆ . ²² ವಾಳು ಈ ಮಾಟ್ನಿ ಇನಿ ಆಶ್ಚರ್ಯುಮು ಪಡಿ ಯೇಸುನಿ ಇಡ್ಸಿ ಪಾಯ್ರಿ . ²³ ಅದೇ ದಿನುಮ್ಲ ಸದ್ದುಕಾಯುಲು ಯೇಸು ದೆಗ್ರುಕಿ ವಚ್ರಿ . ವೂಳು ಪುನರುತ್ಥಾನ್ಮುಲೇದು ಅನೋಳು . ²⁴ ವೂಳು ಯೇಸುಕಿ ಪ್ರಶ್ನುಮು ಸೇಸಿನ್ದೇಮಂಟೆ - ಭೋದಕುಡಾ , ಒಕ್ಡು ಬಿಡ್ಳುಲೇಕುನ್ನ ಸಸ್ತೆ ವಾಡ್ ಪೆನ್ಡ್ಲಾಮ್ನಿ ವಾಡ್ ತೊಂಬ್ಡು ಪೆಂಡ್ಳಿ ಸೇಸ್ಕೋನಿ ವಾಡ್ ಅನ್ಕಿ ಸಂತಾನ್ಮು ಪಡಿಯಾಲನಿ ಮೋಶೆಡು ಸೊಪ್ನಾಡoತೆ . ²⁵ ಆಯ್ತೆ ಮಾಲ ಯೋಡು ಮಂದಿಲು ಅನ್ದೊಂಬುಳುನ್ಟೇನು . ಮೊದ್ಲೋಡು ಪೆಂಡ್ಳಿ ಆಯಿ ಸಚ್ಚ್ಪಾಯೇ . ವಾಡ್ಕಿ ಸಂತಾನ್ಮು ಲೇನಿಂದಾನಿಂಚ ಪೆಂಡ್ಳಾಮ್ನಿ ವಾಡ್ ತೊಂಬ್ಡುಕಿ ಇಡ್ಸೆ , ²⁶ ದಾನ್ಲಾಕೆ ರೊಂಡ್ನೋಡು ಮೂಡ್ನೋಡು ಮುಂತಾಯಿನೋಳು ಯೋಡ್ನೊಡ್ಗoಟ ಸೇಸ್ರಿ . ²⁷ ವಾಳಂದ್ರು ಸಚ್ಚಿನ್ಮಿಂದ ಆ ಆಡ್ದಿ ಸಚ್ಚೆ . ²⁸ ಅಟ್ಟಾಯ್ತೆ ಪುನರುತ್ಥಾನ್ಮುಲ ಆ ಯೋಡು ಮಂದಿಲ್ಲ ಯೋಳ್ ಪೆಂಡ್ಳಂ ಆಯುಂಟಾದಿ ? ದಾನ್ನಿ ವಾಳಂದ್ರು ಪೆಂಡ್ಳಿ ಸೇಸ್ಕೊನ್ನಾರೆ ಅನ್ರಿ . ²⁹ ದಾನ್ಕಿ ಯೇಸು ಉತ್ರುಮಾಯಿ ವಾಳ್ಕಿ - ಮೀರು ಶಾಸ್ತ್ರುಮಾವ್ನಿ ದೇವುಡು ಶಕ್ತಿನಾವ್ನಿ ತಿಲಿಕುಣ್ಣ ತಪ್ಪ್ನೋಳು ಆಯಿನಾರು , ³⁰ ಪುನರುತ್ಥಾನ್ಮು ಆಯಿನ್ಮಿಂದ ಪೆಂಡ್ಳಿ ಸೇಸ್ಕೊನೆಕು ಲೇದು , ಸೇಸಿಚ್ಚೆಕು ಲೇದು , ಪರ್ಲೋಕ್ಮು ದೇವುಡು ದೂತುಲ್ಲಾಕ ವುನ್ಟಾರು . ³¹ ಸಚ್ಚಿನೋಳು ಪುನರುತ್ಥಾನ್ಮು ವಿಷಯ್ಮಾಯಿ ಸೊಪ್ಬೇಕಾಯ್ತೆ - ³² ನಾನು ಅಬ್ರಹಾಮು ದೇವುಡು , ಇಸಾಕುಡು ದೇವುಡು , ಯಾಕೋಬುಡು ದೇವುಡು ಅನಿ ದೇವುಡು ಮೀಕಿ ಸೊಪ್ಪಿಂದಾನ್ನಿ ಮೀರು ಓದ್ಲೆದಾ . ಯೇಸು ಜೀವಿತುಲ್ಕಿ ದೇವುಡಾಯ್ನಾಡೆ ಹೊರ್ತು ಜೂಡು ಲೇನಿನೋಳ್ಕಿ ಕಾದು ಅನಿ ಸೊಪ್ಪೆ . ³³ ಜನಲು ದಾನ್ನಿ ಇನಿ ವಾಡ್ ಭೋದನೆಕಿ ಅತ್ಯಾಶ್ಚರ್ಯುಮು ಪಡ್ರಿ . ³⁴ ಯೇಸು ಸದ್ದುಕಾಯುಲು ನೋರು ಕಟ್ಟೆ ಅನಿ ಪರಿಸಾಯುಲು ಇನಿ ಆನ್ಕಿ ಕೂಡೋಚ್ರಿ . ³⁵ ವಾಳ್ಳಾ ವುಂಡಿನ ಒಕ್ಕ ಧರ್ಮೊಪದೇಶಕುಡು ಯೇಸುನಿ ಪರೀಕ್ಷೆ ಸೇಯಾಲನಿ - ³⁶ ಗುರುಲಾ , ಧರ್ಮಶಾಸ್ತ್ರುಮ್ಲ ಯಾವ್ ಆಜ್ಞೆ ಮುಖ್ಯಮಾಯುಂಡೇದಿ ಅನಿ ವಾಡ್ನಿ ಅಡ್ಗಿನ್ದಾಂಕು ವಾಡು - ³⁷ ನೀ ದೇವುಡಾಯಿನ ಕರ್ತುಡ್ನಿ ನೀ ಪೂರ್ಣುಮು ಹೃದಯ್ಮಿಂಚ ನೀ ಪೂರ್ಣುಮು ಪ್ರಾಣುಮಿಂಚ ³⁸ ನೀ ಪೂರ್ಣಮು ಬುದ್ದಿಯಿಂಚಾನು ಪ್ರೀತಿಯಾಲ ಅನೆ ಆಜ್ನೇನೆ ಮುಖ್ಯುಮಾಯಿಂದಿ ಮಲಿ ಮೊದ್ಲೆನೆದಿ . ³⁹ ದೀನ್ಕಿ ಸಮಮಾಯಿನ ರೊಂಡ್ನೆ ಆಜ್ಞೆ ಒಕ್ಟಿ ವುಂಡಾದಿ , ಆದಿ ಯಾವ್ದಂಟೆ - ನೀ ನೆರೆಯೋಡ್ನಿ ನೀಯಂತೆನೆ ಪ್ರೀತಿಯಾಲ ಅನೇದೆ . ⁴⁰ ಈ ರೊಂಡು ಆಜ್ಞೆಲು ಅನ್ನಿ ಧರ್ಮಶಾಸ್ತ್ರುಮ್ಕಿ ಪ್ರವಾದನ್ಮು ಗ್ರಂಥುಮ್ಕಿ ಆಧಾರ್ಮಾಯಿಂದಿ ಅನಿ ಸೊಪ್ಪೆ . ⁴¹ ಪರಿಸಾಯುಲು ಕೂಡಿವಚ್ಚಿನಪ್ಡು ಯೇಸು ವಾಳ್ಕಿ - ರಾಬೇಕಾಯಿನ ಕ್ರಿಸ್ತುಡು ವಿಷಯ್ಮಾಯಿ ಮೀಕಿ ಎಟ್ಟ ಸೂಪೋಸ್ತಾದಿ ⁴² ? ವಾಡು ಯೋಳ್ ಕೊಡ್ಕು ? ಅನಿ ಪ್ರಶ್ನುಮು ಏಸಿಂದಾಂಕಿ ವಾಳು ವಾಡ್ಕಿ - ⁴³ ದಾವಿದುಡು ಕೊಡ್ಕು ಅನಿ ಸೊಪ್ಪೆಕಿ ವಾಡು - ಅಟ್ಟಾಯ್ತೆ ನಾನು ನೀ ವಿರೋದಿಲ್ನಿ ನೀ ಪಾದಾಲು ದುಗುನ ಏಸೆ ಗಂಟ ನಾ ಕುಡುಮ್ ತೊಟ್ಟು ಕುಚ್ಚೋನುಂಡು ಅನಿ ಕರ್ತುಡು ನಾ ಒಡೆಯುಡ್ಕಿ ನುಡ್ಸೆ ⁴⁴ .ಅನೆ ಮಾಟ್ಲ ದಾವೀದುಡು ಪವಿತ್ರಾಮುಮು ಪ್ರೆರಿತುಡಾಯಿ ವಾಡ್ನಿ ಒಡೆಯುಡು ಅನೇದಿ ಎಟ್ಟ ? ⁴⁵ ದಾವಿದುಡು ವಾಡ್ನಿ ಒಡೆಯುಡನಿ ಸೊಪ್ಪಿನ್ಮಿಂದ ವಾಡು ವಾಡ್ಕಿ ಕೊಡ್ಕಾಯೇದಿ ಎಟ್ಟ ? ಅನೆ . ⁴⁶ ದಾನ್ಕಿ ಉತ್ರುಮಾಯಿ ಯೋಳು ಒಕ್ಕ ಮಾಟವ್ನಿ ವಾಡ್ಕಿ ಸೊಪ್ಪೆಕಾಕುಣ್ಣಾ ಪಾಯ್ರಿ . ಇದ್ಕಾಕುನ್ನ ಅಪ್ಡಿಂಚ ವಾಡ್ನಿ ಇoಕೇಮಾರ ಅಡ್ಗೆದಾಂಕಿ ಯೋಳ್ಕಿ ಧೈರ್ಯುಮು ಪುಟ್ಲೇದು .