¹ ಯೇಸು ಈ ಮಾಟ್ಲುನಿ ಮುಗ್ಬಿಚ್ಚಿನ್ಮಿಂದ ಗಲಿಲಾಯ್ಮುನಿ ಇಡ್ಸಿ ಯೋರ್ದೊನ್ ಏಟ್ ಆಕ್ಟರ ಪ್ರಯಾಣ್ಮು ಸೇಸಿ ಯೂದಾಯ್ಮು ಪ್ರಾಂತ್ಯುಮ್ಕಿ ವಚ್ಚೆ . ² ಬಹುಜನಲು ವಾಡ್ ಎನ್ಕ ಗುಂಪ್ ಗುಂಪಾಯಿ ಪಾಯ್ರಿ , ವಾಡು ವಾಳ್ನಿ ಆನೆ ಸ್ವಸ್ಥ್ಮು ಸೇಸೆ . ³ ಅಪ್ಡು ಪರಿಸಾಯುಲು ವಾಡ್ ದೆಗ್ರುಕಿ ವಚ್ಚಿ ವಾಡ್ನಿ ಪರಿಕ್ಷೀಯಾಲನೆ ಯೋಚ್ನುಮಿಂಚ - ಒಕ್ಡು ಯಾವ್ದಾಯ್ತೆನು ಒಕ್ಟಿ ಕಾರ್ಣುಮಿಂಚ ವಾಡ್ ಪೆಂಡ್ಲಾಮ್ನಿ ಇಡ್ಸಿಡ್ಸೆದಿ ಧರ್ಮುಮೋ ಎಟ್ಟ ಅನಿ ಅಡ್ಗಿನ್ದಾಂಕು ವಾಡು - ⁴ ಮನುಷ್ಯುಲ್ನಿ ನಿರ್ಮಾಣ್ಮು ಸೇಸ್ನೋಡು ಆದಿಯಿಂಚಾನೇ ವಾಳ್ನಿ ಪಿಲ್ಗಾಡುಪಿಲ್ಲಾಯಿ ಸೇಸಿ ವಾಳ್ ವಿಷಯುಮ್ಲ- ⁵ ಈ ಕಾರ್ಣ್ಮಿಂಚ ಮೊಗೋಡು ತಲ್ಲಿತಂಡ್ರಿಲ್ನಿ ಇಡ್ಸಿ ತನ್ ಪೆಂಡ್ಲಾಮ್ನಿ ಸೇರ್ಕೊಂಟಾಡು, ವಾಳಿದ್ರೂ ಒಕ್ಕೇ ಶರೀರ್ಮು ಆಯ್ತಾರು ಅನಿ ಸೊಪ್ನಾಡುಅನಿ ಮೀರು ಓದ್ಲೆದಾ ?ಇಟ್ಟುಂಡೆದಾಂಟ್ಲ ವಾಳು ಇಂಕ ಇದ್ರುಕಾದು , ಒಕ್ಕೇ ಶರೀರ್ಮು ಆಯ್ನಾರು . ⁶ ದಾನ್ನಿಂಚ ದೇವುಡು ಕೂಡಿಚ್ಚಿಂದಾನ್ನಿ ಮನುಷ್ಯುಲು ಅಗಲಿಯ್ಗುಡ್ದು ಅನೆ. ⁷ ವಾಳು ವಾಡ್ನಿ - ಅಟ್ಟಾಯ್ತೆ ತ್ಯಾಗ್ಮು ಪತ್ರುಮ್ನಿ ಇಚ್ಚಿ ದಾನ್ನಿ ಇಡ್ಸಿಡಚ್ಚು ಅನಿ ಮೋಶೆಡು ಎಂದ್ಗೂ ಆಜ್ಞೆ ಇಚ್ಚೆ ಅನಿ ಅಡ್ಗೇಕಿ ವಾಡು- ⁸ 8ಮೋಶೆಡು ಮೀ ಮೊಂಡುತನುಮ್ನಿ ಸೂಸಿ ಮೀ ಪೆಂಡ್ಳಾಲ್ನಿ ಇಡ್ಸಿಡೆಕಿ ಅಪ್ಪಣ್ಮು ಇಚ್ಚೆ , ಆಯ್ತೆ ಆದಿಯಿಂಚಾನೇ ಅಟ್ಟ ವುಂಡ್ಲೆದು . ⁹ ಮಲಿ ಹಾದ್ರುಮು ಕಾರ್ಣ್ಮಿಂಚಕಾಕುನ್ನ ವಾಡ್ ಪೆಂಡ್ಲಾಮ್ನಿ ಇಡ್ಸಿ ಇಂಕೊಕ್ದಾನ್ನಿ ಪೆಂಡ್ಳಿಸೇಸ್ಕೊನೋಡು ವ್ಯಭಿಚಾರ್ಮು ಸೇಸೋಡಾಯ್ತಾಡು ಅನಿ ಮೀಕಿ ಸೊಪ್ತಾನು ಅನೆ . ¹⁰ ದಾನ್ಕಿ ಶಿಷ್ಯುಲು - ಪೆಂಡ್ಲಾಮ್ ವಿಷಯ್ಮಾಯಿ ಮೊಗ್ಡು ಧರ್ಮು ಇಟ್ಟುoಟೆ ಪೆಂಡ್ಲಿ ಆಯೇದಿ ಮಂಚಿದ್ಕಾದು ಅನ್ನಪ್ಡು ವಾಡು ವಾಳ್ಕಿ - ¹¹ ಈ ಮಾಟ್ನಿ ಅಂಗಿಕರಿಚ್ಚೆ ವರ್ಮುನಿ ಹೊಂದ್ನೋಳೆ ಹೊರ್ತು ಇಂಕ್ಯೋಳು ದಾನ್ನಿ ಅಂಗಿಕರಿಚ್ಚೆಟ್ಲೆ . ¹² ತಲ್ಲಿ ಗರ್ಬ್ಮಿಂಚ ನಪುಂಸಕುಲಾಯಿ ಪುಟ್ನೋಳು ಕೆಲುವ್ಲು ವುಂಡಾರು , ಮನುಷ್ಯುಲಿಂಚ ನಪುಂಸಕುಲಾಯಿ ಸೇಸ್ನೋಳು ಕೆಲುವ್ಲು ವುಂಡಾರು , ಮಲಿ ಪರ್ಲೋಕ್ಮುರಾಜ್ಯುಮಿನ ನಿಮಿತ್ಮಾಯಿ ವಾಳ್ನಿ ವಾಳೆ ನಪುಂಸಕುಲಾಯಿ ಸೇಸ್ಕೊನ್ನೋಳು ಕೆಲುವ್ಲು ವುಂಡಾರು .ಅಂಗಿಕರಿಚ್ಚೆಕಿ ಬಲ್ಲುಡು ಅಂಗಿಕರೀಯಿನಿ ಅನಿ ಸೊಪ್ಪೇ . ¹³ ಅಪ್ಡು ಕೆಲುವ್ಲು ವಾಳ್ ಸನ್ ಸಿನೋಳ್ನಿ ಯೇಸು ದೆಗ್ರುಕಿ ಎತ್ಕೊಚ್ಚಿ ಯೇಸು ಅವುಟ್ಲು ಮಿಂದ ಸೈಪೆಟ್ಟಿ ಪ್ರಾಥ್ನುಮು ಸೇಯಾಲನಿ ಅಡ್ಗೇಕಿ ಶಿಷ್ಯುಲು ವಾಳ್ನಿ ಗದ್ರಿಚ್ರಿ . ¹⁴ ಆಯ್ತೆ ಯೇಸು - ಸಿನೋಳ್ನಿ ಇಡಿಯಂಡ್ರಿ , ನಾ ದೆಗ್ರುಕಿ ವಚ್ಚೆದಾನ್ಕು ಅವುಟ್ಲುಕಿ ಅಡ್ಡಿ ಸೇಯದಂಡ್ರಿ , ¹⁵ ಪರ್ಲೋಕ್ಮು ಇಟ್ಟೊಲ್ದೇ ಅನಿ ಸೊಪ್ಪಿ ಅವುಟ್ಲು ಮಿಂದ ಸೈಪೆಟ್ಟಿ , ಆನಿಂಚ ಪಾಯೇ . ^{16 17} 16-17 ಅಪ್ಡು ಒಕ್ಡು ವಚ್ಚಿ ಯೇಸುನಿ - ಭೋದಕುಡಾ , ನಾನು ನಿತ್ಯಮು ಜೂಡ್ನಿ ಪಡ್ಸ್ಕೊಬೇಕಾಯ್ತೆ ಎಮೀ ಮಂಚಿ ಕಾರ್ಯಲುನಿ ಸೇಯಾಲ ಅನಿ ಅಡ್ಗಿ ಯೇಸು ವಾಡ್ಕಿ - ಮಂಚಿದಾನ್ನಿ ಕುರಿಂಚಿ ನನ್ನೀ ಎಂದ್ಗೂ ಅಡ್ಗ್ತಾವು? ಮಂಚೋಡು ಒಕ್ಡೆ. ಆಯ್ತೆ ಆ ಜೂಡ್ಲ ಸೇರಲಅನುಂಟೆ ದೇವುಡುಆಜ್ನೆಲ್ಲ್ಕಿ ಸರಿಯಾಯಿ ನಡ್ಸ್ಕೋ ಅನಿ ಸೊಪ್ಪಿನ್ದಾಂಕಿ ವಾಡು - ¹⁸ ಅವಿ ಯಾವಿ ಅನಿ ಅಡ್ಗೇಕಿ ಯೇಸು - ನರಹತ್ಯುಮು ಸೇಯ್ಗುಡ್ದು , ವ್ಯಭಿಚಾರ್ಮು ಸೇಯ್ಗುಡ್ದು , ದೊಂಗ್ಲೀಯ್ಗುಡ್ದು, ಸುಳ್ಳುಸಾಕ್ಷಿನಿ ಸೊಪ್ಗುಡ್ದು , ನೀ ತಂಡ್ರಿ ತಲ್ಲಿನಿ ಸನ್ಮಾನಿಯಾಲ , ¹⁹ ಮಲಿ ನೀಲಾಕ್ನೆ ನೀ ನೆರೆಯೋಡ್ನಿ ಪ್ರೀತಿಸೇಯಾಲ ಅನೆಇವೆ ಅನೆ . ²⁰ ಆ ಯೌವನಸ್ಥುಡು ವಾಡ್ನಿ - ಇವನ್ನಿದಾಂಕು ಸರಿಯಾಯಿ ನಡ್ಸ್ಕೊನ್ನಾನು , ಇಂಕೇಮಿ ಕಮ್ಮಿಯಾಯುಂಡಚ್ಚು ? ಅನಿ ಅಡ್ಗೇಕಿ , ²¹ ಯೇಸು ವಾಡ್ಕಿ - ನುವ್ವ ಸಂಪೂರ್ಣ್ಮು ಆವಾಲನುಂಟೆ ಪಾಯಿ ನೀ ಆಸ್ತಿನಂತ ಅಮ್ಮಿ ಬಡುವ್ಲ್ಕಿ ಇಯ್ಯಿ , ಪರ್ಲೋಕುಮ್ಲ ನೀಕಿ ಸಂಪತ್ತುಂಟಾದಿ , ನುವ್ವ ವಚ್ಚಿ ನನ್ನೀ ಹಿಂಬಾಲಿಯಿ ಅನಿ ಸೊಪ್ಪೇ . ²² ಆ ಯೌವನಸ್ಥುಡು ಎಕ್ವ ಆಸ್ತಿವುಂಡೋಡ್ ಆಯುಂಡೆದಾನ್ನಿಂಚ ಈ ಮಾಟ್ನಿ ಇನಿ ದುಖ್ಮಿಂಚ ಪಾಯೇ . ²³ ಅಪ್ಡು ಯೇಸು ತನ್ ಶಿಷ್ಯುಲ್ನಿ ಸೂಸಿ - ಮೀಕಿ ಸತ್ಯುಮಾಯಿ ಸೊಪ್ತಾನು , ಐಶ್ವರ್ಯ ವಂತುಡು ಪರ್ಲೋಕ್ಮುರಾಜ್ಯುಮುಲ ಸೇರೇದಿ ಕಷ್ಟ್ಮು . ²⁴ ಐಶ್ವರ್ಯ ವಂತುಡು ದೇವುಡು ರಾಜ್ಯುಮ್ಲ ಸೇರೇದಾನ್ಕಿಂತ ಒಂಟ ಸೂದಿ ಕನ್ಲ ನುಗ್ಗೇದಿ ಸುಲ್ಬ್ಮು ಅನಿ ಮೀಕಿ ತಿರ್ಗಿ ಸೊಪ್ತಾನು ಅನೆ . ²⁵ ಶಿಷ್ಯುಲು ದೀನ್ನಿ ಇನಿ ಅತ್ಯಾಶ್ಚರ್ಯುಮು ಪಡಿ - ಇಟ್ಟುoಟೆ ಯೋಳ್ಕು ರಕ್ಷಣ್ಮು ಆಯ್ತಾದಿ ಅನಿ ಅಡ್ಗೇಕಿ ಯೇಸು ವಾಳ್ನಿ ದೃಷ್ಟಿಚ್ಚಿ ಸೂಸಿ - ²⁶ 26 ಇದಿ ಮನುಷ್ಯುಲಿಕಿ ಅಸಾದ್ಯುಮು , ಆಯ್ತೆ ದೇವುಡ್ಕಿ ಅನ್ನೀ ಸಾದ್ಯುಮೇ ಅನೆ . ²⁷ ಅಪ್ಡು ಪೇತ್ರುಡು ವಾಡ್ನಿ - ಇಗೋ, ಮಾಮು ಅಂತ ಇಡ್ಸಿಡ್ಸಿ ನಿನ್ನೀ ಹಿಂಬಾಲಿಸ್ತ್ಮಿ , ²⁸ ಮಾಕಿ ಏಮಿ ದೊರ್ಕ್ತಾದಿ ಅನಿ ಅಡ್ಗೇಕಿ ಯೇಸು ವಾಳ್ಕಿ - ಮೀಕ್ಕಿ ಸತ್ಯುಮಾಯಿ ಸೊಪ್ತಾನು , ಕೊತ್ ಸೃಷ್ಟೀಲ ಮನುಷ್ಯು ಕುಮಾರುಡು ತನ್ ಮಹಿಮೇನಿ ಸಿಂಹಾಸನ್ಮಿಂದ ಕುಚ್ಚೇನೆ ನಪ್ಡು ನನ್ನೀ ಹಿಂಬಾಲಿಚ್ಚುಂಡೆ ಮೀರು ಸಹ್ಮು ಪನ್ನೆಂಡು ಸಿಂಹಾಸನ್ಮಿಂದ ಕುಚ್ಚೋನಿ ಇಸ್ರಾಯೇಲಿನ ಪನ್ನೆಂಡು ಕುಲ್ಮುಲುಕಿ ನ್ಯಾಯ್ಮು ತೀರ್ಬಿಸ್ತಾರು . ²⁹ ಮಲಿ ನಾ ಪೇರ್ ನಿಮಿತ್ಮು ಇಂಡ್ಲಾವ್ನಿ ಅನ್ ದೊಂಬುಳ್ಳಾವ್ನಿ ತಂಡ್ರಿನಾವ್ನಿ ತಲ್ಲಿನಾವ್ನಿ ಬಿಡ್ಳುನಾವ್ನಿ ಭೂಮಿನಾವ್ನಿ ಇಡ್ಸಿ ಇಡ್ಸುoಡೋಳ್ಅಂದ್ರುಕು ಅನೇಕ್ಮು ಪಾಲು ಹೆಕ್ವ ಸಿಕ್ತಾದಿ , ಮಲಿ ವಾಳು ನಿತ್ಯುಮು ಜೂಡ್ಕಿ ಭಾದ್ಯುಲಾಯ್ತಾರು . ³⁰ ಆಯ್ತೆ ಬಹುಮಂದಿಲು ಮೊದ್ಲೋಳು ಕೊನೆಯೋಳಾಯ್ತಾರು , ಕಡೆಯೋಳು ಮೊದ್ಲೋಳಾಯ್ತಾರು.