¹ ಆ ಕಾಲುಮ್ಲ ಉಪರಾಜುಡೈನ ಹೆರೋದುಡು ಯೇಸುಲ ಸುದ್ದಿನಿಯಿನಿ ತನ್ನ ಪರಿವಾರ್ಮೊಳಕಿ ದೀನ್ನಿ ² ಸ್ನಾನಿಕುಡೈನ ಯೋಹಾನುಡು ತಿರ್ಗಿ ಬದ್ಕೊಚ್ಚೆ ದಾನ್ನಿಂಚ ಮಹತ್ಕಾರ್ಯಲ್ನಿ ನಡ್ಬಿಚ್ಚೆ ಶಕ್ತಿ ವಾಡ್ಲ ವುಂಡಾವಿ ಅನಿ ಸೊಪ್ಪೆ . ³ ಹೆರೋದುಡು ಹೆರೊದ್ಯುದಿ ನಿಮಿತ್ಮು ಯೋಹಾನುಡ್ನಿ ಪಟ್ಟಿ ಕಟ್ಟಿಚ್ಚಿ ಸೆರೇಲ ಏಬಿಚ್ಚ್ರಿ . ⁴ ಆ ಹೆರೊದ್ಯುದಿ ಹೆರೋದುಡು ಅನ್ನಾ ಆಯಿನ ಪಿಲಿಪ್ಪುಡು ಪೆಂಡ್ಲಾಂ . ಯೋಹಾನುಡು - ನುವ್ವ ದೀನ್ನಿ ಪೆಟ್ಕೋನುoಡೆದಿ ಧರ್ಮುಮು ಕಾದು ಅನಿ ಸೊಪ್ತ ವುಂಡೆ . ⁵ ಹೆರೋದುಡು ವಾಡ್ನಿ ಸೊಂಪಿಯಾಲನಿ ವುಂಟೆನು ಜನಲು ವಾಡ್ನಿ ಪ್ರವಾದಿ ಅನಿ ಎನ್ಬಿಚ್ಚಿಂದಾಂಕು ವಾಳ್ಕಿ ಭಯ್ಮು ಪಡಿ ಸೊಂಪಿಬಿಯ್ಲೆದು . ⁶ ಆಯ್ತೆ ಹೆರೋದುಡು ಪುಟ್ಟಿನ್ ದಿನ್ಮು ಪಂಡ್ಗುಮು ನಡ್ಸೆನಪ್ಡು ಹೆರೊದ್ಯುದಿ ಬಿಡ್ದ ವಚ್ನೋಳ್ ಮುಂದ್ರ ನಾಟ್ಕ್ಮು ಸೇಸಿ ಹೆರೋದುಡ್ನಿ ಮೆಚ್ಚಿಚ್ಚಿಂದಾಂಕು ವಾಡು ದಾನ್ಕಿ - ⁷ ನುವ್ವ ಏಮಿ ಅಡಿಕೊಂಟೇನು ಇಸ್ತಾನು ಅನಿ ಆಣ್ಮು ಸೇಸಿ ಮಾಟ ಇಚ್ಚೆ . ⁸ ಅಪ್ಡು ಆದಿ ದಾನ್ ತಲ್ಲಿ ಬೋಧನ್ಮುನಿ ಇನಿ - ಈನ್ನೇ ಸ್ನಾನಿಕುಡೈನ ಯೋಹಾನುಡು ತಲ್ಕಾಯ್ನಿ ಪರಾತ್ಮುಲ ನಾಕಿ ಚಪ್ಪಿಚ್ಚಿಇಯ್ಯಿ ಅನೆ . ⁹ ಆ ಮಾಟ್ಕಿ ರಾಜುಡು ದುಖ್ಮು ಪಡ್ತೆನು ವಾಡ್ ಪೆಟ್ಕೊನಿನ ಆಣ್ಳು ನಿಮಿತ್ಮು ಆಯಿನು ವಾಡ್ ಜೊತ್ಲ ಪಂಕ್ತಿಲ ಕುಚ್ಚೋನುoಡಿನೋಳು ನಿಮಿತ್ಮಾಯಿನು ದಾನ್ನಿ ಎತ್ಕೊಚಿಚ್ಚೇಕಿ ಅಪ್ಪಣ್ಮು ಇಚ್ಚೆ . ¹⁰ ಮಲಿ ಆಳ್ನಿ ಅಂಪಿಚ್ಚಿ ಸೆರಇಂಟ್ಲ ಯೋಹಾನುಡು ತಲ್ಕಾಯ್ನಿ ಅಂಪಿಚ್ಚೆ . ¹¹ ವಾಳು ವಾಡ್ ತಲ್ಕಾಯ್ನಿ ಪರಾತ್ಮುಲ ಎತ್ಕೊಚ್ಚಿ ಆ ಪಿಲ್ಕಿ ಇಚ್ರಿ , ಆದಿ ದಾನ್ನಿ ದಾನ್ ತಲ್ಲಿ ದೆಗ್ರುಕಿ ಎತ್ಕೋನಿ ಪಾಯೇ . ¹² ಯೋಹಾನುಡು ಶಿಷ್ಯುಲು ವಚ್ಚಿ ವಾಡ್ ಪೀನ್ಗುನಿ ಮೋಸ್ಕೊನಿ ಪಾಯಿ ಪೂಡ್ಸಿ ಪೆಟ್ಟಿ ಯೇಸು ದೆಗ್ರುಕಿ ವಚ್ಚಿ ತಿಲ್ಬಿಚ್ರಿ . ¹³ ಯೇಸು ದಾನ್ನಿ ಇನಿ ದೋಣಿನಿ ಎಕ್ಕಿ ಆ ಸ್ಥಲ್ಮುನಿ ಇಡ್ಸಿ ವಿಂಗಡ್ಮಾಯಿ ಅಡ್ವಿಕಿ ಪಾಯೇ . ದೀನ್ನಿ ಇನಿನ ಜನಲು ಗುಂಪ್ ಗುಂಪಾಯಿ ವಾಳ್ ವಾಳ್ ಊರಿಂಚ ಕಾಲ್ ನಡುಕ್ಮು ಇಂಚ ವಾಡ್ ಎನ್ಕ ವಚ್ರಿ . ¹⁴ ವಾಡು ಆಕ್ಟರ್ಕಿ ವಚ್ಚಿ ಬಹುಲು ಜನ್ಮು ಗುಂಪ್ನಿ ಕನಿ ಕನಿಕರ್ಮು ಪಡಿ ವಾಳ್ಳವುಂಡಿನ ರೋಗಿಲ್ನಿ ಸ್ವಸ್ಥ್ಮು ಸೇಸೆ . ¹⁵ ಮಾಟಾಲ್ ಆಯ್ನಪ್ದು ಶಿಷ್ಯುಲು ವಾಡ್ ದೆಗ್ರುಕಿ ವಚ್ಚಿ - ಇದಿ ಅಡವಿ , ಇಪ್ಡು ಪೊದ್ದು ಪಾಯೇ , ಈ ಗುಂಪ್ಕಿ ಅಪ್ಪಣ್ಮು ಇಯ್ಯಿ , ವಾಳು ಹಳ್ಳಿಪಳ್ಳಿಲ್ಕಿ ಪಾಯಿ ಅಹಾರ್ಮು ಪದಾರ್ಥ್ಮುಲ್ನಿ ಕನ್ಕೊಂದ್ರುಗಾನಿ ಅನಿ ಸೊಪ್ನಪ್ಡು ಯೇಸು - ¹⁶ ವಾಳು ಪಾಯೇದಿ ಅಗತ್ಯುಮು ಲೇದು , ಮೀರೇ ವಾಳ್ಕಿ ಊಟುಮ್ಕಿ ಇಯ್ಯಂಡ್ರಿ ಅನೆ . ¹⁷ ದಾನ್ಕು ವಾಳು - ಮಾಕಿ ಈನ ಐದು ರೊಟ್ಳು ರೊಂಡು ಶಾಪ್ಲು ಹೊರ್ತು ಮಲೇಮಿ ಲೇದು ಅನ್ನಪ್ಡು ಯೇಸು - ಅವುಟ್ಲುನಿ ಈನ ನಾಕಿ ಎತ್ಕೊಚ್ಚಿಯಂಡ್ರಿ ಅನೆ . ¹⁸ ಮಲಿ ಜನಲ್ಕಿ ಕೊಸ್ವು ಮಿಂದ ಕುಚ್ಚೋನೆದಾನ್ಕಿ ಸೊಪ್ಪಿ ¹⁹ ಆ ಐದು ರೊಟ್ಟ ರೊಂಡು ಶಾಪ್ಲುನಿ ಸೀಸ್ಕೊನಿ ಅಕಾಶ್ಮು ತೊಟ್ಗಿ ಸೂಸಿ ದೇವುಡು ಸ್ತೋತ್ರುಮು ಸೇಸಿ ರೊಟ್ಳುನಿ ಇರ್ಸಿ ಶಿಷ್ಯುಲು ಸೇತ್ಕಿ ಇಚ್ಚೆ , ಶಿಷ್ಯುಲು ಜನಲು ಗುಂಪ್ಕಿ ಇಚ್ರಿ . ²⁰ ವಾಳ್ ಅಂದ್ರು ಊಟ್ಮು ಸೇಸಿ ತೃಪ್ತುಲಾಯ್ರಿ . ²¹ ಮಿಕ್ಕಿನ ತುಂಡ್ಲುನಿ ಕೂಡಿಚ್ಚಿ ಪನ್ನೆಂಡು ಪುಟ್ಳು ನಿಂಡೆ. ಊಟ್ಮು ಸೇಸ್ನೋಳು ಆಡೋಳು ಬಿಡ್ಳು ಕಾಕುನ್ನ ಮೊಗೋಳೆ ಐದು ಸಾವ್ರಲು ಮಂದಿಲು . ²² ಇದಿ ಆಯಿನ್ ತಕ್ಷಣ್ಮೆ ಯೇಸು ತನ್ ಶಿಷ್ಯುಲ್ಕಿ - ಈ ಜನಲು ಗುಂಪುಲ್ನಿ ಅಂಪಿಚ್ಚಿಇಡ್ಸೆ ಅಂತ್ಪದ್ಗಿ ಮೀರು ದೋಣಿನಿ ಎಕ್ಕಿ ಮುಂದ್ರಾಯಿ ಅಕ್ಡ ದಡುಮ್ಕಿ ಪೊಂಡ್ರಿ ಅನಿ ಬಲ್ವಂತ್ಮು ಸೇಸೆ . ²³ ಯೇಸು ಜನಲು ಗುಂಪ್ನಿ ಅಂಪಿಚ್ಚಿ ಇಡ್ಸಿನ್ಮಿಂದ ಪ್ರಾಥ್ನುಮು ಸೇಸೆದಾಂಕು ಎಕಾಂತ್ಮಾಯಿ ಬೆಟ್ಟುಮ್ನಿ ಎಕ್ಕೆ . ಮಲಿ ಪೊದ್ದು ಮುಳ್ಗಿನ್ಮಿಂದ ಒಕ್ದೆ ಆನ ವುಂಡೆ . ²⁴ ಅಂತ್ಪದ್ಗಿ ದೋಣಿ ಭೂಮಿಕಿ ಬಹು ದೂರ್ಮು ಪಾಯುಂಡೆ . ²⁵ ಮಲಿ ಎದ್ರುಗಾಲಿ ಬೀಸ್ತಾ ವುಂಡೆದಾನ್ನಿಂಚ ತೆರೆಲು ಓಡ್ತ್ಮುಕಿ ಸಿಕ್ಕಿ ಒದ್ದಾಡ್ತಾವುಂಡೆ . ಆ ರಾತ್ರ ನಾಲ್ಗ್ನೆ ಪೊದ್ಲ ಯೇಸು ಸಮುದ್ರುಮು ಮಿಂದ ನಡ್ಸಿ ವಾಳ್ ತೊಟ್ಗಿ ವಚ್ಚೆ . ²⁶ ಸಮುದ್ರು ಮಿಂದ ನಡ್ಸೆ ವಾಡ್ನಿ ಶಿಷ್ಯುಲು ಸೂಸಿ ಭೂತ್ಮು ಅನಿ ಭಯ್ಮಿಂಚ ಕೂಸ್ರಿ . ²⁷ ಅಪ್ಡೇ ಯೇಸು ಮಾಟ್ಲಾಡಿ ವಾಳ್ಕಿ - ಧೈರ್ಯುಮಾಯುಂಡoಡ್ರಿ , ನಾನು , ಅಂಜದಂಡ್ರಿ ಅನಿ ಸೊಪ್ಪೇ . ²⁸ ದಾನ್ಕಿ ಪೇತ್ರುಡು - ಸ್ವಾಮೀ , ನುವ್ವೆಯಾಯ್ತೆ ನಾಕಿ ನೂಳಿನ ಮಿಂದ ನಡ್ಸಿ ನೀ ದೆಗ್ರುಕಿ ವಚ್ಚೇಕಿ ಅಪ್ಪಣ್ಮು ಇಯ್ಯಿ ಅನ್ನಪ್ದು ಯೇಸು - ರಾ ಅನೆ . ²⁹ ಅಪ್ಡು ಪೇತ್ರುಡು ಯೇಸು ದೆಗ್ರುಕಿ ಪಾಯೇದಾನ್ಕು ದೋಣಿ ಇಂಚ ದಿಗಿ ನೂಳ್ ಮಿಂದ ನಡ್ಸೆ . ³⁰ ಆಯ್ತೆ ಗಾಲಿನಿ ಸೂಸಿ ಭಯ್ಮು ಪಡಿ ಮುಲ್ಗ್ತಾ - ಸ್ವಾಮೀ , ನನ್ನೀ ಕಾಪಾಡು ಅನಿ ಕೂಸ್ಕೊನ್ರಿ . ³¹ ಆ ಕ್ಷಣ್ಮೆ ಯೇಸು ಸೈ ಚಾಚಿ ವಾಡ್ನಿ ಪಟ್ಕೋನಿ - ಅಲ್ಪ್ಮು ವಿಶ್ವಾಸಿಲ , ಎಂದ್ಗೂ ಸಂದೇಹ್ಮು ಪಡ್ತ್ವಿ ಅನಿ ಸೊಪ್ಪೇ . ಆಮಿಂದ ವಾಳು ದೋಣಿನಿ ಎಕ್ಕಿನ್ಮಿಂದ ಗಾಲಿ ನಿಲ್ಪಡಿ ಪಾಯೇ . ³² ಅಪ್ಡು ದೋಣಿಲ ವುಂಡ್ನೋಳು - ³³ ನಿಜ್ಮಾಯಿ ನುವ್ವ ದೇವುಡುಕುಮಾರುಡು ಅನಿ ಸೊಪ್ಪಿ ಯೇಸುಕಿ ನಮಸ್ಕರಿಚ್ರಿ . ³⁴ - ವಾಳು ಸಮುದ್ರುಮ್ನಿ ದಾಟಿ ಗೆನೆಜರೇತ್ ದೇಶ್ಮು ದಡುಮ್ಕಿ ಮುಟ್ಟ್ರಿ . ಆ ಸ್ಥಳ್ಮು ವೋಳು ವಾಡ್ ಗುರ್ತ್ನಿ ಪಟ್ಟಿ ³⁵ ಆ ಸುತ್ಲು ಸೀಮೆಕoತ ಸೊಪ್ಪಿಅಂಪಿ ಪೈಲ ನೆಟ್ಗ ಲೇನೋಳ್ ಅಂದ್ರುನಿ ಯೇಸು ದೆಗ್ರುಕಿ ಪಿಲ್ಬಿಚ್ಚಿ ವಾಡ್ನಿ - ³⁶ ನೀ ಉಡ್ಪು ಗೊಂಡೆಯಾಯ್ತೆನು ಮುಟ್ಟಿಯಾಲನಿ ಬೇಡ್ಕೊನ್ರಿ . ಮುಟ್ನೋಳ್ ಅಂದ್ರು ಸ್ವಸ್ಥ್ಮು ಆಯ್ರಿ .