¹ ಯೇಸು ವಾಳ್ ಪನ್ನೆಂಡು ಮಂದಿ ಶಿಷ್ಯುಲ್ಕಿ ಸೊಪ್ಬೇಕಾಯುಂಡೆದ್ನಿ ಸೊಪ್ಪಿ ಮುಗ್ಸ್ಮಿಂದ ಆನೋಳ್ ಊರ್ಲ ಉಪದೆಶ್ಮು ಸೇಸೆದಾನ್ಕು ಸುವಾರ್ತುಮ್ನಿ ಸಾರೆದಾನ್ಕು ಆನಿಂಚ ಪಾಯ್ರಿ . ² ಯೋಹಾನುಡು ಕ್ರಿಸ್ತುಡು ಕಾರ್ಯಲು ಸುದ್ದಿನಿ ಸೆರಇನ್ಟ್ಲ ಇನಿ ವಾಡ್ ದೆಗ್ರುಕಿ ಶಿಷ್ಯುಲ್ನಿ ಅಂಪಿಚ್ಚಿ - ³ ರಾಬೇಕಾಯುಂಡೋಡು ನುವ್ವೋ , ಮಾಮು ಬೇರೊಕ್ಡು ದಾವ್ನಿ ಸೂಡಲ್ನೋ ಅನಿ ಅಡುಗ್ಬಿಚ್ಚೆ . ⁴ ವಾಡು ವಾಳ್ಕಿ ಪ್ರತ್ಯುತ್ರುಮಾಯಿ - ಗುಡ್ದೊಲ್ಕಿ ಕನ್ಲು ವಸ್ತಾವಿ , ಕುಂಟುಡ್ಕಿ ಕಾಲ್ ವಸ್ತಾವಿ , ಕುಷ್ಟುರೋಗಿಲು ಶುಧ್ಮಾಯ್ತಾರು , ಶೌಟೋಳ್ಕಿ ಶೊವ್ಲು ವಸ್ತಾವಿ, ಸಚ್ನೋಳು ⁵ ಜೂಡ್ನಿ ಹೊಂಡ್ಕೊಂಟಾರು , ಬಡುವ್ಲ್ಕಿ ಸುವಾರ್ತ್ಮು ಸಾರ್ನಟ್ಗಾಯ್ತದಿ ಮೀರು ಪಾಯಿ ಕನಿ ಇನಿಂದ್ನಿ ಯೋಹಾನುಡ್ಕಿ ತಿಲ್ಬಿಯಂಡ್ರಿ. ⁶ ನಾ ವಿಷಯುಮ್ಲ ಸಂಶಯ್ಮುನಿ ಪಡ್ನೋಡೆ ಧನ್ಯುಡು ಅನಿ ಸೊಪ್ಪೇ. ⁷ ವಾಳು ಪಾತವುಂಡೆನಪ್ಡು ಯೇಸು ಯೋಹಾನುಡು ವಿಷಯ್ಮಾಯಿ ಆ ಜನಲು ಗುಂಪುಲ್ಕಿ ಸೋಪ್ಪಿಂದೆಮಂಟೆ - ಏಮಿ ಸೂಡಲನಿ ಅಡ್ವಿಕಿ ಪಾಯುಂಟ್ರಿ ? ⁸ ಗಾಲಿನಿಂಚ ಅಲ್ಲಾಡೆ ದಂಟ್ನಾ ? ಕಾಕ್ಪೋತೆ ಏಮಿ ಸೂಡಲನಿ ಪಾಯುಂಟ್ರಿ ? ನಯ್ಮಾಯಿ ಬಟ್ಲುನಿ ಎಸ್ಕೊನಿನ ಮನುಷ್ಯುಡ್ನಾ ? ನಯ್ಮಾಯಿನ ಬಟ್ಲುನಿ ಏಸ್ಕೊನಿನೋಳು ಅರ್ಸುಡುಇನ್ಟ್ಲ ವುನ್ಟಾರಂತೆ . ⁹ ಅಟ್ಟಾಯ್ತೆ ಎಂದ್ಗೂ ಪಾಯುಂಟ್ರಿ ? ಪ್ರವಾದಿಲ್ನಿ ಸೂಸೆದಾನ್ಕೋ ? ಹೌನು , ಪ್ರವಾದಿಲ್ಕಿಂತ ಹೆಚ್ನೋಡ್ನಿ ಸೂಸ್ನಾರು ಅನಿ ಮೀಕು ಸೊಪ್ತಾನು. ¹⁰ ನಾ ದೂತುಡ್ನಿ ನೀ ಮುಂದ್ರ ಅಂಪಿಸ್ತ , ನುವ್ವ ಪಾಯೇ ದಾವ್ನಿ ಯೇಸು ನೀ ಮುಂದ್ರ ಸರಿ ಸೇಸ್ತಾಡು ಅನಿ ಯೋಳ್ ವಿಷಯ್ಮಾಯಿ ರಾಸಿಂದೋ ಆ ಮೊಗೋಡು ವೂಡೆ . ¹¹ ಆಡೋಳ್ಳಾ ಪುಟ್ನೋಳ್ನೋನ ಸ್ನಾನಿಕುಡೈನ ಯೋಹಾನುಡುಕಿಂತ ಪೆದ್ಡೋಡು ಲೆಯ್ಲೇ. ಆಯ್ತೆನು ಪರ್ಲೋಕುಮ್ಲವುಂಡಿನ ಸನ್ನೋಡು ವಾಡ್ಕಿಂತನು ಪೆದ್ಡೋಡು ಅನಿ ಮೀಕಿ ಸತ್ಯುಮಾಯಿ ಸೊಪ್ತಾನು. ¹² ಇದ್ಕಾಕುನ್ನ ಸ್ನಾನಿಕುಡೈನ ಯೋಹಾನುಡು ಕಾಲ್ಮಿಂಚ ಇಪ್ಡುಗಂಟ ಪರ್ಲೋಕ್ಮು ರಾಜ್ಯುಮು ಬಲತ್ಕಾರುಮ್ಕಿ ಗುರಿಯಾಯಿಂದಿ, ಬಲತ್ಕಾರಿಲು ನುಗ್ಗಿ ದಾನ್ನಿ ಸ್ವಾದೀನ್ಮು ಸೇಸ್ಕೊಂಟಾರು . ¹³ ಪ್ರವಾದಿಲಂದ್ರು ಧರ್ಮಶಾಸ್ತ್ರುಮು ಪ್ರವಾದಿಚ್ಚೆದಿ ಯೋಹಾನುಡು ಗಂಟ ವುಂಡೆ . ¹⁴ ಮೀಕಿ ಗ್ರಹಿಸೇಕಿ ಮನ್ಸುಂಟೆ ವಚ್ಚೆತಕ್ಮು ಎಲಿಯುಡು ವೂಡೆ ಅನಿ ತಿಲ್ಚ್ಕೊಂಡ್ರಿ. ¹⁵ ಶವ್ವುನ್ಡೋಡು ಇನುನಿ. ¹⁶ ಆಯ್ತೆ ಈ ಸಂತತ್ಮುನಿ ಯೋಳ್ಕು ಹೋಲ್ಬಿತ್ನು ?ಪೇಟ್ಲುಲಾ ಕುಚ್ಕೋನಿ ವಾಳ್ ಸ್ನೇಹೀತುಲ್ಕಿ - ¹⁷ ಮೀಕೋಸ್ಕರ್ಮು ಕೊಲಲ್ನಿವೂದುತ್ಮಿ, ಮೀರು ಕುಣಿಲೇದು . ಗೊಲಾಡುತ್ಮಿ , ಮೀರು ಎದಕೊಟ್ಕೊನ್ಲೆ ಅನಿ ಕೂಸಿ ಸೊಪ್ಪೇ ಸಿನೋಳ್ನಿ ಹೋಲ್ತಾದಿ . ¹⁸ ಎಟ್ಟಂಟೆ ಯೋಹಾನುಡು ವಚ್ಚೆ , ವಾಡು ಅನ್ಮುಪಾನ್ಮುಲ್ನಿ ಸೀಸ್ಕೊನಕಾವ್ನೋಡಾಯುಂಡೆ , ವಾಳು ವಾಡ್ಕಿ - ದೈಮು ಪಟ್ಟಿoದಿ ಅನ್ಟಾರು . ¹⁹ ಮನುಷ್ಯ ಕುಮಾರುಡು ವಚ್ಚೆ , ವಾಡು ಅನ್ಮು ಪಾನಲ್ನಿ ಸೀಸ್ಕೊನೋಡಾಯ್ನಾಡು, ವಾಳು - ಇಗೋ , ವೂಡು ಕೊಡ್ಪು ಬಾಕುಡು , ಕುಡ್ಕುಡು , ಭ್ರಷ್ಟುಲ ಮಲಿ ಪಾಪಿಸ್ಟುಲ ಸ್ನೇಹಿತುಡು ಅನ್ಟಾರು . ಆಯ್ತೆ ಜ್ಞಾನಮು ಮೀ ಕೆಲ್ಸಲಿಂಚ ಜ್ನಾನ್ಮೆ ಅನಿ ಗೊತ್ತಾಯೇದಿ ಅನೆ. ²⁰ ಅಪ್ಡು ವಾಡು ವಾಡ್ ಮಹತ್ಕಾರ್ಯಲು ಬಹಳ್ಮಾಯಿ ನಡ್ಸ್ನ ಊರ್ಲು ದೇವುಡು ತೊಟ್ಗಿ ತಿರ್ಗ್ಲೆದನಿ ಅವುಲ್ನಿ ಗದರಿಚ್ಚೆಕಿ ಪ್ರಾರಂಬ್ಮು ಸೇಸೆ . ²¹ ಎಟ್ಟಂಟೆ - ಅಯ್ಯೋ ಖೋರಾಜುಡ , ಅಯ್ಯೋ ಬೆತ್ಸಾಯಿದವೇ , ಮೀಲಾ ನಡ್ಸ್ನ ಮಹತ್ಕಾರ್ಯುಮ್ಲು ತೂರ್ ಮಲಿ ಸೀದೋನ್ ಪಟ್ಟ್ನುಮ್ಲ ನಡ್ಸುಂಟೆ ಅನೋಳು ಅಪ್ಡೇ ಗ್ವಾನ್ತಿತ್ತ್ನಿ ಏಸ್ಕೋನಿ ಬೋಡ್ದ್ಲಾಕುಚ್ಚೋನಿ ದೇವುಡು ತೊಟ್ಗಿ ತಿರಿಕೊಂಟವುಂಡ್ರಿ . ²² ಆಯ್ತೆ ನ್ಯಾಯ್ಮು ವಿಚಾರ್ಮು ದಿನುಮ್ಲ ಮೀ ಗತಿಕಿಂತಾನು ತೂರ್ ಸೀದೊಮ್ ಪಟ್ನ್ಮು ಗತಿ ಪೈನಾಯುಂಟಾದಿ ಅನಿ ಮೀಕಿ ಸೊಪ್ತಾನು. ²³ ಅನ್ನಿ ಕೆಪೆರ್ನೌಮೆ, ನುವ್ವ ಪರ್ಲೋಕ್ಮುಕಿ ಎತ್ತಲ್ಪಡ್ತಾವ ? ಪಾತಾಳುಮ್ಕಿ ದಿಗ್ತಾವು . ನೀಲಾ ನಡ್ಸಿನ ಮಹತ್ಕಾರ್ಯಾಲು ಸೋದೊಮಿಲ ನಡ್ಸುಂಟೆ ಆದಿ ಇಪ್ಡುಗಂಟ ಉಳ್ಸ್ಕೊಂಟವುಂಡೆ. ²⁴ ಆಯ್ತೆ ನ್ಯಾಯ್ಮು ವಿಚಾರ್ಮು ದಿನುಮ್ಲ ನೀ ಗತಿಕಿಂತಾನು ಸೋದೊಮ್ ಸೀಮಿನ ಗತಿ ಪೈನಾಯುಂಟಾದಿ ಅನಿ ಮೀಕು ಸೊಪ್ತ ಅನೆ. ²⁵ ಆ ಸಮಯುಮ್ಲ ಯೇಸು ಸೋಪ್ಪಿನ್ದೆಮಂಟೆ - ಪರ್ಲೋಕ್ಮು ಭೂಲೋಕ್ಮು ರಾಜುಡ , ನುವ್ವ ಜ್ನಾನಿಲ್ಕಿ ಬುದ್ದಿವಂತುಲ್ಕಿ ಈ ಮಾಟುಲ್ನಿ ಮೂಸಿಪೆಟ್ಟಿ ಸನ್ನೋಲ್ಕಿ ಪ್ರಕಟ್ಮು ಸೇಸ್ನಾವು ಅನಿ ನಿನ್ನೀ ಕೊಂಡಾಡ್ತಾನು . ²⁶ ಹೌನು ತಂಡ್ರಿಯೇ , ಇಟ್ಟ ಸೇಸೇದೆ ಮಂಚಿದಿ ಅನಿ ನೀ ದೃಷ್ಟಿಕಿ ತೋಚಿನ್ದಾನಿಂಚ ನಿನ್ನೀ ಕೊಂಡಾಡ್ತಾನು . ²⁷ ನಾ ತಂಡ್ರಿ ನಾಕಿ ಅನ್ನಿ ಒಪ್ಪಿಚ್ನಾಡು . ತಂಡ್ರಿನೇ ಹೊರ್ತು ಇನ್ಕ್ಯೋವ್ಡು ಕೊಡುಕ್ನಿ ತಿಳ್ಚ್ನೋಡು ಕಾದು , ಕೊಡ್ಕೆ ಹೊರ್ತು ಇನ್ಕ್ಯೋವ್ಡು ತಂಡ್ರಿನಿ ತಿಳ್ಚ್ನೋಡು ಕಾದು , ಮಲಿ ಕೊಡ್ಕು ತಂಡ್ರಿನಿ ಯೋಳ್ಕಿ ಪ್ರಕಟಿಚ್ಚೆಕಿ ಮನ್ಸುಂಡೋಡಾಯುಂಡಾಡ ವಾಡು ವಾಡ್ನಿ ತಿಲ್ಸುಂಡೋಡಾಯ್ನಾಡು. ²⁸ ಎಲಾ ಕಸ್ಟ್ಮು ಪಡೋಳಾ , ಮೋಪ್ ಮೋಸ್ನೋಳ , ಮೀರಂದ್ರೂ ನಾ ದೆಗ್ರುಕಿ ರಾಂಡ್ರಿ , ನಾನು ಮೀಕು ವಿಶ್ರಾಂತಿನಿ ಇಸ್ತಾನು . ²⁹ ನಾನು ಸಾತ್ವೀಕುಡು ದೀನ್ಮುಮನ್ಸುಂಡೋಡು ಆಯುಂಡೆದಾನ್ನಿಂಚ ನಾ ನೊಗ್ಮುನಿ ಮೀ ಮಿಂದ ಸಿಸ್ಕೋನಿ ನಾಲ ಕುಚ್ಚೊಂಡ್ರಿ , ³⁰ ಅಪ್ಡು ಮೀ ಅತ್ಮುಲ್ಕಿ ವಿಶ್ರಾಂತಿ ಸಿಕ್ತಾದಿ . ಎಂದ್ಕಂಟೆ ನಾ ನೊಗ್ಮು ಮ್ರುದ್ಮಾಯುಂಡೆದಿ, ನಾ ಮೋಪು ಹೌರ್ಮಾಯುನ್ದೆದಿ.