¹ .ವಾರಂನ ಮೊದಲ್ನೆ ದಿನಂ ಮಗ್ದಲಂನ ಮರಿಯಳು ಮುಂಜಾನೆ ಇಂಕ ಸೀಗ್ಟಿ ಉಂಡ್ನಪ್ದೆ ಸಮಾದಿ ದೇಗ್ಗರ್ಗಿ ವಚ್ಚಿ ಸಮಾಧಿಯಾ ರಾಯಿ ಆನ್ನಿಂಕ ತೀಸುoಡೆದಾನ್ನಿ ಸೂಸ್ನಾದಿ. ² .ಆದಿ ಸೀಮೋನ ಪೆತ್ರುಡ ದೇಗ್ಗರ್ಗು ಯೇಸುಗಿ ಪ್ರೀಯಡೈನಾ ಆ ಮಲೊಕ್ಕ ಶಿಷ್ಯಡ ದೇಗ್ಗರ್ಗು ಪಾರಿ ವಚ್ಚಿ ವಾಳ್ಗಿ-ಸ್ವಾಮಿನ್ನಿ ಸಮಾಧಿಲೋಗನ್ನಿಂಕ ತಿಸ್ಗಾನಿ ಪಾಯಿ ಆತುಡ್ನಿ ಯಾನ್ಪೆಟ್ನಾರೋ ಮಾಕಿ ಗೊತ್ಲೇದನಿ ಸೋಪ್ಪಿಂದಿ. ³ .ಅಪ್ಡು ಪೇತ್ರುಡು ಆ ಮಲೊಕ್ಕ ಶಿಷ್ಯಡು ಎಲ್ಲಿ ಸಮಾಧಿಯ ಕಡ್ಗಿ ಪೈನಾರು. ⁴ .ವಾಳಿದ್ರು ಜೋತಾಯಿ ಪಾರಿಪೈನಾರು;ಆದ್ರೆ ಆ ಮಲೊಕ್ಕ ಶಿಷ್ಯಡು ಪೆತ್ರುಡ್ನೀoಕ್ಕ ಮುಂದ್ರ ಪಾರಿ ಮೊದ್ಲೇ ⁵ .ಸಮಾಧಿಗಿ ಮುಟ್ಟಿ ವಂಗ್ಗಿ ಸೂಸಿ ಆ ನಾರುಬಟ್ಟಲ್ಲು ಪೋಡುಂಡದಾನ್ನಿ ಸೂಸ್ನಾಡು;ಆಯ್ತೆ ಲೋಕಿ ಪೊಲೇದು. ⁶ .ಸೀಮೊನ್ ಪೇತ್ರುಡು ವಾಡ ಯನ್ಕವಚ್ಚಿ ಸಮಾಧಿಲೋಗ ಪಾಯಿ ಆ ನಾರು ಬಟ್ಟಲ್ನಿ ಪೋಡುಂಡವುಟ್ಲ್ನಿ ಆತುಡು ತಲಪೈನಾಉನ್ನ ⁷ ಆ ನಾರುಬಟ್ಲಾ ಕೂಡ ಉಂಡ್ಗುಂಡ ಸುತ್ತಿ ಒಕ್ಕಕಡಲಾ ಬೇರೆ ಉಂಡದಾನ್ನಿ ಸೂಸ್ನಾಡು. ⁸ .ಅಪ್ಡು ಸಮಾಧಿಯ ದೇಗ್ಗರ್ಗಿ ಮೊದ್ಲು ವಚ್ನಾ ಆ ಮಲೊಕ್ಕ ಶಿಷ್ಯಾಡು ಸಹ ಲೋಕಿಪಾಯಿ ಸೂಸಿ ನಂಬ್ನಾಡು. ⁹ .ಆತುಡು ಸಚ್ನಪೈನ ಜೀಂನ್ನಿಕಲೇಸಿ ರಾವಾಲನೈ ಶಾಸ್ತ್ರoಲ ರಾಸ್ನಾ ಮಾಟ ವಾಳ್ಗಿ ತಿಳ್ಸುoಡ್ಲಾ. ¹⁰ .ತರುವಾಯಂ ಆ ಶಿಷ್ಯಾಲು ತಿರ್ಗಿ ತಮ್ಮೊಳ ದೇಗ್ಗರ್ಗಿ ಪೈನಾರು. ¹¹ ಅಯ್ತೆ ಮರಿಯಳು ಆತರ ಸಮಾಧಿಯ ದೇಗ್ಗರ ಎಡ್ಸತ ನಿಲ್ಚಿಂದ್ದಿ.ಇಟ್ಟೆ ಆದಿ ಎಡ್ಸುoಡಾಗ ಸಮಾಧಿಲೋಗ ವೆಂಗಿಸೂಡಲು ¹² .ಯೇಸು ದೇಹಾಮು ಪೆಟ್ಟುಂಡ ಸ್ಥಳಮ್ಲಾ ತೆಲ್ಗ ಉಂಡ್ನಾ ವಸ್ತ್ರಲ್ನಿ ಮೂಸ್ಗನ್ನ ಇದ್ದರು ದೇವದೂತಲ್ನಿ ಸೂಸ್ನಾರು ವಾಳ ಒಕ್ಕಡು ತಲಉಂಡ್ನಾ ಕಡ್ಲಾ ಒಕ್ಕಡು ಕಾಳುಂಡ್ನಾ ಕಡ್ಲಾ ಕುಚ್ಗೋಉಂಡ್ರಿ. ¹³ .ವಾಳು ದಾನ್ನಿ ಅಮ್ಮಾ ನುವ್ವ ಎಂದ್ಗೂ ಎಡ್ಸ್ತಾವು ಅನಿ ಅಡ್ಗಾಲು ಆದಿ ನಾ ಸ್ವಾಮಿನೀ ತಿಸ್ಗಾನಿ ಪೈನಾರು ಆತುಡ್ನಿ ಯಾನ ಪೆಟ್ಲಾರೋ ನಾಕಿ ಗೊತ್ಲೇ ಅನ್ನಾಡು. ¹⁴ .ದೀನ್ನಿ ಇನಿ ತಿರ್ರಿಕ್ಕಾನಿ ಯೇಸು ನಿಲ್ಚಾಗಾವುoಡದಾನ್ನಿ ಸೂಸಿಂದಿ,ಅಯ್ತೆ ಆತುಡು ಯೇಸು ಅನಿ ದಾನ್ಗಿ ತಿಲಿಲೆದು. ¹⁵ .ಯೇಸು ದಾನ್ನಿ-ಅಮ್ಮಾ,ಯಂದ್ಗು ಎಡ್ಸತಾವು?ಯವ್ವಲ್ನೀ ಉಡುಕ್ತಾವು?ಅನಿ ಅಡ್ಗಾಲು ಅದಿ ಆತುಡ್ನಿ ತ್ವಾಟಗಾರುಡನೀ ನೆನ್ಸಿ ಆತುಡ್ಗಿ-ಅಮ್ಮಾ,ನುವ್ವ ಆತುಡ್ನಿ ಎತ್ಗಾನಿ ಪೈಂಟೆ ಯಾನ ಪೆಟ್ನಾವು ನಾಕಿ ಸೊಪ್ಪು;ನೀನು ತಿಸ್ಗಾನಿ ಪಾತಾನು ಅನಿ ಸೋಪ್ನಾದಿ. ¹⁶ .ಯೇಸು ದಾನ್ಗಿ-ಮರಿಯಳೆ,ಅನಿ ಸೋಪ್ನಾಡು. ಅದಿ ತಿರ್ರಿಕ್ಕಾನಿ ಇಬ್ರಿಯ ಮಾಟ್ಲಾ-ರಬ್ಬೂನಿ,ಅನ್ನಾದಿ.[ರಬ್ಬೂನಿ ಅಂಟೆ ಗುರುವೇ ಅನಿ ಅರ್ಥಂ]. ¹⁷ .ಯೇಸು ದಾನ್ಗಿ -ನನ್ನಿ ಪೊಟ್ಟದ್ದು ;ಯಂದ್ಗoಟ್ಟೆ ನೀನು ಇಂಕ ತಂಡ್ರಿಯ ದೇಗ್ಗರ್ಗಿ ಏರಿ ಪೈನೋಡುಕಾದು.ನುವ್ವ ನಾ ಸಹೋದರುಲಾ ದೇಗ್ಗರ್ಗಿ ಪಾಯಿ -ನೀನು ನಾ ತಂಡ್ರಿಯು ಮೀ ತಂಡ್ರಿಯು ನಾ ದೇವುಡು ಮೀ ದೇವುಡು ಅಯ್ದಾತುಡ ದೇಗ್ಗರ್ಗಿ ಏರಿ ಪಾತಾನು ಅನಿ ವಾಳ್ಗಿ ಸೊಪ್ಪು ಅನ್ನಾಡು. ¹⁸ .ಮಗ್ದಲದ ಮರಿಯಳು ಪಾಯಿ -ನಾನು ಸ್ವಾಮಿಲ್ನಿ ಸೂಸ್ನಾನು;ಆತುಡು ಇಟ್ಟಿಟ್ಟದಾನ್ನಿ ನಾಕಿ ಸೋಪ್ನಾಡು ಅನಿ ಶಿಷ್ಯಲ್ಗಿ ತಿಲ್ಬಿಚ್ಚಿಂದಿ. ¹⁹ .ಅದೇ ದಿನಂ ಅoಟ್ಟೆ ವಾರಂನ ಮೊದ್ಲೇನೆ ದಿನಂನ ಮಾವ್ಟಲ ಶಿಷ್ಯಾಲು ಯೆಹೂದ್ಯ್ಲ ಭಯಂನ್ನಿಂಕ ತಾವು ಉಂಡ್ನಾ ಇಲ್ಲಾ ವಾಕಲ್ನಿ ಮುಸ್ಗನುಂಡಾಲು ಯೇಸು ವಚ್ಚಿ ಮದ್ಯ ನಿಲ್ಚಿ ಸಮಾಧಾನಂಕಾನಿ ಅನ್ನಾಡು. ²⁰ .ದೀನ್ನಿ ಸೋಪ್ನಾಪೈನಾ ವಾಳ್ಗಿ ತನ್ನ ಸೈಲ್ನಿ ಪಕ್ನಿ ಸೂಪ್ತಾಡು.ಶಿಷ್ಯಾಲು ಸ್ವಾಮಿನಿ ಸೂಸ್ನಂದ್ಗು ಸಂತೋಷಂಪೋಡ್ನಾರು. ²¹ .ಯೇಸು ವಾಳ್ಗಿ-ಮೀಕಿ ಸಮಾಧಾನಂಕಾನಿ ಅನಿ ತಿರ್ಗಿ ಸೊಪ್ಪಿ-ತಂಡ್ರಿ ನನ್ನಿ ಅಂಪ್ಪಿಚ್ಚಿಚ್ನಾ ಅಟ್ಟೆ ನೀನು ಮಿಮ್ಮಲ್ನಿ ಅಂಪಿಚ್ಚಿಚ್ಚಿಸ್ತಾನು ಅನ್ನಾಡು. ²² .ದೀನ್ನಿ ಸೊಪ್ಪಿ ವಾಳ ಪೈನಾ ಊದಿ ವಾಳ್ಗಿ ಪವಿತ್ರಾತ್ಮವರಂನ್ನಿ ತಿಸ್ಗಂಡಿ; ²³ .ಮೀಳು ಯವ್ಲ ಪಾಪಲ್ನಿ ಕ್ಷಮ್ಸಿಉಡ್ಸಾತಾರೋ ವಾಳ್ಗಿ ಅವುಟ್ಲಾ ಕ್ಷಮಾಪಣೆ ಆಯ್ತಾವಿ;ಯವ್ಲ ಪಾಪಲ್ನಿ ಕ್ಷಮೀಚ್ಗುoಡ ಉಳ್ಬಿಸ್ತಾಲೋ ವಾಳ್ಗಿ ಅವುಟ್ಲಾ ಉಳ್ಸತಾವಿ ಅನ್ನಾಡು. ²⁴ .ಯೇಸು ವಚ್ನಪ್ದು ಪನ್ನೆಂಡು ಮಂದಿ ಶಿಷ್ಯಲೊಗ ಒಕ್ಕಾಡೈನಾ ದಿದುಮನನ್ಬಿಚ್ಗನ್ನ ತೊಮಡು ವಾಳ ಸಂಗಡಂ ಉಂಡ್ಲೇದು. ²⁵ .ದಾನ್ನಿಂಕ ಉಳ್ಸನಾ ಶಿಷ್ಯಾಲು-ಮೀಮು ಸ್ವಾಮೀನ್ನಿ ಸೂಸ್ನಾಮು ಅನಿ ವಾಡ್ಗಿ ಸೋಪ್ನಾರು.ಅಂದ್ಗೆ ವಾಡು-ನೀನು ಆತುಡ ಸೈಲಾ ಮೊಳಲ್ನಿoಕೈನ ಗಾಯಮ್ನಿ ಸೂಸಿ ಆ ಮೊಳ ಘಯಂಲಾ ಬಾ ಬೆರಳ್ನೀ ಪೆಟ್ಟಿ ಆತುಡ ಪಕ್ಕೆಲಾ ನಾ ಸೈಯ್ನಿ ಎಸ್ನಾ ಹೊರ್ತು ಮೀ ಮಾಟ್ನೀ ನಂಬೆದೇ ಲೇದು ಅನ್ನಾಡು. ²⁶ .ಎನಂದಿ ದಿನಾಲ್ಪೈನಾ ಆತುಡ ಶಿಷ್ಯಲು ತಿರ್ಗಿ ಲೊಗಉನ್ನಪ್ದು ತೊಮಡು ವಾಳ ಸಂಗಡ ಉಂಡಾಡು.ವಾಕಲಿಲು ಮೂಸ್ನಾವಿ.ಅಪ್ಡು ಯೇಸು ವಚ್ಚಿ ಮದ್ಯ ನಿಲ್ಚಿ-ನೀಕಿ ಸಮಾಧಾನಂಕಾನಿ ಅನ್ನಾಡು. ²⁷ .ಆಮಂಕ ತೊಮಡ್ಗಿ-ನೀ ಬೆಳ್ನಿಈ ಪಕ್ಕ ಚಾಚಿ ನಾ ಸೈಲ್ನಿ ಮುಟ್ಗಾನಿ ಸೂಡಿ;ನೀ ಸೈಚಾಚಿ ನಾ ಪಕ್ಕೆಲಾ ಎಯ್ಯಿ;ನಮ್ಬಗುನ್ನವಾಡುಕಾವದ್ದು,ನಂಬೆವಾಡುಕಾ ಅನಿ ಸೋಪ್ನಾಡು ²⁸ .ತೊಮಡು ಆತುಡ್ಗಿ-ನಾ ಸ್ವಾಮಿ,ನಾ ದೇವುಡು!ಅನಿ ಸೋಪ್ನಾಡು. ²⁹ .ಯೇಸು ವಾಡ್ಗಿ-ನುವ್ವ ನನ್ನಿ ಸೂಸ್ನಾದ್ಗು ನಂಬ್ನಾವು;ಸೂಡ್ಗುoಡ ನಂಬ್ನಾವಾಳು ಧನ್ಯಲು ಅನಿ ಸೋಪ್ನಾಡು. ³⁰ .ಯೇಸು ಇಂಕ ಬೇರೆ ಎಂತೋ ಸೂಚಕಕಾರ್ಯಾಲ್ನಿ ತನ್ನ ಶಿಷ್ಯಾಲ ಮುಂದ್ರ ಸೇಸ್ನಾಡು.ಅವುಟ್ಲ್ನಿಈ ಗ್ರಂಥಂಲಾ ರಾಸುಂಡೆಲೇ. ³¹ .ಆಯ್ತೆ ಯೇಸು ದೇವಕುಮಾರುಡೈನಾ ಕ್ರೀಸ್ತುಡನೀ ಮೀಳು ನಂಬೆಟ್ಲಾ,ನಂಬಿ ಆತುಡ ಪೆರ್ನಾ ಮೂಲಕಂಮೈ ಜೀಮ್ನಿ ಪಡ್ಗಾನಾಟ್ಲಾನು ಇಂತಂತ ರಾಸಿಂದಿ.