¹ .ಪದ್ನಾಲ್ಕು ವರ್ಷಲೈನ ಪೈನಾ ನೀನು ತಿತಡ್ನಿ ಪಿಲ್ಬಿಗಾನಿ ಬಾರ್ನಾಬುಡ ಜೋತ್ಲ ತಿರ್ಗಿ ಯೇರುಸಲೆಮ್ಗಿ ಪೈನಾಡು . ² .ದೈವ ಪ್ರೇರಣೆಲು ಸಾರಂಗ ಪೈನಾನು.ಅನ್ಯಜನಾಲಾ ನೀನು ಸಾರೇ ಸುವಾರ್ತಮು ಎಮನದಾನ್ನಿ ಅನುಂಡವಾಳ್ಗಿ ತಿಳ್ಬಿಚ್ನಾಡು .ಆಯ್ತೇ ನೀನು ಪಡ್ತಾ ವುಂಟೆ ಪ್ರಯಾಸಕಿ ಕಾನಿ ಪೋಡ್ತೆ ಪ್ರಯಾಸಂಕಾನಿ ನಿಷ್ಪಲಂಕಾಗುಡ್ದಾನ್ನಿ ಮಾನಿಷ್ಟಲ್ನಿ ಎಕಾಂತಂಲಾ ತಿಳ್ಬಿಚ್ನಾನು . ³ .ನಾ ಜೋತ್ಲಾ ಉಂ ಡ್ನಾ ತಿತಡು ಗ್ರೀಕ ಡೈನಾನು ವಾಡ್ಗಿ ಸುನ್ನತಿ ಕಾವಾಲನಿ ಯವ್ಳು ಬಲಾತ್ಕಾರಂ ಸೆಯ್ಲೇದು . ⁴ .ಸಭೆಗಿ ದೊಂಗತಂ ನಂನ್ನಿಕ ಸೇರ್ಗಾನ್ನ ಸುಳ್ಳು ಸಹೋದರಲ್ಲು ಆನಾ ಉಂಡದಾನ್ನಿಂಕ ಬಲತ್ಕಾರಂ ನಡ್ಸೆತದನೀ ಭಯಂಮುಂಡೆ .ವಾಳು ಮಮ್ಮಲ್ನಿ ದಾಸತ್ವಂ ಲೋಗ ಸಿಕ್ಕಿಚ್ಹಾಲನಿ ಕ್ರಿಸ್ತಯೇಸುಲಾ ಮಾಕಿ ದೊರಕ್ಕು ಸ್ವಾತಂತ್ರ್ಯಮ್ನಿ ಗೂಡಂ ಮೈ ವಿಚಾರಿಚ್ಹೇದಾನ್ನಿ ಮಂಚ್ಚಿಗನ್ನಾ ವಚ್ಹಾವಾಳು . ⁵ .ಸುವಾರ್ತೆಯಂ ಸತ್ಯಾರ್ಥಮು ಮಿಲಾ ಸ್ತಿರಂಗ ಉಂಡಾಲನಿ ಮಾಮು ವಾಳ್ಗಿ ವಶಂಮಾಯದಾನ್ಗಿ ಒಕ್ಕಗಳಿಗೆ ಪದೈನಂ ಸಮ್ಮತಿ ಪಡ್ಲ ⁶ ಆಯ್ತೇ ಮಾನಿಷ್ಟ ನೆನ್ಬಿಚ್ಗನ್ನ ಕೊನ್ನವಾಲ್ನಿಂಕಾ ನಾಕೇಮಿಲೋಲೋ ದೊರಕ್ಲೆದು ವಾಳು ಯನ್ನ ಕಾಲಂಲಾ ಎಟ್ಟಾ ವಾಳೆ೦ಟು ನಾಕಿ ಲಕ್ಷ್ಯಲೆದು .ದೇವುಡು ಮೊಖಂ ದಾಕ್ಷಿಣ್ಯ ಸೇಸವಾಡು ಕಾದು ಮಾನಿಷ್ಟಲ್ನಿ ಲೆನ್ಬಿಚ್ಚನ್ನಾವಾಳು ನಾ ಮಾಟ್ಗಿ ಒಪ್ಲೇ ಹೊರ್ತು ನಕೆಮು ನೆ ಪೆರಿಪಿಲ್ಲ. ⁷ .ಸುನ್ನತಿ ಯೈನಾವಾಳ ಅಪೋಸ್ತಲತನಂನ್ನಿ ನಡ್ಸೆದಾನ್ಗೋ ಸ್ನೇಹಂ ಪೆತ್ರಡ್ನಿ ಪ್ರೆರಿಪಿಚ್ನಪ್ಪು ಅನ್ಯಜನಾಲಾ ದಾನ್ನಿ ನಡ್ಪೆದಾನ್ಗಿ ನನ್ನಿ ಪ್ರೇರೆಪಿಚ್ನಾಡು . ⁸ .ಸುನ್ನತಿಯ್ಯಾನವಾಲ್ಗಿ ಸುವಾರ್ತೆನ್ನಿ ಸಾರೇಕೆಲಸಮು ಎಟ್ಟ ಪೆತ್ರುಡ್ಗಿ ಇಚ್ಚಲ್ಪಡಿಂದೋ ಅಟ್ಟೆ ಸುನ್ನತಿ ಲೆಗುನ್ನ ವಾಳ್ಗಿ ದಾನ್ನಿ ಸಾರೆ ಕೆಲಸಮು ನಾಕಿ ಇಚ್ಚುಂಡದಾನ್ನಿ ಸಭಾಸ್ತಂಭಲನಿ ⁹ .ಪೆರ್ಗೊಂಡ್ನ ಯಾಕೋಬಡು ಕೆಪ್ಹಡು ಯೋಹಾನಾಡು ಸೂಸಿ ದೇವುಡು ನಾಕಿ ದಯಪಾಲಿಚ್ನಾ ವರಂನ್ನಿ ತಿಚ್ಗಾನ್ನಿ ಐಕ್ಯಮ್ಮ್ನಿ ಸೂಪ್ಪಿಚ್ಚೆ ದಾನ್ಗಿ ನಾಕೂ ಬಾರ್ನಾಬುಡ್ಗು ಎಡಂ ಸೈ ಇಚ್ಚಿ ಮಿಳು ಅನ್ಯಜನಲಾ ದೇಗ್ಗರ್ಗಿ ಪೊಂಡಿ ಮಾಮು ಸುನ್ನತಿವಾಳ ದೇಗ್ಗರ್ಗಿ ಪಾತಾಮು ಅನ್ನಾರು . ¹⁰ .ಆಯ್ತೆ ಮಿಳು ಮಾಲಾ ಉಡ್ನಾ ಬಡಮಲ್ನಿ ಜ್ಞಾಪಂಕಂ ನ್ನಿ ಸೇಬಿಚ್ಗಾವಾಲನಿ ಒಕ್ಕೆ ಸಂಗತಿನ್ನಿ ಬೇಡ್ಗಾನ್ನಾರು ;ದಿನ್ನಿ ಸೇಸೆದಾ೦ಟ್ಲ ನೀನು ಆಶಕ್ತಡೈಂ ಯಿಂಟ . ¹¹ .ಕೆಫಡು ಅಂತಿಯೋಕ್ಯಾನ್ಗಿ ವಚ್ನನಪ್ಪುವಾಳು ದೊಷಿಯಾಯಿ ಕಂಬಿಚ್ಗಾನ್ನ ದಾನ್ನಿಂಕಾ ನೀನು ವಾಡ್ನಿ ಮುಖಾಮುಖಿಯಾಯಿ ದಡ್ಬಿಚ್ನಾನು . ¹² .ಯಂದ್ಗ೦ ಟ್ಟೆ ಯಾಕೋಬುಡ ಕಡ್ಗಿಂನ್ನಿಂಕಾ ಕೆಲವುಲು ವಚ್ಹೆದಾನ್ಗಿ ಮುಂದ್ರವಾಡು ಅನ್ಯ ಜನಾಲ ಸಂಗಡಂಲೂ ಟಂ ಸೇಸ್ತಾ ಉಂಟಾಡು ;ವಾಳು ವಂಚ್ನಾ ಪೈನಾ ಸುನ್ನತಿಯವ ಲೈನಾ ವಾಳ್ಗಿ ವಾಡು ಭಯಂ ಪೋಡಿ ಅನ್ಯಜನಾಲ್ನಿ ಉಡ್ಸಿ ತನ್ನನ್ನಿ ಪ್ರತ್ಯಕ್ಷಿಚ್ಗಾನ್ನಾಡು. ¹³ .ಇದ ಕಾಗುಂಡಾ ಮಿಕ್ಕಿನ್ನಾ ಯೆಹುದ್ಯಾಲು ವಾಡ ಜೋತ್ಲಾ ಸೇರಿ ಅಟ್ಟೆ ಯೇ ಕಪಟ೦ ಸೇಸ್ನಾರು;ಇಟ್ಟೆ ಬಾರ್ನಾಬಾಡು ವಾಡ ಕಪಟ೦ನಾ ಸೇಳಮಿಗಿ ಪೋಡ್ನಾಡು. ¹⁴ .ವಾಳು ಸುವಾರ್ತೆಯ ಸತ್ಯಾರ್ಥಂನ ಪ್ರಕಾರಂ ನೆಟ್ಗಾ ನಡ್ಸೆ ಲೇದನಿ ನೀನು ಸುಸ್ನಾಪ್ದು ಅಂದ್ರಮುಂದ್ರಾ ಕೆಫಡ್ಗಿ ಸೋಪ್ಪಿಂದೆಮ೦ಟೆ ನುವ್ವ ಯಹುದ್ಯಾಲ ಜ್ಞಾನೇ ನಡ್ಗುಂಡ ಅನ್ಯಜನಾಲಕಾನೆ ನಡ್ಸನ್ನಾ ಪೈನಾ ಅನ್ಯಜನಾಲ್ಗಿ ಮೀಳು ಯಹುದ್ಯಾಲ ಪದ್ದಲೆಲ್ನಿ ಅನುಸರಿಚ್ಹಾಲನಿ ನುವ್ವ ಬಲತ್ಕಾರಂ ಸೇಸೆದೀ ಯಟ್ಟ ? ¹⁵ .ನೀನಂತೂ ಪುಟ್ಟಿ ಯಹುದ್ಯಾಲು ಪಾಪಿಲನ್ಜಿಚ್ಗನ್ನ ಅನ್ಯಜನಾಲ್ನಾದು. ¹⁶ .ಆಯ್ನಾನು ಯವ್ವಡೈನಾನು ಯೇಸು ಕ್ರಿಸ್ತುಡೂ ಪೈನಾ ನಂಬಿಕಾನ್ನಿಂಕಾನ್ನೆ ಹೊರ್ತುನೇಮ ನಿಷ್ಟೇಲ್ನಿ ಅನುಸರಿಚ್ಚಿ ನಿತಿವಂತುಡನಿ ನಿರ್ಣಯಿಚ್ಚಲ್ಪಡೇ ಲೇದು ಮಾಕಿ ತಿಳ್ಸುಂ ಡ ದಾನ್ನಿಂಕಾ ಮಾಮೂ ಸಹ ನೇಮನಿಷ್ಟೇಲ್ನಿ ಉಡ್ಸಿ ಕ್ರಿಸ್ತುಡಾ ಪೈನಾ ನಂಬಿಕಾನ್ನಿಂಕಾನೇ ನಿತಿವಂತಲನಿ ನಿರ್ಣಯಿಚ್ಹಾಲ್ಪ ಡೇದಾನ್ಗಿ ಕ್ರಿಸ್ತಯೇಸುಲಾ ನಂಬಿಕೆ ಪೋಡ್ನಾಮು ;ಯದ್ಗುಂಟ್ಟೆ ಯವ್ವಡೈನಾನು ನೇಮನಿಷ್ಟೇಲ್ನಿ ಅನುಸರಿಚ್ಚಿ ನಿತಿವಂತುಡನಿ ನಿರ್ಣಯಿಚ್ಚಲ್ಪಡೇಲೇದು . ¹⁷ .ಆಯ್ತೇ ಮಾಮು ಕ್ರಿಸ್ತುಡಾ ಆಶ್ರಯಂಲಾ ನೀತಿವಂತಲನ ನಿರ್ಣಯ ಹೊಂದೆದಾನ್ಗಿ ಪ್ರಯತ್ನಂ ಸೇಸ್ತುಂಡ ಗ ಮಾಮು ಪಾಪಿಲೈಯ್ಯಿ ಕನ್ಬಿಸ್ತಾವ ಸ್ತೆ ಕ್ರಿಸ್ತುಡೂ ಪಾಪಾನ್ಗಿ ಸಹಾಯಕಡನಿ ಸೋಪ್ಪಲೇ ಮೋ ?ಎಂದ್ಗೂ ಸೋಪ್ಪೆಗುಡ್ದು . ¹⁸ .ನೀನು ಕೆಡವಿದಾನ್ನಿ ತಿರ್ಗಿ ಕಟ್ತೆ ನನ್ನಿ ನಾನೇ ಅಪರಾಧಿ ಅನಿ ಸೂಪಿ ಚ್ಗಾಂಟನುಕದ. ¹⁹ .ನೀನಂತೂ ದೇವುಡೈಗೈಜೀವಿ ಚ್ಹೆದಾನ್ಗೊಸ್ಕರಂ ಧರ್ಮ ಪ್ರಮಾಣಂ ಮ್ನಾ ಮೂಲಕ೦ ಮೈ ಧರ್ಮಪ್ರಮಾಣಂ ನ ಪಾಲ್ಗಿ ಸಚ್ಚಾನು. ²⁰ .ಕ್ರಿಸ್ತುಡಾ ಜೋತ್ಲಾನೆ ಶಿಲುಬೇಗಿ ಎಬಿಚ್ಗಾನಾ ವಾಡೈನಾನು ;ಇಂಕಾ ಜಿವಿಚ್ಹೆವಾಡು ನೀನುಕಾದು ಕ್ರಿಸ್ತುಡೂ ನಾಲ ಜಿವಿಸ್ತಾಡು;ಇಪ್ಡು ಶರೀರಂಲಾ ಉಂಡ್ನಾ ನೀನು ಜೀವಿಚ್ಹೆದೀ ಯವುಂಟ್ಟೆ ದೇವಕುಮಾರುಡ ಪೈನಾ ನಂಬಿಕಾಲನೆ, ಆತುಡುನನ್ನಿ ಪ್ರಿತಿಚ್ಚಿ ನಾಕೊಸ್ಕರಂ ತನ್ನನ್ನಿ ಒಪ್ಪಿಚ್ಹಿಚ್ನಾಡು . ²¹ .ನೀನು ದೇವುಡು ಕೃಪಾನ್ನಿ ನಿರರ್ಥಕಂ ಸೇಸೆಲೆದೂ .ಕರ್ಮಮಾರ್ಗಂ ನ್ನಿಂಕಾ ನೀತಿಎಂಟೈ ಯ್ಯೇದೈತೆ ಕ್ರಿಸ್ತುಡೂ ಮರಣಂನ್ನಿ ಹೊಂದೆದಾನ್ಗಿ ಕಾರಣಮೆಲೇದು.