¹ ದೇವುಡು ಮಿಮ್ಮುಲ್ನಿ ಕ್ಷಮಿಚ್ನಾಡೆ ಅಟ್ಟೆ ಪ್ರಿಯುಲೈನ ಬಿಡ್ಡುಲಿಕಿ ತಕ್ಮಯ್ಯಿ ವಾಡಿನಿ ಹಿಂಬಾಲಿಂಚಿರಿ. ² ಕ್ರಿಸ್ತುಡು ಮಿಮ್ಮಿಲ್ನಿ ಪ್ರೀತಿಂಚಿ ಅಂದ್ರುಕೊಸ್ಕರ್ಮು ವಾಳಿನಿ ದೇವುಡುಕಿ ಸುಗಂದ್ಮು ವಾಸ್ನುಮಾಯಿ ಕಾಣಿಕೆಯಾಯಿ ಯಜ್ನುಮಾಯಿ ಒಪ್ಪಿಂಚಿನಟ್ಗ ಮೀರು ಪ್ರೀತಿಲ ನಡ್ಸ್ಕೊಂಡ್ರಿ. ³ ಮೀಲ್ಲಾ ಯಾವ್ ವಿದಮೈನ ಜಾರತ್ಮು ಬಂಡುತನ್ಮು ಇವಿ ಮೀಲಾ ವುಂಡ್ಗುಡ್ಧು ಇವುಟ್ಲಿಕಿ ದೂರ್ಮಾಯಿಂಡೆದೆ ದೇವುಡು ಜನಲ್ಕು ಮಂಚ್ಚಿದಿ. ⁴ ಹೊಲ್ಸ್ಲು ಮಾಟ್ಲು ಹುಚ್ಚು ಮಾಟ್ಲು ಇವಿ ವದ್ದು ಇವುಟ್ಲುನಿ ದೇವುಡ್ಕಿ ಉಪಕಾರ್ಮು ಸ್ತುತಿಲ್ನಿ ಸೇಸೇದೆ ಮಂಚಿದಿ . ⁵ ಜಾರುಲು ದುಸ್ಟುಲು ವಿಗ್ರಹಾರದಕುಲುಲಾಕ ವುಂಡಿನ ಲೋಭಿಲು ವೂಳ್ಳಾ ಒಕ್ಳಿಕು ದೇವುಡು ರಾಜ್ಯಮುಲ ಹಕ್ಕುನ್ದೆಲೆದನಿ ತಿಳ್ಚ್ಕೊಕುನೋಳು ⁶ ಹುರುಳುಲೇನಿನ ಮಾಟ್ಲಿಕಿ ಶವ್ವಿಚ್ಚಿ ಮೋಸ್ಮು ಪೋವಾದಂಡ್ರಿ ಇಟ್ಟೆ ಅವಿದೇಯಮು ಆಯಿನೋಳಿನ ಮಿಂದ ದೇವುಡು ಕೋಪ್ಮು ವಸ್ತಾದಿ. ⁷ ಮೀರು ವಾಳು ಜೊತ್ಲೋ ಸೇರ್ಕನಿ ಪಾಲುಗಾರುಲು ಆವೊದಂಡ್ರಿ. ⁸ ಮೀರು ಎನ್ಕಿನ ಕಾಲ್ಮುಲ್ಲೋ ಸೀಟ್ಕಾಯಿಂಟ್ರಿ ಇಪ್ಪ್ದು ಕ್ರಿಸ್ತುಡುಲವುಂಡಿ ಎಲ್ಗಾಯ್ನಾರು ಎಲ್ಗುಲಾಕ ನಡಿಯನ್ದ್ರಿ. ⁹ ಎಲ್ಗಿನ ಪಲ್ಮು ಉಪಕಾರಮ್ಲೋ ನೀತಿಲಾನು ಸತ್ಯಮ್ಲಾನು ಕನ್ಬಿಚ್ಕೊಂಟಾದಿ. ¹⁰ ಕರ್ತುಡುಡ್ಕಿ ಯಾವ್ದಿ ಮೆಚ್ಗೆಯಾಯಿಂದನಿ ತಿಲ್ಸ್ಕೊಂಡ್ರಿ. ¹¹ ಸೀಕ್ಟಿಕಿ ಸಂಭದ್ಮಾಯಿನ ಕಾರ್ಯಮ್ಲಿಂಚ ಏಮಿ ಪ್ರಯೋಜ್ನುಮು ಆಯೇಟ್ಲೆ ಆವುಟ್ಳುಲಾ ಪಾಲುಗಾರುಡು ಆಯ್ಕುನ್ನ ಆವುಟ್ಲುನಿ ಎಲ್ಗಿಕಿ ಎತ್ಕೊಚ್ಚಿ ಖಂಡಿಯನ್ದ್ರಿ. ¹² ಆ ಜನ್ಮುಲು ಗುಪ್ತ್ಮಾಯಿ ಸೇಸೆ ಕೆಲ್ಸಾಲ್ನಿ ಕುರಿಂಚಿ ಮಾಟ್ಲಾಡೇದಿ ನಾಚ್ಕೇಕಿ ಕಾರ್ನ್ಮಾಯಿಂದಿ. ¹³ ಎಲ್ಗಿನಿಂಚ ಅನ್ನಿ ಕಾರ್ಯಮುಲ ಮೊಂಚಿಗುನ್ಮು ಕಂಟಾದಿ ಶೆಡ್ದೇದಿ ಶೆಡ್ದೆದ್ಲಾಕ್ನೆ ಕಂಟಾದಿ ಅದಿ ಪ್ರಕಟ್ಮಾಯೇದೆಲ್ಲಾ ಎಲ್ಗಿಕಿ ಸಂಭಂದ್ಮಾಯಿಂದಿ. ¹⁴ ದಾನಿಂಚ ನಿದ್ರುಮ್ ಸೇಸೊಳೆ ಎಚ್ಚ್ರುಮಾವ೦ಡ್ರಿ ಸಚ್ಚಿನೋಳ್ನಿ ಇಡ್ಸಿ ಲೆಯ್ಯಿ ನೀಕಿ ಎಲ್ಗು ವಚ್ಚೆ ¹⁵ ಮೀರು ನಡ್ಸ್ಕೊನೆ ರೀತಿಲ್ನಿ ಕುರಿಂಚಿ ಎಚ್ಹೃಮಾವಂಡ್ರಿ ಮೂರ್ಕುಲ್ಲಾಕ ಆಯ್ಕುನ್ನ ಜ್ನಾನಮಂತ್ಲಾಯಿ ವುನ್ದನ್ಡ್ರಿ . ¹⁶ ಕಾಲುಮ್ನಿ ಊರ್ಕೆ ಕಲ್ಸ್ಕೋಕುನ್ನಾ ದಾನಿನಿ ಬೆಲೆವು೦ಡೆದನಿ ಉಪಯೋಗ್ಯುಮಿಚ್ಚ್ಕೊಂಡ್ರಿ. ¹⁷ ಬುದ್ದಿಹೀನುಡಾಯಿ ನಡ್ಸ್ಕೊಕುನ್ನ ಬುದ್ದಿವಂತ್ಲಾಯಿ ನಡ್ಸ್ಕೊಂಡ್ರಿ ಕರ್ತುಡಿನ ಚಿತ್ತಮೆಮನಿ ತಿಲ್ಸ್ಕೊಂಡ್ರಿ. ¹⁸ ಮದ್ಯಪಾನಮ್ನಿ ಸೇಸಿ ಮತ್ತಲಾಯಿವುನ್ದನ್ಡ್ರಿ ದಾನಿಂಚ ಪಟಿ೦ಗತನ್ಮು ಪುಟ್ತ್ತಾದಿ. ¹⁹ ಪವಿತ್ರಾತ್ಮುಡು ಬರಿತ್ಮಾಯಿoಡಿ ಕೀರ್ತುಲಿಂಚ ಆತ್ಮ ಸಂಭಂದ್ಮೈನ ಹಾಡ್ಲಿಂಚನೂ ಒಕ್ಳುಕೊಕ್ಳುಕಿ ಮಾಟ್ಲಾಡ್ಕೋನಿ ಮೀ ಹೃದಯಮುಲ ದೇವುಡಿಕಿ ಗಾನುಮ್ನಿ ಸೇಸ್ತಾ ಕೀರ್ತುನ್ನುನಿ ಹಾಡಂಡ್ರಿ. ²⁰ ಎಪ್ಪ್ದು ಅನ್ನಿ ಕೆಲ್ಸುಮ್ನ್ಕ್ಲಾಯಿ ಮಾ ಕ್ರಿಸ್ತುಡು ಪೇರಿಲ ತಂಡ್ರಿಯಾಯ್ನ ದೇವುಡುಕಿ ಸ್ತೋತೃಮು ಸೇಸ್ತಾ ಬಾಯಮ್ ಪಡೋಳಾಯಿ ²¹ ಒಕ್ಳುಕೋಕ್ಲಿಕಿ ವಿನಯಮುಂಡೋಲಾಯಿ ನಡ್ಸ್ಕೊಂಡ್ರಿ ²² ಪೆಂಡ್ಲಾಮುಲಾ ಮೀ ಮಗುಡುಕಿ ಎಟ್ಟ್ಟೋ ಅಟ್ಟ ಕರ್ತುಡುಡಕಿ ಅದೀನ್ಮಾಯಿನ್ದುನ್ದ್ರಿ. ²³ ಕ್ರಿಸ್ತುಡು ಸಬೇಕಿ ಮುಖ್ಯಸ್ತುಡಾಯಿನ ಪ್ರಕಾರ್ಮು ಮೋಗ್ಡು ಪೆಂಡ್ಲಾಮುಕಿ ಮುಕ್ಹ್ಯಸ್ತುಡಾಯ್ನಾಡು ಕ್ರಿಸ್ತುಡು ಸಬೇ ದೇಹಂಕಿ ರಕ್ಶಕುಡೈಯ್ನಾಡು. ²⁴ ಸಬೇಲು ಕ್ರಿಸ್ತುಡ್ಕಿ ಎಟ್ಟ ಅದೀನ್ಮಾಯಿಂದೋ ಅಟ್ಟೆ ಸ್ರ್ತಿಯುಲು ವಾಳ್ ವಾಳ್ ಮೊಗ್ಡುಲಿಕಿ ಅನ್ನಿದಾನ್ಟ್ಲಾ ಅದೀನ್ಮಾಯಿನ್ದಾಲ. ²⁵ ಮಗ್ಡುಲ ಕ್ರಿಸ್ತುಡು ಸಬೇನಿ ಪ್ರೀತಿಂಚನಟ್ಗಾ ಮೀ ಮೀ ಪೆನ್ದ್ಲಾಲ್ನಿ ಬಿಡ್ಡಿಲ್ನಿ ಪ್ರೀತಿನ್ಚಂಡ್ರಿ. ²⁶ ವಾಡು ದಾನ್ನಿ ಪ್ರತಿಷ್ಟೆ ಪಡಿಂಚೆದಾನಿಕಿ ವಾಡಿನಿ ಒಳ್ಮು ಪಟ್ನಾಡು ²⁷ ದಾನ್ನಿ ಶೆಡ್ದೇದಿ ಪಾಗ್ಲೇನಿನ ಇoಕೆಲ್ವುಲಾ ಇoನ್ಕೊಕ್ಟಿ ಲೇನಿನ ಕನ್ನಿಕ್ಮೋ ಅನಟ್ಗ ಪರಿಶುದ್ಮು ನಿರ್ದೊಶ್ಮು ಮಹಿಮಾಯ್ನ ಸಬೇಯನ್ನಾಯಿ ತನ್ನೆದ್ರುಗ್ಲಾ ನಿಲ್ಪಿನ್ಚ್ಕೊವಾಲನಿ ವಾಕ್ಯ್ಮು ಉಪದೆಶಾಲು ಸಹಿತ್ಮು ನೂಳಿನ ಸ್ನಾನ್ಮು ಸೇಬಿಂಚಿ ಶುಧ್ದ್ಮುಸೇಸೆ. ²⁸ ಅಟ್ಟೆ ಮೊಗೋಳು ಸಹ್ಮು ವಾಳಿನ ಶರೀರಮ್ನಿ ಪ್ರೀತಿಂಚ್ಕೊನೆ ಪ್ರಕಾರ್ಮು ವಾಳ್ ಪೆನ್ದ್ಳಮ್ನಿ ಬಿಡ್ಲುನಿ ಪ್ರೀತಿನ್ಚೆ ಅದೀನಮ್ಲವುಂಡೋಲಾಯಿಂಟೆ ವಾಡ್ ಪೆನ್ದ್ಲಾಮ್ನಿ ಪ್ರೀತಿಂಚೋಡು ವಾಡಿನೆ ಪ್ರೀತಿನ್ಚೋಡಾಯಿನ್ನಾಡು. ²⁹ ಯವ್ವುಳು ವಾಳ್ ಶರಿರಮ್ನಿ ತಿರ್ಸ್ಕಾರ್ಮು ಸೇಸೆಟ್ಲೆ ಅಂದ್ರು ಕಾಪಾಡ್ಕೊಂಟಾರು ³⁰ ಯಾವ್ ದೇಹಮ್ಕಿ ಮಾಮು ಅಂಗುಮ್ಲಾಯ್ನಾಮ್ನೋ ಸಬೆ ಅನೆ ದೇಹಮನಿ ಕ್ರಿಸ್ತುಡು ಕಾಪಾಡುತ್ತಾಡೆ. ³¹ ಈ ಕಾರಮ್ನಿಂಚ ಮೊಗೋಡು ತಂಡ್ರಿ ತಲ್ಲಿಲ್ನಿ ಇಡ್ಸಿ ಪೆನ್ದ್ಲಾಮ್ನಿ ಸೇರ್ಕೊಂಟಾದು ವಾಲಿದ್ದ್ರು ಒಕ್ಕೆ ಶರಿರ್ಮುಆಯ್ತಾಲು. ³² ನಾನು ಕ್ರಿಸ್ತುಡಿಕಿ ಸಬೇಕಿ ವುಂಡಿನ ಸಂಬಂದ್ಮು ಕುರಿಂಚಿ ಮಾಟ್ಲಾಡ್ತಾ. ದೀನ್ಗಂಟ ರಹಸ್ಯುಮಾಯಿನ ಸತ್ಯುಮು ಗಮ್ಬೀರ್ಮಾಯಿಂದಿ ³³ ಅದುನ್ದ್ನಿ ಮೀಲಾ ಅಂದ್ರೂ ಮೊಗೋಳು ವಾಳ್ ಪ್ರೀತಿಂಚಟ್ಗ ವಾಳ್ ಪೆನ್ದ್ಲಾಮ್ನಿ ಪ್ರೀತಿಯಾಲ ಅಂದ್ರು ಪೆನ್ದ್ಲಾಲು ವಾಳ್ ಮೊಗ್ಡಿಕಿ ಭಯಂ ಭಕ್ತಿಯಿಂಚ ನಡಿಯಾಲ.