¹ Anu nga matatikizo oku yendesa ezywi lya Jeso Kiresite, mwana wa Nyambe. ² Shina omo ñolelwa mwi buka yo mupolofita Isaya, "tonde, ndi tuma o mutumwa ozyo akezya habuso, ozyo achenesa enjila. ³ Ezywi likuwa mwinkanda, ' Muchenese enjira yo Nfumu; muworore enjira yakwe."' ⁴ Joani nakezya, mwinkanda kezya ku yendesa noku kutaza ezywi lyoku kolobeza ye abantu bashuwe nokuli kumbilila ezibbi zabo. ⁵ Bonshe bantu bo muchishi cha Judeya ne Jerusarema boku zwira kwakwe. Shaba kolobeza mu rwizyi rwa Jorodani, naba amba ezibbi zabo habuso. ⁶ Joani kazyabere echizyabaro chobozya bwe kamere no munsunga we chikabi mwi nyonga yakwe, mi kalya ezinxuna no buchi. ⁷ Aku basumwina," ye kwina ozyo akezya andihita mi kandiwoli kutongama noku shumununa enshangu zakwe. ⁸ Eme ndimi kolobeza ka menji eye nala mikolobeza ko luho luchenete. ⁹ Sheku tendehara bulyaho mu mazyuba amunya Jeso ozyo kwazwa kwa Nazareta ina mwa Galireya, mi sha kolobezwa mu rwizyi rwa Jorodani kwa Joani. ¹⁰ Jeso aho kazwa mu menji, ewilu nilya aluka kokuzwa o luho lufwana o njiva. ¹¹ Koku shuwahala ezywi lizwa kwiwulu litiye, "Oli mwanangu ndishaka hawa. ndili temba hawa hako." ¹² Mi o ruho nirwa musininika okuya mwinkanda. ¹³ Naka yelekwa kwa satani mwinkanda ka mazyuba a makumi o ne. Kakere mwinkanda nezi pau, mi amangiloi nia muhaza kwazo. ¹⁴ Aho sha kwatiwa Joani, Jeso nakezya mu munzi wa Galireya naka buamba ezywi lya Nyambe, ¹⁵ naka buamba ye, ''enako sheya bumbilizwa, muzwe kuzibbi muzumine kwa Nyambe kakuli o mubuso wa Nyambe shewina ahafwihi." ¹⁶ Aho kaka buyenda kumbali ye wate lya Galireya, shekubona a banchu bakwe ba mandui Simone ne Anduru naba teya o tunyandi. ¹⁷ Aku bakuwa Jeso ye,"mukezye kunu mundihumpe, mi nandila mitenda abanduyi ba bantu." ¹⁸ haho bulyo boku muhumpa kureka tunyandi twabo. ¹⁹ Aho shayenda Jeso okure kanini, shekubona Joani ne Jakobo a bana ba Zebediya, naba kere mubwato kuku suma o tunyandi twabo. ²⁰ Aku bakuwa boku reka shwabo Zebediya na batendi boku kumbila, abo boku muhumpa. ²¹ Aho sheba kezya mwa kapenauma rwe Nsabata, Jeso akuyenda kwi sinagogi noka zyiya. ²² Niba komokwa oku zyiya kwakwe, kakuli kabazyiya mbwe muntu akwesi a manta manene kali mbwe bañoli. ²³ Haho bulyo o mukwame wo ruho rubbi kakere mukati mwi sinagoge aku lila. ²⁴ nataye, ''ewe Jeso wa Nazareta, chinji tuwola kutenda newe? kukutuyaya niwa kezya? ndikuzyi me. Oli mwana wozyo achenete Nyambe. ²⁵ Jeso aku ambila ruho rubbi rwa madimona ye, '' tontole zwe kwakwe" ²⁶ Haho bulyo ruho rubbi lokuzwa kwakwe roku mugwisikiza hanshi naya bulila kezywi enene hawa. ²⁷ Bantu bonshe kabakere mo boku komokwa, bokuli buzabuza, "chinji chi? kuzyiya okuya ka manta hawa? Awola nanga ruho rubbi rumu shuwa shinga sha rutaa!" ²⁸ Mi embunzi yakwe haho bulyo yoku zyura konshe mumukuro wa Galireya. ²⁹ Mi aho shebazwa mwi sinagoge, bokuyenda kakabila munjuwo ya Simone ne Anduru nabaya buyenda ne Jakobo ne Joani. ³⁰ Mwi nako yiyo ba mukwekazwe wa Simone kabarwara nabarere kokuhisa mubili, boku sumwina Jeso zakwe. ³¹ Cware Jeso akezya, noku mukwata kwi anja, kumu zyimika; kuhisa mubili wakwe koku mana, akutatika kuba tahwila. ³² Mantengu, ezyuba shelya mini boku muretera bonshe barwara nabo bena o ruho rubbi. ³³ Bonshe bo munzi boku shanganina hachizyi cho munzi. ³⁴ Bonshe abo kabarwara aku bahoza bashi zirwaro zingi zingi noku zwisa o ruho rwa madimona kubantu, mi kali na zuminina madimona ye a ambe kakuli kazyibahere kwawo. ³⁵ Nabuka masikusiku muruura, nakushi siha; nakaya muchibaka chi tontwere, aka lapera. ³⁶ Simone nabo kabakere neye nakaya kuku mushakashaka. ³⁷ Aho sheba kamuwana, boku musumwina," ye bantu bonshe ndiwe bakwesi bashaka." ³⁸ Aku basumwina ye, "tuyende kumunya, ku minzi imunya izimbulukite, ndika kutaze ko. Shila ndazwi nokezya kunu. ³⁹ Akuzwa naya buyenda mu minzi ya Galireya, muma sinagoge nakaya bukutaza noku zwisa madimona. ⁴⁰ Shi mbingwa akukezya kwakwe. kumu kumbila; noku tongama aku musumwina, " heba oshaka, owola kundi chenesa." ⁴¹ Akufwa enkumbu, mi Jeso aku wolola e anja lyakwe noku mukwata, kumutaa, "ndishaka. O chene." ⁴² Haho bulyo embingwa yoku muzwa mi na cheneswa. ⁴³ Jeso aku musuwina koku gora hawa noku mutandira kungi. ⁴⁴ Aku amba kwakwe ye, "kwaazya echo o ambe ku muntu, yende, kalisunde ku Mupurisita, ewe kahe zichenesa omo nami sumwina Mushe, ye naku zyibahare kwabo." ⁴⁵ Kono eye aho shazwa aku tatika kusumwina bantu bonshe ezywi lya Jeso mi lyoku retera Jeso kusha kabira nenja mu munzi onshe bulyo. Aku kara yenke mu ntontwere mi a bantu bokezya kwakwe bazwa kungi.