¹ Nani Yesu, na iwa kullo ghe nin Uruhu Ulau, akpilla unuzu kurawan Yahudiya, Uruhu nya ninghe udu nanya kusho ² nanya nayiri akut anas shetan. Wa di dumunghe kikane, nanya na leli ayire, na awa lii imon ba, udu nimalin nkoni kubi alanza kukpon. ³ Shetan ghe woroghe, "Andi fe gono Kutelle ari taah atala ale aso uborodi." ⁴ Yesu kauwa ghe ina nyertin, "Na unit ba so ninlai bara uborodi cas ba." ⁵ Nin nani shetan dofino nunghe udu kiti kizalan, adi durso ghe vat kipin tigo nanya inye na nin kubi ba. ⁶ Shetan ghe woro ghe, "Meng ba nifi likara asu tigo nanya kipin tigone nin ngongon vat, meng wan su nsu nani bara ina nii nsu tigowe kitene, tutun nwansa nnah ko ghaku ulenge na ndinin nsuwe. ⁷ Bara nani asa uba tumunu nbun nighe unii ngongon, vat nilele ba so infe." ⁸ Bara nani Yesu kauwa a wono ghe, "Udi nanya ninyerte uba tumuzunu Cikilari Kutelle fe amere cas uba nighe ngongon." ⁹ Udu nbune shetan dofino nin Yesu udu Urushelima adi cio ghe kiiti kizalang kuttyi nliran a woro ghe, "Andi fe gono Kutelle ari nyinna kikane. ¹⁰ Bara inyerte na bellin abati nono kadura mye iminfi, ikese fi. ¹¹ Inung ba ghantinfi nin nacara mine, bara uwa tiro kitene litala." ¹² Yesu kauwa a woroghe. "Ina bellin na uwa dumun Cikilari Kutelle fe ba. ¹³ Kubi na shetan nmala udumuzunu Yesu ku, a nya a sunghe udu nkon kubi. ¹⁴ Nani Yesu kpilla udu Ugalili nin likara Uruhu, uliru kitene mye malla kiti vat nkilinu ligan nmyino. ¹⁵ A dursuzo nani nanya kutyi nliran ko gha wa sughe liru. ¹⁶ Nlon liri adah Unazaret, kagbir kanga na ana kunjoku, nafo ile imon na amene nsuzuwe, a pira kutyi nliran liri nasabar, a fita ayisa a karanta inyerte. ¹⁷ Kufah nnan nliru nin nuu |Kutelle Ishaya ri iwa nighe a puno kufe, asa kiti kaa na inyerte ule duku, ¹⁸ "Uruhu Kutelle di nin mye, Bara unashipai nbellu uliru ucine kiti nakimon. Ana tuuyi nbellin ibunku alenge na idi licin, nin npunu niyisi nale na idi aduu, ¹⁹ Nin nbellu likus nse nyinnu Ncikilari." ²⁰ Na atursu kuffe, akpilla mun ana unan kutuwa kutyi nlirane, atina aso, iyizi na nite vat nanya kutyi nliran kpilla kitimye. ²¹ A cizina uliru nanghinu, "Kitimone nkullo nanya nlanzu mine." ²² Ko gha wanso iyizi inba nanya nimon vat na awa bellin nanuu itunna ikiffo tinu, bara tigbulang timang na ti di nnucu nnu mye. I wa din du "Kaane gonon Yusufu ari, sa na nani ba?" ²³ Yesu woro nani, "Kiden nari iba belle to tinan kugoldo, kabere shinno nin litife, vat nile imon na tina lanza au una su Ukafarnahum su inin kikane kagbirfe." ²⁴ Ame tutun woro, "Kidegenari ndi nbellu munu, na iwasa iyina nin nan nliru nin nnu Kutelle kipin mye ba. ²⁵ Kidegen meng di nbellu munu, awani alenge na ales mine wa kuzu wa diku gbardang kubon Iiya, kubi na kitene kani wa tursu, sa uwuru udu akus atat nin tipwui kutocin kubi na kukpon wandi vat kipine. ²⁶ Bara nani na iwa tuu Iliya ku kiti nmong nanya mine ba, bara cas udu kiti nmong uwani na ules mye na kuu, kupo kipin Sidon. ²⁷ Tutun akuturu wa duku gbardang kubin Alisha unan nliru nin nuu Kutelle, bara nani na iwa shinn nin nmong ba se Naaman kunan Suriya." ²⁸ Vat nanite nanya kutyi nliran lanza ileli imone ayi mine nana. ²⁹ Inung fita inutunghe nanya kagbire nin likara, inya ninghe udu kitene likup longo na iwa ke kagbir mine ku, bara itununghe udak kutyin. ³⁰ Ame tunna anya dert kiyitik mine libau mye. ³¹ A tolo udu Ukafarnahum kagbir nanya ngalili, namon asabar awandi ndursuzu nanit nanya kutyin nliran. ³² Inung wa kiffo tinu nin ndursuzu mye, bara awa liru nin likarra. ³³ Nene nanya kutyin nliran umong wa duku ulenge na awa dinin Nruhu nagbergenu, asu kuculu komg, ³⁴ Iyaghari arike basu ninfi Yesu kunan Nazarat? Udah kikane uda molu nari? Meng yiru sa fe ghari, fere Ulau un Kutelle!" ³⁵ Yesu kpada agbergenu a woro, "Taan tik inuzu nanya mine!" Kubi na agbergenu liinghe kutyen kiyitik mine, anuzu nanya mye sa uworu ataghe ukul. ³⁶ Vat nanite kiffo tinu, itunna nliru nanya nati mine, i woro, "Imusin ntime tigbulan ghari tine? A kpada agbergenu ananzang nin likara inanai inuzu wa?" ³⁷ Uliru we kitene mye tunna umala kiti nanyan nkilinu kipine. ³⁸ Na Yesu nsuna kutyin nlira, apira kilari Simon, nene unan nwani simo ne awadi nniu nin nkonu, inung foghe acara nmemuku mye. ³⁹ Bara nani a fita ayisina kitime akpada ukone, atinna ashino, deddei atina a fita acizina asu nani katuwa. ⁴⁰ Kubi ndiu nwui, anite da nin na nan tikonu gbardang kitin Yesu, Ame tarda nani acara itino itinna ishino. ⁴¹ Agbergenu nuzu kiti nani gbardang, nin kuculu i woro, "Fe gono Kutelle Yesu kpada agbergenu a wantina nani uliru. Bara iwa yinin au ame Kristi ari. ⁴² Nin nshantu kiti ada, anya udu kiti kah na unit duku ba, ligozi nanit wadi npiziru ghe ida kiti kah na aduku, isu inda na iba wantinghe asun nani. ⁴³ Baara nani, aworo nani, "Usoyi gbasari tutun nbellin ulinu ucine kitene kipin tigo Kutelle nanya nigbir gbardang, bara nanere iwa tuuyi kikane." ⁴⁴ Nin nani atina aleo ubun nbellu nliru nlai nanya natyi nlira, nin vatt ligan Yahudiya.