¹ Lirilin lizunu nayiri kuzor nin kwui dinding, ida kiti kissekke, ida nin nuffe na ishirya. ² Ise iturno litala ntursu kissekke. ³ I pira nan nya, ama na iyene kidowo Ncikilari Yesu ba. ⁴ Ita buu nan nya nkpilizu mine kitene ni leli imone, I tunna, anit naba yissina kupo mine nin nimon ibo in baltu. ⁵ Na awane tiu nkifo nani I tunnu ati mine kutyin, I woro na wane, "Iyiziari idin piziru nnan lai nan nya na nan kue? ⁶ Na adi kikane ba, ama a fila! Lizinon ulirue na awa belu minu adutun Galili, ⁷ asa a woro Gono nnit uma nakpu ghe nacara na nan nalapi gbas inan kotunghe kucar lirin lin tatte a fita tutung." ⁸ Awane lizino iliru me, ⁹ ikpilla unuzu kissekke I belle ngissin kuzakure ubeleng ni leli imone vat umunu ngissin nanite. ¹⁰ Maryamu Magdaliya, Yuwana, nin Maryamu unan Yakubu, a ngissin na wane na iwa di ligowe di belin nono katwawe ile imone. ¹¹ Ka kadura so nono katwa we nafo uliru uhem, na iyinna nin liru na wane ba. ¹² Vat nani Bitrus fita, nin cum a do kiti kissekke, a tumuno adin yenju nan nye, ayene kumalti kubowe non likot. Bitrus nya ado ngame, adin kpilizu kitene nimon ile na ise. ¹³ Anit naba nan nya mine wa din cin libo ucin du kagbiri Imwasu. Kanga na npite wa durun timel akut kutocin unuzun Urshalima. ¹⁴ I wa din belu nbeleng nimon ile na ina se. ¹⁵ I wa din lirue icin cine a iyita ntiru nati mine ligowe Yesu da duru nani a tunna ncine nanghinu. ¹⁶ Amma iyizi mine wa turdun na iyininghe ba. ¹⁷ Yesu woro nani, "Iyaghari idin belue nabe icin cina?" Iyissina kitene nin tecu timuro. ¹⁸ Unit urum mine, unan lissan, Kilyobas, kawa ghe, "Fere cas in Urshalima ulenge na nyiru imon ilenge na ina se nayiri alele ba?" ¹⁹ Yesu woro nani, "Iyeme imon?" Ikawa ghe, "Imon nbeleng Yesu Nnazareth, na awa di unan liru nin nuu Kutelle, awa di nin likara katwa a uliru nbun Kutelle a anit. ²⁰ Na udya na prieste nin na go na iwa nakpa ghe aso nca nkul I kotunghe kuca aku. ²¹ Ti wa cisso ayi nworu amere ma tucu anan Israila. Nanere, kinal ni lele vat, kitimone lin tat na ile imone na se. ²² Nani tutung, among awani nan nya bite nna nari tissina, ini do kissekke nin kwui dinding. ²³ Na iyene kidowo me ba, inani kpilla, ina ni nworo inin ta amoron wui nono kadura Kutelle nworo nani adi nin lai. ²⁴ Among anit na idi ligowe nan ghiruk ndo kiti kissekke, ina nin se kinin nafo ubellu na wane. Amma na iyene ghe ba." ²⁵ Yesu woro nani, "Anung na nilime ni lalang idi shankalong in yinnu nin vat nimon unan liru nin nuu Kutelle na bellin! ²⁶ Udi gbas nworu Kristi nco nan nya nile imone, a piru nan nyan ngongong me?" ²⁷ Ucizunu kitin Musa udu anan liru nin nuu Kutelle vat, Yesu wa belin nani imon ile na idi litine nan nya nliru ntucue. ²⁸ Na ida susut nin kagbire, na iwa cinu ucin due, Yesu ta nofo ama katu ulsun. ²⁹ I masa ghe nworu, "Aso nanghinu, bara kuleleng wadi ku mal dak, kiti cizna usirui." Yesu pira a so nan ghinu. ³⁰ Iwa se nani, na awa so nanghinu ima li imonli, ayauna ufungale, ata nkoli ku, a pucco unin, a na nani unin. ³¹ Iyizi mine tunna ipuno, inin yininghe, atunna a wulu niyizi mine. ³² Itunna nbelu nati mine, "Na nibinai bite npya nan nya bite ba, kube na tini cina ninghe libowe, na ani bele nari uliru ntueue?" ³³ Iwa tunun ifita nan nya kube, I kpilla udu Urshalima. Idi se kuzakure nzuro ligowe, nan na lenge na Iwa di nanghinu, ³⁴ I woro, "Kidigenere, Cikilare na fita, amini na durso litina kitin Simon." ³⁵ Inung tunna I belle imon ile na ise libowe, nin nimusun dursue na ani pucco nani ufungule. ³⁶ Na iwadi nbelu nileli imone, Yesu da ada yissina kyitik mine, a woro nani, "Lissosin limang sa nanghinu." ³⁷ Iwa ketize fiu kifo nani, iyenje nafo inung yene mmoli. ³⁸ Yesu woro nani, "Iyaghari nta nibinai mine nfita? Iyaghari nta matiru tiru din fitiyu nibinai mine? ³⁹ Yeneng acara nighe nin nabune, mere nin liti nighe. Dudoi uyene. Bara na mmoli di nin kidowo nin naku ba, nafo na iyene men dimun." ⁴⁰ Na awa belin nani, a durso nani acara me nin nabunue. ⁴¹ A I dutu nan nyan salin yinnu a liburi libo, a ukpiliza, Yesu woro nani, "I di nin nimonmong nlia?" ⁴² Inaghe kugir fibo nwui. ⁴³ Yesu sere fining, a leo finin nbun mine. ⁴⁴ A woro nani, "Kube na nwa di nanghinu, nwa woro minu nenge vat nimon ile na ina nyertin liti nighe nan nya ndukan Musa nin na nan liru nin nuu Kutelle a Uzabura vat ma kulu gbas." ⁴⁵ A tunna apuno nibinai mine, inan yinno ulirun ntucue. ⁴⁶ A woro nani, "Tutung ina nyertin nworo Kriste ba niu, anin fita tutung nan nyan ku lirin lin tat. ⁴⁷ Uwazi nsunu nalapi nin shawu nin kulapi isu unin nan nya ligang in yie vat, icizin in Urshalima. ⁴⁸ Anung iyizi nbari ni lenge imone. ⁴⁹ Yeneng, mma tu nin ciu nnuu ncifnighe nati mine. Amma cican nan nya kipine, sei ikulo minu nin likara unuzu kitine kani." ⁵⁰ Yesu tunna na nuzu nan ghinu udu susut nin Baithanya. A ghantina acara me, ata nani nkoli. ⁵¹ Uwa se nani, kube na awa di nan nya nti nani nkolie, asuna nani iyira ghe ughanu udu kitene Kutella. ⁵² Isu ghe usajada, inin kpilla udu Urshalima nin nabari abo kang. ⁵³ Iwa so nan nya kutyi nlira ko lome liyiri, idin tizzu Kutelle nkoli.