¹ I wa diku nlon liri, na YEsu wadin dursuzu na nite nanya kutii nlira nin belu nani utiru Kutelle, adidya kutii nlire nang nanan niyerte daa kiti me nan na kukune ntardu nacara alau. ² I benle ulire, I woroghe, "Benle nari nin liyapin licarari udin su ka katwa we? Sa ghari ule na anafi lo likare?" ³ A kpana a woro nani, "Meng wang ba tirin minu imemong. ⁴ Belenni ubelen inshintun Yohana, Uwa nuzu kiti Kutelle aria. Sa kiti na nit?" ⁵ I kpilza nati mene, I benle, "Ti wa woro, 'kitene kani,' a ba benlu, 'too iyarin taa na iyina yina nin ghe ba?' ⁶ Tutung ti ma belin 'unuzu na nitari,' anite vat ma fil su nari nin natala bara na iyire Yohana wadi unam liru nin nuu Kutelleari." ⁷ I kawa au na iyiru kite na a nuzuku ba. ⁸ Yesu woro nani, "Na meng ma belin minu nin liyapin likarari in din su ale adodwe. ⁹ A taa anite ntun tiwankare, "Umung wa bilisu kunem, anaa among ukewe, anya udu nkankipin a di dandaun ku. ¹⁰ Na kubi da atoo kucin me udu kitin nanan kye kunene, au inighe kumat kuce, bara nani anan kye kunene fooghe, inin kooghe nin na cara akone. ¹¹ A kuru a too nkun kucin me ikuru I fooghe, I naghe incin, inin kooghe nin na cara akone. ¹² A kuru a too unan tat ikuru I lanzaghe ukul, inin fillinghe indas. ¹³ Bara nani Cikilari kunene woro, 'I yanghari mba ti? Na ntoo gononsunighe. Mbuti ima yenu ngongonme.' ¹⁴ Bara nani naiyeneghe ncinu, I munu ati I woro, 'Ulelere unan nlin gadu kunen kune, dan ti molughe, ugadwe nan soo unbit.' ¹⁵ I fillinghe mamal kunene, inin mologhe. Iyari unan kunene ma tii nani? ¹⁶ Ama dak ada mulsu nani, anin ni amon kunene." Na I lanza, I woro, "Kutelle sauke." ¹⁷ Bara nani Yesu yene nani, anin woro, "Iyari ile I yerte din belu? 'Litala loo na anan kye kilare nari, linnere nda so lin tune kilare'? ¹⁸ Vat nle na a deu kitene litala lile ama putuzu agerager. Bara nani bat ne na litale ndeu liti me lima yarughe." ¹⁹ Bara nani anan niyerte nin na didya kutii nlire wa piziru I kifoghe nanya kuni kube, bara na I yino a wasu too tiwankare nati menere. Bara nani I wa lanza feu nanite. ²⁰ I yenjeghe mseen, I too anan gbizinu kipin ita nafo anit alau, inan se ufanu nliru me, bara inan kifoghe inakpa anan natet tigoo ngumna. ²¹ I tirighe, I benle, "Unan dursusu, ti yiru udin dursuzu ubele dert, na umon din rusuzu fiba, bara nani udin dursuzu kedegene udu libau Kutelle. ²² Udukari kiti bite ti ni Kaisar ku uganu bite sa babu?" ²³ Bara nani Yesu yinno kujinjin mene, a woro nani, ²⁴ "Dursuni fikubu, kuyeli nghari, nin lisa du kitene fin nin?" I woro "Un Kaisar." ²⁵ A woro nani, "Naan Kaisar ku imun ile na idi un Kaisar, nin Kutelle imun ile na idi in Kutelle." ²⁶ Anan miyerte nan nadidya kutii nlire na iwa yinin unari ni mon ile na awa belen nbun nanite ba. I lanza umamaki nkawu me na ibenle uliru ba. ²⁷ Na amon Asandukiyawa nda kiti me, ale na I wa woro na ufitun yii duku ba, ²⁸ I tiringhe, I benle, "Ku mallami, Musa wa yertin nari a woro, gwana nmung wa kuu nin ulani, na I mara ba, unite yira uwanin gwana me, a maraghe gono ku. ²⁹ Nwana wa duku imun kuzur, unan burne yira urani, a kuu na imaraba, ³⁰ unan mba me wang nanere. ³¹ Unan tate udu unan zurre nanere na imara ba, ³² na ikala ayeri uwane kuu wang. ³³ Lirin fitun yii ama yitu uwani ngha nany mene? Bara na ma suzu ilugma min wane?" ³⁴ Yesu woro nani, "Nono inyii ulele din suzu ilugma, I niza awani. ³⁵ Bara nani ale na idumna nani ise iduru useru nanan fitu unuzum kul inin piru ulai sa ligang na idin suzu ilugma sa i nakpa uwani ba. ³⁶ Na I ba kuru I kuu tutung ba, bara na isoo nafo nono kadura Kutelle, inun nso nono Kutelle. ³⁷ Bara nani iba feu abe, Musa wang I wa durughe, mbeleng kitene na a wadi kusho kikaa na awa yicila Ucef Kutellen Ibrahim, Kutellen Ishaku, nin Kutellen Yakub. ³⁸ Nene na ame Kutelle nanan nkulari ba ama kun nanan nlaiyari, bara na vat di nin nlai udu kiti me." ³⁹ Among anan niyerte kpana iworo "Ku mallami ukpana caut." ⁴⁰ Bara nani ikuru I tiringhe imemon turtung ba. ⁴¹ Yesu woro nani, "I yizieri I din belu au Kristi gono Daudari? ⁴² Bara na Dauda litime wa belen nanya niyert in Zabura, Ucife wa woro Ucif nighe, 'Soo incara ulime ning, ⁴³ sai dai nta anan narife kitin cisu na bunu fe.' ⁴⁴ Nanere Dauda yicila Kristiku 'Ucif' a suu usaun Dauda nene?" ⁴⁵ Natuf nanit vat a woro nono kadura me, ⁴⁶ "Sun insen nin nanang niyert, ale na idinin su I cinu nanya nalutuk ajajangaran, nin su nilip icine nanya tikasau, nin niti lisosin nididya nanya natii nlira, nin niti nididya niti tibuki. ⁴⁷ Ikuru idin nanzu ninari nawani ale na ales mene nakuzu, nin nlira mijakaka kirusuzo. Alele maseru ukul udindya."