¹ Anit gbardang wa mala unyertinu nadu adu na ana malu kulu nanya bit. ² Alenge na iwa di iyizin yenju ucizunun burne ida so acin ligbulang, ida so acin ligbulang, ida belle arike ku. ³ Nani, udu menku gigime wang nin feru nimoon dert oworu uburnu-nnan nyertine inin dert-udak kitin Theofilus unit ugigime. ⁴ Ndi nin su iyinin incasarak nimoon ile na ina masu minu. ⁵ Nanya nayirin Hiridus, ugon Yahudiya, umong unit wa duku ku priest lisa me Zakariya, unuzun likuran Abijah. Uwani me wa di unuzu anashonon Haruna, lisa me Alisabatu. ⁶ Vat mine iwa cinu dert mbun Kutelle, icing lau sa utanu vat nanya nadu na Kutelle wa di nin su we. ⁷ Na iwa di nin nonol ba, bara na Alisabatu wa di uwanin sali kumat, vat mun wa di imalu ti akune. ⁸ Lon liyiri Zakariya wa di kiti katwa me kan ti priest mbun Kutelle. ⁹ A priest nanya nadu ale na imenen sue ifere Zakariya ku a piro nanya kutiin nlira Kutelle a juju uhadaya. ¹⁰ Ligoo na nite vat wa sosin ndas iyitan nlira kube na iwa jujun hadaye. ¹¹ Gono kadura Kutelle tunna a nusno mbun me, a yisina likoot ncara ulime kupo napik njujuzun hadaya. ¹² Zakariya ta zabat kube na awa yeneghe; bara na fiu wa kifoghe kang. ¹³ Gono kadura Kutelle woroghe, "Na uwa lanza fiu ba, Zakariya, bara ina lanza nlira fe. Uwane fe, Alisabatu, ama maru fi gono, uma ni lisa me Yohanna. ¹⁴ Ima se mmang nin kibinai ki mang bara ame, anit gbardang ma lanzu mang nin maru me. ¹⁵ Ame ma yitu unit u dya kiti Kutelle. Na a ma sonu nmyen nanab sa ntoro ba, Ima kulu ngeh nin Ruhu Ulau a dutu nanya liburin nna me. ¹⁶ A ma ti non Israila grardang i kpilin udak kitin Cikilari Kutelle mine. ¹⁷ A ma katu mbun me nanyan ruhu nin likaran Iliya. A ma kpiliu nibinai na cif udu kitin nono, a ti anan dortun liru i cunu nanyan yiru nin libau licine. Ama su nani anan ta anit isoo kiti kirum nanya lisosin ncaa ndak Ncikilari." ¹⁸ Zakariya woron gono kadura kutelle, "Nmati iyiziari nyimin kubin dak ni le imone? Bara na meng kukune ari, uwani ning tutung mali ti kuwali." ¹⁹ Gono kadura Kutelle kpana a woro, "Meere Jibrailu, in yisin mbun Kutelle. I wa tuyi nda bellin fi nda nifi uliru umang ulele. ²⁰ Yene, uma ti uturo na u ma liru ba se kubi ko na uliru ulele ma kulu, bara unari uyinnu nin tigbulang too ne, ton go na ti ma kulu nanya kubi ku dert." ²¹ Nanya nani, anite wa din ncaan Zakariya iyitan Kpilizue iyang ari ta a mini dandauna tituut nanya kutiin nlire nani. ²² Kube na awa nuzu udas, na ayinno uliru nan ngyinu ba, itunna yinno a di yene amoro Kutelle nanya kutiin nlire. A bela nani nin nacara, nna yinno uliru nin nuu ba. ²³ Na ayiri katwa me nkulo, a yanya udu kilari. ²⁴ Na ayirin nda, uwani me Alisabatu ta liburi. A nyeshe litime tipui titaun, adin su, ²⁵ "Ile imone Kutelle ari suui mun. Adin yenjii, aba kalui imon ncing nanya na nit." ²⁶ Nene nanya mpuin toocin nin ti liburin Alisabatu, itoo gono kadura Kutelle Jibrailu udu nanya nkang kagbirin Galili, lisa kanin Nazarat, ²⁷ kitin nkong kubura na awa su likawali nin mong unit lisa me Yusufu. A wa di likura nan Dauda, lisa kubure wa di Maryamu. ²⁸ Gono kaddura Kutelle da kiti me, a woro, "Nliso fi, udi gongong kang! Kutelle di ligowe ninfi!" ²⁹ A tunna ata kpak nin tigbulang to ne, anin kpiliza sa imus ni yapin ilipp ari ine di. ³⁰ Gono kadure woroghe, "Na uwa lanza fiu ba, Maryamu, fee nse ngongong kiti Kutelle. ³¹ See, u ma ti liburi u maru gono, u ma ninghe lisa Yesu. ³² A ma yitu udya, i ma yicu lisa me Gonon Ngo Udya kitene kani. Kutelle Ucif ma nighe kutett tigo ncif me, Dauda. ³³ A ma su tigo kitene nakuran Yakubu udu sa ligang, na kutii tigo me ma yitu nin nimalin ba." ³⁴ Maryamu woron gono kadure, "Iyiziari ile imone ma ti, meng tutung du kabura?" ³⁵ Gono kadura woro nghe, "Uruhu Ulau ma dak Kiti fe nin likara Ndya kitene kani ma kirinfi. Bara nani, unit ulau une na uma maru i ma yicu lisa me Gono Kutelle. ³⁷ Na imon katin likara Kutelle ba." ³⁸ Maryamu woro, "Usoo nani, meng kucin Ncikilari ari." Na ile imone so dert nafo na ubelle. ³⁹ Nanya nayiri ane Maryamu tunna a fita dedeiughanu udu kipin, udu kang kagbiri nayan Yahudiya. ⁴⁰ A pira nanya kilarin Zakariya a liso Alisabatu ku. ⁴¹ Kube na Alisabatu wa lanza ilippin Maryamu, gono nanya liburi me tunna ki metiline, Alisabatu tunna a kulo nin Ruhu Ulau. ⁴² A tunna a lirina a ghantina liwui kang a woro, "Fe unan mmari ari nanya nawani, fisudu nanya liburi fe wang di nin mmari. ⁴³ Iyizi ari nta unan Cikilari ning na dak kiti ning? ⁴⁴ Kubi kongo na liwui nilip fe wa diu natuf ning, gono nanya liburi ning tunna a zulluno bara ayi aboo. ⁴⁵ Ame ulenge na ayinna a di nin mmari, bara na uliru ulenge na ina belin litime unuzu kitin Cikilare ma kuluu." ⁴⁶ Maryamu woro, "Ulai ning di liru Kutelle, ⁴⁷ Uruhu ning di nayi abo nin Kutelle unan tucu ning. ⁴⁸ Bara na ana ghantin kuchin me kikimon. Nin nene udu ubun ji ma yicui unan mmari. ⁴⁹ Bara na Ame Udya na su imoon ididya bara meng, tutung lisa me di lau. ⁵⁰ Nkune-kune me di kitene kuji udu kuji na nit alenge na idin lanzu fiu me. ⁵¹ Ana su imon likara nin cara me; ana malu kiti nin na lenge na idin ghantizunu ati mine. ⁵² Ana toltizin ago ketene natet tigo mine, anin ghantina kimon. ⁵³ Ana niza anan kukpong imonli icine, anin kko anan nimon naacara sa imong nacara mine. ⁵⁴ Ana bun kucin me Israila, anan lizino nin ⁵⁵ Ibrahim nin likura me sa ligang, nafo na awa ti likawali kiti nan kaa bit a masu." ⁵⁶ Maremu wa so nin Alisabatu tipui titat, anan kpilla udu kilari me. ⁵⁷ Na kubin Alisabatu wa duru kongo na ama maru gono me a tunna a mara gono. ⁵⁸ A doon lisosinn me nan likura me lanza ubeleng inkune-kune mongo na Kutelle su Maremu ku, inung wang su ayi abo ligowe ninghe. ⁵⁹ Ituna, na ayiri linuanu me in kulo ayiri kulir, idaa nda kalu kucuru ngone, iwa din nworu inighe lisan Zakariya, nafo lisan incifme. ⁶⁰ Unan gone kpana a woro, "Babu, ima yicu lisame Yohanna ari." ⁶¹ Anite woroghe, "Na umong duku nanya likura mine na idin yicughe nin lisa lole ba." ⁶² Itunna i kpiliya ucifin ngone ulire nin nacara inan yinno lisa longo na ibaa yicu gone mun. ⁶³ A joorino nin cara inighe imon nanyerte , a tuna a nyertine, "Lisa me Yohanna ari." Vat mine umamaki kifo ani. ⁶⁴ Na nin nanzu kubi ba unuume tunna upuuno kidowo lileme buntu, a tuma nliru, nin su liru Kutelle. ⁶⁵ Fiu tunna fi kifo alenge vat na iwa di ligowe kite itunnan belu nimon ilenge na isu vat nanya kipin natala ucin du Uyahidiya. ⁶⁶ Vat na lenge na iwa lanza ubeleng nimon ilele itunan kpilizue nanya nibinai mine iworo nenghe, "Ani nene, gono kane ma yitu Iyiziari?" Bara na iwa yinin ucaran Ncikilari di ligowe ninghe. ⁶⁷ Ucif me Zakariya wa kulun nin Ruhu Ulau, a tunan belu nimon ilenge na ima su mbun, ⁶⁸ "Liru udu kitin Cikilari, Kutellen Israila, bara na ana dak kiti bit a puuno lbaun nutunu nanitme licin. ⁶⁹ Ana ni nari unan likaran tucu nanya likura kucinme Dauda, ⁷⁰ Nafo na Kutelle wa belin tinuu nnono ni lau kadura me uworu. ⁷¹ A na ti nari likawalin tucu nacara na nan nivira bit, nin nacara na lenge na inari arik. ⁷² Ana su nani anan durso nkune-kune udu nan kaa bite, anan nin likawale me, ⁷³ loli likawale isilinari na awa belin udu kitin kaa bit Ibrahim. ⁷⁴ A wa su isilin anan nutun nari nanya nacara na nan nikira bit anan ta nari ti sughe katwa sa fiu, ⁷⁵ nanyan nlau ni su nimon icine mbun me udu ligan nayiri bit. ⁷⁶ A fee, gonon ning, ima yicufi unan liru nin nuu Kutelle Ugo Udya, bara na uma diu mbun Incikilari ukelee anit bara udak me, ⁷⁷ unan buuno anit iyinin use ntucu nshawa nin nalapi mine. ⁷⁸ Kutelle bite ma shawa nin nalapi bite bara nkune-nkune migbardan me, kitenen mon kune-kune, unan tucu ulenge na adi nafo uzun nwui, ma dak unuzu kitene kani a da bun mari. ⁷⁹ A ma ni nkanang kiti nalenge na isosin nanyan nsirti nin kuyelin nkul. Ama dortu nin nabunu bite nanya libau lisosin limanng." ⁸⁰ Gone tunna ki kuno, ada nin likara kidowo nin ruhu. A wa di so nanya kusho ku kau udu kobi kongo na a wa cizin upicu nanya na nitin Isaraila.