¹ Agrippa woro in Bulu ku, "Uwasa usu uliru nin litife" Bulus nakpa ucara me asu uliru nkussu litime. ² "In yira liti ning unan ayi abo, ugo Agrippa, nsu uliru nighe nbunfe kimone nbelleng nimon ile ena a Yhudawa na belin liti ning; ³ bara fe unan yiraari kitine vat ntanda na Yahudawa nin tiru mine. Ndin tiru fi nworo ulanzai nin nayi ashau. ⁴ Kidegere, a Yahudawa vat yiru imusun lissosin longo na nna su a in yita kwanyana nmin nighe nin Ushalima. ⁵ Innung yiru ucizunighe tutung ucaun inin yinin nworu meng ku farisawari, alenge na idin kpilizu imon hem ba. ⁶ Nene in yissing kikane bara ndin piziru nciu nliru ulenge na kutelle wa ni acifi bite. ⁷ Bara nanere akura nnonon Israila na su Kutelle katwa kitik nin lirin nan nya kidegen, arik ani nceo ayi ti duru kite bara ule uciu nayere a Yahudawa nvuroyi, Ugo! ⁸ Iyaghari nta idin yenju uma konu Kutelle fya anan kul? ⁹ Nkon kubi asa nkpilza nsu imon gambalang gbardang kitene lissan Yesu Nnazareth. ¹⁰ Nna su in Urshalima; nwa yaccu anan katwa kacine kilari licin gbardang, nwa seru likara nsu nani kiti ndya na priest iwa molusu nani, asa mere yinna isu nani. ¹¹ Ina tizu nani ineo kang nan nya nilari nlira mine nkuru ntiza nani izoguzu Kutelle. Nwa yita nin tinana nayi nin ghinu kang ndortu nani uduzu mmin das. ¹² Na nwa din su nani, Nwa do Udamaska nin yinnu a likara ngo na priest; ¹³ libowe ucin due, nin wui gberere, Ugo, in yene imon nkanan unuzu kitene Kutelle mida mala kiti bite vat umunu alenge na iwa din cin ligowe nan mi. ¹⁴ na vat bite ndeo kutyen, nlanza liwui nin ti Ibrananci din liru nin mi, 'Shawulu, Shawulu, iyaghari nta udin tizui nneo? Uwa konui men nari.' ¹⁵ Ntunna nworo, fe ghari, Cikilaria? Cikilare kawa, ' men Yesu ule na udin funu ghe. ¹⁶ Nene fita uyissin nin nabunu fe; bara ile imonere ndurso liti nighe kitife, nfere fi uso kucin a unan wazi nbell nimon ile na uyiru inin nin nen nin nimon ile na Mma dursu fi iwa dandaun; ¹⁷ mma tucu fi na cara nanite nin na wurme alenge na mma tuu fi ucindu kitimine; ¹⁸ udi pun iyizi mine uti nani ikpilin isun adu nsirti mine udak nan nya nkanang, nan nya likara nshaitan udak likara Kutelle, inan se ukussu nalapi kiti Kutelle, nin gadu ulenge na ina ni ceo nani nin liti nighe nan nya yinnu sa uyenu.' ¹⁹ Bara nani, Ugo Agrippa, Na nna dira uyinnu nin anabci Kutelle ba; ²⁰ amma, kiti na lenge na idin Damaska tukuna, nin na nan Urshalima, nin na lenge vat na idi nmin in Yhudiya, a ining awurmi, ndi wazi i sun alapi mine ikpilin kiti Kutelle, isu imon ile na ima dak nin sunu nalapi. ²¹ Bara ile imonere a Yahudawa na kifo nannya kilari nlira inani pizira imolui. ²² Kutelle koni na buni udak nene, in yissin nbelin nbun na talaka nin nanit adidya na umong ubeleng ugan ba se ulenge na anan liru nin nuu Kutelle nin Musa na belin uma se; ²³ nworu Kristi ma niu gbas, tutng ama yitu unan burnun fitu nan nya nissek anin kuru a durso nkanang kiti na Yahudawa nin na wurmi. ²⁴ Na Bulus nmala ukusu litime, Fastos woro nin liwui gberere, " Bulus uta ilaza; uyiru udya fe nta fi ilaza." ²⁵ Amma Bulus woro ghe, "Na ndi nin nilaza ba Fastos unit udya; amma nin nayi akone ndin su liru kidegen nin toltenu liti. ²⁶ Bara Ugo yiru ubelleng nilenge imone, bara nani, ndi woas nsu nin ghe, bara meng yiru na imonmong nyeshin kiti me ba, bara na ina su ilenge imone likot ba. ²⁷ Uyinna nin na annabawe, Ugo Agrippa? Ina yiru uyinna nin ghinu." ²⁸ Agrippa woro Bulus ku " nan nya kabiri bar uma kpiliu nso unan dortu Kutelle?" ²⁹ Bulus woro, "Ndi inlira kiti kutelle, sa nin kabiri bat sa nin kubiri gbardang, na fe usanfi ba, amma umunu alenge na idin lanzui kiti mone, iso nafo mewe, amma na nin ninyang kilari licin ba. ³⁰ Ugowe tunna a fita ayissina, a udya mine nin Barniki wang fita umuni alenge na iwa sossin ligowe nan ghinu; ³¹ na isuna kudarua, itunna nliru nin nanit mine idin su, "Na unit ulele nati nkon kulapi kongo na ku batina ukul so utecu ba." ³² Agrippa woro Festus ku, "Iwa sunu unit ulele nda fo na afo acara kitin Kaisar ba."