¹ Na ayiri atat in kata, Ananiyas udya na Priest, among akune nin, nin mong una yirun liru lissame Teritullus, nya udu kite. Ale anite da nin vurun liru litin Bulus. ² Na Bulus in yissina in bun gumne, Teritullus tunna aghanan vurzughe in liru aworo ugumne, "Bara fe tidi nin lissosin limang; tutung ukpiluzung in bunfe in danin nimon icene in nmyen bit; ³ nani nin godo udya tikpana vat nin nimon ilenge na usu, Felix uniti udindya. ⁴ Bara na ayedi in yissafi kang ba, indin potufi acara, lanzai baat nin kunene. ⁵ Bara tikpaghe nin kulapin tizu na Yahudawa vat nanya nyii inari uduka. Amere udya nanan dortu kunan Nazeret. ⁶ Amani mala uti kutii inlira kudyawe facak; unare tinani kpaghe. ⁷ Amma ugo likume Lisiyas wa dak, a da kpalkinghe nin likara na cara bite. ⁸ Asa utiro Bulusku kitenen tipinpin tone, fewang manin yinnu imon irika na tidin bellu litime." ⁹ A Yahudawe ligowe vat joro Bulus iworo, uliru ulele kidegenghari. ¹⁰ Ama na ugumne woro Bulus ku alirin, Bulus kawa, "Inyinno nwo fedi unan mawucuwucu nmyen mone inworsu, bara nani nin kibinayi kibo inma bell uliru litining. ¹¹ Use uyinnu in woro na isa kata ayiri likure nin naba ba nin duning u'Urushalima indi su usujada; ¹² na inung wase mengku nanya kutii in lira kudywe, na meng wasu mayardang nin mong mine ba, tutung na meng na tulu ligozin nanit ba, na inansu nani kutii in lira kudywe ba, a na inna su nani nanya kagbri ba; ¹³ tutung na inung wasa durofi ulire na idin vuszi mung ba nene. ¹⁴ Ama meng yinna nbunfe nworu, kitene libauwe na inung din yiccu umon ubi, in loli libau lirumere ndin su Kutelle nacif ning katwa. Meng di lau nanya vat nimon ile na idin duka nin nana liru nin nuu Kutelle. ¹⁵ Meng dinin yinnu urumere kiti Kutelle, nafo na ale anite din caa ndakin fituzu nanan kul, nan vat nanit alau nin nanan dinong; ¹⁶ tutung nanya nile imon, ndi katwa nwo in yitta nin kibinayin sali nalapi nbun Kutelle nin nanit nanyan vat nimon. ¹⁷ Nene kimalin katu nakus gbardan inna dak nin bunnu udya a ufillu nikubu bara anit ning. ¹⁸ Na nwa din sunani, among a Yahudawa in Asiya wasei nanya lidun kusu litining nanya kutii inlire, na nwa di nin ligozin sa ufiu nayi ba. ¹⁹ Ale anite na idin bunfe, na ibellin imon irika na idumun kibinayi ninmi, adi idimun nimonimon. ²⁰ Sa na anit alele bellin utanu ule na inasei mun kubi ko nq nwq yissin kudaru na Yahudawe; ²¹ andi na macas ile imon irume na nwa ghatin liwui nbelle kube na nwa yissin nbun mine, 'Ubelen fitu nanan kularita udi mawucuwucu kitimone.'" ²² Iwa bellu Felix ku gegeme kitene libauwe, bara nani ata a Yahudawe so ncaa. Aworo, "Vat kubi ko na Lasiya udya nasoje da unuzun Urushalima imanin wusu uliru mine." ²³ Anin woro kusoje asu ucaa in Bulus, tutung na awayita gangang ba, yenje awa nazu adondon me nin bunghe sa uda lissughe. ²⁴ Na ayiri baat in kata, Felix kpila nin Durisilla uwani me, kunan Jewess, anin to iyiccila Bulus ku, anin lanza kitime ubelle yinnu sa uyenu kitene Kristi Yesu. ²⁵ Ama na Bulus lira ninghe kitene lissosin lilau, ukifu litin, nin dakin shara, fiu kpa Felix ku; anin kawa, "Can nene, asa nse kubi tutung inma yicculu fi." ²⁶ Kubi kurum kone, awadin su Bulus ma ninghe ikurfu, unare asa to idak ninghe anin lira ninghe. ²⁷ Ama na akusu aban kata, posiyus Fistus so ugumna kimal in Felix, Felix wadi ninsu ase useru kitin na Yahudawa, asuna Bulus ku alii ubun nanya tursu.