1 पौलुसा री तरफा ले जो यीसू मसीहा रा बंदी आ, होर भाई तीमुथियुसा री वखा ले आस्सा रा प्यारा दोस्त होर साउगी सेउआ करणे वाळा फिलेमोन l 2 होर आस्सा री बैहण अफ़िया, आस्सा साउगी स्पाही रा काम करणे वाळे अर्ख़िप्पुस होर तेस झुण्डा जो जेहड़ा मण्डली रे रूपा मन्झ तुस्से रे घरा कठा हुहां आ l 3 आस्सा रे पिता परमेसर होर प्रभु यीसू मसीह री तरफा ले दया होर सांति तुस्सा जो मिल्दी रैहे l 4 आपणी प्रार्थना मन्झ तुस्सा जो याद करी किन्हें हांऊ परमेसरा रा धन्याबाद करहा l 5 तेरे तेस प्यार होर विस्वासा री चर्चा सुणहां ऐं, जो सभ पवित्र लोका साउगी होर प्रभु यीसू पर ई l 6 मेरी अरज ये ई कि तुस्सा रे विस्वासा ले जम्मी री उदार सैहभागिता किन्हें लोका रा अगुवाई करे l जेस ले तिन्हा जो तिन्हा सभी खरी गल्ला री समझ हुई जाए जो मसीहा रे मकस्दा जो अगे बढ़ाणे मन्झ जेहड़ी आस्सा मन्झ हुएया करहा ई l 7 क्यूंकि हे भाई, मुंजो तेरे प्यारा ले बौहत खुसी होर तसल्ली मिली गई l इधी कठे, कि तेरे जरिये पवित्र लोका रे मन हरे भरे हुई गये l 8 एस वजहा ले हांऊ मसीह मन्झ इतनी हिम्मत मैहसूस करहा, कि जो गल ठीक ई, तेता रा हुकम हांऊ तुजो देई सकूं l 9 तेबे भी मुंजो बुढे पौलुसा जो, जो एबे मसीह यीसू रे कठे बंदी आ, ये होर भी खरा लग्या कि हांऊ प्यारा किन्हें अरज करूं l 10 हांऊ आपणे म्हठे उनेसिमुसा री स्पार्स करहा जो जेहला मन्झ मेरे ले जम्मेया तुध ले अरज करहा l 11 पैहले ता से तेरे कोई कामा रा नी था, पर एभे से तेरे कठे होर मेरे कठे बड़े कामा रा आ । 12 तेस जो मतलब जो मेरे दिला रा टुकड़ा आ, तेस जो हांऊ तेरे वाले वाप्स भेज्या करहा l 13 असली मन्झ हांऊ तेस जो आपणे नेडे रखणा चाहां था ताकि एस जेहला मन्झ से तेरी तरफा ले मेरी सेऊआ करे l 14 पर मैं तेरी मरजी बगैर कुछ करणा नी चाहेया ताकि तेरी ये किरपा दबाबा ले नी पर खुसी री वजहा ले हो l 15 क्यूंकि क्या जाणे से तेरे ले कुछ ध्याड़े इधी कठे तुध ले लग हुएया ताकि से हमेसा रे कठे तेरे वाले रही सके l 16 पर एभे से दासा आ साहीं नी आ, बल्कि दासा ले भी खरा आ, मतलब भाई साहीं रहे, जो मेरे कठे ता खास प्यारा आ, पर एभे सरीरा मन्झ होर ख़ास करी किन्हें प्रभु मन्झ तेरा भी प्यारा आ l 17 अगर तू मुंजो आपणा साथी समझ्हा ता तेस जोमेरे साहीं मनी ले l 18 होर अगर से तेरा कुछ नुकसान करी बैठिरा या से तेरा लेणदार हुई गईरा, ता से सभ कुछ मेरे नांऊआं पर लिखी दे l 19 हांऊ पौलुस आपणे ई हाथ ले एस गल्ला जो लिख्हा, कि मां तेसरा कर्जा आपु ऐ भरी देणा; होर ये बोलण री जरुरत नी हाई कि तू आपु मेरा जिन्दगी भरा रे कठे लेणदार आ l 20 हे भाई ये खुसी मुंजो प्रभु मन्झ तेरी तरफ़ा ले मिली जाए: मसीह मन्झ मेरी जिन्दगी जो ताजा करी दे l 21 हांऊ तेरी मानदारी पर तबार करी किन्हें, तुजो ये लिख्या करहा होर ये जाणहां , कि जो कुछ हांऊ बोल्हा, तुध तेता ले बढ़ी किन्हें करणा l 22 होर तेरे ले एक अरज करहा कि, मेरे कठे एक कमरा त्यार करी के रक्खेया, क्यूंकि मुंजो आस ई, कि तुस्सा री प्रार्थना रे जबाबा मन्झ हांऊ तुस्सा जो वाप्स मिली जाणा l 23 इपफ़्रास जेहड़ा मसीह यीसू मन्झ मेरे साउगी कैदी आ तुस्सा जो नमस्ते बोल्हा l 24 होर मरकुस, अरिस्तर्खुस, देमास होर लूका जो मेरे साउगी काम करहा ऐ इन्हा रा तुजो नमस्कार l 25 आस्सा रे प्रभु यीसू मसीहा री दया तुस्सा री आत्मा पर हुन्दी रहे l