¹ Ngieti dio banzila vo vena ye lusiamusu mu Klisto. Ngieti dio banzila vo vena ye ngolo zituknga mu zola kuani. Ngieti dio banzila vo vena kintuadi mu mpeve. Ngieti dio banzila diaka vo vena ye nkenda zavuvama ye kiadi. ² Nukitula kiese kiani kialunga mukala ye ngindu zimosi ye zola kumosi, mukala kintuadi mu mpeve, ye kala ye mbueno imosi. ³ Kanu sadilani konso ka diambu mu kiwimu ko evo mu kukimonikisa ko. Kansi tu, mu luyinunu, lumuena ankeke konso vo akunulutidi. ⁴ Kanu tombani mu yangidika ndandu za yeno kibeni ko kansi ye za ankaka mpe. ⁵ Nukala ye ngindu zimosi konso zakala mu Klisto Yisu. ⁶ Yani wakala mu lufuanikisu lua Nzambi, kansi kayindula kukidedikisa ye Nzambi bonso diambu di kafueti vakamana ko. ⁷ Kansi nkutu, yani osi wakikatila mawonsono. wakala fuani kia kisadi va ntete. Yani waki fuanikisa kua antu. ⁸ Wakikulula ye watumama nate ye mu lufua, lufua lua va kulunsi. ⁹ I diawu mpe Nzambi wanzangula mu lulendo ye wamvana nkumbu yoyo yiluti zinkumbu zazonsono. ¹⁰ Wavanga dio mpasi vo mu nkumbu ya Yisu, awonsono ena kumfukamena tuka muna mazulu, va ntoto ye mu nsi a ntoto. ¹¹ Ye ndinga zazonsono zina sasula vo Yisu Klisto i mfumu, muna nkembo wa Nzambi se. ¹² I diawu mpe nubakiazola, konso wuna tatamana, ka va ntadisi ame kaka ko kansi wawu nkutu lutila vo mono nkondolo, ntatamana mu sala nu diambu dia mpulusu eno mu wonga ye zakama. ¹³ Kadi i Nzambi wusalanga mu yeno mu sa vo nua zola ye nua vanga wonso wena luzolo luani lua mbote. ¹⁴ Nuvanga mamonsono mu kondua kua yawula kani nkutu vunguta. ¹⁵ Nuvanga wo mpasi vo nuakala akondua bila ye alunungu, ana a Nzambi akondua kieta. Nuvanga wo mpasi vo nua lezima wonso kia mu nza, va kati kua mbandu yavualangana ye yambi. ¹⁶ Nutoma simbinina mambu ma moyo mpasi vo yabaka lunungu vo ngina kisana mu lumbu kia Klisto, kadi mu diawu ngina zayila vo kia zawudi evo kia sedi mu mpamba ko. ¹⁷ Kansi kani nkutu vo yavewa wonso nkayilu ye mu salu kia minu kieno, ngiena wa yangalala ye wayangalal mu eno awonsono. ¹⁸ Ye mu mpila mosi, nuyangalala diaka ye mu yangalala va kimosi ye mono. ¹⁹ Kansi ngiena dio vuvu vo, mu mfumu Yisu, i kunufidisa Timoteo wawu, mpasi vo ya siamusua va ngina wa nsangu zeno. ²¹ Kiena ye muntu wankaka ko wu fuanane ye kadulu kia yani, wakalanga mayindu beni mu yeno. ²⁰ Kadi awonsono atombanga ndandu za yau kibeni ye kaza Yisu Klisto ko. ²² kansi yeno nuzeyi wonso wu kenina mfumu, kadi konso muana wu sadisanga se diani, idina wasala ye mono mu mbuangusulu a nsamu wa mbote. ²³ Ngiena vuvu mu kunfila vana kaka ngina zaya mu kia nsendo weti kumpingila. ²⁴ Kansi ngiena ye vvuv mu mfumu vo mono mosi ngina kuiza kantama beni ko. ²⁵ Mbueni dio dia mfunu beni mu kunu fidila Epafolodito. Yani wena mpangi ame ye wusalanga yame ntuadi, ye i yani lua kumfidisa mpasi vo kakundatina yonso yi ngia vua nsatu. ²⁶ MU ntangu i nua wa vo yani wakezi yela, kinkenda beni ye wakala nsatu kala a ye yeno awonsono kintuadi. ²⁷ Yani wakala nkatikua kimbevo kia ngolo ye lukufi mu fua, kansi Nzambi wamuena kiadi kakua yeni kaka ko, kansi kua mono mpe mpasi yalembua mona mpasi va zulu a mpasi diaka. ²⁸ Ngieti kunu fidila yani mu nsualu kidi vo va nuna nku mona diaka, nuna yangalala ye mono kiadi kiame kina kuluka. ²⁹ Nutoma tambula Epafaloditi mu kiese kia mfumu, nuvuminanga antu a mpila yoyo konso yani. ³⁰ Kadi i mu diambu dia salu kia Klisto kakutu fuila. Yani wa vuka mu fua mu kunsadisa ye vanga momo yeno nukutu lembakana kumpangila.