¹ Gobu Dawi pranduma kbe'e etakrã ï ko Saul tey wywydjiware, chinga djeky mewã go Jonatãpe prawo gatudjiwa. ² Saul tapy puagi ï kbe'e dja buetygi etakrã idja bykuapyre Siba, gogipe pukama wëwã Dawi endape. Gobu ymachija Dawi pranduma idjape: Dje bykuapere ko siba. gobu idja inama: Guei cho. ³ Gobu ymachija pranduma etakrã ï wyche ku Saul tey wywydjiware, Apã Wachu chinga djeky mewã idjape? gobu Siba ina ymachidjagipe: Jonatan tey ï wyche go rõ watallãngi. ⁴ Gobu ymachidjagi pranduma idjape: Maty enda? Gobu Siba djawu reko ymachidjagipe: ï go Makir Amiel tey tapype Lodebar ekuandype. ⁵ Gobu ymachija Dawi buema mondo eruwã Makirpe, Amiel tey tapy puare Lodebar tapy ekuandype. ⁶ Gobu wëma bu Mefiboset, go Jonatan tey Saul Teywe ekõma Dawi endape. Gobu Kmarã roma djo Dawi chã ruwa. Gobu Dawi inama: Mefiboset, gobu inama: Kowepe ïma dje buetygi. ⁷ Gobu Dawi ina idjape: Krymballãeme, cho djepywerã djepe dje apã Jonatampe prawo gatudjiwa, cho membawerã djepe dje apã Saul ywywe, gobu dje ï gatuwerã emi dje uwerã bakupyre cho u'u endatype. ⁸ Idja tõ wycho ina idjape: Awa rõ dje buetygi dje Meiwã chodji, cho rõ begi manowe nonga. ⁹ Gobu ymachidja pukama Sibape, go Saul buetygipe, gobu imama: Go Saul emi dja tapy puagi idja llapowe cho membawerã dje apã teywepe. ¹⁰ Cho membawerã pendjepe ywy pendje tyrõwã, emi dje tey wywy emi dje buetygi wywy, dje kuwëwerã idja llapowegi go dje rekoatygi tey rekowã bue dja uwã, go Mefiboset rõ go dje rekuatygi teywe gorãwë uwerã bakupyre cho u e ndatype. Go Siba reko 15 tey wywy, 20 buetygi wywy. ¹¹ Gobu Siba djawuma ymachidjape: go nongaeche dje inawe nonga dje buetygipe, go nonga cho djapowerã. Gobu ymachidja ina wyche: Mefiboset uwerã bakupyre cho u endatype ymachidja rayeche nonga. ¹² Go Mefiboset rekowe tey krumingi go bykuapere Micaia. Go Siba tapy pua wywy go Mefiboset buetygima. ¹³ Go ekoma Mefiboset Jerusalempe,idja uma reko gorãwe bakupyre ymachija u endatype; idja rõ watallãechegi.