¹ David prawoma 30.000 kbe'e tarãpe. ² Gobu David puãma o Juda Baala puare go dja djãwêwangi wywy erupiwatygidji, go rawã Apã Wachu arka byradji djapopyre, go rupi pukapyty Apã Wachu chidjaechegi bykuapyredji go ï llambatygi dja buetygi wywydji ³ Gobu Apã Wachu arka wyradji djapopyre mima etakrã wyra wataty pougipe gobu rama Abinadab tapype, go ingi kuambuku llabu. Gobu Uza gobu emi Ahio, Abinadab tey wywy wata roma ra wyrawatata pou. ⁴ Gobu rabu Apã Wachu arka Abinadab tapy puare, go ïngi kuambuku llabu, Ahio oma Apã Wachu arka wyradji djapopyre chã ruwachidja. ⁵ Gobu David dja irõndy Israel puagi ury reko pychã pambu reko Apã Wachu chã ruwa bue prewãngi wywype wyradji djapopyre, go arpa, go mymby gatu, go bue parãndygi wywydji, ⁶ Gobu wëmbu Nacon idja bapu edaty djãwẽ uza dja ipo upi ywadji Apã Wachu arka wyradji djapopyre kawãwãngi Achipurã wata wa urygi. ⁷ Gobu Apã Wachu prandjã buchã roma Uzadji, gobu achy buchã roma djo gobu wama o mano djo Apã Wachu arka wyradji djapopyre chã ruwa, pokoware Apã Wachu arkadji, Pa'i wywy etakrã rõ pokoaty. ⁸ Gobu David djã'ã achy buchã roma dja pychoware Uzape, gobu bykuama ywy ichakrã perez-Uza djawupyty pacho endaty. ⁹ Gobu David kryballã bucha djo Apã Wachudji, inama: Mawe nonga cho eruwerã Apã Wachu arka Jerusalempe? ¹⁰ Gobu David eru djuellãma Apã Wachu chidja llabaty ija Apã jobu rama obed. Edon tapype jorõ Gat faty ¹¹ Gobu pypyma Apã Wachu arka idja edarãpe Obed edon etakra Gat pua tapype brewipychã djachy manopewe, gobu Apã Wachu djepy reko obed-edonpe emi dja tapy pua wywype. ¹² Kiu reko ymachidja Davidpe, inama: Apã Wachu djepy reko obed-edompe emi dja tapy pua wywype emi dja bue gatu wywy go rekodjiwa dja tapype Apã Wachu arka. Gobu David oma eruma urygatupe Apã Wachu arka wyradji djapopyre obed-edon tapy puare David ekuandype. ¹³ Gobu Apã Wachu arka ratygi watabu Buachapa minibu, go mema achipurã emi etakrã wachupurã chuegi kyra gatugi keimbyrã Apã Wachupe. ¹⁴ Gobu David ury gatu reko Apã Wachu chã ruwa. Pypyma tyru gatu pa'i cha'a pypytygi bykuapyre Efod. ¹⁵ Go nonga David rama idja irõndy Israel wywydji Apã Wachu arka ury gatupe bue mymby gatupe. ¹⁶ Gobu Apã Wachu arka wêma'o David chupape. Gobu Mical Saul radjy idja mei tapy djawã rupi, meïma chijape David mema ury gatu pychã pambubu Apã Wachu chã ruwa, gobu Mical uryllã idja djãpe go Dawi djapowedji. ¹⁷ Gobu pypyma mondo Apã Wachu arka tapy djãwãpe, tyrudji djapopyre nonga David djapowe, gobu David mema we keïwã keï endatygipe emi mima bue membyre wywy okryrawãdjiwa go Apã Wachu chã ruwa. ¹⁸ Gobu Davi membabu we keïmbyregi emi bue membyre okryrawãdjiwa, djawu gatu mema dja ekuandy pua wywype go Apã Wachu chidjaechegi bykuapyrepe. ¹⁹ Gobu mema dja irondype, emi Israel ekuandy pua wywype, mema kbe'e gobu kudjã wywype etakrã bikytã gobu we o ichakrã gobu mema chipo lla'adjiware torta, gobu go ekuandy puagi wywy oma dja tapype. ²¹ Gobu Dawi djawu reko Micalpe. Apã Wachu chã ruwa cho djapo reko. chope prawowe dje apãdji emi dja irõdy emi dja tey wywydji. Chope miwã ymachidja wachugirã go Apã Wachu ekuandy llabu, go Israel llabu, go buare cho urygatu mewerã Apã Wachupe. ²² Go cho tõ buchã nongawerã wyche kowe krey nonga dje chã ruwa, go chodji djawu gatuwerã go buetygi kudjã wywy go dje gogi wywydji djawu buchandygi. ²³ Gobu Mical Saul radjy mebyllã roma djo gorãwe.